Au Uianga a te Aronga Tatau

Teiea oki a Daniela i te timata angaia nga Epera e toru i mua i te tiki maatamaata ta Nebukanesa i akatu i runga i te ngai mataataa o Dura?

Kare te Pipiria i akakite mai, no reira kare e rauka i tetai tangata i teia tuatau i te akanoo e teiea a Daniela i taua tuatau timata anga.

Kua taiku etai no runga i to Daniela turanga opita me kare tona turanga mareka anga no ko mai ia Nebukanesa e teitei atu i to Sadaraka, Meseka, e Abenego e no reira kare a Daniela i umuumuia kia aere atu ki te ngai mataataa o Dura. Te akakite maira a Daniela 2:49 e no tetai tuatau kua rauka iaia tetai turanga teitei atu i tona au taeake e toru. Inara kare e rauka ia tatou i te akapapu e kua akatakake teia iaia mei te akaputuanga ma tetai atu ki mua i te tiki.

I te tautaanga i te akamarama i te tumu i kore ei a Daniela i reira, kua tuatua tetai e penei kua aere atu aia ki tetai ngai ke no tetai angaanga opita me kare kua makiia aia e kare i rauka i te aere atu. Inara, kare te Pipiria i akakite mai ana i te reira. Noatu eaa te tu, kare to Daniela aerenga i akaapaia ana, naringa me kua peraia, kare e ekoko anga ka taangaanga te au opita vareae o Babulonia i te reira no te akaapa atu iaia. (Daniela 3:8) I mua atu e i muri mai i teia tupu anga, kua akapapu a Daniela iaia uaorai ei tangata akono tiratiratu, tei vai tika atu ki te Atua noatu e eaa te au timata anga tana i aro atu. (Daniela 1:8; 5:17; 6:​4, 10, 11) Noatu rai e kare te Pipiria i akakite mai i te tumu i kore ei a Daniela i runga i te ngai mataataa o Dura, ka papu ia tatou e kua vai tiratiratu aia ma te kore e tuku i te au ki te Atua ko Iehova.​—Ezekiela 14:14; Ebera 11:33.