Akapeea Koe me Rave i te Au Iki Anga Meitaki

E APINGA aroa te tu rangatira mei te Atua. Me kare te reira, ka riro tatou mei te ropoti rai, kare e rauka i te akatere i ta tatou au angaanga. Inara, ma te reira, ka aro atu tatou i te au akaaoanga. Te raukaanga te tu rangatira, ka anoanoia tatou kia rave i te au iki anga i roto i te oraanga.

Ae, kare e puapinga ana te au iki anga e manganui. Ko tetai atu, mei te angaanga ka iki me kare me ka akaipoipo, ka akatuke i te katoa anga o to tatou tuatau ki mua. Noatu rai te akakeu ra tetai i tetai atu. Ko tetai au iki anga ta te nga metua ka rave ka akakeu oonu i ta ratou tamariki. Pera katoa, ka tika tatou katoatoa kia tuku i te apainga ki te Atua no te au iki anga e manganui ta tatou ka rave.​—Roma 14:12.

Anoano Anga i te Tauturu

Kare o te au tangata rekoti meitaki no te rave anga i te au iki anga. Ko tetai o te au iki anga a nga tangata mua tei tataia kua tupu te kino. Kua iki a Eva no te kai i te ua rakau ta te Atua i arai taka meitaki. Kua taki atu tana iki anga, tei akanooia ki runga i te anoano noinoi uaorai, i tana tane kia kapiti atu kiaia i roto i te akarongo kore anga i te Atua, e tei tupu kua mamae maata te tangata ravarai. I te au tu e manganui, te akanoo ra rai te au tangata i ta ratou au iki anga ki runga i te au anoano noinoi uaorai e ki runga i te au kaveinga tika. (Genese 3:​6-19; Ieremia 17:9) E me aro atu i te au iki anga pakari, te manako putuputu ra tatou i to tatou au kotinga anga.

Kare i te mea poitirere, i reira, e me rave i te au iki anga puapinga, te kimi ra te manganui i te tauturu mei te au tumu teitei atu i te au tangata. Kua rekoti te Pipiria i tetai atianga i te rave anga a Nebukanesa, i roto i tetai oro anga vaeau, i tetai iki anga. Noatu e e ariki aia, kua kite atu aia i te anoano no te “rave anga i te totou etene,” i te tuatua anga ki te au vaerua. No reira, te akakite ra te rekoti: “Kua ruru i te au kakao, kua ui ki te au tiki, kua akara oki ki te ate.” (Ezekiela 21:21) Ma te aiteite i teia tuatau, e manganui te tuatua ra ki te aronga puapinga e te akara etu e tetai atu au ravenga no te kimi tauturu mei te au vaerua. Inara e au tumu anga akavare ua teia e te pikikaa ua.​—Levitiku 19:31.

Te vaira Tetai ka tau kia irinakiia e tei tauturu i te au tangata i roto i te tuatua enua kia rave i te au ikianga pakari. Ko te reira ko te Atua ko Iehova. Ei akaraanga, i roto i te tuatau taito, kua oronga te Atua ki tona iti tangata, ia Iseraela, te Urima e te Tumima​—penei paa, e au apinga tapu tei titiriia me aro atu te iti tangata i te au turanga puapinga maata. Na roto i te Urima e te Tumima, kua oronga atu a Iehova i te au pauanga tika ki te au uianga e kua tauturu i te aronga pakari o Iseraela kia papu e te rotai ra ta ratou au iki anga ki tona anoano.​—Exodo 28:30; Levitiku 8:8; Numero 27:21.

Ka akamanako ana i tetai atu akaraanga. I te akaue angaia a Gideona kia arataki i te au vaeau o Iseraela kia tamaki atu ia Midiana, kua anoanoia aia kia iki me ka ariki i taua akameitaki anga teitei ra. I te inangaro anga i tetai akapapu anga e ka tauturu a Iehova iaia, kua pati atu a Gideona i tetai akairo temeio. Kua pure aia e kia mauu te uru mamoe tei akarukeia ki vao ma te au e kia maro te enua. I tera mai po, kua pati atu aia e kia vai maro te uru mamoe koi mauu ei te enua i te au. Kua oronga takinga meitaki atu a Iehova i te au akairo kia Gideona tana i pati atura. Tei tupu, kua rave a Gideona i te iki anga tau, ma te tauturu tu-Atua, kua autu pu tikai i to Iseraela au enemi ra.​—Akava 6:​33-40; 7:​21, 22.

Akapeea i Teia Tuatau?

I teia tuatau, te oronga nei rai a Iehova i te tauturu ki tona au tavini me aro atu ratou i te au iki anga puapinga. Akapeea ra? Kia pati ainei tatou, mei ia Gideona rai, i te au akairo mei te ‘timata anga uru mamoe rai,’ mei ia Iehova kia akaari mai kia tatou i te aerenga tau? Kua manakonako tetai nga tokorua me ka neke atu raua ki tetai ngai kia angaanga i reira te anoano maataia ra te aronga akakite i te Patireia. Kia tauturu ia raua kia iki, kua akapapa raua i tetai timata anga. Kua tuku raua e kia okoia to raua are no tetai tutaki anga tau. Me ka okoia te are i te ra tei akanooia i te tutaki anga tei umuumuia ra me kare e teitei atu, ka ariki raua i te reira ei akakite anga e te inangaro ra te Atua ia raua kia neke atu. Me kare te are e okoia, ka taopenga raua e kare te Atua e inangaro ia raua kia neke.

Kare i okoia te are. E akakite anga ainei te reira e kare a Iehova i inangaro i teia nga tokorua kia angaanga i te ngai te umuumu maataia ra te tauturu? E tika, e mea rapurapu ua kia taiku no runga i ta Iehova ka rave me kare ra no tona au tavini. Kare e rauka ia tatou i te tuatua i teia tuatau e kare a Iehova e takai mai ki roto no te akatutu i tona anoano no tatou. (Isaia 59:1) Inara, kare o tatou tika anga kia tapapa i te reira takai anga i roto i ta tatou au iki anga maata, mei te mea ra te tuku ra i ta tatou iki anga ki te Atua. Eaa ra, kua rave a Gideona i te toenga anga o tona oraanga i te au iki anga ma te kore te au akairo temeio no ko mai ia Iehova!

Noatu rai, te akakite ra te Pipiria e te rauka ra te arataki anga tu-Atua. Te totou maira te reira i to tatou tuatau: “E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.” (Isaia 30:21) Me aro atu tatou i te au iki anga puapinga, e mea tau tikai i te akara ei akapapu anga e te rotai ra ta tatou au iki anga ma to te Atua anoano e te akaata ra i tona pakari teitei. Akapeea? Na te akaraanga i tana Tuatua e te akatikaanga i te reira kia riro ei ‘lamepa i to tatou nei vaevae, e turama no to tatou nei arataa.’ (Salamo 119:​105; Maseli 2:​1-6) E rave ei i teia, ka anoanoia tatou kia tatanu i te tu matau no te apii anga i te kite tika mei te Pipiria. (Kolosa 1:​9, 10) E me ka aro atu i tetai iki anga, ka anoanoia tatou kia kimikimi meitaki i te au kaveinga Pipiria pouroa no taua manako ra. Ka akariro taua kimikimi anga ia tatou ‘kia timata oki i te au mea e maata ua atu te meitaki.’​—Philipi 1:​9, 10.

Kia tuatua katoa tatou kia Iehova na roto i te pure, te irinaki anga e ka akarongo mai aia ia tatou. Mei teaa te pumaana anga i te akamarama atu ki to tatou Atua aroa no runga i ta tatou iki anga ka rave e te au ravenga ke ta tatou e manakonako nei! I reira, ka rauka ia tatou i te pati irinaki ua i te arataki anga no te raveanga i te iki anga tau. E putuputu te taime, ka akamaara mai te vaerua tapu kia tatou i te au kaveinga Pipiria te tau ra, me kare ka tauturu te reira ia tatou kia marama taka meitaki i tetai irava te tau ra ki to tatou turanga.​—Iakobo 1:​5, 6.

Te oronga katoa maira a Iehova i te aronga pakari atu i roto i te putuputuanga ma ratou ka rauka ia tatou i te uriuri i ta tatou au iki anga. (Ephesia 4:​11, 12) Inara, i te tuatua anga ki tetai, auraka tatou e aru atu i te takainga o tetai aronga tei aravei i tetai tangata e tetai atu e tae rava kia kitea e ratou tetai tangata te tuatua ra i ta ratou e inangaro ra i te akarongo. E oti ka aru ratou i tana ako anga. Kia akamanako katoa tatou i te akaraanga akamatakite anga o Rehoboama. I te aro anga atu aia i tetai iki anga puapinga, kua rauka mai iaia tetai ako anga tau mei te aronga pakari tei tavini ana ma tona metua tane. Inara, koi kore ei i aru atu i ta ratou ako anga, kua tuatua atu aia ki te au mapu tane e tai o ratou tuatau. I te aruanga i ta ratou ako anga, kua rave aia i te iki anga kino e tei tupu mai kua ngere i tetai tuanga maata o tona Patireia.​—1 Ariki 12:​1-17.

Me kimi atu i te ako anga, e rave i te reira ma te aronga tei kite i te oraanga e te kite meitaki ra i te au Tuatua Tapu e te manako ngateitei ra i te au kaveinga tika. (Maseli 1:5; 11:14; 13:20) Me ka rauka, e akanoo i tetai tuatau no te akamaaraara anga i te au kaveinga te o maira e no runga i te au tuatua taau i kimikimi ra. Ia koe e kite ra i te au mea mei roto mai i te Tuatua a te Atua, papu e ka kitea uaia te au iki anga tika.​—Philipi 4:​6, 7.

Te Au Ikianga ta Tatou ka Rave

Te ngoie ua ra etai au iki anga i te raveia. I te akaue angaia kia akamutu i te tutuanga, kua kite te au apotetoro e kia akakite tamou ua atu ratou no runga ia Iesu, e kua akakite atu ratou i te Sunederi i ta ratou iki anga no te akarongo i te Atua kare i te tangata. (Angaanga 5:​28, 29) Penei ka anoano atu tetai au iki anga i te manakonako anga no te mea kare e akakite anga tika mei te Pipiria te taiku ra no runga i te reira. Noatu rai, papu e ka akaari mai te au kaveinga Pipiria i te iki anga meitaki kia raveia. Ei akaraanga, noatu e te vai nei te au tu tarekareka anga tuke tuke i teia tuatau e kare i vai ana i to Iesu tuatau, te vaira te au akakite anga taka meitaki mei te Pipiria no runga i tei akamareka ia Iehova e tei akamareka kore iaia. No reira, ko tetai ua atu Kerititiano te ka piri atu ki roto i te au tarekareka anga te akamaata ra i te ta ua, te tu akono tau kore, me kare te akarongo kore kua rave i te iki anga kino.​—Salamo 97:10; Ioane 3:​19-21; Galatia 5:​19-23; Ephesia 5:​3-5.

I tetai taime, penei ka tika nga iki anga e rua. Te angaanga anga i tetai ngai te umuumu maataia ra te tauturu e tika anga umereia e ka taki atu ki te au akameitakianga maata. Inara me ka iki tetai tangata no tetai tumu auraka kia pera, ka rauka katoa iaia i te rave i te angaanga meitaki i roto i tana putuputuanga i te kainga. I tetai atianga, penei ka aro atu tatou i tetai iki anga te ka oronga mai kia tatou i tetai tuatau no te akatutu i te oonu o ta tatou akono anga kia Iehova me kare ko teaa te mea puapinga i to tatou au oraanga. No reira, te akatika ra a Iehova ia tatou kia taangaanga i to tatou tu rangatira kia akaari e eaa tikai to roto i to tatou ngakau.

E putuputu te taime, te o atura tetai ki roto i ta tatou au iki anga. Ei akaraanga, kua rekareka te au Kerititiano o te anere mataiti mua e kua matara mai mei te au arairai anga o te Ture. Ei akatauanga, ko teia te aiteanga, ka rauka ia ratou i te ariki me kare te kopae i te kai viivii i raro ake i te Ture. Noatu rai, kua akamaroiroiia ratou kia akamanako i te akava ngakau o tetai atu me iki no te rave i teia tu rangatira. Ka tau ta Paulo tuatua no runga i te reira ki te au iki anga e manganui ta tatou ka rave: “Auraka kotou kia riro ei turorianga.” (1 Korinetia 10:32) Te anoano anga auraka e turori i tetai penei ka tauturu no te akanoo i te au iki anga e manganui ta tatou ka rave. I te mea e, ko te inangaro i te tangata tupu te rua ia o te akauenga maata roa atu.​—Mataio 22:​36, 39.

Te Tupu Anga o ta Tatou Au Iki Anga

Te au iki anga tei raveia ma te akava ngakau meitaki e tei akanooia ki runga i te au kaveinga Pipiria ka tupu ua te au tupu anga meitaki i te openga ra. I tetai tuatau poto ua, e tikai, ka tupu mai te reira i roto i tetai akaatinga uaorai. I te akakite anga te au apotetoro ki te Sunederi no ta ratou iki anga kia tutu ua atu no runga ia Iesu, kua papaia ratou i mua ake ka tukunaiai. (Angaanga 5:40) I te iki anga nga Epera e toru​—ko Sadaraka, Meseka, e Abedenego​—e kare ratou e tupou ki raro i te tiki auro a Nebukanesa, kua tuku ratou i to ratou au oraanga ki roto i te tumatetenga. Kua papa ratou no te aro atu i te raukaanga e penei ko te aite anga o ta ratou iki anga e ka tamateia ratou. Inara kua kite ratou e ka rauka ia ratou te tu mareka anga e te akameitakianga o te Atua.​—Daniela 3:​16-19.

Me aro atu tatou i te au tu ngata i muri ake i te rave anga i tetai iki anga tau ki te akava ngakau, kare e tumu kia manako e kua tarevake taua iki anga. Ka akakino te “tuatau ra, e te manuia ua,” i te tupu anga o tetai au iki anga akakoro meitakiia. (Koheleta 9:11) Pera katoa, i tetai taime te akatika ra a Iehova i te kino kia timata i te oonu o ta tatou akonoanga. Kua kukumi atu a Iakoba i te po ra ma tetai angera i mua ake ka raukai te akameitaki anga. (Genese 32:​24-26) Penei ka anoano katoaia tatou kia kukumi ma te kino, noatu me te rave ra tatou i te tika. Noatu rai, me te rotai ra ta tatou au iki anga ma to te Atua anoano, ka papu ia tatou e ka tauturu aia ia tatou kia akakoromaki e ka akameitaki aia ia tatou i te openga ra.​—2 Korinetia 4:7.

No reira, me rave i te au iki anga puapinga, auraka e irinaki ua ki runga i toou uaorai pakari. E kimi i te au kaveinga Pipiria te tau ra. E tuatua kia Iehova no te reira. I te ngai ka rauka, e tuatua ki te au taeake pakari Kerititiano. I reira e rave ma te mataku kore. E akono i toou tu rangatira orongaia mai e te Atua na roto i tetai tu tau. E rave i te iki anga meitaki e e akatutu kia Iehova e e ngakau tu tika toou ki mua iaia.

[Tutu i te kapi 28]

E akara i ta te Atua Tuatua i mua ake ka rave ei i te iki anga puapinga

[Au Tutu i te kapi 28, 29]

E tuatua kia Iehova no te au iki anga taau ka rave

[Tutu i te kapi 30]

Ka rauka ia koe te uriuri i taau au ikianga puapinga ma te au Kerititiano pakari