Akaora a Iesu​—Akapeea?

“Akaora a Iesu!” “Ko Iesu to tatou Akaora!” I roto i te au enua e manganui takapini i te ao, te akaariia ra taua au tuatua ki runga i te au paruru o te au are teitei e i tetai atu au ngai papuriki. Te irinaki ngakau tae ra te au tangata e au mirioni ua atu e ko Iesu to ratou Akaora. Me ka ui koe kia ratou, “Akapeea a Iesu i te akaora anga ia tatou?” penei paa ka pau mai ratou, “kua mate a Iesu no tatou” me kare, “kua mate a Iesu no ta tatou au ara.” Ae, te akariro ra te matenga o Iesu e kia rauka tatou i te akaoraia. Inara akapeea te matenga o tetai tangata okotai i te tutaki anga i te au ara a te manganui? Me ui ia atu kia koe, “Akapeea to Iesu matenga i te akaora anga ia tatou?” eaa taau ka tuatua atu?

TE PAU anga ta te Pipiria e oronga mai nei ki teia ui anga e mea mama ua e te taka meitaki e te puapinga maata. Inara, e marama ei i te puapinga o te reira, ka anoanoia tatou kia akara na mua i te oraanga o Iesu e te matenga ei pau anga ki tetai manamanata ngata tikai. I reira anake tatou e marama meitaki ei i te puapinga o te matenga o Iesu.

I te akakeu anga ia Iesu kia oronga i tona oraanga, te akono ra te Atua i tetai turanga tei tupu mai i te ara anga a Adamu. Mei teaa te kino i taua ara! E nga tangata apa kore te tane mua ko Adamu, e tana vaine, ko Eva. Ko te kainga manea tikai i Edene to raua kainga. Kua oronga atu te Atua i tetai angaanga puapinga kia raua i te akonoanga i to raua kainga. Kua rauka ia raua i raro ake i ta raua akonoanga te au mea ora i te enua nei. I te au tangata e maata maira e kua akaki i te enua ma te au mirioni ua atu i to raua tu, kua anoanoia raua kia akamaata atu i te parataito e kia pini roa te enua. (Genese 1:28) Mei teaa te meitaki e te rekareka o taua angaanga tei orongaia kia raua! Pera katoa, kua rauka ia raua te pirianga maana ma tetai e tetai. (Genese 2:18) Kare raua i ngere i te apinga. Tei ia raua tetai oraanga mutu kore e te mataora.

Ka ngata i te manako e akapeea a Adamu me kare a Eva i te ara anga. Inara kua meameaau nga tokorua mua i tei anga ia raua​—i te Atua ko Iehova. I te taangaanga anga i tetai ovi, kua akavare te vaerua ko Satani te Tiaporo ia Eva kia akarongo kore ia Iehova, e kua aru atu a Adamu iaia.​—Genese 3:​1-6.

Kare e ekoko anga no runga i ta Tei Anga ra ka rave kia Adamu raua ko Eva. Kua oti ke ana iaia i te akakite i te tupu anga o te akarongo kore, i te na ko anga: “E kai ua koe i to te au rakau katoa o te kainga nei: Kareka i to te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:​16, 17) I teianei te umuumu ra tetai ui anga puapinga maata i tetai pau anga.

Aro Atu te Tangata Ravarai i Tetai Manamanata Ngata

Kua akatupu te ara mua i tetai manamanata ngata no te tangata ravarai. Kua akamata a Adamu i te oraanga ei tangata apa ua. No reira, ka rauka i tana tamariki i te rekareka i taua ora anga mutu kore. Inara, kua ara a Adamu i mua ake ka uanga ei aia i tetai tamariki. Tei roto rai iaia te katoa anga o te au tangata i te rauka anga iaia taua utunga: “E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.” (Genese 3:19) No reira i te ara anga a Adamu e kua akamata i te mate atu mei ta te Atua i tuatua, kua akautunga katoaia te au tangata ravarai ki te mate kapiti atu kiaia.

Ma te tau, kua tata te apotetoro ko Paulo i muri mai: “No te tangata okotai ra [Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Ae, no te ara mua, ko te au tamariki tei manakoia e kia anau apa koreia mai ma te ora anga mutu kore no ratou kua anauia mai ma te maki, te ruaine, e te mate e ko to ratou manakonakoanga ia.

“Kare te reira e tika ana,” i na tetai ei. “Kare matou i iki ana no te akarongo kore i te Atua​—ko Adamu ra. Eaa ra matou ka ngere atu ei i to matou manakonakoanga no te ora mutu kore e te mataora?” Kua kite tatou me tuku te ngai akavaanga i tetai tamaiti ki roto i te are auri no te mea kua keia tona papa i tetai motoka, ka tika te tamaiti kia koumuumu e: “Kare te reira i te tika! Kare au i rave ana i te tarevake.”​—Deuteronomi 24:16.

Na te akakeuanga i te tane mua e te vaine kia ara, penei kua taopenga a Satani e kua tuku atu aia i te Atua ki roto i tetai turanga ngata. Kua maro vave te Tiaporo i roto i te tuatua enua o te tangata ravarai​—i mua ake ka anauiai tetai tamariki. I te ara anga a Adamu, kua tupu mai te ui anga puapinga, Eaa ta Iehova ka rave no runga i te au tamariki te ka anauia mai e Adamu raua ko Eva?

Kua rave te Atua ko Iehova i tei tika e te tau. “Kia atea ke atu te tuatua kino i te Atua: e te ara i te Mana katoatoa” i akakite ei te tangata tuatua tika ko Eliu. (Iobu 34:10) E no Iehova ra, kua tata te peroveta ko Mose: “Ko te Mato aia ko tei tika rava tana angaanga ra; ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!” (Deuteronomi 32:4) Te pauanga tei orongaia mai e te Atua mou no te manamanata tei akatupuia mai e te ara a Adamu kare te reira e apai ke i to tatou tuatau kia rauka te ora mutu kore i runga i te enua parataito.

Oronga Mai te Atua i Tetai Pauanga Apa Kore

Ka akamanako ana i te pauanga ta te Atua i akanoo mai no te utunga tana i tuku ki runga ia Satani te Tiaporo. Kua tuatua a Iehova kia Satani: “Ka tuku oki au i te ke ia korua ko te vaine [ta te Atua akaaerenga i te rangi ra], e to uanga [te ao i raro ake i te akatere anga a Satani] e tona uanga [a Iesu Karaiti]; nana e akaparuparu i to [Satani] mimiti, e naau e akaparuparu i tona pooavae [to Iesu matenga].” (Genese 3:15) I roto i teia totou mua o te Pipiria, kua akakite mai a Iehova i tana akakoroanga e kia aere mai tana Tamaiti vaerua mei te rangi ra ki te enua nei kia ora ei tangata apa kore e oti ka mate atura​—ka akaparuparuia te pooavae​—i roto i taua turanga ara kore ra.

Eaa ra te Atua i umuumu ei i te matenga o tetai tangata apa kore? Eaa oki ta te Atua ko Iehova utunga no Adamu me ara oki aia? Kare ainei i te mate? (Genese 2:​16, 17) “E utunga te mate no te ara,” i tata ei te apotetoro ko Paulo. (Roma 6:23) Kua tutaki a Adamu i tona tu ara na te mate anga aia. Kua orongaia te ora kiaia, kua iki aia i te ara, e kua mate atu aia ei utunga no tana ara. (Genese 3:19) Akapeea oki te akaapa anga tei o atu te katoa anga o te tangata ki roto no taua ara? Kua umuumuia te mate e raukai i te akaongi mai i ta ratou au ara. Inara ka tau toai matenga i te tapoki atu i te au ara a te tangata ravarai?

Kua umuumu te Ture a te Atua ki te iti tangata taito o Iseraela “mei te mate ra, ei mate ïa [me kare, ora no te ora].” (Exodo 21:23) Kia tau ki teia kaveinga tureia, te matenga tei tapoki ra i te au ara a te tangata ravarai ka tau te puapinga e kia aite atu ki tei ngaro ia Adamu. Na roto i te matenga o tetai tangata apa kore e tutakiiai te au ara. Ko Iesu taua tangata ra. E tika, kua ‘oronga a Iesu iaia uaorai ei oko’ no te akaoraanga i te au tangata tau ravarai o te uanga a Adamu.​—1 Timoteo 2:6; Roma 5:​16, 17.

E Puapinga Maata Oki te Matenga o Iesu

Kare e puapinga o te matenga o Adamu; kua tau aia kia mate no tana ara. Inara, i to Iesu matenga, e puapinga maata oki no te mea kua mate aia i roto i tetai turanga apa kore. Kua rauka i te Atua ko Iehova i te ariki i te puapinga o te ora anga apa kore o Iesu ei oko no te au uanga akarongo a Adamu tei ara ra. E kare te puapinga o to Iesu atinga e akamutu ua i te tutaki anga i ta tatou au ara i topa. Me koia ia, kare o tatou manakonakoanga no te tuatau ki mua. I te anau angaia mai i roto i te ara, ka ara ua tatou. (Salamo 51:5) Mei teaa atura to tatou mareka anga e kua akariro te matenga o Iesu e kia rauka ia tatou te ora mutu kore tei akakoro muaia e Iehova no te uanga a Adamu raua ko Eva!

Ka akaaiteia a Adamu ki tetai metua tei mate e kua akaruke mai ia tatou ki roto i te kaiou oonu i te pae moni (te ara) e kare atu e mataara ke e raukai ia tatou te akakore i te kaiou. I tetai tua, mei tetai metua meitaki rai a Iesu tei mate e tei akaruke mai i tetai apinganui na tatou kare anake e ka akamatara ia tatou mei te kaiou maata ta Adamu i tuku mai ki runga ia tatou inara te oronga maata maira no tatou e raukai te ora e tuatau ua atu. Kare anake to Iesu matenga i te akakore ua i te au ara i topa; e apinga meitaki katoa ia no to tatou tuatau ki mua.

Te akaora ra a Iesu no te mea kua mate aia no tatou. Mei teaa te puapinga o tona matenga! Me akara atu tatou i te reira ei tuanga o ta te Atua pau anga ki te manamanata ngata no te ara a Adamu, te akaketaketaia ra to tatou akarongo ia Iehova e tana mataara no te rave anga i te au mea. Ae, e ravenga to Iesu matenga no te akaoraanga i te “katoatoa te taangaanga i te akarongo” i roto iaia mei te ara, te maki, te ruaine, e te mate. (Ioane 3:16, NW) Te akameitaki ra ainei koe ki te Atua no te akanoonoo anga mai i teia akapapa anga aroa e orai tatou?

[Tutu i te kapi 5]

Tuku mai a Adamu i te ara e te mate ki runga i te tangata ravarai

[Tutu i te kapi 6]

Kua oronga mai a Iehova i tetai pau anga apa kore