Te Apii Maira Iehova ia Tatou i te Tatau i to Tatou Puke Ra
“E apii mai ia matou i te tatau i to matou puke rā, kia riro to matou ngakau ki te pakari.”—SALAMO 90:12.
1. Eaa ra i tau ei kia pati ia Iehova kia apii mai ia tatou ‘i te tatau i to tatou puke rā’?
KO TE Atua ko Iehova Tei Anga mai ia tatou e Tei Oronga i te Ora. (Salamo 36:9; Apokalupo 4:11) No reira kare tetai ke atu i roto i te turanga meitaki atu e kia apii mai ia tatou e akapeea te akono i te au mataiti o to tatou oraanga na roto i te tu pakari. E mea tau, i reira, e kua pati te tata taramo ko te Atua: “E apii mai ia matou i te tatau i to matou puke rā, kia riro to matou ngakau ki te pakari.” (Salamo 90:12) I te 90 Salamo, te ngai e kitea ra e tatou taua patianga ra, te tau ra ta tatou akamanako anga matakite. Inara, te mea mua, e kimi tatou i te manako anga tapoto ua i teianei imene akauruia e te Atua ra.
2. (a) Koai tei tapaia e ko te tangata i tata ia Salamo 90, e penei i naea i tataiai te reira? (e) Akapeea te akatupu anga tau a te Salamo 90 i to tatou manako no te oraanga?
2 Te tataanga i runga ake ia Salamo 90 te tapa ra i te reira “te pure a te tangata o te Atua ra a Mose.” I te mea te akaketaketa maira teia taramo i te aerenga poto o te oraanga tangata nei, penei kua akapapaia te reira i muri ake i te akaora anga mai i to Iseraela mei te tuikaaanga i Aiphiti ra e i te tuatau e 40 mataiti i aaere ei i roto i te metepara ra, i te matenga e au tauatini ua atu tei apai maira i tetai uki akarongo kore ra ki tona openga. (Numero 32:9-13) Noatu rai eaa te tu, te akakite maira Salamo 90 e ko te oraanga o te au tangata apa ua nei e poto ua. Te taka meitaki ra, i reira, ka tau tatou kia akono pakari i to tatou puke ra okomaata.
3. Eaa te au apinga tumuanga o Salamo 90 ra?
3 I roto ia Salamo 90, nga irava 1 ki te 6 te akataka maira ia Iehova ei akapuanga mutu kore no tatou. Te akaite maira nga irava 7 ki te 12 eaa ta tatou ka tau kia akono i te taangaanga i to tatou oraanga e viviki ra te pou te au mataiti i te tu ka arikiia mai e ia ra. E mei tei akakiteia maira i nga irava 13 ki te 17, ka inangaro akatenga tatou kia rauka mai to Iehova ra aroa takinga meitaki e te akameitakianga. Inara, kare teianei taramo e akakite mai ana i te ka tupu ki te au tavini tataki tai o Iehova ra. Tera ra, ka tau tatou taki tai kia tuku i ta te reira au manako ngakau na te pure ki roto i to tatou ngakau. No reira e akara piri vaitata tatou ia Salamo 90 na roto i te au mata o te aronga akatapuia ra ki te Atua.
Ko Iehova—to Tatou “Akapuanga”
4-6. Akapeea a Iehova i riro ei ei “akapuanga” no tatou?
4 Te akatuera maira te tata taramo ma te au tuatua: “E te Atu, ko koe to matou akapuanga i tera uki i tera uki. Kare ua te au maunga nei i anau, kare oki te enua e te ao katoa nei i angaia e koe ra, ko koe rai koe, e te Atua, mei tupua roa mai e tuatau ua atu.”—Salamo 90:1, 2.
5 No tatou “te Atua mate kore,” ko Iehova, e “akapuanga” tikai—ko tetai akapuanga pae vaerua. (Roma 16:26) Te manako ngakau tinamou ra tatou, no te mea te vai maira aia i te au tuatau ravarai kia tauturu ia tatou e ko “Tei Akarongo i te pure.” (Salamo 65:2) No te mea kua tuku atu tatou i to tatou au apiapi ki runga i to tatou Metua i te rangi ra na roto i tana Tamaiti akaperepere, ‘na te au o te Atua, ko tei maata ua atu i te kite tangata, e akamaroiroi mai i to tatou ngakau e to tatou manako.’—Philipi 4:6, 7; Mataio 6:9; Ioane 14:6, 14.
6 Te rekareka ra tatou i te tinamou anga pae vaerua no te mea, i te akatutu anga, ko Iehova tikai to tatou “akapuanga.” Te oronga katoa maira aia i te “au pia ra”—penei te kapiti vaitataia atura ma te au putuputuanga o tona au tangata—ei au akapuanga pae vaerua, te ngai e tauturu maata ra te au tiaki i to tatou tu tinamou. (Isaia 26:20; 32:1, 2; Angaanga 20:28, 29) Pera katoa oki, ko tetai papaki o tatou no te au pamiri kua roa te tuatua enua no te tavinianga i te Atua e kua kite tikai iaia ei “akapuanga i tera uki i tera uki.”
7. I teea tu i “anau” mai ei te au maunga nei e i “angaia” mai ei te enua e te ao katoa ra?
7 Kua vai mai a Iehova i mua ake i “anau” mai ei te au maunga me kare i “angaia” mai ei te enua nei. Me manakoia mei to te au tangata ra tu manako, ko te anga mai anga i te enua nei e tona au tu katoatoa, te au kemikara, e te au tu tuke tuke kua umuumuia te tauta anga maata. E na te tuatuaanga kua “anau” mai te au maunga e kua “angaia” mai te enua, te akakite maira te tata taramo i te akangateitei anga maata no te maata o te angaanga tei raveia i ta Iehova anga mai anga i teianei au apinga. Kare ainei tatou e tau kia akakite akangateitei e te ariki anga aiteite no te angaanga a Tei Anga maira?
Tei Reira Ua a Iehova no Tatou Nei
8. Eaa te aiteanga o te tuatua e ko Iehova te Atua “mei tupua roa mai e tuatau ua atu”?
8 “Ko koe rai koe, e te Atua, mei tupua roa mai e tuatau ua atu,” ta te tata taramo i imene maira. Te “tuatau ua atu” ka rauka kia taiku i te au apinga e openga to ratou inara kare to ratou tuatau i akatakaia mai. (Exodo 31:16, 17; Ebera 9:15) Inara, ia Salamo 90:2 e etai atu ngai i roto i te au Tuatua Tapu Epera ra, te akataka maira te “tuatau ua atu” i te “mutu kore ua atu.” (Koheleta 1:4) Kare e marama to tatou manako e i akapeea i raukai e i ora tamou mai ana te Atua ra. Inara, kare o Iehova akamataanga e kare oki ona ope anga. (Habakuka 1:12) Ka ora ua atu aia e te papa ra kia tauturu ia tatou.
9. Kua akaaite atu te tata taramo i te tauatini mataiti ki teaa no te oraanga tangata nei?
9 Kua akauruia te tata taramo kia akaaite mai i te tauatini mataiti o te oraanga o te tangata nei ma tetai tuatau poto ua i te tupu anga ki te mutu kore anga o Tei Anga maira. I te tuatuaanga ki te Atua, kua tata aia: “Te akariro nei koe i te tangata ei one; te tuatua ra koe, E oki, e te tamariki a te tangata na. Ia koe ra oki, okotai tausani ua atu i te mataiti, e tau ïa ki te rā okotai i topa ra; e mei te araanga i te po ra.”—Salamo 90:3, 4.
10. Akapeea ta te Atua ra akariro anga i te tangata “ei one”?
10 E mate ua te tangata, e ka akariro te Atua ra iaia “te tangata ei one.” Koia oki, ka oki akaou te tangata “ei one,” me kare ei pueu, i te enua. Ko te tika, te tuatua ra Iehova: ‘E oki ua atu ki raro i te one; no reira mai oki koe.’ (Genese 2:7; 3:19) Te akataka ra teia i te katoatoa—tei maroiroi me kare tei paruparu, tei apinganui e tei putaua—no te mea kare e rauka i te tangata apa ua nei ‘kia akaora i tona taeake, e kare ana tutaki kia apai ki te Atua e rauka mai ei aia ra, kia ora ua aia e tuatau ua atu.’ (Salamo 49:6-9) Inara mei teaa ta tatou akameitaki anga e kua ‘oronga mai te Atua i tana Tamaiti anau tai, kia rauka ra te akarongo iaia te ora mutu kore’!—Ioane 3:16; Roma 6:23.
11. Eaa ka raukai ia tatou kia tuatua e ko te tuatau roa no tatou e poto ua ki te Atua ra?
11 Mei to Iehova ra manako anga, noatu ko Metusela e 969 ra mataiti kare i okotai ra tona oraanga. (Genese 5:27) Ki te Atua te tauatini mataiti e ra okotai ua ia—tetai tuatau e 24 ua ora—me topa ia. Kua taiku katoa te tata taramo ra e ki te Atua te tauatini mataiti te aite ra ki te tiaki anga a te tangata tiaki no te a ora i te puakapa i te po ra. (Akava 7:19) Te taka meitaki ra, i reira, e ko tetai tuatau roa kia tatou e poto ua ia ki te Atua mutu kore ra, ko Iehova.
12. Akapeea te au tangata “te riro nei” i te Atua ra?
12 Ei tuke anga ma to te Atua ra oraanga mutu kore, e poto ua rai te oraanga tangata i teianei. Te tuatua ra te tata taramo: “Te riro nei ratou ia koe mei te riro vai puke ra; mei te varea moe ra ratou: i te popongi ra, mei te ngangaere e tupu ra ratou; Ko tei kao, e tei tupu i te popongi ra; i te aiai ra, kua tipuia, e kua mae atura.” (Salamo 90:5, 6) Kua kite a Mose e au tauatini ua atu to Iseraela ra i te mate anga i te metepara ra, “te riro nei” i te Atua mei roto i te vai puke ra. Ko teianei tuanga o Salamo kua uriia: “Te akaatea atura koe i te au tangata na roto i te moe o te matenga.” (New International Version) I tetai pae, ko te oraanga o te au tangata apa ua nei “e moe ua” no te tuatau poto—aite atu ki tetai moe anga no te po okotai ua.
13. Akapeea tatou i riro ei “mei te ngangaere e tupu ra,” e eaa te akatupu anga tau na teia i to tatou manakoanga?
13 ‘Mei te ngangaere tatou e tupu ra ko tei kao, e tei tupu i te popongi ra’ inara i te aiai kua mae atura i raro ake i te veravera o te ra. Ae, e poto ua to tatou oraanga mei te ngangaere i te ra okotai ra. No reira, auraka tatou e kaimoumou i teianei apinga okomaata. Mari ra, ka tau tatou kia kimi i ta te Atua ra arataki anga e akapeea ta tatou taangaanga i to tatou au mataiti e toe nei i teianei akatereanga o te au mea nei.
Tauturu ra a Iehova ia Tatou ‘i te Tatau i to Tatou Puke Rā’
14, 15. Eaa te akatupuanga ia Salamo 90:7-9 ki runga i to Iseraela ra?
14 E ki te Atua, kua tuatua atura te tata taramo: “Koia teia kua pou matou i toou riri, e kua ngarangara matou i toou makitakita. Kua tuku koe i ta matou ara ki mua ia koe; ta matou apa ngaro i roto i te mārama o to mata ra. Kua topa akenei to matou au rā katoa i toou ra riri: Kua pou to matou au mataiti mei te manako ra.”—Salamo 90:7-9.
15 ‘Kua pou to Iseraela aronga akarongo kore i te riri o te Atua.’ ‘Kua ngarangara ratou i tona makitakita’ me kare ‘kua mataku i tona riri.’ (New International Version) Tetai papaki “kua mate iora ratou i te medebara” ei tupu anga no te au akavaanga tu-Atua ra. (1 Korinetia 10:5) Kua ‘tuku a Iehova i ta ratou ara ki mua iaia.’ Kua akakite atura aia kia ratou i ta ratou raveanga tarevake i te ngai tangata, noatu ra ko ta ratou “apa ngaro,” me kare au ara uunaia, tei mua ‘i te mārama o tona mata.’ (Maseli 15:3) Ei au tangata ririia e te Atua ra, kua riro to Iseraela tataraara kore ra kia ‘pou to ratou au mataiti mei te manako ra.’ No taua tu ra, te riro ra to tatou oraanga poto mei te ao te na roto atura i to tatou nga ngutu mei te koumuumu ua ra.
16. Me te rave ngaro ra tetai papaki i te ara, eaa ta ratou ka tau kia rave?
16 Me ka rave tetai o tatou i te ara ngaro, penei ka rauka ia tatou te uuna i taua tu akono ra i to tatou au oa tangata nei no tetai tuatau. Inara ko ta tatou raveanga tarevake uunaia ra tei ‘mua i te mārama o to Iehova ra mata,’ e ka akakino ta tatou au angaanga i to tatou pirianga kiaia ra. E rauka akaou ei te pirianga vaitata ma Iehova, ka tau tatou kia pure no tana akakoreanga ara, e akaruke i ta tatou au rave kino, e kia ariki akameitaki i te tauturu pae vaerua a te aronga pakari Kerititiano ra. (Maseli 28:13; Iakobo 5:14, 15) Mei teaa ra te meitaki atu te reira e i te ‘akapouanga i to tatou au mataiti mei te manako ra,’ ma to tatou manakonako anga no te oraanga mutu kore i roto i te turanga kino!
17. Eaa te roa o te oraanga te matauia ra no te au tangata, e te ki ra to tatou au mataiti i teaa?
17 No te oraanga o te au tangata apa ua nei, te tuatua ra te tata taramo: “Te au rā o to matou au mataiti, e itu ïa ngauru i te mataiti; e kia tae ki te varu i te ngauru i te mataiti i te maroiroi, e riro ra taua maroiroi ra ei roiroi e ei taitaia anga; kare oki e mamia, motu ke atura, rere atura matou.” (Salamo 90:10) Te oraanga no te 70 mataiti e mea matauia no te au tangata nei, e i te 85 ona mataiti, kua akakite maira Kaleba i tona maroiroi anga taka ke. E au tuke anga etai, mei ia Aarona ra e (123), a Mose e (120), e a Iosua e (110). (Numero 33:39; Deuteronomi 34:7; Iosua 14:6, 10, 11; 24:29) Inara ko te uki akarongo kore tei aere maira mei Aiphiti, ko te aronga retitaia mei te 20 mataiti aere ki runga kua mate i roto i te 40 mataiti ra. (Numero 14:29-34) I teia tuatau, i te au enua e manganui te oraanga tangata matauia te vaira i roto i te tuanga orongaia maira e te tata taramo. Te ki ra to tatou au mataiti i te “roiroi e ei taitaia anga.” Kua motu ke atura ratou, e “rere atura matou.”—Iobu 14:1, 2.
18, 19. (a) Eaa te aiteanga e kia ‘tatau i to tatou puke rā, kia riro to tatou ngakau ki te pakari’? (e) Ta tatou akono anga i te pakari ka akakeu ia tatou kia rave i teaa?
18 Kua imene maira te tata taramo: “Koai ra tei kite i te viviki anga o toou ra riri, e toou ra makitakita, mei te mataku e tau ia koe ra? E apii mai ia matou i te tatau i to matou puke rā, kia riro to matou ngakau ki te pakari.” (Salamo 90:11, 12) Kare e okotai o tatou nei i kite ki katoa i te ririnui o to te Atua riri me kare te maata o tona makitakita, e ka tau teia kia akateitei i to tatou mataku anga tapu no Iehova. Ko te tika, ka tau te reira kia akakeu ia tatou kia ui kiaia ‘e akapeea e raukai ia tatou i te tatau i to tatou puke rā, kia riro to tatou ngakau ki te pakari.’
19 E pure te au tuatua a te tata taramo ra e kia apii a Iehova i tona au tangata e akapeea te akono i te pakari i te vaitoanga puapinga e te taangaanga oki i to ratou au ra te toe ra i te aerenga marekaia e te Atua. Ko te ora anga manakoia no te 70 mataiti te mou maira i te manakonako no etai 25,500 ra. Inara, noatu eaa to tatou mataiti, ‘ko tatou oki ko tei kore i kite i te ka tupu apopo, e auai ïa, no vaivai ake, e roa poto akera, ngaro atura ïa.’ (Iakobo 4:13-15) I te mea ‘e tuatau ra, e te manuia ua, to tatou katoa ra,’ kare e rauka ia tatou te tuatua eaa te roa atu to tatou ora anga. No reira e pure tatou no te pakari kia akono i te au timataanga, kia akono tika atu ia etai ke ra, e kia rave i te meitaki e rauka ia tatou i te tavini anga ia Iehova i teianei—ra tikai! (Koheleta 9:11; Iakobo 1:5-8) Te arataki ra Iehova ia tatou na tana Tuatua, tona vaerua, e tana akaaerenga oki. (Mataio 24:45-47; 1 Korinetia 2:10; 2 Timoteo 3:16, 17) Na te akono i te pakari ra e akakeu ia tatou kia ‘na mua te kimi i te Basileia o te Atua’ e kia taangaanga i to tatou au ra i te aerenga te ka apai mai i te kaka kia Iehova e kia akariro i tona ngakau kia rekareka. (Mataio 6:25-33; Maseli 27:11) Kare te akamorianga iaia ma te ngakau katoa e akakore atu i to tatou au manamanata katoatoa, mari ra ka akatupu tika mai i te rekareka anga maata.
Na te Akameitakianga a Iehova e Apai Mai i te Rekareka no Tatou
20. (a) Na roto i teea tu ta te Atua “akaongi mai” anga? (e) Akapeea ta Iehova ra akono ia tatou me ka rave apa kino tatou mari ra ka akakite i te tataraara mou ra?
20 Mei teaa ra te meitaki me kia rekareka tatou i te toenga katoa o to tatou oraanga! I teia tu, kua pati a Mose: “E ariu mai koe, e Iehova, aea ra ïa? E akaongi mai koe i to au tavini nei. E akamataora vave mai koe ia matou i toou ra aroa [me kare, “aroa tiratiratu”], kia mareka matou, e kia pereperekavana, i to matou katoa nei au rā toe.” (Salamo 90:13, 14, NW; tataanga i raro ake) Kare te Atua e rave ana i te au tarevake. Inara, te rauka ra iaia te “akaongi mai” e te “anga mai” mei tona riri e mei te oronga anga akautunga me ka akatupu tana akamatakiteanga i te raveanga i taua angaanga ra i tetai taui anga i te tu manako e te tu akono i te tuanga a te aronga rave tarevake tei tataraara ra. (Deuteronomi 13:17) No reira noatu me ka apa kino tatou inara ka akakite i te tataraara mou, ‘ka akamataora vave mai a Iehova ia tatou i tona aroa,’ e ka rauka ia tatou te tumu “kia pereperekavana.” (Salamo 32:1-5) E ma te aruaruanga i te aerenga tuatua tika, ka kite tatou i te aroa tiratiratu o te Atua no tatou e ka rauka ‘kia pereperekavana, i to tatou katoa nei au rā toe’—ae, no te toenga o to tatou au ora anga.
21. I roto i te au tuatua tataia ia Salamo 90:15, 16 ra, penei eaa ta Mose e pati ra?
21 Kua pure akatenga te tata taramo ra: “E akarekareka mai ia matou e kia aite ki te au rā i tumatetengaʼi matou ra; te au mataiti i akakoromaki ei matou i te kino ra. E akakite mai i taau ra angaanga ki to au tavini nei, e toou ra kakā ki ta ratou ra tamariki.” (Salamo 90:15, 16) Penei kua pati a Mose ki te Atua kia akameitaki atu i to Iseraela ma te rekarekaanga kia tau atu, me kare kia aite atu te roa, ki to ratou au ra tumatetenga e te au mataiti o to ratou mamae anga kino ra. Kua pati atu aia e kia kitea ta te Atua “angaanga” akameitakianga i to Iseraela ra e Tona au tavini e kia akakiteia Tona kaka ki rungao i ta ratou au tamariki, me kare anaunga. Ka tau katoa kia pure tatou kia akamaringiia mai te au akameitakianga ki runga i te au tangata akarongo ra i roto i ta te Atua ao ou taputouia maira.—2 Petero 3:13.
22. Kia tau ki ta Salamo 90:17 ra, eaa ta tatou ka tika kia pure?
22 Te akaope ra a Salamo 90 ma teianei pati anga: “Kia vai mairai te akaperepere o to matou nei Atua, o Iehova, ki runga ia matou nei, e te angaanga a to matou nei rima, e akatinamou koe ki runga ia matou; koia ïa, te angaanga a to matou rima, e akatinamou koe i te reira.” (Salamo 90:17) Te akaari maira teianei au tuatua e ka tika tatou kia pure no te Atua kia akameitaki mai i ta tatou au tauta anga i roto i tana tavini anga. E au Kerititiano akatainuia me kare ei au oa no ratou, no te “mamoe ke atura,” te rekareka nei tatou e ko ‘te akaperepere o Iehova’ te vai maira ki runga ia tatou. (Ioane 10:16) Mei teaa ra to tatou mataora e kua ‘akatinamou te Atua i te angaanga a to tatou rima’ ei aronga akakitekite i te Patireia e i etai atu au ravenga oki!
E Tamou Tatou i te Tatauanga i to Tatou Puke Ra
23, 24. Akapeea tatou e puapingaiai mei te tamanakoanga ki runga ia Salamo 90 ra?
23 Na te tamanakoanga ia Salamo 90 ra ka tau kia akamaata atu i to tatou irinaki anga ki runga ia Iehova, koia to tatou “akapuanga.” Na te akaataanga ki runga i tana au tuatua no te poto ua o te oraanga, ka tau tatou kia maata atu te matakite i te umuumu anga no te aratakianga tu-Atua i te tatauanga i to tatou puke ra. E me ka akakoromaki tatou i te kimianga e te akono anga i te pakari tau i te Atua ra, ka papu ia tatou te rauka anga o to Iehova ra aroa takinga meitaki e te akameitakianga oki.
24 Ka rave ua atu a Iehova i te akakite mai kia tatou e akapeea te tatau i to tatou puke ra. E me ka aru tatou i tana au apiianga, ka rauka ia tatou kia tatau ua atu i to tatou puke ra e mutu kore ua atura. (Ioane 17:3) Me ka tamou marie tatou i te ora mutu kore ki roto i te manako, inara, ka tika a Iehova ei akapuanga no tatou. (Iuda 20, 21) Mei ta tatou ka kite i te atikara te aru mai nei, ka akataka meitaki maataia teianei tumu na roto i te au tuatua akamaroiroianga ia Salamo 91 ra.
Akapeea Koe me Pau?
• Akapeea a Iehova i riro ei, ei “akapuanga” no tatou?
• Eaa ka raukai ia tatou kia tuatua e te papa maira Iehova i te tauturu ia tatou nei?
• Akapeea ta Iehova ra tauturu anga ia tatou kia ‘tatau i to tatou puke rā’?
• Na teaa i raukai ia tatou kia ‘pereperekavana, i to tatou katoa nei au rā toe’?
[Tutu i te kapi 10]
Ko Iehova te Atua “kare ua te au maunga nei i anau”
[Tutu i te kapi 12]
Mei to Iehova ra manakoanga, kare i okotai ra to Metusela ora anga e 969 mataiti ra
[Tutu i te kapi 14]
Kua ‘akatinamou a Iehova i te angaanga a to tatou nga rima’