E Tavini Ua Atu ia Iehova ma te Ngakau Mou
“Kua mou toku ngakau, e te Atua, kua mou toku ngakau.”—SALAMO 57:7.
1. Eaa ka raukai ia tatou te irinaki anga mei to Davida rai?
KA RAUKA ia Iehova kia akariro ia tatou kia mou i te akarongo Kerititiano, e raukai ia tatou i te mou atu ki te akonoanga Kerititiano mou ei au tavini akatapuia nona. (Roma 14:4) No reira, ka rauka ia tatou te irinaki anga mei ta te tata taramo ko Davida, tei akakeuia ra kia imene: “Kua mou toku ngakau, e te Atua.” (Salamo 108:1) Me te mou ra to tatou ngakau, ka akakeuia tatou kia akatupu i ta tatou akatapuanga ki te Atua. E na te akaraanga atu kiaia no te arataki anga e te maroiroi, ka rauka ia tatou i te akapapu kia ngaueue kore, na te mou tamanakoanga e te irinaki anga ei aronga tamou i te tiratiratu, “kia maata nei te rave anga i te angaanga a te Atu, auraka e tivata.”—1 Korinetia 15:58.
2, 3. Eaa te puapinga o ta Paulo ra au akamaroiroi anga tei tataia ra ia 1 Korinetia 16:13?
2 I roto i te au akamaroiroi anga tei tataia atu ki te au pipi a Iesu i Korinetia i taito ra e te tau katoa ra ki te au Kerititiano o teianei tuatau, kua tuatua te apotetoro ko Paulo: “Kia matakite; kia mou piri tikai te akarongo; e akatangata pakari kotou; e akamaroiroi.” (1 Korinetia 16:13) I roto i te Ereni tei roto teia au akauenga tataki tai ra i te au tataanga no teia tuatau nei, no reira te raurau maira kia angaanga ua atu. Eaa te puapinga o teianei akamaroiroi anga?
3 Ka rauka ia tatou “kia matakite” i te pae vaerua na te patoianga i te Tiaporo e te noo vaitataanga ki te Atua. (Iakobo 4:7, 8) Na te irinaki anga kia Iehova e raukai ia tatou kia tamou marie i to tatou au turanga auraka e motu e kia ‘ngaueue kore i te akarongo Kerititiano.’ Ko tatou—kapiti katoa te au vaine i roto ia tatou—“e akatangata pakari” na te tavinianga maroiroi i te Atua ei aronga akakitekite i te Patireia. (Salamo 68:11) Ka “akamaroiroi” tatou na te akaraanga tamou ki to tatou Metua i te rangi ra no te maroiroi kia rave i tona anoano.—Philipi 4:13.
4. Eaa tei taki atu ki to tatou papetito anga ei au Kerititiano?
4 Kua rave tatou i to tatou turanga no te akarongo mou i ta tatou rave anga i te akatapuanga kotinga koreia kia Iehova e kua akatutu atu i te reira na te taruku anga i te vai. Inara na teaa i taki atu ia tatou ki te papetito anga? Te mea mua kua tauru tatou i te kite tika no te Tuatua a te Atua. (Ioane 17:3) Na teianei i patu i te akarongo e kua akakeu ia tatou kia tataraara, i te akakiteanga i te mii mou no te au tarevake kua topa. (Angaanga 3:19; Ebera 11:6) I muri mai ko to tatou taui anga, no te mea kua uri ke atu tatou mei te au ravenga tarevake kia rauka te aruaru i te oraanga rotai ma te anoano o te Atua ra. (Roma 12:2; Ephesia 4:23, 24) Kua aruia atu teianei na tetai akatapuanga ma te ngakau katoa kia Iehova na roto i te pure. (Mataio 16:24; 1 Petero 2:21) Kua pati tatou kia Iehova no te akava ngakau meitaki e kua papetitoia ei akatutu anga i to tatou akatapuanga kiaia. (1 Petero 3:21) Na te mouanga i teianei au takainga ki roto i te manako ka tauturu ia tatou kia akara tamou marie ki runga i te umuumu anga no te tauta anga mutu kore kia akono i ta tatou akatapuanga e kia tavini ua atu ia Iehova ma te ngakau mou.
E Tamou Ua Atu i Taau Pati Anga no te Kite Tika
5. Eaa tatou i tau ei kia rave ua atu i te kite Tuatua Tapu ra?
5 Kia akono i ta tatou akatapuanga ki te Atua, ka tika tatou kia rave ua atu i te kite Tuatua Tapu ei patu i te akarongo. Mei teaa ra te mareka anga i te kaikai anga i te kai vaerua i to tatou kite mua anga i te tuatua mou a te Atua! (Mataio 24:45-47) E reka taua au “kaikaianga” ra—e kua akamatutu meitaki ia tatou i te pae vaerua. I teianei te umuumuia ra kia kaikai ua atu i te kai vaerua apinganui kia tamou marie rai tatou i te ngakau mou ei au tavini akatapuia no Iehova.
6. Penei akapeea te tauturu anga ia tatou kia akatupu i te ariki anga ngakau tae no te tuatua mou Pipiria ra?
6 Te umuumuia ra te tauta anga kia raukai kia tere atu te kite i te au Tuatua Tapu. Te aite ra ki te kimianga i te apinganui uunaia—tetai apinga te anoanoia ra te tauta anga. Inara mei teaa te puapinga kia rauka “ia koe te kite i te Atua”! (Maseli 2:1-6) I te akamata mua anga tetai papuritia Patireia i te apii anga i te Pipiria kia koe, penei kua taangaanga aia i te puka Te Kite te ka Arataki ki te Ora Mutu Kore. Penei e maata te tuatau i pou i te uriurianga i te au pene tataki tai, penei kua tere atu te apiianga okotai. Kua puapingaia koe i te tatau anga e te uriuri anga i te au tuatua tapu i taikuia ra. Me e ngata i te tamou i tetai tumu manako, ka tau kia akatakaia mai. Ko tei akono ra i taau apii Pipiria kua teateamamao meitaki, kua pure oki no te vaerua o te Atua, e kua tauturu ia koe kia akatupu i te akameitakianga manako ngakau no te tuatua mou.
7. Na teaa i akatau i tetai tangata kia apii atu i te tuatua mou a te Atua kia etai ke ra?
7 E tau teianei tauta anga, no te mea kua tata a Paulo: “E te tangata i apiiia i te tuatua ra, ka oronga aia i te au mea meitaki ravarai na tei apii mai.” (Galatia 6:6) I konei te akakite maira te irava Ereni e ko te au apiianga no te Tuatua a te Atua ra kua akatomoia ki roto i te manako e te ngakau o tei “apiiia i te tuatua ra.” Na taau apiiia anga ma te reira tu ka tau koe kia apii atu ia etai ke ra. (Angaanga 18:25) E riro ei kia tiratiratu ki toou akatapuanga, ka tika kia tamou marie koe i toou ora anga vaerua e te tu mou na te apii ua anga i te Tuatua a te Atua ra.—1 Timoteo 4:13; Tito 1:13; 2:2.
Kia Maara i Taau Tataraara Anga e te Taui Anga
8. Akapeea e raukai kia tamou marie i te tu akono tau i te Atua ra?
8 Te maara ra ainei ia koe i te matara anga taau i kite i toou apii anga i te tuatua mou, te tataraara anga, e i reira te tu manako no ta te Atua akakore anga i te ara tei akatumuia ki runga i te akarongo i to Iesu atinga oko ra? (Salamo 32:1-5; Roma 5:8; 1 Petero 3:18) E tika tikai kare koe e anoano kia oki akaou ki te oraanga rave ara. (2 Petero 2:20-22) I roto i etai atu mea ko te pure putuputu kia Iehova ka tauturu ia koe kia tamou marie i te tu akono tau i te Atua, kia akono i taau akatapuanga, e kia tavini tiratiratu ua atu ia Iehova.—2 Petero 3:11, 12.
9. I te uri ke anga mei te au raveanga ara, eaa te aerenga ka tau tatou i te aru?
9 I te taui anga na te uri keanga mei te au raveanga ara, e tamou marie i te kimi anga i ta te Atua tauturu kia tamou ki toou ngakau. Ko te tika, te aere ra koe ki raro na runga i te mataara tarevake mari ra kua akara koe i tetai mapu irinakiia e kua akamata i te aere na runga i te mataara tika. Auraka e aere ke i toou mataara i teianei. E irinaki i ta te Atua arataki anga, e tamanako oki kia vai ki runga i te mataara ki te ora.—Isaia 30:20, 21; Mataio 7:13, 14.
Auraka e Ngaropoina i Toou Akatapuanga e te Papetito Anga
10. Eaa te au tumu tau na tatou kia akamanako no runga i ta tatou akatapuanga ki te Atua ra?
10 E tamou ki roto i to manako e kua akatapu koe kia Iehova na roto i te pure, i te manako tavini tiratiratu mutu kore anga. (Iuda 20, 21) Te akakite ra te akatapuanga i te akanooanga takake, me kare te akataka keanga, no tetai akakoro anga tapu. (Levitiku 15:31; 22:2) Kare taau akatapuanga i tetai koreromotu ei tuatau poto ua kare katoa i te apainga ki te au tangata. E akatapuanga tinamou ia ki te Ngateitei o te Ao Katoa e Pini Ua Ake, e ko te akonoanga i te reira te umuumuia ra te tiratiratu ki te Atua no te oraanga katoa. Ae, ‘te ora nei tatou, e te mate nei tatou, e te mate nei oki, no Iehova rai tatou.’ (Roma 14:7, 8) Tei runga to tatou mataora i to tatou kauraro anga ki tona anoano e to tatou tavini ua atuanga kiaia ma te ngakau mou.
11. Eaa koe i tau ei kia maara i toou papetito anga e tona puapinga maata?
11 Kia maara e kia tamou i toou papetito anga i te akatutu anga i toou akatapuanga ngakau katoa ki te Atua. Kare ia i te papetito anga maroia, no te mea naau uaorai te ikianga. Ka tauta ainei koe i teianei kia akono i toou anoano kia rotai ma te anoano o te Atua ra no te toenga atu o toou oraanga? Kua pati koe ki te Atua no te akava ngakau meitaki e kua papetitoia i te akatutu anga i toou akatapuanga kiaia. E akatinamou i taua akava ngakau meitaki ra na te akatupuanga i taau akatapuanga, e ka noo mai te akameitakianga apinganui a Iehova ki runga ia koe.—Maseli 10:22.
Te Akatupu ra Toou Anoano i Tetai Tuanga
12, 13. Akapeea te pirianga o to tatou uaorai anoano ki te akatapuanga e te papetito anga?
12 Kua apai mai te akatapuanga e te papetito anga, i te au akameitaki anga maata ki te au mirioni ua atu au tangata i te enua katoa. Me akatutu tatou i to tatou akatapuanga ki te Atua na te papetito anga i te vai, kua mate tatou ki to tatou aerenga oraanga kua topa mari ra kare ki to tatou uaorai anoano. Ei au aronga irinaki apii tikaiia, kua akono tatou i to tatou uaorai anoano i to tatou akatapuanga ki te Atua na roto i te pure e te papetito angaia. Te aerenga no te akatapuanga e te papetito anga te umuumuia ra kia tamanako tatou e eaa to te Atua anoano e i reira ka iki akakoro ei kia rave i te reira. (Ephesia 5:17) No reira kua aru tatou ia Iesu, tei akono ra i tona anoano i tana akaruke anga i tana au apinga kamuta ki te pae, e kua papetitoia, e kua oronga ki katoa iaia uaorai ki te raveanga i te anoano a tona Metua i te rangi ra.—Salamo 40:7, 8; Ioane 6:38-40.
13 Kua akakoro te Atua ko Iehova e ka akariroia tana Tamaiti ‘ei ora manea mou i te mate.’ No reira kua akono a Iesu i tona anoano kia akakoromaki i taua mate ra i roto i te tiratiratu. Ki taua openga ra, kua oronga aia “i te pati anga atu kiaia, ma te aue maata e te roi-mata . . . e i akarongoia aia i tana i mataku ra.” (Ebera 2:10, 18; 5:7, 8) Me ka akakite tatou i te mataku tapu aiteite no te Atua, ka papu ia tatou e ka ‘akarongo akaperepereia mai,’ e ka rauka ia tatou kia irinaki e ka akariro a Iehova ia tatou kia mou ei Au Kite akatapuia nona.—Isaia 43:10.
Ka Rauka ia Koe kia Tamou i te Ngakau Mou
14. Eaa tatou i tau ei kia tatau i te Pipiria i te au ra ravarai?
14 Eaa te ka tauturu ia koe kia tamou i te ngakau mou e kia akono i taau akatapuanga ki te Atua? Ma te akakoro anga kia apii i te kite te tupu maata ra no te Tuatua a te Atua, e tatau i te Pipiria i te au ra tataki tai. Ko teianei tetai apinga ta “te tavini akono meitaki e te pakari” e raurau tamou maira ia tatou kia rave. Te orongaia maira taua akoanga ra no te mea ko te akonoanga i to tatou akatapuanga te umuumuia ra e kia aaere tamou marie tatou i te tuatua mou a te Atua ra. Me te kiteia ra te akaaerenga a Iehova e akono ana i te au apiianga pikikaa, kare rava te akauenga kia tatau i te Pipiria e orongaia ki te Au Kite o Iehova e te aronga katoa oki ta ratou e tutu atura.
15. (a) Eaa te ka akamanakoia me te rave ra i te au ikianga? (e) Eaa ra i raukai kia tuatuaia e ko te angaanga moni nei e angaanga tuarua ia ki te angaanga Kerititiano?
15 Me te rave ra i te au ikianga, e akamanako marie ua e akapeea ta ratou akatupuanga ki taau akatapuanga kia Iehova. Penei ka piri atu teianei ki taau angaanga moni. Te tauta ra ainei koe kia tauturu te reira ia koe kia tere ki mua i te akamori mou? Noatu rai te kite ra te aronga pu angaanga e ko te au Kerititiano akatapuia e aronga irinakiia e te meitaki, te kite katoa ra ratou e kare te Au Kite o Iehova e noinoi ana kia tere ratou ki mua i roto i teianei ao e kare e taemoemo ana ma etai ke ra no te turanga maata te tutakiia ra. No teianei oki kare te akakoro anga a te Au Kite e kia rauka te apinganui, te rongonui, e te ingoa teitei, me kare te mana. No te aronga te akono ra kia tau ki to ratou akatapuanga ki te Atua, ko te mea puapinga maata ko te raveanga i te anoano o te Atua. Ko te angaanga moni e raukai ia ratou kia rauka mai te au mea umuumuia no te oraanga nei e angaanga tuarua ua te puapinga. Mei te apotetoro ko Paulo ra, ko ta ratou angaanga mua, me kare te angaanga maata ko te angaanga orometua Kerititiano. (Angaanga 18:3, 4; 2 Tesalonia 3:7, 8; 1 Timoteo 5:8) Te tuku ra ainei koe i te au manako Patireia ei mea mua i roto i toou oraanga?—Mataio 6:25-33.
16. Eaa ta tatou ka rauka kia rave me te akatupu ngata ra te apiapi kare ra i manakoia kia akono i ta tatou akatapuanga ki te Atua ra?
16 Penei ko tetai papaki kua vaitata te pokia e te au apiapi tuke tuke i mua ake ka kite ei ratou i te tuatua mou. Inara mei teaa ra te tauianga o to ratou ngakau ki runga ma te rekareka, te akameitaki anga, e te aroa no te Atua i to ratou takave anga i te manakonako no te Patireia! Na te akaataanga ki runga i te au puapinga ta ratou i rekareka mei reira maira penei ka tauturuia ratou kia akono i to ratou akatapuanga kia Iehova. I tetai pae, akapeea ra me ka pokia e te apiapi kare ra i manakoia no te au manamanata matauia i te oraanga i roto i teianei akatereanga te ka akakoko mai “i te tuatua a te Atua ra,” mei te au tara te tapu ra i te tupuanga o te uua kia kore e tae ki te pakari anga? (Luka 8:7, 11, 14; Mataio 13:22; Mareko 4:18, 19) Me ka kite koe e te akamata maira teianei i te tupu kia koe me kare ki toou pamiri, e tuku atu i toou apiapi ki runga ia Iehova e pure e kia tauturu mai aia ia koe kia tupu te aroa e te ariki anga. Me ka tuku koe i taau apainga teiaa ki runga iaia, ka tauturu mai aia ia koe e ka oronga i te maroiroi kia koe kia tavini mataora ua atu iaia ma te ngakau mou.—Salamo 55:22; Philipi 4:6, 7; Apokalupo 2:4.
17. Akapeea e raukai i te akono i te au timataanga pakari ra?
17 E pure tamou putuputu ki te Atua kia Iehova, mei ia koe i pure ra i te akatapuanga kiaia. (Salamo 65:2) Me timataia kia rave i te tarevake me kare me aro atu ma tetai timataanga ketaketa, e kimi i ta te Atua arataki anga e tana tauturu kia aru i te reira. E mou ki te manako i te umuumu anga no te akarongo, no te mea kua tata te pipi ko Iakobo: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore: ko tei ekoko ra, e tau ïa i te ngaru tai e puia e te matangi, e tikitiki akera. Auraka oki te reira tangata e manako e, ka rauka tana i te Atu ei ngai mea ngiti ake: E tangata ngakau rua ïa, e te tinamou kore, i tona katoa ra au aerenga.” (Iakobo 1:5-8) Me akaraanga maata rava tetai timataanga, ka papu ia tatou teia: “Kare kotou i rokoia e te timataanga, mari ra mei ta te tangata nei rai: e tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”—1 Korinetia 10:13.
18. Eaa ta tatou ka rave me te akaparuparu ra tetai ara uunaia i to tatou manako kia akono i ta tatou akatapuanga kia Iehova?
18 Ka akapeea me ko tetai ara kino tei uunaia ra te tamanata maira i toou akava ngakau e te akaparuparu ra i toou manako anga kia akono i taau akatapuanga ki te Atua? Me kua tataraara koe, ka rauka ia koe te kite pumaana e ‘kare ua a Iehova e akavaavaa i te ngakau paruparu, e te aue ra.’ (Salamo 51:17) E kimi i te tauturu a te aronga pakari Kerititiano aroa ra, i te kiteanga e ko ratou—te aru ra ia Iehova—kare e akono akameangiti ua i toou inangaro kia kite i te akaora anga i te pirianga meitaki ma toou Metua i te rangi ra. (Salamo 103:10-14; Iakobo 5:13-15) Ei reira ma te akaou anga i te maroiroi pae vaerua e te ngakau mou, ka rauka ia koe kia akatika i te au arataa no toou nga vaevae e ka rauka te reira kia akono i taau akatapuanga ki te Atua ra.—Ebera 12:12, 13.
E Tamou i te Tavinianga ma te Ngakau Mou
19, 20. Eaa ra i puapinga maatai kia akono tatou i ta tatou akatapuanga kia Iehova?
19 I teianei tuatau kino nei, ka tika tatou kia rave pakari kia akono i ta tatou akatapuanga e kia tavini ua atu i te Atua ma te ngakau mou. Kua tuatua a Iesu: “Kareka te tāpu tikai e tae ua atu ki te openga ra, ka ora ïa.” (Mataio 24:13) I te mea e te noo nei tatou i te “tuatau openga,” ka tae mai te openga a tetai ua atu taime. (2 Timoteo 3:1) Pera katoa, kare e papu ia tatou e me ka ora tatou apopo. (Iakobo 4:13, 14) No reira e puapinga maata kia akono i ta tatou akatapuanga i teianei ra!
20 Kua akaketaketa mai te apotetoro ko Petero i teia i tana reta tuarua. Kua akakite mai aia e mei te aronga akono kore i te Atua i mate ra i te Vaipuke, no reira ko te enua akatutuia maira, me kare te taiate tangata rave kino, ka akapouia i te ‘ra o Iehova.’ No reira kua tuatua a Petero: “Mei te aa ra to kotou tu tikaʼi i te tuatua tapu e te akono i te Atua”! Kua raurau katoa aia ia ratou: “E aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra, e inga iora kotou i to kotou maroiroi anga na.” (2 Petero 3:5-17) Mei teaa ra te mii te reira me ka taki keia tetai tangata papetitoia e kia tae ki te openga o tona oraanga ra ko tetai tei kore ra i tamou i te ngakau mou!
21, 22. Akapeea te au tuatua ia Salamo 57:7 ra i tikai ki te tu o Davida e te au Kerititiano mou ra?
21 Ka tau toou tamanako anga kia akono i taau akatapuanga ki te Atua kia akamaroiroiia me ka tamou koe i te ra mataora o toou papetito anga e ka kimi oki i ta te Atua ra tauturu kia riro taau au tuatua e te au angaanga kia akarekareka i tona ngakau. (Maseli 27:11) Kare a Iehova e akamareka kore i tona au tangata, e e mea tika oki ka tau tatou kia tiratiratu tatou kiaia. (Salamo 94:14) Kua akaari aia i te aroa e te tangi i te akakoreanga i te au parani a te au enemi e te akaoraanga ia Davida. I te akameitaki anga no teianei, kua akakite a Davida i te tu mou, e te ngaueue kore, o tona inangaro no Tei Akaora iaia. Ma te manako ngakau oonu, kua imene aia: “Kua mou toku ngakau, e te Atua, kua mou toku ngakau; ka imene au, e e akameitaki rai au.”—Salamo 57:7.
22 Mei ia Davida rai, kare te au Kerititiano i ngaueue ke atu mei ta ratou akamori anga i te Atua. Ma te au ngakau mou, ka oronga ratou i to ratou akaoraanga e te akatinamou anga kia Iehova ta ratou e imene akapaapaa rekareka ra. Me e mou toou ngakau, ka irinaki ia i te Atua, e ma tana tauturu ka rauka ia koe te akatupu i taau akatapuanga. Ae, ka aite koe ki “tei tuatua-tika” ta te tata taramo i imene ra: “Kare aia e mataku i te rongo kino ra; kua mou tona ngakau i te irinaki anga ia Iehova.” (Salamo 112:6, 7) Ma te akarongo i te Atua e te irinaki anga ki katoa iaia, ka rauka ia koe i te akono i taau akatapuanga e kia tavini tamou ua atu ia Iehova ma te ngakau mou.
Maara Ainei ia Koe?
• Eaa tatou i tau ei kia rave ua atu i te apiianga kite tika i te Pipiria ra?
• Eaa tatou i tau ei kia tamou ki to tatou manako i te tataraara anga e te taui anga?
• Akapeea tatou e puapingaiai i te maaraanga i ta tatou akatapuanga e te papetito anga?
• Eaa te ka tauturu ia tatou kia tavini tamou ua atu ia Iehova ma te ngakau mou?
[Au Tutu i te kapi 18]
Te akariro anga i te angaanga orometua Kerititiano ei angaanga maata na tatou ka tauturu ia tatou kia tavini ua atu ia Iehova ma te ngakau mou
[Tutu i te kapi 18]
Te tamou marie ra ainei koe i toou ora anga pae vaerua e te ngaueue kore na te tatauanga i te Tuatua a te Atua i te au ra ravarai?