Akapeea Tetai Tamaiti i te Tauturu Anga i Tona Papa
E AU maki akangoru pakari i te pae manako e te manga maki autism to James, no England mai, tei roto i tona 30 anga mataiti. Noatu rai, no tetai au mataiti e manganui kua aere ana aia ki te au uipaanga a te Au Kite o Iehova ma tona mama e te tuaine. Inara, kare rava tona papa i akaari mai ana i te tu inangaro i to ratou au irinaki anga. I tetai aiai i muri ake i tetai uipaanga tei akaariari mai i tetai akatutu anga akapeea me pati i tetai taeake no te Akamaara Anga i te matenga o Karaiti, kua aere viviki atu a James ki tona pia. Ma te apiapi, kua aru atu tona mama iaia e kua kite atu iaia e kimi aere ra i roto i te au itiu takere o te au makatini Punanga Tiaki e te Awake! Kua iki aia i tetai ma te pati anga Akamaara Anga tei neneiia i te kapi openga e kua apai viviki atu ki tona papa. Kua tou mua atu aia ki te tutu e ki tona papa kua tuatua ko “Koe!” Kua akara poitirere tona mama e papa i tetai e tetai i te kite anga mai raua e te pati ra a James i tona papa ki te Akamaara Anga. Kua tuatua mai tona papa e penei ka aere atu aia.
I te aiai o te Akamaara Anga, kua aere atu a James ki te pia vairanga kakau o tona papa, kua rave mai i tetai piripou, kua apai atu ki tona papa, e kua akatutu e kia aao aia i te reira. Kua pau mai tona papa e kare aia e aere ki te uipaanga. No reira, kua aere atu a James raua ua ko tona mama ki te Are Uipaanga Patireia.
Inara, no etai tuatau i muri mai, kare a James i ariki ua atu i te tauta anga a tona mama i te akateateamamao iaia no te aere atu ki te au uipaanga putuputuanga, te ikianga i te noo i te kainga ma tona papa. I tetai popongi Tapati, kua patoi akaou a James i te ariki ua i te tauta anga a tona mama i te akateateamamao iaia no te uipaanga. I tona poitirere anga, kua anga mai te papa o James kiaia e kua tuatua, “E James, me aere au ki te uipaanga i teia ra, ka aru mai ainei koe?” Kua mataora mai a James. Kua takave aia i tona papa e kua tuatua “Ae!” e kua aere ratou tokotoru ki te Are Uipaanga Patireia.
Mei taua ra maira, kua aere ua atu te papa o James ki te au uipaanga i te Tapati ravarai e kare i roa ana kua akakite mai e e tere ei aia ki mua, ka anoanoia aia kia aere katoa ki tetai atu au uipaanga. (Ebera 10:24, 25) Kua rave aia i teia, e rua marama i muri mai kua akamata aia i te apii putuputu i te Pipiria. Kua tere meitaki aia ki mua, te rave viviki anga i te au taui anga tei anoanoia i roto i tona oraanga, e kare i roa ana kua akamata aia i te piri atu ki roto i te angaanga tutuanga i te Patireia. E tai mataiti i muri mai i tona akamata anga i te apii i te Pipiria, kua akatapu aia i tona oraanga kia Iehova e kua akatutu i teia na te taruku anga ki raro i te vai. Te tavini nei aia ei orometua tavini i roto i tana putuputuanga. I teianei te tavini taokotai nei te katoatoa i roto i te pamiri ia Iehova.