Au Umuumu Anga Tu-atua ka Akamaata ia Iehova

“Ka akamaata au iaia i te akameitaki.”​—SALAMO 69:30.

1. (a) Eaa ra i tau ei kia akamaataia a Iehova? (e) Akapeea tatou i te akamaata anga iaia ma te akameitakianga?

KO IEHOVA te Atua mana katoatoa, Tei Ngateitei i te Ao Katoa e Pini Ua Ake, ko Tei Anga ra. No te reira, te tau ra tona ingoa e tana au akakoroanga kia akamaataia. Te aiteanga o te akamaata ia Iehova kia mou iaia ki roto i te ngai teitei katoa, kia akapaapaa e te akateitei oki iaia na te tuatua e te angaanga. Kia rave i te reira “i te akameitaki” anga te umuumuia ra e ka akameitaki tatou iaia no tana i rave ana no tatou i teianei e no tana ka rave i te tuatau ki mua. Te tu manako ka tau tatou kia akono te akaariia maira ia Apokalupo 4:11, te ngai i akakite maira te au mea ora vaerua i te rangi: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” Akapeea tatou i te akamaata anga ia Iehova? Na te apiianga nona e i reira na te raveanga i tana e umuumu maira ia tatou. Ka tau tatou kia manako ngakau mei te tata taramo i rave ra i tana tuatuaanga: “E apii mai koe iaku kia rave au i to inangaro; ko koe oki taku Atua.”​—Salamo 143:10.

2. Akapeea ta Iehova ra akono anga i te aronga tei akamaata ra iaia e ma te aronga kare e pera ra?

² Te ariki ra a Iehova i te aronga e akamaata ra iaia. No reira i riro ei “e koia tei tutaki mai i te aronga i kimi tikai iaia.” (Ebera 11:6) Eaa ra te tutaki? Kua tuatua a Iesu na roto i te pure ki tona metua i te rangi ra: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Ae, ko te aronga te “ka akamaata ia [Iehova] i te akameitaki ” ka ‘riro te enua e ka noo tamou rai ratou i reira.’ (Salamo 37:29) I tetai pae, “Kare oki o te tangata kino ra tutaki meitaki.” (Maseli 24:20) E i teia tuatau openga nei, te rapurapu ra te umuumuanga no te akamaataanga ia Iehova no te mea kare e roaia ka akapou aia i te aronga rave kino e ka akaora i te aronga tuatua tika. “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:17; Maseli 2:​21, 22.

3. Eaa tatou i tau ei kia akamanako i te puka a Malaki?

³ Te kitea ra te anoano o Iehova i roto i te Pipiria, no te mea “te au tuatua tapu katoa i tataia ra, e mea akauruia mai e te Atua.” (2 Timoteo 3:16) Te vaira i te Tuatua a te Atua te au tataanga e manganui i akapeea ta Iehova ra akameitaki anga i te aronga tei akamaata ra iaia e eaa tei tupu ki te aronga kare i pera. Ko tetai o taua au tataanga ra ko tei tupu ra i Iseraela i te tuatau o te peroveta ko Malaki. I vaitata i te mataiti 443 M.T.N., i to Nehemia kavana anga ia Iuda, kua tata a Malaki i te puka tapaia ra i tona ingoa. Te vaira i roto i teianei puka ririnui e te marekaanga te akakite anga e te au totou “ei ako mai oki ia tatou, i te aronga i rokoia mai i te openga o te au tuatau nei, i tataiaʼi.” (1 Korinetia 10:11) Na te akamanako anga i te au tuatua a Malaki ra e tauturu ia tatou kia teateamamao no “taua rā maata e te mataku o Iehova ra,” e akapou ei Aia i teianei akatereanga kino.​—Malaki 4:5.

4. Eaa nga tumu e ono te akakiteia maira ki to tatou manako anga ia Malaki pene 1?

⁴ Akapeea te puka a Malaki, tei tataia e tere atu i te 2,400 mataiti kua topa, i te tauturu anga ia tatou i teia 21 anere mataiti kia teateamamao no taua ra maata e te mataku o Iehova ra? Te akaanga maira te pene mua i to tatou manako anga ki nga tumu maata e ono ki ta tatou akamaataanga ia Iehova ma te akameitaki anga kia raukai tana akaperepere anga e te oraanga mutu kore: (1) Te inangaro maira Iehova i tona au tangata. (2) Kia akaari tatou i te ariki anga no te au mea tapu ra. (3) Te manakonako maira Iehova kia oronga atu tatou i tei meitaki ia tatou kiaia. (4) Te akakeuia ra te akamori mou e te inangaro noinoi kore, kare na te noinoi apinga. (5) Kare te tavini anga arikiia e te Atua i te apainga teiaa. (6) Ka tika tatou tataki tai kia oronga i tetai akakite anga ki te Atua. No reira, i roto i teianei au atikara mua e toru i te puka a Malaki, e akamanako tataki tai tatou i aua tumu ra ia tatou e akara vaitata atura kia Malaki pene 1.

Te Inangaro Maira Iehova i Tona Au Tangata

5, 6. (a) Eaa ra a Iehova i inangaro ei ia Iakoba? (e) Me ka aru tatou i to Iakoba tu tiratiratu, eaa ta tatou ka rauka kia manakonako atu?

⁵ Te taka meitaki maira to Iehova inangaro i roto i te au irava mua o Malaki ra. Te akatueraia maira taua puka ra ma te au tuatua: “Te totou ra i te tuatua a Iehova kia Iseraela.” Pera katoa, te tuatua ra te Atua: “I inangaro ana au ia kotou.” I te akakiteanga mai i tetai akatauanga, i roto i te irava 3, kua tuatua a Iehova: “I inangaro ra au ia Iakoba.” Ko Iakoba te tangata i akarongo ra ia Iehova. I muri iora, kua taui a Iehova i te ingoa o Iakoba kia Iseraela, e kua riro mai aia ei metua no te iti tangata o Iseraela. No te mea ko Iakoba e tangata akarongo i inangaro ei a Iehova iaia. Ko te aronga i roto i te au tangata tei akaari i to Iakoba ra tu akono kia Iehova kua inangaro katoaia e Ia ra.​—Malaki 1:​1-3.

⁶ Me te inangaro ra tatou ia Iehova e te piri tiratiratu ra ki tona au tangata, ka rauka mai ia tatou te akapumaana anga mei te tataanga ia 1 Samuela 12:22: “No tona ra ingoa maat[a] e kore ei a Iehova e akaruke i tona iti-tangata.” Te inangaro ra Iehova i tona au tangata e te tutaki ra ia ratou, i te openga ma te ora mutu kore. No reira ka tatau tatou: “E irinaki kia Iehova, ka rave ei i te meitaki; e noo koe i te enua i reira, e kare koe e kore i te angaiia mai. Kia mataora oki koe ia Iehova; e nana e oronga mai i ta to ngakau e anoano ra.” (Salamo 37:​3, 4) To tatou inangaroanga ia Iehova te kapiti ra i te rua o te tumu te apaiia maira ki to tatou manako anga i roto ia Malaki pene 1.

E Akaari i te Ariki Anga no te Au Mea Tapu

7. Eaa ra a Iehova i makitakitai ia Esau?

⁷ Ia tatou i tatau ra ia Malaki 1:​2, 3, i muri ake i ta Iehova tuatua anga, “I inangaro ra au ia Iakoba,” kua tuatua katoa aia, “Kare ra au i inangaro ia Esau.” Eaa ra te tuke anga? Kua akamaata a Iakoba ia Iehova, mari ra ko tona taeake maanga, ko Esau, kare i pera. Kua tapa katoaia a Esau ko Edoma. Ia Malaki 1:4, kua tapaia te enua o Edoma ra ko te kotinga o te kino ra, e tona au tangata kua riri tamouia. Te ingoa Edoma (te aiteanga e “Muramura”) kua orongaia kia Esau i muri ake i tana okoanga i tona tika ei mataiapo kia Iakoba no tetai kai muramura. Kua “akavaavaa aturā Esau i te taoonga mataiapo ra,” ta Genese 25:34 i tuatua. Kua raurau atura te apotetoro ko Paulo i tona au oa akarongo kia matakite e “ko te tupu ua ake tetai akaturi, e te tangata akono kore i te Atua, mei ia Esau ra, ko tei oko i tana tuanga tama mua i te kai anga kai okotai ra.”​—Ebera 12:​14-16.

8. Na teaa i akariro ia Paulo kia akaaite atu ia Esau ki tetai tangata akaturi ra?

⁸ Eaa ra a Paulo i kapiti atu ei i ta Esau i rave ra ki te akaturi? No te mea te tupuanga te manako mei to Esau rai ka rauka kia taki atu i tetai tangata kia kore e ariki i te au mea tapu ra. I te openga, ka rauka kia tupu ei au ara kino, mei te akaturi rai. No reira, penei ka ui tatou tataki tai: ‘Te timataia ra ainei au i etai taime kia taui i toku tuanga Kerititiano​—te ora mutu kore​—no tetai apinga meangiti mei te kai ra? Penei kare e kiteanga, e te akavaavaa ra au i te au mea tapu?’ Ia Esau tetai inangaro akakoromaki kore kia akamerengo i tona kakianga kai kopapa ra. Kua karanga aia kia Iakoba: “Kia taviviki ine, e oronga mai kia apuku au i te mea muramura na.” (Genese 25:30, NW) E mea mii ra, e penei ko tetai papaki o te au tavini o te Atua, kua tuatua e: “Taviviki! Eaa ka tatari ei no te akaipoipo anga ngateitei?” Ko te inangaro no te akamerengo anga ainga noatu eaa te tutaki kua riro ei ariki kai na ratou.

9. Akapeea e raukai ia tatou kia tamou marie i te mataku tapu no Iehova?

⁹ Auraka rava tatou kia akavaavaa i te au mea tapu na te akangateitei kore anga i te tu ma, te tiratiratu, e to tatou tuanga pae vaerua oki. Kare e kia aite kia Esau, e akaaite atu ia tatou kia Iakoba tiratiratu ra e kia tamou marie i te mataku tapu i te Atua na te akaarianga i te ariki anga oonu no te au mea tapu. Akapeea e raukai ia tatou te rave i teia? Na te matakite anga kia tau ki te au umuumu anga a Iehova. Ka taki mai teia ia tatou ki te toru o te tumu te akakitea maira ia Malaki pene 1. Eaa oki te reira?

Orongaanga kia Iehova i Tei Meitaki ia Tatou

10. I roto i teea tu to te kau taunga ra akavaavaaanga i te kaingakai a Iehova ra?

¹⁰ Kare te kau taunga ngati Iuda te tavini ra i te iero i Ierusalema i te tuatau ia Malaki ra i oronga kia Iehova i te au atinga meitaki. Te tuatua ra Malaki 1:​6-8: “E akangateitei te tamaiti i te metua tane, e te tavini i tona atu: e teianei, e Metua au nei, teiea taua akangateitei noku ra? e e Atu oki au ra, teiea au i te mataku angaia, ko ta Iehova Sabaota ïa tuatua ia kotou, e te kau taunga, ko tei akavaavaa i toku nei ingoa” “Teiea matou i te akavaavaa anga i toou ingoa?” i ui ei te kau taunga. “Te apai nei kotou i te kai viivii ki runga i taku nei atarau,” i pau ei a Iehova. “Teiea iora matou i te akaviivii anga ia koe?” i ui ei te kau taunga. No reia kua akakite atura a Iehova kia ratou: “Ko kotou i karanga e, E mea vaavaa te kaingakai a Iehova. Kua akakite taua kau taunga ra e kua akavaavaa ratou i te kaingakai a Iehova i te au taime taki tai ta ratou i orongai i te atinga viivii, e te na koanga: ‘Kare i te mea kino.’

11. (a) Eaa ta Iehova i tuatua no te au atinga ariki koreia ra? (e) I roto i teea tu i apa uai te au tangata ra?

¹¹ Kua maro tau atura Iehova i reira no runga i taua au atinga ariki koreia ra: “E tenana ka apai atu na te tutara; e mareka ainei aia ia koe? e kiteia mai ainei koe?” Kare, kare to ratou tutara e mareka i taua apinga ra. Kare katoa oki Tei Ngateitei i te Ao Katoa e Pini Ua Ake e ariki i te au orongaanga viivii! E kare ko te kau taunga anake tei tarevake. E tika, kua akaari ratou i te akavaavaa no Iehova na te raveanga i taua au atinga ra. Inara kare ainei te au tangata ra i apa? Kua apa tikai ratou! Na ratou oki i iki i taua au manu matapo ra, te pirikoki, e te maki e na ratou i apai mai ki te kau taunga ra kia tuku atinga ia ratou. Mei teaa ra te araanga!

12. Akapeea te tauturu anga ia tatou kia oronga i ta tatou meitaki kia Iehova?

¹² Na te orongaanga kia Iehova i te meitaki katoa e rauka ia tatou ko te aerenga ia e raukai ia tatou i te akakite e te anoano tika ra tatou iaia. (Mataio 22:​37, 38) Kare mei te kau taunga aere ke ra o to Malaki tuatau ra, te oronga nei ta Iehova akaaerenga i teia tuatau i te au apiianga Tuatua Tapu meitaki te tauturu ra ia tatou kia akamaata ia Iehova ma te akameitakianga na te raveanga i te au umuumuanga tu-Atua ra. Kapiti atu ki teianei ko te a o te tumu puapinga maata te ka rauka mai mei ia Malaki pene 1.

Te Akakeuia ra te Akamori Mou e te Anoano, Kare te Noinoi

13. Eaa ta te kau taunga ra i rave tei akaari ra e kua akakeuia ratou e te noinoi apinga?

¹³ E aronga noinoi te kau taunga o to Malaki tuatau ra, e aroa kore, e te noinoi moni. Akapeea tatou i kite ei i te reira? Te tuatua ra a Malaki 1:10: “Koai ia kotou te tika kia topiri ua i te au pa? kare oki kotou e tutungi tutaki kore ua i te ai ki runga i taku atarau, Kare au i mareka ia kotou, te tuatua mairā Iehova Sabaota ra, kare oki au e āriki atu i tei apaiia mai e to kotou rima.” Ae, kua pati katoa taua kau taunga noinoi ra i te tutaki no te angaanga meangiti ua i te iero ra, te umuumu anga kia tutakiia no te topiri anga i te au pa e te tutungi anga i te ai ki runga i te atarau! No reira rai a Iehova i kore ei e ariki i te au mea orongaia mai e to ratou au rima!

14. Eaa ka raukai ia tatou kia tuatua e te akakeuia ra te Au Kite o Iehova e te aroa?

¹⁴ Te karapii e te noinoi apinga o te kau taunga rave ara i Ierusalema i taito ra penei ka akamaara mai ia tatou e, kia tau ki te Tuatua a te Atua ra, kare te au tangata tataki tai noinoi apinga ra e noo i te Patireia o te Atua. (1 Korinetia 6:​9, 10) I te akamanakoanga ki runga i te au aerenga noinoi a taua kau taunga ra ka akateitei atu i to tatou ariki anga no te angaanga tutu aereanga i te ao katoa te raveia nei e te Au Kite o Iehova. Te rave uaia ra; kare tatou e pati tutaki no tetai ua atu tuanga o ta tatou angaanga orometua. Kare, “kare tatou i te aronga okooko i te tuatua a te Atua.” (2 Korinetia 2:17, NW) Mei ia Paulo rai, ka rauka ia tatou taki tai kia tuatua mou tikai: “Kua akakite mataora au i te tuatua meitaki a te Atua kia koe kare e tutaki.” (2 Korinetia 11:7, NW) E akara e “kua akakite mataora [a Paulo] i te tuatua meitaki.” Te akakite maira te reira i te rima o te tumu i apaiia mai ki to tatou manako anga i roto ia Malaki pene 1.

Te Tavini Anga i te Atua Kare i te Apainga Teiaa

15, 16. (a) Eaa te tu manako o te kau taunga ra i te orongaanga i te atinga? (e) Akapeea te Au Kite o Iehova i te oronga anga i ta ratou au atinga?

¹⁵ Kua manako te kau taunga akarongo kore i Ierusalema i taito ra i te orongaanga i te au atinga ei ravenga roiroi ia. E apainga teiaa kia ratou. Mei tei akakiteia maira ia Malaki 1:13, kua tuatua te Atua kia ratou: “Kua tuatua katoa oki kotou, I na, e mea roiroi teia! e kua akaviivii kotou i te reira.” Kua akavaavaa mai taua kau taunga ra i te reira, te au mea tapu a te Atua. E pure tatou e kia kore tatou uaorai e riro kia aite atu kia ratou. Kareka ra, kia akakite marie tatou i te vaerua te akakiteia maira i te au tuatua ia 1 Ioane 5:3: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.”

¹⁶ Kia mareka tatou i te orongaanga i te au atinga vaerua ki te Atua, auraka e manako i teia ei apainga roiroi. E kia akono tatou i te au tuatua totou: “Ka tuatuaʼi [kia Iehova], Ka akakore mai koe i te au kino katoa, ka āriki mai ei ia matou ma te aroa: ka oronga atu ei matou i te atinga ra o to matou vaa.” (Hosea 14:2) Te tuatua “te atinga ra o to matou vaa” te tuatua ra i te au atinga vaerua, te au tuatua ta tatou i tuatua i te akapaapaa ia Iehova e tana au akakoro anga. Te tuatua ra a Ebera 13:15: “E teianei e na ko tatou ia [Iesu Karaiti] ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.” Mei teea ra to tatou mataora e ko ta tatou au atinga pae vaerua, kare i te au ravenga ua nei, mari ra e au akakite anga ngakau katoa i to tatou inangaro no te Atua! Te taki atu nei teia ki te ono o te tumu te ka kiteia mai mei ia Malaki pene 1 ra.

Ka Tika kia Oronga Tataki Tai i Tetai Akakite Anga

17, 18. (a) Eaa ra a Iehova i taumaai “i tei rave kikite ra”? (e) Eaa ta te aronga tei rave kikite ra kare i akamanako ana?

¹⁷ Te aronga tataki tai te ora ra i te tuatau ia Malaki ra kua rave i ta ratou uaorai apainga no ta ratou angaanga, e pera katoa oki tatou nei. (Roma 14:12; Galatia 6:5) No reira, kua tuatua a Malaki 1:14: “Kia taumaaia ra te pikikaa te vai ra te toa i roto i tana anana, e kua tia iora, e kua apai i te mea viivii na te Atu.” Te tangata e anana tana kare e e okotai ua manu​—mei te mea, e okotai ua mamoe​—e kare ana iki anga ke. I te ikianga i tetai animara no te atinga, kare aia i tau e kia iki i tetai te matapo ra, te pirikoki ra, me kare te maki ra. Me kua iki aia i tetai animara viivii ra, ka akaari mai te reira e te akavaavaa ra aia i te akanoonooanga atinga a Iehova ra, no te mea ko te tangata e anana animara tana ka rauka kia kitea tetai kare ra ona tu viivii!

¹⁸ Ma te tumu meitaki, i reira, kua taumaa atura Iehova i tei rave kikite ra, tetai e animara meitaki ra tana mari ra kua apai mai​—penei kua kika mai​—i tetai e matapo, e pirikoki, me kare e maki ki te taunga ei atinga. Tera ra, kare e akakite anga e kua taiku te kau taunga i te ture a te Atua e kare te au animara viivii e arikiia. (Levitiku 22:​17-20) Kua kite te aronga tau tataki tai e kare e meitaki no ratou me ka tauta ratou kia oronga atu i taua tu apinga ra ki to ratou tutara. Inara ko te tu tika tikai te akono atura ratou ma Tei Ngateitei i te Ao Katoa e Pini Ua Ake, ko Iehova, tei maata mamao roa atura i tetai ua atu tutara tangata nei. Te akakite maira Malaki 1:14 na teia tu: “E Ariki maata oki au nei, te tuatua mairā Iehova Sabaota ra, e matakuia oki toku nei ingoa i roto i te pa enua ra.”

19. Eaa ta tatou i anoano, e eaa ta tatou ka tau kia rave?

¹⁹ Ei au tavini tiratiratu no te Atua, ka tapapa atu tatou no te tuatau e akatapuiai te Ariki Maata ra, ko Iehova e te au tangata katoatoa. A taua tuatau ra, “ka ki te enua i te kite ia Iehova, mei te vairanga tai e ki i te tai ra.” (Isaia 11:9) I teianei, e tauta tatou kia akono i ta Iehova ra au umuumu anga na te aruanga i ta te tata taramo i tuatua ra: “Ka akamaata au iaia i te akameitaki.” (Salamo 69:30) Ki taua akakoro anga ra, e akoanga ke atu ta Malaki te ka riro ei puapinga maata. I nga atikara e rua te aru mai nei, e rave tatou i reira i te akamanakoanga matakite ki etai atu tuanga no te puka a Malaki.

Maara Ainei ia Koe?

• Eaa tatou i tau ei kia akamaata ia Iehova?

• Eaa oki te au atinga i te tuatau ia Malaki ra i ariki koreiai e Iehova?

• Akapeea tatou me oronga i te atinga akapaapaa kia Iehova?

• Eaa te akakeu anga tau no te akamori anga mou?

[Tutu i te kapi 9]

Kua tou mai te totou a Malaki ki to tatou tuatau nei

[Tutu i te kapi 10]

Kare a Esau i ariki i te au mea tapu ra

[Tutu i te kapi 11]

Kua oronga te kau taunga e te au tangata i te au atinga ariki koreia ra

[Tutu i te kapi 12]

I te ao katoa, te oronga ua ra te Au Kite o Iehova i te au atinga no te akapaapaa anga