E Rave Tamou i te au Mea ta Kotou i Kite

“I te au mea oki ta kotou i kite ra, ta kotou i āriki, ta kotou i akarongo, e ta kotou i kite mai iaku ra, ka rave ïa: e e noo te Atua au ra ki o kotou.”​—PHILIPI 4:9.

1, 2. Ei mea matauia, te tuku ra ainei te Pipiria i tetai mana ki roto i te au oraanga o te tangata te akamanako ra e akonoanga ta ratou uaorai? E akataka mai.

“TE TUPU ra te Mana o te Akonoanga, mari ra ko te Akono Tau te Topa ra Tona Mana.” Ko teia tumu i roto i te nuti reta Emerging Trends kua akakite mai i te au tupuanga no tetai akarakara anga i te pa enua katoa i roto ia Marike. I te akara anga, kua kite taua enua ra i te tupuanga o te numero o te au tangata te aere ra ki te are pure e te tuatua ra e te mou ra te akonoanga i tetai ngai maata i roto i to ratou oraanga. Inara, te akakite ra te ripoti e: “Noatu rai teia au numero maata, e manganui te au tangata Marike te ekoko ra i te akatupuanga a te akonoanga ki runga i te au ora anga tataki tai e te taiate katoa.”

² Kare teia turanga i roto i te enua okotai ua ra. Takapini i te ao katoa, e manganui te au tangata te tuatua ra e te ariki ra ratou i te Pipiria e e aronga akonoanga kare ra e tuku ana i te au Tuatua Tapu kia mana ki roto i to ratou oraanga. (2 Timoteo 3:5) “Te mou nei rai matou i te Pipiria i roto i te turanga teitei,” i tuatua ei tetai upoko o tetai pupu kimikimi, “inara no te akapouanga tikai i te taime i te tatauanga i te reira, te apiianga i te reira e te akonoanga i te reira​—e apinga ia kua topa ki muri.”

3. (a) Akapeea te akatupu anga a te Pipiria ki te aronga tei riro ra ei au Kerititiano tikai? (e) Akapeea te akono a te au pipi a Iesu i te akoanga a Paulo i tataia ia Philipi 4:9 ra?

³ Inara, ki te au Kerititiano tika tikai, e tuke te turanga. Te akonoanga i te akoanga mei te Tuatua a te Atua kua akatupu mai i te au taui anga i roto i ta ratou manakoanga e te tu akono. E te tu tangata ou ta ratou e akaari ra te kite vivikiia ra e etai ke. (Kolosa 3:5-10) No te au pipi a Iesu, kare te Pipiria i te puka taangaanga koreia te akaputu ra i te repo i runga i te paata. Ei tuke anga, kua tuatua atu te apotetoro ko Paulo ki te au Kerititiano i Philipi: “I te au mea oki ta kotou i kite ra, ta kotou i āriki, ta kotou i akarongo, e ta kotou i kite mai iaku ra, ka rave ïa: e e noo te Atua au ra ki o kotou.” (Philipi 4:9) E maata ta te au Kerititiano ka rave i te ariki i te tuatua mou o te Tuatua a te Atua. Ka rave ratou i ta ratou i apii, ka akono tamou i te akoanga a te Pipiria​—i roto i te pamiri, i te ngai angaanga, i roto i te putuputuanga, e i etai atu ngai katoa o te oraanga.

4. Eaa ra i riro ei ei akaaoanga kia akono i te ture a te Atua ra?

⁴ Te taangaangaanga i te au ture a te Atua e te au kaveinga kare i te mea ngoie ua. Te noo nei tatou i roto i te ao tei raro i te mana o Satani te Tiaporo, ta te Pipiria i tapa ra ko “te atua o teianei ao.” (2 Korinetia 4:4; 1 Ioane 5:19) No reira, e mea umuumuia kia paruru atu i tetai ua atu mea te ka arai ia tatou mei te aruaruanga i te aerenga tiratiratu ki te Atua kia Iehova. Akapeea tatou e riro ei ei aronga akono i te tu tiratiratu?

E Mou Meitaki i te “Akonoanga Tuatua Tikai”

5. Eaa te akakiteia maira e ta Iesu tuatuaanga: “Ka aru mai ei iaku”?

⁵ Tetai tu o te raveanga i ta tatou i apii te umuumu ra te akono tiratiratu anga i te akamori mou, noatu te au patoi anga mei te aronga akarongo kore ra. Te umuumu ra te tamou marie i te tautaanga. “Ko tei inangaro i te aru mai iaku,” ta Iesu i tuatua, “e akaruke aia iaia uaorai, e rave i tana satauro, ka aru mai ei iaku.” (Mataio 16:24) Kare a Iesu i karanga ana e ka aru tatou iaia no tetai epetoma ua, tetai marama, me kare no tetai mataiti. Mari ra, kua karanga aia: “Ka aru mai ei iaku.” Te akakite maira tana au tuatua e kare to tatou riroanga ei pipi no tetai tuanga poto ua o to tatou oraanga me kare ei akamori anga poto ua e tei konei i teia ra e apopo kua ngaro ke atu. Te aiteanga o te akono tiratiratu anga i te akamori mou e ka tamou marie tiratiratu tatou i te aerenga ta tatou i iki, noatu eaa te tupuanga. Akapeea e raukai ia tatou i te rave i te reira?

6. Eaa te akonoanga tuatua tikai ta te au Kerititiano o te anere mataiti mua ra i apii mei ia Paulo maira?

⁶ Kua raurau atura Paulo i tona oa angaanga ia Timoteo: “E tāpu meitaki i te akonoanga tuatua tikai taau i kite iaku nei ra, ma te akarongo e te anoano i te Mesia ra ia Iesu.” (2 Timoteo 1:13) Eaa te aiteanga o ta Paulo tuatua? Ko te tuatua Ereni tei uriia e “akonoanga” te taiku ra ki te toroanga a tetai tangata karape ra. Noatu rai e kare i taka meitaki te tutuanga, te meitaki ra te au kotinga e raukai i te tangata akara atu i te akataka i te tutu katoa. Aiteite katoa, te akonoanga tuatua mou ta Paulo i apii atura kia Timoteo e etai ke kare i akapapaia kia oronga atu i tetai pauanga ki te au uianga ravarai tei manakoia. Inara, te oronga maira teia tu apiianga kia rava te arataki anga​—tetai papaanga, mei tera te tu​—kia kite ei te aronga ngakau tiratiratu e eaa ta Iehova e umuumu maira ia ratou. Inara, kia akamareka i te Atua, ka tau ratou kia akono ua atu i taua akonoanga i te tuatua mou ra na te raveanga i ta ratou i apii ra.

7. Akapeea e raukai i te au Kerititiano kia mou i te akonoanga tuatua tikai?

⁷ I te anere mataiti mua ra, ko te aronga tataki tai mei ia Humenaio, Alekanedero, e Phileto te akakitekite ra i te au manako kare ra i tau “i te akonoanga tuatua tikai.” (1 Timoteo 1:18-20; 2 Timoteo 2:16, 17) Akapeea e raukai i te au Kerititiano mua ra kia kopae ke i te arataki keanga a te au apoteiti ra? Na te apiianga meitaki anga i te au tataanga akauruia ra e te taangaangaanga i te reira i roto i to ratou oraanga. Ko te aronga tei aaere ra kia tau ma te akatauanga a Paulo e etai atu aronga tiratiratu ra kua kite e kua kopae ke i tetai ua atu apinga kare i tau ki te akonoanga tuatua mou ta ratou i apii maira. (Philipi 3:17; Ebera 5:14) Kare i riro ei “auouo ua i te ui e te māro anga tuatua,” kua aere ua atu ratou ki mua i roto i to ratou aerenga tikai i te akono tau i te Atua ra. (1 Timoteo 6:3-6) Te rave ra tatou i taua mea rai me tamou marie tatou i te akonoanga i te au tuatua mou ta tatou i apii ra. Mei teaa ra te akamaroiroianga i te kite i te au mirioni ua atu te tavini ra ia Iehova takapini i te enua nei e te akono tamou ra i te mouanga ngaueue kore i te akonoanga tuatua mou o te Pipiria tei apiiia kia ratou.​—1 Tesalonia 1:2-5.

Kopae Ke i te “Tuatua Taeke Ua”

8. (a) Akapeea ta Satani kimi anga kia akapou i to tatou akarongo i teia tuatau? (e) Eaa te akamatakiteanga a Paulo te kitea ra ia 2 Timoteo 4:3, 4?

⁸ Te tauta ra a Satani kia aati i to tatou tiratiratu na te ruruanga i te au ekoko anga no ta tatou i apiiia maira. I teia tuatau, mei to te anere mataiti mua ra, te kimi ra te au apoteiti e etai atu kia akapou i te akarongo o te aronga apa kore ra. (Galatia 2:4; 5:7, 8) I etai taime ka taangaanga ratou i te aronga akakite nuti kia akatotoa i te au akakitekite anga tarevake me kare ko te au pikikaa tikai no runga i te au ravenga e te au akakeu anga a te au tangata o Iehova. Kua akamatakite a Paulo e e tarurikeia tetai papaki mei te tuatua mou. “Te vai atura oki te tuatau,” tana i tata, “e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro; E ariu ke oki to ratou taringa i te tuatua-mou, e anga atu ei ki te tuatua taeke ua.”​—2 Timoteo 4:3, 4.

9. Penei eaa ta Paulo i manako ana iaia i taiku ra i te “tuatua taeke ua”?

⁹ Kare e kia mou i te akonoanga tuatua tikai, kua akavareia tetai papaki e te au “tuatua taeke ua.” Eaa teianei au tuatua taeke? Penei i roto i te manako o Paulo ko etai au tua manako uaia, mei tei kiteia ra i roto i te puka apocryphal a Tobit.a Penei te au tuatua taeke kua kapiti katoa i te au tuatua manako uaia. I reira, katoa oki, tetai papaki​—“kia tau ki to ratou uaorai au inangaro”​—penei kua akavareia te manako e te aronga tei akatika ra i te manako anga tarevake i to te Atua ra turanga me kare tei akaapa ra i te aronga tei arataki ra i te putuputuanga. (3 Ioane 9, 10; Iuda 4) Noatu te au toka turori anga tei o maira, i te akaraanga ko tetai papaki kua iki i te au tu tarevake ki rungao i te au tuatua mou o te Tuatua a te Atua ra. Kare i roaia kua akamutu ratou i te akonoanga i te au apinga ta ratou i apii, e kua riro te reira ei kino no ratou uaorai i te pae vaerua.​—2 Petero 3:15, 16.

10. Eaa etai au tuatua taeke ua, e i akapeea ta Ioane akamarama anga i tei umuumuia no te matakite anga?

¹⁰ Ka rauka ia tatou te kopae i te tapae keanga ki te au tuatua taeke ua i teia tuatau me ka akara matatio tatou e ka iki i ta tatou ka akarongo atu e ta tatou ka tatau. Ei akatauanga, e putuputu te aronga akakite nuti i te akakeu i te ainga tau kore. E manganui te au tangata te akamaroiroi ra i te kore e irinaki i te Atua me kare te manakoanga e kare e Atua. Te akaapa ra te aronga akaapa teitei i te tuatua a te Pipiria e e mea akauruia e te Atua. E te rave tamou ra te au apoteiti o teia tuatau i te tautaanga kia ruru i te au ua no te ekoko kia raukai i te akaanga ke i te akarongo o te au Kerititiano. No runga i tetai tu kino aiteite tei orongaia maira e te au peroveta pikikaa i te anere mataiti mua ra, kua akamatakite mai te apotetoro ko Ioane: “E aku au akaperepere e, auraka e akarongo atu i te au vaerua ravarai, e timata ra i taua au vaerua ra, kia kitea e, no ko mai aina i te Atua ra: no te mea e manganui te peroveta pikikaa i aere atu na na te ao nei.” (1 Ioane 4:1) No reira ka tau tatou kia matakite.

11. Eaa tetai tu no te timataanga kia kite e me tei roto tatou i te akarongo?

¹¹ No runga i teia tu, kua tata a Paulo: “E kimi matatio ia kotou uaorai i to kotou akarongo.” (2 Korinetia 13:5) Kua raurau mai te apotetoro ia tatou kia akara matatio ia tatou uaorai kia kite me te akarongo ra tatou i te au irinaki anga Kerititiano katoa ra. Me te ariu atura to tatou taringa ki te aronga mareka kore ra, ka tau tatou kia akara matatio ia tatou uaorai ma te pure. (Salamo 139:23, 24) Te kimi ra ainei tatou kia kite i te tarevake i te au tangata o Iehova ra? Me koia ia, no teaa ra? Kua mamae ainei tatou i te au tuatua me kare te au angaanga a tetai ra? Me koia ia, te tuku ra ainei tatou i te au mea ki roto i te ngai tika? Tetai ua atu mate ta tatou e aro atu i roto i teianei akatereanga o te au mea nei e mea poto ua ia. (2 Korinetia 4:17) Noatu me ka tupu etai timataanga kia tatou i roto i te putuputuanga, eaa tatou ka akamutu ei i te tavini i te Atua? Me kua taitaiaia tetai i tetai apinga, kare ainei i te mea meitaki atu kia rave i te ka rauka ia tatou kia takore atu i taua tumu ra e ka akaruke atu ei ki roto i nga rima o Iehova?​—Salamo 4:4; Maseli 3:5, 6; Ephesia 4:26.

12. Akapeea te akanoo anga a to Berea ra i te akatauanga meitaki no tatou?

¹² Kare e kia akaapa ua, e tamou marie ra tatou i te manako vaerua meitaki no te au akakiteanga tei rauka maira na te apiianga e te au uipaanga putuputuanga. (1 Korinetia 2:14, 15) E kare e kia ekoko i te Tuatua a te Atua, mei teaa ra te pakari atu kia akono i te tu manako o te au tangata o Berea i te anere mataiti mua ra tei akara matatio ma te piri vaitata i te au Tuatua Tapu ra! (Angaanga 17:10, 11) Ei reira, e rave ua atu tatou i ta tatou i apii ra, ma te kopaeanga i te au tuatua taeke ua e te mouanga ki te tuatua mou.

13. Penei e akapeea tatou e akatotoa ei ma te kite kore ei i te tuatua taeke ua?

¹³ Te vaira tetai atu tu tuatua taeke ua te ka tau ia tatou kia paruru atu. E manganui te au tua te akatotoa putuputuia ra na te E-mail. E mea pakari ra kia matakite i taua au tua ra, e maata oki me kare tatou i kite i te tumu akamataanga mai o te akakitekite anga. Noatu me ko tetai tupuanga me kare e tua tei tukuia mai e te Kerititiano meitaki ra, penei kare aia i kite meitaki i te au tika ra. No reira oki i puapinga ei kia matakite i te ripiti anga me kare i te orongaanga i te au tuatua kare ra i akatakaia. Kare tikai tatou e inangaro i te tuatua akaou i te “tuatua taeke ua,” me kare te “au tua pikikaa tei akakino ra i tei tapu.” (1 Timoteo 4:7; New International Version). I te mea e apainga katoa ta tatou kia tuatua mou atu kia etai ke ra, te akono pakari ra tatou na te kopaeanga i tetai ua atu apinga te ka akariro ia tatou kia akatotoa i te au mea kare i te tuatua mou.​—Ephesia 4:25.

Au Tupuanga Papu no te Akonoanga i te Tuatua Mou

14. Eaa te au puapinga te ka tupu mai na te akonoanga i te au mea ta tatou i apii mei te Tuatua a te Atua?

¹⁴ Na te akonoanga i ta tatou i apii na roto i te apii Pipiria e te au uipaanga Kerititiano ka apai mai i te au puapinga e manganui. Ei akatauanga, penei ka kitea e tatou e to tatou au pirianga ma te aronga te piri maira kia tatou i te akarongo ka meitaki mai. (Galatia 6:10) To tatou uaorai turanga ka tauiia no te meitaki me ka akono tatou i te au kaveinga Pipiria. (Salamo 19:8) Pera katoa oki, na te akonoanga i ta tatou i apii, ka ‘akamanea tatou i te apiianga a te Atua’ e penei ka akavaitata mai ia etai ke ki te akamori mou.​—Tito 2:6-10.

15. (a) Akapeea tetai tamaine ou i te akono mataku kore anga i te tuatua akakite i te apii? (e) Eaa taau i kite mai mei teia tupuanga?

¹⁵ I roto te Au Kite o Iehova e manganui te aronga ou te akono ra i ta ratou i apii na roto i te apiianga uaorai i te Pipiria e te au puka Kerititiano ra pera katoa te aere putuputu anga ki te au uipaanga putuputuanga. To ratou tu akono meitaki e akakite anga ririnui ki te au puapii e te au oa apii i te ngai apiianga. (1 Petero 2:12) E akamanako ia Leslie, e tamaine e 13 mataiti i Marike. Kua akatika aia e e mea ngata iaia i te tuatua atu ki tona au oa apii no runga i tona akarongo, inara i tetai ra kua tauiia te reira. “Kua tuatua to ratou pupu no runga i te au tauta anga a te au tangata kia oko atu i te au apinga kia koe. Kua taaki tetai tamaine i tona rima ki runga e kua taiku atu i te Au Kite o Iehova ra.” Ei Kite, akapeea ta Leslie akono anga? “Kua paruru atu au i toku akarongo” tana i tuatua, “papu tikai iaku e kua poitirere te katoatoa, te mea e tu muteki ua toku i te apii.” Te tupuanga no to Leslie tu mataku kore? “Kua rauka iaku i te oronga i tetai poroutia e te aenga pepa ki taua tamaine apiiia ra, no te mea e au uianga ke atu tana,” ta Leslie i tuatua. Mei teaa ra to Iehova rekareka anga i te rauka anga te mataku kore o te aronga ou tei akono ra i ta ratou i apii kia akakite atu i te ngai apii!​—Maseli 27:11; Ebera 6:10.

16. Akapeea i puapingaiai tetai Kite ou i te Apii Orometua Teokaratiki ra?

¹⁶ Tetai atu akatauanga ko ta Elizabeth. I te akamataanga i te itu mataiti e i tona au mataiti katoa i te apiianga mua, kua pati atu teia tamaine ou i tona au puapii kia aere mai ki te Are Uipaanga Patireia i tona taime e tuanga tana i te Apii Orometua Teokaratiki. Me kare e rauka i te puapii i te aere atu, kua noo atu a Elizabeth i muri ake i te apiianga e ka oronga atu i te tuatua anga ki te puapii. I tona mataiti openga i te apii teitei ra, kua tata atu a Elizabeth i tetai ripoti e tai ngauru kapi no runga i te au puapinga o te Apii Orometua Teokaratiki ra e kua oronga i te reira ki mua i nga puapii e a. Kua pati katoaia aia kia oronga atu i tetai tuatua akatauanga no te Apii Orometua Teokaratiki ra, ko tana i iki ra ko te tumu tuatua “Eaa ra te Atua i Tuku Uaʼi i te Mamaeanga?” Kua puapingaia a Elizabeth mei te porokaramu apiianga tei raveia ra e te Au Kite o Iehova i te Apii Orometua Teokaratiki ra. Koia tetai o te au Kerititiano ou e manganui tei apai maira i te akapaapaa anga kia Iehova na te akonoanga i te au mea ta ratou i apii ra mei tana Tuatua.

17, 18. (a) Eaa te akoanga ta te Pipiria i oronga no te tiratiratu? (e) Akapeea te tupu anga ki tetai tangata no te akono tiratiratu o tetai Kite no Iehova?

¹⁷ Te akamaroiroi maira te Pipiria i te au Kerititiano kia akono tiratiratu ia ratou uaorai i te au mea ravarai. (Ebera 13:18) Ka rauka i te tiratiratu kore kia akakino i to tatou pirianga ma etai atu e, e maata atu oki, kia Iehova uaorai. (Maseli 12:22) Te oronga ra to tatou tu akono tau i te akakite anga e te akono ra tatou i te au mea ta tatou i apii ra, e kua akariro te reira i te aronga e manganui kia maata atu te akangateitei anga no te Au Kite o Iehova.

¹⁸ E akamanako i tei tupu ki tetai tangata vaeau ko Phillip. Kua ngaro iaia tetai cheque kua tainaia kare ra i akakiia e kare i kite ana e tae roa kia akaokiia mai kiaia i roto i te mere. Kua kitea mai taua cheque ra e tetai e Au Kite o Iehova, e tetai aenga pepa tei kapitiia maira ki te reira tei akakite e na te akonoanga o taua tangata i kite ra, i akakeu iaia kia akaoki atu i te reira. Kua va ua a Phillip. “Ka rauka ua iaia i te akangere mai iaku i taku moni katoa e $9,000!” tana i tuatua. Kua manamanata aia i tetai atu atianga i te keia angaia tona pare i roto i te are pure. I te akaraanga, kua raveia tona pare e tetai o tona au oa, e i na kua akaoki atu tetai tangata ke i tetai cheque e au tauatini ua atu tara tona puapinga! E tikai, te apai maira te au Kerititiano tiratiratu i te akangateitei anga ki te Atua ko Iehova!

E Rave Tamou i Taau i Apii

19, 20. Akapeea tatou e puapingaiai mei te akonoanga kia tau ma te au mea Tuatua Tapu ta tatou i apii ana?

¹⁹ Te aronga te rave ra i ta ratou i apii ana mei te Tuatua a te Atua ka kokoti i te au puapinga e manganui. Kua tata te pipi ko Iakobo: “Ko te akara ra ki roto i te ture tika rava o te rangatira ra, ma te tamou tikai, no te mea kare aia i te tangata akangaropoina ua i te tuatua kia akarongo, e tangata rave ra aia i taua angaanga ra, e akameitakiia ïa aia i te rave anga.” (Iakobo 1:25) Ae, me ka rave tatou kia tau ma te au mea Tuatua Tapu ta tatou i apii, ka rauka ia tatou te mataora tikai e ka meitaki atu no te akono i te au taomianga o te oraanga. E maata atu oki, ka rauka ia tatou ta Iehova akameitakianga e te manakonako anga no te oraanga mutu kore!​—Maseli 10:22 1 Timoteo 6:6.

²⁰ No reira, e rave tamou i te akono ia koe uaorai kia apii i te Tuatua a te Atua. E kapiti putuputu atu ma te aronga akamori ia Iehova, e kia akamanako atu i te au tumu te orongaia maira i te au uipaanga Kerititiano. E akono i taau e apii ra, e rave atu i te reira, e “e noo te Atua au ra ki o kotou.”​—Philipi 4:9.

[Tataanga Rikiriki i Raro]

Maara Ainei ia Koe?

• Eaa te “akonoanga tuatua tikai,” e akapeea e raukai ia tatou kia mou tamou i te reira?

• Eaa te “tuatua taeke ua” ta tatou ka tau kia kopae ke?

• Eaa te au puapinga te aere maira ki te aronga tei akono ra i te au mea ta ratou i apii ra mei te Tuatua a te Atua?

[Tutu i te kapi 17]

Akapeea te au Kerititiano mua i te kopaeanga i te arataki keanga a te au apoteiti?

[Au Tutu i te kapi 18]

Ka rauka te au ua ekoko i te ruruia e te aronga akakite nuti, na roto i te “Internet,” e te au apoteiti o teia tuatau

[Tutu i te kapi 19]

E pakari kore te akatotoa i te au ripoti kare i tika

[Au Tutu i te kapi 20]

I te angaanga, i te apii, e etai atu ngai, te rave ra te Au Kite o Iehova i ta ratou e tatau ra i roto i te Tuatua a te Atua