Au Uianga a te Aronga Tatau

Te tau ra ainei i te Tuatua Tapu no tetai Kerititiano kia tuku i tona rima ki runga i te Pipiria e kia taputou no te akakite i te tika i te akavaanga?

Kia akono te au tangata taki tai i te iki anga uaorai no teia. (Galatia 6:5) Inara, kare te Pipiria e arai ana i te rave anga i te taputou kia akakite i te tika i te akavaanga.

E akonoanga matauia te rave anga i te taputou. Ei akatauanga, i te au tuatau taito, kua taaki te au Ereni i to ratou rima ki runga me kare kua amiri i tetai atarau koi rave ei i te taputou. Me rave tetai tangata tiuri Roma i te taputou, ka mou aia i tetai toka i roto i tona rima e kua taputou: “Me pikikaa akakoro au, iaia e akaora ra i te oire e te punanga, kia akaatea ke atu [te atua] Tiupita iaku mei te au meitaki katoa, iaku e rave pera ra i teia toka.”​—Cyclopedia of Biblical, Theological, and Ecclesiastical Literature, na John McClintock raua ko James Strong, Voriumu VII, kapi 260.

E au akakiteanga taua au rave anga i te tu ariu anga o te au tangata kia kite i te vai anga o te mana tu-Atua tei rauka ra i te akara mai te au tangata e kua apa ratou kiaia. Mei te au tuatau taito, kua kite te aronga akamori mou ia Iehova e kua kite aia i ta ratou i tuatua e i rave ra. (Maseli 5:21; 15:3) Kua akono ratou i te au taputou ki mua i te aroaro o te Atua, mei tera te tu, me kore kiaia ei kite. Ei akaraanga, kua raveia teia e Boaza, Davida, Solomona, e Zedekia. (Ruta 3:13; 2 Samuela 3:35; 1 Ariki 2:23, 24; Ieremia 38:16) Kua akatika katoa te aronga akamori i te Atua mou i tetai atu kia tuku ia ratou i raro ake i tetai taputou anga. Kua tupu te reira kia Aberahama raua ko Iesu Karaiti.​—Genese 21:22-24; Mataio 26:63, 64.

Ko tetai tangata e rave ra i te taputou anga kia Iehova kua akono i tetai taime i te akairo. Kua akakite a Aberama (Aberahama) ki te ariki o Sodoma: “Kua taputou au ki te Atua teitei ra, kia Iehova, ki te Pu o te rangi e te enua nei.” (Genese 14:22) Kua akono tetai angera e tuatua ra ki te peroveta ko Daniela “i tataki i tona rima katau e tona rima kaui ki runga i te rangi, ka taputou ei iaia i tei ora ra e tuatau ua atu.” (Daniela 12:7) E kua taiku katoaia te Atua i te taaki akatutu anga i tona rima i te taputou anga.​—Deuteronomi 32:40; Isaia 62:8.

Kare e arai anga mei te Tuatua Tapu no te raveanga i te taputou. Inara, kare tetai Kerititiano e anoanoia kia rave i te taputou anga e raukai te akapapu i tana au tuatua ka tuatua. Kua karanga a Iesu: “Kia riro ra ta kotou Koia, ei koia; e ta kotou Kare, ei kare.” (Mataio 5:33-37) Kua akakite akapera rai te pipi ko Iakobo. I tona tuatua anga ‘auraka rava e taputou,’ te akamatakite ra aia i te rave puapinga kore anga i te taputou. (Iakobo 5:12) Kare a Iesu raua ko Iakobo i tuatua ana e e tarevake te rave anga i te taputou no te akakite i te tika i te akavaanga.

Akapeea, i reira, me patiia tetai Kerititiano i roto i te ngai akavaanga kia taputou e kia tika tana akakite anga? Penei te manako ra aia e ka rauka iaia i te rave i taua taputou. Me kare, penei ka akatikaia aia kia akapapu e kare aia e pikikaa ana.​—Galatia 1:20.

Me kapiti mai ki roto i te aerenga akavaanga te taaki anga i te rima me kore te tukuanga i te reira ki runga i te Pipiria i te taputou anga, penei ka iki tetai Kerititiano i te rave ua. Penei ka manako aia i te au akaraanga Tuatua Tapu o te rave anga i te akairo ma te taputou anga. No tetai Kerititiano, tei maata atu i te akono anga i te akairo no te rave anga i tetai taputou ka akamaara aia e te taputou ra aia ki te Atua kia akakite i te tika. E tumu anga pakari te rave anga i te taputou. Me manako tetai Kerititiano e ka rauka iaia e ka tau kia pau i tetai uianga tei uiia mai kiaia i roto i taua au turanga, kia akamanako aia i reira e te rave ra aia i te taputou kia akakite i te tika, ko tei, e tikai, inangaroia oki no tetai Kerititiano kia tuatua i te au taime ravarai.