Te Au Mapu—Te Tupu ra Ainei Kotou i te Pae Vaerua?

“NOATU e aere ana au ki te au uipaanga Kerititiano, kare e maroiroi ana toku inangaro i te tavini ia Iehova,” i na Hideo ei iaia e maaraara ra i tona au tuatau i te apii-rotopu. “E manako putuputu ana au iaku uaorai e te rekaia maira e toku au oa apii e te aere akaparau anga i runga i te mataara ma tetai oa vaine. Kare e taka meitaki ana taku au akakoroanga, e kare au e inangaro ana i te rave i tetai tupu anga i te pae vaerua.” Mei ia Hideo rai, i te akara anga e manganui te au mapu te aere ke ua atura, kare e inangaro ana i te itae i tetai au akakoroanga tau me kore i te rave kia tere ki mua.

Me e mapu koe, penei te mataora ra koe me piri atu koe ki roto i te tarekareka anga me kare i tetai angaanga inangaroia. Inara, me ko te au angaanga i te pae vaerua ra te reira, kare koe e manako ana mei te reira rai. Ka rauka ainei kia mataora ua atu no runga i te au akakoroanga i te pae vaerua? E akamanako ana i teia au tuatua na te tata taramo e: “Te tuatua-akakite a Iehova, e mea mou ïa, e pakari ei te kamakura. . . . te akauenga a Iehova, e mea viivii kore ïa, e māramaʼi te mata nei.” (Salamo 19:7, 8) Ka rauka i te Tuatua a te Atua i te arataki i “te kamakura” kia rave pakari, ‘e māramaʼi tona mata nei.’ Ae, ka rekareka koe e ka mataora i te au mea i te pae vaerua. Inara eaa te anoanoia ra noou kia manako i taua tu ra? Ka akamata ainei koe kiea?

Kia Akakeuia i te Tavini i te Atua

Te mea mua, e mea tau kia akakeuia koe. E tamanako ana i te tu o te ariki mapu ua ko Iosia o Iuda. Te kitea anga te puka no te Ture a Iehova i roto i te iero, kua rave a Iosia kia tatauia te reira e kua akakeu oonuia no tana i akarongo. Tei tupu, “kua rave iorā Iosia e kua akaruke i te au mea viivii katoa o te pa enua no te tamariki a Iseraela.” (2 Paraleipomeno 34:14-21, 33) Te tatau anga i te Tuatua a te Atua kua akakeuia a Iosia kia rave maata ua atu i te akamaata anga i te akamorianga ma.

Ka rauka katoa ia koe i te tatanu i te inangaro i te tavini ia Iehova me tatau putuputu koe i te Pipiria e te akamaaraara anga i taau i tatau ana. Na te reira i akakeu ia Hideo. Kua akamata aia i te piri taokotai ki tetai painia pakarikari, ko tetai orometua tamou no te Au Kite o Iehova. E tangata apiipii karape no te Pipiria te painia e kua tauta kia rave i te au apii anga a te reira ki roto i tona oraanga. Kua akamaroiroi maata ia no te akaraanga a te painia, kua akamata a Hideo i te rave i te reira e kua akatupu i tetai inangaro ketaketa kia tavini i te Atua e i tetai atu au tangata. Kua akamaata tona tupuanga i te pae vaerua i tetai oraanga puapinga.

I te tatau anga i te Pipiria i te au ra ravarai ka rauka ei akakeu anga no te aronga mapu. Kua akataka mai a Takahiro e: “Me aere au i te moe e kua kite au e kare ake rai i rave ana i taku tatau anga i te Pipiria no taua ra ra, ka tu mai au ki runga e ka tatau i te reira. Tei tupu, kua kite au i ta Iehova arataki anga. Te tatau anga i te Pipiria i te au ra ravarai kua tauturu iaku kia tere ki mua i te pae vaerua. I te tauta pakari anga kia piri maata ki roto i ta Iehova angaanga, kua akamata au i te angaanga painia tamou i muri poto ua ake i te karatuati anga mei te apii turua. E te mataora maata tikai nei au i te reira.”

Te kapiti mai anga ki te tatau anga i te Pipiria, eaa ua atu ei te ka tauturu ia koe kia akaketaketa i te akakeu anga ia koe kia akapaapaa ia Iehova? Kua apiiia a Tomohiro i roto i te tuatua mou o te Pipiria e tona metua vaine. Kua tuatua aia e: “I te tae roa anga toku 19 mataiti i apii meitaki ei i te puka Life Does Have a Purpose kua akakeu oonu tikai ia au e te aroa o Iehova e te atinga oko o Iesu. Kua akakeu taua arikianga no te aroa o te Atua ra iaku kia rave maata ua atu i te angaanga a Iehova.” (2 Korinetia 5:14, 15) Mei ia Tomohiro rai, kua akamaroiroiia te au mapu e manganui kia tere ki mua i te pae vaerua na te aruaru anga i tetai apii Pipiria karape nana uaorai.

Noatu rai, akapeea me te ngere ra koe i tetai anoano ngakau tae i te tavini ia Iehova? E tangata ainei tetai te ka rauka ia koe kia ariu mai no te tauturu? Kua tata te apotetoro ko Paulo e: “Ko te Atua oki tei angaanga ki roto ia kotou, i te inangaro e te rave, mei tana i anoano ra.” (Philipi 2:13) Me pure koe kia Iehova no te tauturu, ka oronga pu ua mai aia kia koe i tona vaerua tapu, te ka rauka i te akamaroiroi ia koe kare ua no “te rave” mari katoa ra no“te inangaro.” Teia te aite anga e ka akamaata te vaerua tapu o te Atua i toou inangaro kia rave i taau ka rauka i roto i te angaanga a Iehova e ka tauturu ia koe kia tupu i te pae vaerua. No reira, e irinaki i te mana o Iehova e kia akaketaketa i toou ngakau!

Akanoo i Taau Uaorai Au Akakoroanga

I toou manako pakari i te tavini maata tikai ia Iehova, te anoanoia ra koe kia akanoo i te au akakoroanga naau uaorai e rauka ei kia tupu i te pae vaerua. Ko tetai tamaine mapu Kerititiano, ko Mana, kua tuatua e: “Te akanoo anga i te au akakoroanga e tauturu maata ia kiaku. Kare e oki ki muri, ka rauka iaku i te tere ki mua ma te mataku kore. Ma te manako i te au akakoroanga, kua pure akatenga au kia Iehova no te aratakianga, e kua rauka iaku kia tere ki mua kare e tamanamanata anga.”

E mea tau taau au akakoroanga kia tika e kia rauka ua. I te tatau anga i tetai pene o te Pipiria i te au ra ravarai ka riro ei akakoroanga tau. Ka rauka katoa ia koe i te akamata i tetai angaanga kimikimi anga. Kia akatutu i teia ma tetai apinga tei roto i te reo Papaa, penei ka apii koe i te au tu o Iehova tei akapapaia i raro ake i te upoko tuatua e “Qualities by Name” i raro ake i te tata anga “Jehovah” i roto i te Watch Tower Publications Index. E 40 tata anga i reira te ka rauka ia koe i te akamanako, e kare e ekoko anga e ka akavaitata atu te kimikimi anga ia koe kia Iehova e te akaaraara anga ia koe kia rave maata ua atu nona ra. Ko tetai atu au akakoroanga te rauka ra penei ko te kapiti atu anga ki roto i te pau anga e tai ua taime i te uipaanga Kerititiano tataki tai ra e te inangaroia maira te aronga akarongorongo ra kia paupau atu, i te kite meitaki anga e penei e tai mema o te putuputuanga i te uipaanga katoa ra, e auraka e tuku e tai ra kia pati ma te kore e pure kia Iehova e te tuatua anga no runga iaia ki tetai ke.

Me kare koe i piri ake ki roto i te Apii Orometua Teokaratiki, e akakoroanga meitaki te reira naau. Kua rave ana ainei koe i te angaanga orometua papuriki? Me kare, penei ka inangaro koe kia rave i te angaanga kia riro mai ei papurutia kare i papetitoia. Te manako pakari anga i toou pirianga ma Iehova e te akatapu anga ia koe uaorai kiaia ko te takainga matauia te reira ka aru mai. E manganui te au mapu te tauta ra i te akono ua atu i to ratou akatapu anga na te itae anga i te angaanga orometua tamou.

Koi meitaki ei kia rauka te au akakoroanga i roto i toou oraanga, e matakite ra i te akatupu anga i tetai vaerua no te taemoemoanga. Ka kite koe i te rekareka maata i taau e rave ra me kare koe e akaaite ia koe uaorai ki tetai ke.​—Galatia 5:26; 6:4.

Peneiake te manako ra koe e kare koe e karape roa ana e e mea ngata te reira kia akanoo i te au akakoroanga tau. No reira e aru i te ako anga a te Pipiria: “E ariu mai i to taringa, e akarongo mai i te tuatua a te aronga pakari.” (Maseli 22:17) E kimi i te tauturu a toou nga metua me kore a tetai au Kerititiano pakari. Ko te au metua e ko tetai ua atu, ae, te anoanoia ra kia tau e kia akamaroiroi i roto i teia tumu nei. Te manako taomiia kia aruaru i tetai akakoroanga ta tetai i akanoo ra na ratou ka akakore atu ia i te rekareka o te aronga mapu e penei ka takore atu i te tumu no te akanoo anga i te au akakoroanga. Kua tupu te reira ki tetai tamaine, tei akakite mai e: “Kua akanoo toku nga metua i te au akakoroanga e manganui naku ra, mei te piri anga ki roto i te Apii Angaanga Orometua Teokaratiki, te piri anga ki roto i te angaanga koro, te papetitoanga, e kia riro mai ei painia. Kua rave au i te au tauta anga pakari kia taena taki taiia ratou. Me taenaia e tai akakoroanga, kare toku nga metua e akameitaki mai iaku inara, ka oronga mai kiaku i tetai atu akakoroanga kia aruaru. Tei tupu, e manako ua ana rai au e te oparaia nei kia taenaia te au akakoroanga. Kua roiroi au e kua manako e kare e tumuanga no te akatupuanga.” Eaa te tarevake? Te tau ra te au akakoroanga katoatoa, inara kare e nana uaorai te reira. Kia autu, ka tau koe kia akakeuia kia rave na mua i te akanoo anga i tetai akakoroanga naau uaorai!

E akamanako ia Iesu Karaiti. I tona aere mai anga ki te enua, kua kite aia e eaa ta tona Metua, ko Iehova, e tapapa maira mei iaia ra. Te rave anga i to Iehova ra anoano, kare ua e akakoroanga no Iesu, mari ra e angaanga kia akatupuia. Akapeea to Iesu manakoanga no tana ra angaanga? Kua karanga aia e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Kua rekareka a Iesu i te rave i to Iehova ra anoano e kua akono ua atu i te au tapapaanga a tona Metua. Mei te kai rai te reira na Iesu​—kua kite aia i te mareka anga e te merengoanga i te akaoti anga i te angaanga tei tapapaia ei ia ra. (Ebera 10:5-10) Ka rauka katoa ia koe i te kite i te mataora me akakeu meitakiia koe kia rave i ta toou nga metua e akamaroiroi maira ia koe kia rave.

Auraka e Akaroiroi i te Rave i te Takinga Meitaki

Me oti ia koe i te tuku i tetai manako akakoroanga, e tauta pakari kia rauka te reira. Te karanga ra a Galatia 6:9 e: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.” Auraka e irinaki ua ki runga i toou uaorai maroiroi me kore i te tu kite ra. Penei ka aravei atu koe i te au arairai anga e i tetai taime penei ka kite i te autu kore poto ua. Inara kua akapapu mai te Pipiria kia tatou e: “Auraka e akangaropoina [i te Atua] i toou katoa ra au aerenga; e nana e akakite kia koe i toou ra au arataa.” (Maseli 3:6) Na Iehova e tauturu mai ia koe ia koe e angaanga pakari ra i te itae i taau au akakoroanga.

Ae, na te tatanu anga i te anoano kia tavini ia Iehova te itae anga i te au akakoroanga i te pae vaerua, ka rauka ia koe i te rave ‘kia kite te tangata katoa i toou tupuanga.’ (1 Timoteo 4:15) I reira e rekareka ei koe i tetai oraanga puapinga i te tavini anga i te Atua.

[Tutu i te kapi 9]

Tatau anga i te Pipiria e te akamaaraara anga i taau i tatau ana ka akakeu ia koe kia tavini ia Iehova

[Tutu i te kapi 10]

Kua akono ua atu a Iesu i te au tapapaanga a tona Metua