Te Au Mapu Tei Akariro i to Iehova Ngakau kia Rekareka

Kua akapapaia teia au atikara nei na te au mapu tikai i roto i te Au Kite o Iehova. No reira, te akamaroiroi atu nei matou i te aronga mapu ou kia apii meitaki tikai i teia tumu manako e kia oronga mai i te au pau anga me raveia i te Apii Punanga Tiaki a te putuputuanga.

“E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”​—Maseli 27:11.

1, 2. (a) E akataka mai e ko te reka ua anga i te au mea o te ao te aite anga e kare koe e tau kia riro mai ei Kerititiano. (Roma 7:21) (e) Eaa taau i kite mei to Asapha ra akatauanga? (E akara i te pia, kapi 13.)

E AKAMANAKO ana e te okooko ra koe i te au kakau. Ia koe e akarakara ua ra, kua kite atu koe i tetai kakau e manea oki ia koe. I te akara anga kua tano meitaki kia koe te kara e te tu, e te akaari maira te moni e e mama tikai teia. Inara kua akara meitaki atu koe i te reira. Ma te poitirere, kua kite atu koe e kua veru te au tapa anga o te kakau, e e mako kore tikai te tui anga. Ko te kakau ra, e manea ia, e kino ra te maaniia anga. Ka kaimoumou ainei koe i taau moni ki runga i teia apinga kino nei?

² E akaaite atu ra i teia ki tetai turanga te ka aro atu koe ei mapu Kerititiano. I te akaraanga mua, te au mea o teia ao​—mei taua kakau rai​—penei i te akara anga e tu manea tikai. Ei akatauanga, penei te aere ra toou au oa apii ki te au pati tamataora anga, te kai ra i te au apinga akakona, te inu ra, te aere kapiti ra ma te tokorua, e te piri ra ki roto i te ainga tau kore. I tetai atianga, te reka ra ainei koe i taua tu oraanga? Te inangaro ra ainei koe i te tongi atu i ta ratou e tamanako ra e e rangatira? Me koia ia, auraka e viviki ua i te manako e te kino ra koe e kare e tau ana kia riro ei Kerititiano. Ko te tika anga, te akakite maira te Pipiria e te rauka ra i te ao i te akavare anga ririnui tikai​—e pera i tetai ua atu tangata te inangaro ra i te akamareka i te Atua.​—2 Timoteo 4:10.

3. (a) Eaa ra ei mea puapinga kore ei i te aruaru i te au mea o te ao? (e) Akapeea tetai Kerititiano i te akataka mai anga i te puapinga kore no te au apinga o teianei ao?

³ I teianei e akara vaitata atu ine, mei taau rai ka rave ki tetai apinga o te kakau taau e inangaro ra i te oko. E ui kia koe uaorai, ‘Eaa te tu o teia akatere anga o te au mea nei?’ Te karanga ra te Pipiria e “te ngaro ke nei teianei ao.” (1 Ioane 2:17) Ko tetai ua atu tamataora anga no reira mai e mea poto ua ia. Pera katoa, ko te tu akono tau kore i te Atua te kokoti ra i te au turanga kino. Kare e tau ana te reira. Ko tetai Kerititiano, tei akakoromaki ana i tana e kapiki ra e “te au mamae tei tupu mai mei te tuatau kaimoumou anga mapu ra,” te karanga ra e: “Penei e akara anga akaieie e te manea teia ao. E te inangaro maira te reira ia koe kia irinaki e ka rauka ia koe tona tu kanga kanga ma te kore e mamae. Inara kare roa teia e rauka. Ka taangaanga te ao ia koe, e me oti te reira, ka titiri ke ia koe e te reira.”a Eaa ra ka kaimoumou ei i toou mapu anga ki runga i taua tu oraanga puapinga kore ra?

Paruruanga Mei te “Kino”

4, 5. (a) I muri poto ua ake i tona matenga, eaa ta Iesu i pati i roto i te pure kia Iehova? (e) Eaa ra i tau ei teia pati anga?

⁴ I te kiteanga e kare e apinga puapinga ta teia akatereanga o te au mea nei e oronga mai, te aruaru ra te aronga ou i rotopu i te Au Kite o Iehova i te kopae i te anoano o teianei ao. (Iakobo 4:4) Ko koe ainei tetai o teia au mapu tiratiratu? Me koia ia, te akameitaki ia atu nei koe. E tika, kare i te mea ngoie i te patoi atu i te taomi anga a te oa e te kiteaia ra ei tuke anga, inara ka rauka i tetai ua atu i te tauturu ia koe.

⁵ I muri poto ua ake i tona matenga, kua pure a Iesu kia Iehova “kia tiaki” i tana au pipi no te “kino” ra. (Ioane 17:15) No te tumu meitaki i pati ei a Iesu i teia. Kua kite aia e kare te mataara no te tiratiratu ei mea ngoie no tana au pipi, noatu to ratou mataiti. No teaa ra? Ko tetai tumu, mei ta Iesu i akakite maira, ka aro atu tana au pipi i tetai enemi ririnui, kitea koreia​—tei “kino,” ko Satani te Tiaporo ra. Te karanga ra te Pipiria e ko teia mea ora vaerua kino ra ‘te aaere nei mei te liona ngunguru ra, i te kimi anga i te tangata e pou iaia.’​—1 Petero 5:8.

6. Akapeea tatou i kite ei e kare o Satani tangi aroa no te aronga mapu?

⁶ I roto i te tuatua enua, kua rave a Satani ma te mareka maata i te apai mai anga i te au ravenga kino roa atu ki rungao i te au tangata. E akamanako ana i te au tumatetenga kino tikai ta Satani i apai mai ki runga ia Iobu e tona ngutuare tangata. (Iobu 1:13-19; 2:7) Peneiake te maara ra ia koe te au nuti no te au tupu anga i toou uaorai tuatau te akaari maira i te tu o to Satani vaerua kino. Te kimi aere nei te Tiaporo, e i roto i tana kimi anga kia akapou ra, e kare aia e akaari ana i te aroa ki te au mapu. I te akamata anga te anere mataiti mua T.N., ei akatauanga, kua rave a Heroda i tetai ravenga i te tamate i te au tamariki tamaroa katoatoa i Betelehema tei tae ki te rua o te mataiti me kare te ou ra. (Mataio 2:16) Penei e ko Satani tei akakeu ia Heroda​—te tauta katoa anga kia takore i te tamaiti te ka riro mai a tetai ra ei Mesia taputouia na te Atua e ka apai mai i ta te Atua akavaanga ki rungao ia Satani! (Genese 3:15) Te taka meitaki ra e, kare o Satani aroa takinga meitaki no te aronga mapu. Ko tona akakoroanga anake ra kia akapou i te au tangata e manganui. E tika tikai teia i teianei, no te mea kua uriia mai a Satani mei te rangi mai ki te enua nei, “e riri maata oki tona, no te mea kua kite aia e e manga tuatau poto ua tona e toe nei.”​—Apokalupo 12:9, 12.

7. (a) Mei teaa to Iehova tuke anga maata mei ia Satani ra? (e) Eaa to Iehova manako no runga i toou rekareka anga i te oraanga?

⁷ E tuke maata kia Satani, tei “riri maata” ra, e “ngakau aroa” ra to Iehova. (Luka 1:78) Koia te roto tikai o te aroa. E tikai, te akatutu maira teia tu mekameka i Tei Anga ia tatou ra i ta te Pipiria e karanga ra e: “Ko te Atua oki te aroa.” (1 Ioane 4:8) Mei teaa te tuke i rotopu i te atua o teia akatereanga o te au mea nei e te Atua tei akameitakiia koe kia akamori atu! Ia Satani e kimi ra i te akapou, “kare rava [a Iehova] i anoano e kia mate atu tetai.” (2 Petero 3:9) Te akara ra aia i te oraanga o te tangata ravarai ei mea akaperepere​—kapiti atu ki toou. Me ako mai a Iehova ia koe i roto i tana Tuatua kia kore e riro i to teianei ao, kare aia e tauta ra i te arai i toou tu rekareka no te oraanga me kare te kotinga ra i toou rangatira anga. (Ioane 15:19) Ei tukeanga, te tiaki maira aia ia koe no te kino oki. Te inangaro ra toou Metua i te rangi ra kia rauka ia koe tetai apinga meitaki roa atu i to te au tamataora anga poto ua o teia ao. Ko tona anoano ra kia rauka ia koe “te oraanga tikai”​—te ora mutu kore i runga i te enua parataito. (1 Timoteo 6:17-19, NW) Te inangaro ra a Iehova kia autu koe, e te raurau maira aia ia koe kia rauka taua akakoroanga. (1 Timoteo 2:4) Pera katoa, te oronga maira a Iehova i tetai patianga takake kia koe. Eaa te reira?

“Kia Rekareka Toku Ngakau”

8, 9. (a) Eaa te apinga aroa ka rauka ia koe i te oronga kia Iehova? (e) Akapeea a Satani i te akakino anga ia Iehova, mei tei akatutuia mai i roto i te turanga o Iobu ra?

⁸ Kua oko ana ainei koe i tetai apinga aroa na tetai oa vaitata e oti kua akara atu i nga mata katakata o toou oa ma te poitirere e te marekaanga i te ariki anga i te reira? Penei kua manako maata ana koe e eaa te tu o te apinga aroa te ka tau na taua tangata ra. I teianei e akamanako ana i teia uianga: Eaa te tu o te apinga aroa ka rauka ia koe i te oronga ki Tei Anga ia koe, ki te Atua ra kia Iehova? I te akamata anga, penei e tu auouo tikai te manako. Eaa ta te Mana Katoatoa e anoano maira mei te tangata nei? Eaa tikai te ka rauka ia koe i te oronga atu kiaia e kare i rauka takere ana iaia ra? Kua pau maira te Pipiria ia Maseli 27:11 e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”

⁹ Penei mei taau rai i kite mei taau apii i te Pipiria, ko Satani te Tiaporo te akakino ra ia Iehova. Kua akaapa aia e ko tetai ua atu te tavini ra i te Atua te rave ra i te reira, kare no te aroa, mari ra no te au tumu noinoi. E tuku ia ratou kia ngata te mamae, ta Satani ia i akaapa, e ka akaruke viviki ratou i te akamori anga mou. Ei akaraanga, e akamanako ana, i ta Satani i tuatua kia Iehova no runga i te tangata tuatua tika ra ko Iobu: “Kare ainei tei koropiniia aia e koe, e tona ra are, e tana katoa ra au mea ravarai e pini ua ake? kua akameitaki koe i ta tona rima i rave ra, e kua maata tana apinga i te enua nei. Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata.”​—Iobu 1:10, 11.

10. (a) Akapeea tatou i kite ei e te akakoko maira a Satani i te tiratiratu tei maata ua atu i to Iobu ra? (e) Akapeea koe i piri atu ei ki roto i te maro anga o te tu ngateitei ra?

¹⁰ Mei tei akakiteia i roto i te papaanga Pipiria, kua akaao mai a Satani kare anake ua no to Iobu tiratiratu mari katoa ra no te aronga katoatoa tei tavini i te Atua​—kapiti atu ia koe. E tikai, i te tuatua anga no te au tangata katoa, kua tuatua maira a Satani kia Iehova e: “Riro oki ta te tangata katoa ra [kare ko Iobu ua mari ra ko tetai ua atu] ei oko i tona ora.” (Iobu 2:4) Te kite ra ainei koe i taau tuanga i roto i teia maro anga puapinga maata nei? Mei tei akakiteia mai ia Maseli 27:11, te karanga ra a Iehova e e apinga tetai ka rauka ia koe i te oronga kiaia​—e tumu anga nana kia oronga atu i tetai pau anga ki tei akakino maira iaia, ko Satani ra. E akamanako ana​—te kapiki maira te Ngateitei e Pini Ua Ake ia koe kia piri atu ki roto i te akakite anga i te maro anga maata roa atu no te au taime katoatoa. Mei teaa ra te apainga umere e te akaperepere anga noou ra! Ka rauka ainei ia koe i te akatupu i ta Iehova e pati maira ia koe? Kua rauka ia Iobu. (Iobu 2:9, 10) Mei ta Iesu i rave e pera katoa tetai ua atu i roto i te tuatua enua, kapiti atu te au mapu e manganui. (Philipi 2:8; Apokalupo 6:9) Ka rave rai koe i te reira. Inara, auraka e manako tarevake no runga i te reira, kare e turanga tuke i roto i teia tumu. Na roto i taau raveanga angaanga, ka akaari koe e te turu ra koe i ta Satani akakino anga me kare i ta Iehova pau anga. Ko teea taau ka iki kia turu?

Te Manako Maira a Iehova ia Koe!

11, 12. E tuke ainei kia Iehova e me ka iki koe i te tavini iaia me kare ra? E akataka mai.

¹¹ E tumu maata tikai ainei kia Iehova e ko teea te iki anga ka rave koe? Kare ainei e kua rava ua te au tangata tei vai tiratiratu takere ana kia oronga aia i tetai pau anga tau kia Satani ra? E tika, kua akaapa te Tiaporo e kare tetai i tavini ia Iehova no te aroa, no reira kua akapapu takere ia mai te akaapa anga e e pikikaa. Noatu rai, te inangaro ra a Iehova ia koe kia rave i tona tua no runga i te maro anga o te tu ngateitei no te mea te manako maira aia ia koe ei tangata tataki tai. Kua tuatua a Iesu e: “To kotou Metua i te ao ra, kare ïa i inangaro e kia mate tetai o teianei au tangata rikiriki.”​—Mataio 18:14.

¹² Te taka meitaki ra e, te manako maira a Iehova i te aerenga o taau e iki ra. Maata atu i te reira, te akakeu ia ra aia e te reira. Te akataka meitaki maira te Pipiria e e au manako ngakau oonu to Iehova tei akakeuia e te au angaanga meitaki me kare te kino a te au tangata. Ei akatauanga, te meameaau putuputu anga te au Iseraela, kua “akaongoongo atu” ia Iehova. (Salamo 78:40, 41) I mua ake te Tiruvi i te tuatau ia Noa, “e kino maata to te tangata i te enua nei,” ko Iehova ra kua “ongoongo rava akera tona ngakau.” (Genese 6:5, 6) E akamanako ana e eaa te aite anga o teia. Me ariki koe i te aerenga tarevake, ka akatupu koe i te manako mamae ki Tei Anga ra ia koe. Kare te aite anga o teia e e paruparu te Atua me kare te tutara ra na te manako ngakau ua. Kareka ra, te aroa maira aia ia koe e te manako maira no runga i toou tu meitaki. I tetai tua, me rave koe i te tika, kua rekareka to Iehova ngakau. Te mataora ra aia kare anake no te mea e e pau anga ke atu tana i te oronga kia Satani mari katoa ra no te mea kua riro mai aia i teianei ko toou Tutaki. E ko tetai apinga te reira te inangaro ra aia kia riro mai. (Ebera 11:6) E Metua aroa toou ko te Atua ra ko Iehova!

Te Au Akameitaki Anga Maata i Teianei

13. Akapeea oki te tavini anga ia Iehova i te apai mai anga i te au akameitaki anga i teianei?

¹³ Te au akameitaki anga te aere maira i te tavini anga ia Iehova kare e kitea uaia i te tuatau ki mua. Kua akameitakiia te au mapu e manganui i roto i te Au Kite o Iehova ma te rekareka e te merengoanga i teia taime nei, e no te tumu meitaki tikai. “Te akonoanga a Iehova, e mea tika ïa, e rekarekaʼi te ngakau,” i tata ei te tata taramo. (Salamo 19:8) E meitaki atu i tetai tangata ra, kua kite a Iehova eaa te mea meitaki no tatou. Na roto i te peroveta ko Isaia, kua tuatua mai a Iehova e: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”​—Isaia 48:17, 18.

14. Akapeea e rauka ei i te au kaveinga Pipiria i te tauturu ia koe kia kopae i te tamamae anga no te kaiou?

¹⁴ Te aru anga i te au kaveinga Pipiria te tauturu ra ia koe kia kopae i te mamae maata e te ngakau mamae. Ei akaraanga, te karanga maira te Pipiria e ko te aronga tei akatupu i te anoano no te moni ra “kua ko mama rava ia ratou uaorai i te iriea e manganui.” (1 Timoteo 6:9, 10) Kua kite ainei tetai o toou au oa i te tika anga pakari o teia irava nei? Ko etai au tane mapu e te au vaine mapu kua akateiaaia e te kaiou no te mea e mea tau kia rauka ia ratou te au kakau ou oko maataia e te au apinga ou no te kite. Kua akateiaaia e te au tutaki anga roa te tuatau, e te teitei i te moni no te au apinga kare roa e rauka ia koe i te tutaki e tu mamaeia no te tavini anga!​—Maseli 22:7.

15. Na roto i teea au mataara te paruru anga te au kaveinga Pipiria ia koe mei te tamamae anga tei akatupuia mei te ainga tau kore ra?

¹⁵ E akamanako katoa i te tumu no te ainga tau kore. I roto i te ao i te au mataiti tataki tai, e manotini ua atu te aronga ou kare i akaipoipo kua nui ra. Kua anau etai i tetai tamaiti kare ratou e inangaro me kare e kite i te utuutu. Kua ariki atu tetai i te titirianga pepe e kua tutaki i te tutaki anga no tetai akava ngakau tamamaeia ra. I na te vaira tetai au mapu tane e te au vaine tei tuia e tetai maki ainga piri, mei te AIDS. Ko tetai tei kite ia Iehova, ae, ko te tupu anga maata roa atu ko tetai pirianga akakinoia kia Iehova.b (Galatia 5:19-21) Ko tetai tumu meitaki, te karanga te Pipiria e: “E rere ke atu i te akaturi.”​—1 Korinetia 6:18.

Tavini Anga i “te Atua Mataora”

16. (a) Akapeea tatou i kite ei e te inangaro maira a Iehova ia koe kia rekareka i toou mapu anga? (e) Eaa ra a Iehova i akanoo mai ei i te au ravenga no te arataki anga kia aru koe?

¹⁶ Kua akataka mai te Pipiria ia Iehova e ko “te Atua mataora.” (1 Timoteo 1:11, NW) Te inangaro ra aia kia mataora katoa koe. Ko te tika, te karanga tika ra tana uaorai Tuatua e: “Kia rekareka i to ou anga. Kia mataora ia koe e ou ra rai.” (Koheleta 11:9, Today’s English Version) Inara te kite mamao atura a Iehova i te turanga o teianei e te kite ra i te au tupu anga kua roa te tuatau no te tu meitaki e te kino. No reira aia i ako mai ei ia koe e: “E tenana e akamanako i Tei anga ia koe i to ou anga ra, kare i tae ki te au rā kino ra, e kare i tae ki te au mataiti, e karangaʼi koe ra e, Kare rava oku e mataora anga.”​—Koheleta 12:1.

17, 18. Akapeea tetai Kerititiano mapu i te akakite anga i tona mataora i te tavini anga ia Iehova, e akapeea e rauka ai ia koe i te kite i taua rekareka ra?

¹⁷ I teia tuatau, e manganui te au mapu kua kite i te mataora maata i te tavini anga ia Iehova. Ei akaraanga, kua tuatua mai a Lina e 15 mataiti e: “Kua rauka iaku te akapapuanga e te ngateitei kiaku uaorai. E kopapa meitaki toku no te kopae anga i te kai avaava e te au apinga akakona. E aratakianga puapinga toku tei orongaia mai kiaku na roto i te putuputuanga te tauturu ra iaku kia tamaki atu i te taomianga kino a Satani. E mata mataora toku no te akamaroiroianga taokotai tei orongaia mai i te Are Uipaanga Patireia. Tei meitaki maata atu, e manakonako anga meitaki roa atu toku no te oraanga mutu kore i runga i te enua.”

¹⁸ Mei ia Lina rai, e manganui te au mapu Kerititiano kua tamaki pakari atu no te akarongo, e te apai maira teia i te rekareka kia ratou. Kua kite ratou e ko to ratou oraanga​—noatu te au tuatau akaaoanga​—e akakoroanga tika tikai e e tuatau tika tikai to mua. No reira, e rave ua atu i te tavini i te Atua te manako tikai maira ia koe. E akarekareka i tona ngakau, e nana e akarekareka mai ia koe i teianei e e tuatau ua atu!​—Salamo 5:11.

[Au Tataanga Rikiriki i Raro]

Maara Ainei ia Koe?

• Eaa te kino te aro atura koe mei te “kino” ra, ia Satani ra?

• Akapeea koe e akarekareka ei i to Iehova ngakau?

• Akapeea te Pipiria i te akaari mai anga e te manako maira a Iehova ia koe?

• Eaa etai au akameitaki te aere maira no te tavini anga ia Iehova?

[Pia/Tutu i te kapi page 13]

Kua Vaitata Tetai Tangata Tuatua Tika i te Turoriia

E tangata maata ngati Levi a Asapha no te akatangi imene i te iero o Iehova i Iseraela taito. Kua atu katoa aia i te au imene te taangaangaia ra i roto i te akamorianga na te katoatoa. Inara, noatu tana au angaanga takake, no tetai tuatau kua kite a Asapha iaia uaorai i te inangaro anga i te tu akono Atua kore o tona au oa, i te akara anga te aati ra i te au ture a te Atua ma te kore e utunga. “Kua vaitata toku vaevae i te paeke; me turori oki toku takainga,” ta Asapha i akatika i muri mai. “Iaku i vareae i te aronga neneva, ka kite ei au i te meitaki o te aronga kino ra.”​—Salamo 73:2, 3.

I muri mai, kua aere atu a Asapha ki te ngai tapu o te Atua e kua pure no runga i te reira. Ma te orama pae vaerua akaouia, kua marama iaia e te rikarika ra a Iehova i te kino e, kare e roaia, ka kokoti te aronga kino e te aronga tuatua tika i ta ratou i ruru ana. (Salamo 73:17-20; Galatia 6:7, 8) Ko te tika, tei runga te aronga kino i te ngai pateka. I te openga, ka kite ratou i tetai topa anga me akapou a Iehova i teia akatere anga tau kore i te Atua.​—Apokalupo 21:8.

[Au Tutu i te kapi 15]

Te manako maira a Iehova ia koe, kareka ra to Satani akakoroanga ra kia akapou ia koe

[Tutu i te kapi 16]

E manganui te au mapu te kite ra i te mataora maata roa atu na te tavini anga ia Iehova ma te au taeake Kerititiano