Kua Rauka ia Etai te Au Pauanga

E MIRIONI ua atu te au tangata te pure ra. Kua irinaki etai e kua pauia ta ratou au pure. Ko etai e manako ana e me te akarongoia maira ta ratou au pure. Noatu rai te kimi ra tetai i te au pauanga inara kare i manako i te oronga i ta ratou pati anga na roto i te pure ki te Atua.

Kua akataka te Pipiria i te Atua mou e ko “tei akarongo i te pure.” (Salamo 65:2) Me pure koe, kua papu ainei ia koe e te aere ra taau au pure ki te Atua mou? Ko taau au pure ainei tetai ka pauia mai e ia?

No te tangata e manganui i te au tuanga katoa o te enua, kua akapapuia mai te au pauanga e ae! I akapeea i rauka ei ia ratou te au pauanga? Eaa ta ratou i kite?

Te Atua​—Koai Aia?

Ko tetai puapii i Potukara tei apiiia e te au paretenia e te au orometua kua akono ngakau tae tikai i tona akarongo. I te tauianga e te akarukeanga te akonoanga i te au ravenga tei apiiia ana kiaia e e puapinga maata, kua oripu ua tona manako. I te teretere aere anga kua akamatauia aia ki te au tu Orieni no te akamorianga, e kua akamata aia i te manako e me e Atua mou rai tetai. Ka akapeea ra aia me akamori? I te uianga aia ki tona orometua no runga i te au mea i roto i te Pipiria, kua kopaeia tana au uianga, e kua mareka kore aia.

Na te akonoanga Katorika i tua aere i tetai au aenga pepa i roto i te oire o teia puapii kia akamatakite i te au mema e auraka e tuatua ki te Au Kite o Iehova. Inara kua vai tamou ua atu tana au uianga. I tetai ra te aere mai anga te nga Kite ki tona ngutupa, kua akarongo aia e kua akaari i te inangaro no tana e akarongo ra. Ko te taime mua te reira i tona tuatua anga kia ratou.

Kia rauka tana au pauanga ki te au uianga e manganui, kua akamata teia vaine i te apii i te Pipiria ki te nga Kite. I te au epetoma taki tai, e papaanga roroa tana no te au uianga e tiaki ra ia raua. Kua inangaro aia i te kite i te ingoa o te Atua, me e Atua mou tetai, me te ariki maira aia i te taangaanga anga i te au itoro i roto i te akamorianga, e te vai ua atura. Kua akara aia e pouroa te au pauanga tei orongaia mai kiaia no roto mai i te Pipiria, kare e au manako na raua uaorai, no reira kua poitirere aia e kua reka i tana e apii ra. Ma te marie ua, kua rauka iaia te au pauanga ki tana au uianga e manganui. I teia ra, te akamori nei aia ia Iehova ma te vaerua e te tuatua mou, mei ta Iesu Karaiti i akakite mai e ko “te aronga akamori tika ra” ka akapera rai.​—Ioane 4:23.

I Tiri Ranaka, e tatau putuputu kapipiti ana tetai ngutuare tangata i te Pipiria, inara kare i rauka ana ia ratou te au pauanga ki te au uianga e manganui te puapinga maata ra kia ratou. Noatu e te inangaro ra ratou i te tauturu, kare e rauka i to ratou orometua i te oronga atu i te reira. Inara, kua atoro te Au Kite o Iehova ia ratou e kua akaruke i te au puka tauturu a te Pipiria kia ratou. I muri mai, i te akakite anga te Au Kite o Iehova i te au pauanga puapinga maata ki te ngutuare tangata no ta ratou au uianga Pipiria, kua ariki ratou i tetai apii Pipiria. Ko ta ratou i kite ana i roto i ta ratou au apii kua inangaro tikai ratou.

Noatu rai, na te apiianga akonoanga tei apiiia i te tamarikianga i arairai i te vaine i te kite anga e ko te Metua o Iesu Karaiti ko “te Atua mou ra,” mei ta Iesu uaorai i tuatua ana. (Ioane 17:1, 3) Kua apiiia ana aia e kua aiteite a Iesu ki te Metua e ko teia “mea muna” nei kare e ekokoia. Ma te ngakau tae e te aruaru, kua pure aia kia Iehova, i te taangaanga anga i tona ingoa, e kua pati atu iaia kia akaariia mai kiaia e koai a Iesu. I reira kua akara makitoro marie akaou aia i te au irava. (Ioane 14:28; 17:21; 1 Korinetia 8:5, 6) Mei te mea e kua topa tetai mea no runga i tona mata mei te poa ika te tu, kua marama aia i te kite i teianei e ko Iehova​—Tei Anga i te rangi e te enua e te Metua o Iesu Karaiti​—te Atua mou.​—Isaia 42:8; Ieremia 10:10-12.

Mamae Anga​—No Teaa Ra?

Kua mamae te tangata ko Iobu i tetai tu maata rava. Kua tamate pouroa ia tana tamariki i roto i tetai uriia, e kua riro mai aia ei putaua. Kua mamae katoa aia i te maki mamae e kua akakoromaki atu i te taomi anga mei te au oa pikikaa. I rotopu katoa i teia, kua rave a Iobu i te au tuatua tau kore. (Iobu 6:3) Inara kua manako te Atua i te au turanga. (Iobu 35:15) Kua kite aia e eaa to roto i to Iobu ngakau e kua oronga i te ako anga te anoanoia ra e Iobu. Te rave katoa ra aia i te reira no te au tangata i teia tuatau.

I Motomapiki, e tai ngauru ua rai o Castro mataiti te mate anga tona metua vaine. Kua mii tikai aia. “Eaa ra aia i mate ei e te akaruke mai anga ia matou?” i ui ei aia. Noatu e kua utuutuia aia e te nga metua mataku i te Atua, kua manako oripu ua aia. Eaa te ka akapumaana i tona manako e tona ngakau? Kua kitea e ia te pumaana i te tatau anga i tetai Pipiria Chichewa (Teteua) meangiti e te uriuri anga i te reira ki tona au tuakana.

Ma te marie ua, kua marama ia Castro e kua mate tona metua vaine, kare e no te tu tika kore i te tua o te Atua, mari ra no te ara tei akatuangaia mai. (Roma 5:12; 6:23) Na te taputou a te Pipiria no tetai tuakaou anga i oronga mai i te pumaana maata rava kiaia no te mea kua kite aia i roto i reira te tumu anga i te irinakianga e ka kite akaou aia i tona metua vaine. (Ioane 5:28, 29; Angaanga 24:15) Ma te mii, e a mataiti i muri ua mai, kua mate tona metua tane. Inara i teianei kua rauka meitaki ia Castro i te autu i te ngere anga. I teia ra, e inangaro tona ia Iehova e te taangaanga tiratiratu ra i tona oraanga i roto i te angaanga a te Atua. Kua kiteaia tona rekareka e te katoatoa tei kite iaia.

E manganui te au tangata kua ngere i te aronga tei akaperepereia e kua kite i te pumaana i roto i taua au tuatua mou Pipiria ra tei apai mai ana i te pumaana kia Castro. Ko etai tei kite i te tu ngata maata no te au angaanga a te aronga kino ra kua ui, mei ia Iobu rai e: “Eaa te mea i oraʼi te aronga kino nei?” (Iobu 21:7) Me akarongo tikai te au tangata eaa ta te Atua i karanga mai na te pauanga i roto i tana Tuatua, ka kite ratou e ta te Atua tu i te rave anga i te au tumu te angaanga tikai ra ei meitaki no ratou.​—2 Petero 3:9.

Ko Barbara, tei utuutuia i Marike, kare i kite tika ana i te au rikarika anga o te tamaki. Inara kua tupu mai aia i rotopu i tetai ao tamaki. Te au ripoti no te au kino o te tamaki ra ko te au nuti ia i te au ra ravarai. I te tuatau o tana au apii i te apii, kua manamanata aia no te au tupuanga tuatua enua tei akatueraia i roto i tetai au mataara i te akaraanga e kare e papu ana. Na teaa i akatupu i te reira? Te manako maira ainei te Atua e eaa te tupu nei? Kua irinaki aia e e Atua tetai, inara kua marikonga kore ua tona au manako no runga iaia.

Inara, kua taui marie to Barbara akara anga i te oraanga i te taokotaianga ma te Au Kite o Iehova. Kua akarongo aia kia ratou e kua apii i te Pipiria ma ratou. Kua aere aia ki te au uipaanga i tetai Are Uipaanga Patireia. Kua tae katoa aia ki tetai au uruoaanga maata a ratou. Tei maata atu, me ui aia i te au uianga, kua akara aia e kare i orongaia mai kiaia te au manako tukeke mei te Au Kite tukeke ra. Mari, kua tuatua okotai te Au Kite no te mea kua akatumuia to ratou manako anga ki runga i te Pipiria.

Kua tou atu te Au Kite i te akapapu anga mei te Pipiria e na Satani te Tiaporo e akakeu nei i te ao, tona tutara, e te akaata ra te reira i tona vaerua. (Ioane 14:30; 2 Korinetia 4:4; Ephesia 2:1-3; 1 Ioane 5:19) Kua akataka ratou e ko te au tupuanga ta Barbara i manamanata ana kua akakite takereia mai i roto i te Pipiria. (Daniela, pene 2, 7, e te 8) na te Atua i akakite takere mai ia ratou no te mea kua rauka iaia i te kite i te tuatau ki mua me iki aia i te rave i te reira. Ko etai o teia au tupuanga, na te Atua i akatupu. Ko etai ra kua akatika ua aia kia tupu. Kua akaari te Au Kite kia Barbara e kua akakite katoa mai te Pipiria i te au tupuanga meitaki e te kino i to tatou tuatau nei e te akataka anga i to ratou aiteanga. (Mataio 24:3-14) Kua akaari ratou kiaia i ta te Pipiria au taputou no tetai ao ou te ka autu te tuatua tika e ka riro te mamae ei apinga taito.​—2 Petero 3:13; Apokalupo 21:3, 4.

Ma te marie ua, kua akamata a Barbara i te kite marama e kare ko te Atua ko Iehova tei apa no te mamae o te tangata ra, kare aia e arai i te reira na te maro anga i te au tangata kia akarongo ki tana au akauenga me iki ratou i te kopae i te reira. (Deuteronomi 30:19, 20) Kua rave te Atua i te au akapapaanga te ka rauka te ora ia tatou e tuatau ua atu i roto i te tu mataora, inara te oronga maira aia kia tatou i teianei i te tuatau kia akaari e me te noo rotai nei tatou ma tona au arataa tuatua tika. (Apokalupo 14:6, 7) Kua iki a Barbara i te apii i te au umuumuanga a te Atua e kia akono ia ratou. Kua kite katoa aia i roto i te Au Kite o Iehova i te tu aroa ta Iesu i tuatua ana te akataka ra i tana au pipi mou.​—Ioane 13:34, 35.

Ka puapinga katoa koe mei te au akapapaanga tei tauturu ana iaia.

E Oraanga ma te Aiteanga

Pera katoa te aronga i te akara anga e te aere meitaki ra to ratou oraanga penei ka kimi i te au pauanga ki te au uianga tei tamanata ana ia ratou. Ei akatauanga, ko Matthew, e tamaiti mapu i Peritane, e manako ua ana i te anoano oonu kia kimi i te Atua mou e te akakoroanga no te oraanga. Kua mate tona metua tane ia Matthew e 17 mataiti ra. I muri mai, kua rauka ia Matthew tetai pepa apii teitei i roto i te akatangi anga imene. Kua kite i reira aia i tetai kiteanga maata i te puapinga kore o tona tu anoano apinga nui no te oraanga. Kua akaruke aia i te kainga e kua noo ki London, e ki reira ra i piri atu ei aia ki te au apinga akakona, te ngai tarekareka anga, te akaraanga etu, te purepure, e te apiianga Zen Buda e tetai ua atu au apiianga​—pouroa te kimi ra i tetai tu merengoanga no te oraanga. Ma te taitaia kua kapiki aia ki te Atua kia tauturu mai iaia kia kitea mai te tuatua mou.

E rua ra i muri mai kua aravei a Matthew i tetai oa taito e kua akataka atu i tona turanga. Kua apii ana teia tangata ma te Au Kite o Iehova. Te akaariia anga kia Matthew ia 2 Timoteo 3:1-5, kua poitirere aia i te tika anga i te akataka anga a te Pipiria i te ao takapini ia tatou. I te tatau anga aia i te Ako i te Maunga ra, kua akakeu te reira i tona ngakau. (Mataio, pene 5-7) I te akamata anga kua tapupu aia no te mea kua tatau ana aia i etai tataanga te akakino ra i te Au Kite o Iehova, inara i te openga ra kua iki aia i te aere atu ki te au uipaanga ki tetai Are Uipaanga Patireia te vaitata maira.

Kua rekareka a Matthew i tana i akarongo e kua akamata i te apii i te Pipiria ma tetai o te aronga pakari o te putuputuanga. Kare i roa ana kua kite aia e ko tana e apii ra ko tana ia i kimi ana, te pauanga ki tana pure i mua ana ki te Atua. Kua kite aia i te au akameitaki anga i te akarukeanga aia i te au ravenga kare e marekaia ana e Iehova. Iaia e tatanu ra i tetai mataku tau tikai i te Atua, kua akakeuia aia kia apai mai i tona oraanga kia rotai ki ta te Atua ra au akauenga. Kua kite a Matthew i taua oraanga ra e ko tetai aiteanga tikai ia.​—Koheleta 12:3.

Kare i akanooia ana e ka rauka ia Matthew me kare i tetai ua atu tei taikuia i roto i teia atikara tetai mataara merengoanga no te oraanga. Noatu rai, kua kite ratou e e akakoroanga aroa ta te Atua ko Iehova te takave pouroa ra i tei iki rekareka i te akarongo ki tana au akauenga. (Angaanga 10:34, 35) Te kapiti maira taua akakoroanga i te oraanga mutu kore i roto i tetai ao tei akarangatiraia mei te tamaki, tei akarangatiraia mei te maki e te onge​—te akarangatira katoa anga mei te mate. (Isaia 2:4; 25:6-8; 33:24; Ioane 3:16) Te inangaro ra ainei koe i te reira? Me koia ia, ka rauka ia koe i te apii maata atu kia kitea te taviri ki te oraanga merengoanga na te aere anga ki te au uipaanga akatumuia ki runga i te Pipiria i tetai Are Uipaanga Patireia o te Au Kite o Iehova. Te pati pumaanaia atu nei koe kia rave i te reira.

[Tutu i te kapi 7]

E pure akatenga ki te Atua, i te taangaanga anga i tona uaorai ingoa

[Tutu i te kapi 7]

E apii i te Pipiria ma te aronga te apii tikai ra e eaa to roto i reira

[Au Tutu i te kapi 7]

E aere ki te au uipaanga i te Are Uipaanga Patireia

[Akameitakianga no te Tataanga i te kapi 4]

Hiker: Chad Ehlers/Index Stock Photography