Au Uianga a te Aronga Tatau
E tarevake ainei kia tamateia tetai au manu kainga tei maki tikai me kare kua ruaine ra?
E manganui te au tangata kua kite i te au manu tuke tuke ei tumu anga no te inangaro anga e te mataora. Ko etai au manu rarata ra kua riro ei au manu kainga oa meitaki. Ei akatauanga, kua kitea ia te au puakaoa i te akaari ra ma te tau i te akarongo e te inangaro i to ratou au pu. No reira, te pirianga no te au tangata ki taua au manu kainga te marama uaia ra, no tetai manu kainga ta ratou tikai i akono ana kua roa te au mataiti.
Inara, kare e roa ana te oraanga o te maata anga o te au manu. Penei ka ora te au puakaoa e 10 ki te 15 mataiti e tere atu, mei te au kiore ngiao, tei runga ua i te tu. I te mataiti ruaine, penei ka rokoia te au manu kainga i te maki e te kino te ka tamanamanata i to ratou pu, tei maara ana i te au mataiti ou anga e te maroiroi maata o teia au manu nei. E tarevake ainei kia takoreia taua au manu mei to ratou mamae anga, kia tamateia atu ratou?
Ka inangaro tetai Kerititiano i te rave kia rotai ma te anoano o te Atua me akono i te au manu. Te takinokino anga ia ratou kare rava e tau ana ki te anoano o te Atua, te karanga ra tana Tuatua e: “E akono rai te tangata tuatua-tika ra i tana ra puaka kia ora.” (Maseli 12:10) Inara, kare te aiteanga o teia e te manako maira te Atua i te au manu mei tei manakoia ra e ia no te au tangata. I te anga anga te Atua i te au tangata, kua akaari aia i te tuke tikai i rotopu ia ratou e te au manu. Ei akaraanga, kua oronga aia ki te au tangata i te manakonako anga no te ora mutu kore, inara kare aia i oronga ana i teia manakonako anga ki te au manu. (Roma 6:23; 2 Petero 2:12) Ko Tei Anga ra, tei iaia te tikaanga kia oronga i te pirianga tau ki rotopu i te au tangata e te au manu.
Kua akakite mai a Genese 1:28 kia tatou e eaa taua pirianga. Kua karanga atura te Atua ki nga tangata mua e: “E kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.” Tei aiteite rai, te karanga ra ia Salamo 8:6-8 e: “Kua tukuia e koe [te Atua] te au mea katoa nei ki raro ake i ona [tangata] vaevae: Te au mamoe e te au puakatoro katoa; e te au puaka katoa o te ngangaere ra, Te au manu o te reva, e te ika o te tai.”
Kua akataka meitaki mai te Atua i te reira e kia taangaanga meitakiia te au manu e kia taiaia e te tangata. Ei akaraanga, ka taangaangaia to ratou pakiri ei au kakau. Kua oronga katoa te Atua i te tika anga no te au tangata kia kai i te kiko o te au manu i muri ake i te Vaipuke i to Noa tuatau, i te kairo anga atu i te kai o te rakau rikiriki tei orongaia atu kia ratou i mua ana.—Genese 3:21; 4:4; 9:3.
Kare e akatikaia teia kia tamate akakoroia te au manu no te tarekareka ua. Ia Genese 10:9, kua akataka mai te Pipiria ia Nimeroda ei “tangata arumaki ririnui.” Inara te karanga maira taua irava rai e te tuku ra teia iaia “i te patoi anga ia Iehova.” (NW)
No reira, i te tangata e tutara ra i runga ake i te au manu, kare e tau kia akakino aia i taua mana taoonga mari ra kia taangaanga i te reira kia rotai ki te au kaveinga no te Tuatua a te Atua. Penei te kapiti ra teia kia kore e tuku i tetai manu kainga kia mamae ua no te ruaine ua oki, te kino tikai, me kare te maki kino ra. I roto i taua turanga, tei runga i te Kerititiano te apainga kia iki e eaa te ka raveia. Me ka iki aia e e mea aroa ia kia kore e tuku ua atu i tetai manu kainga kia mamae ua kare e manako anga e ka meitaki mai, penei ka iki aia i reira i te tamoe atu i te reira.