Akapeea Tatou i te Manako Anga i te au Tangata i te Vaitataanga Mai te Ra o Iehova?
“Kare ua a Iehova e taroaroa i tana taputou, . . . inara te akakoromaki ra aia no kotou no te mea kare aia e anoano kia akapouia tetai mari ra te anoano ra aia kia rauka te tataraara i te katoatoa.”—2 PETERO 3:9, NW.
1, 2. (a) Akapeea a Iehova i te manako anga i te au tangata i teia tuatau? (e) Eaa te au uianga te ka rauka ia tatou i te ui kia tatou uaorai?
E ANGAANGA ta te au tavini o Iehova kia “akariro i to te pa enua katoa ei pipi.” (Mataio 28:19) Ia tatou e akatupu ra i teia tukuanga angaanga e te tapapa ra i “te rā maata o Iehova,” ka anoanoia tatou kia manako i te au tangata mei tana e manako ra. (Zephania 1:14) E ka akapeea te reira? Kua tuatua maira te apotetoro ko Petero e: “Kare ua a Iehova e taroaroa i tana taputou, mei ta tetai au tangata e manako ra e te akaroaroaia ra, inara te akakoromaki ra aia no kotou no te mea kare aia e anoano kia akapouia tetai mari ra te anoano ra aia kia rauka te tataraara i te katoatoa.” (2 Petero 3:9, NW) Te manako ra te Atua i te au tangata ei aronga tataki tai ma te tika anga e ka rauka te tataraara. Tona “inangaro i te tangata katoatoa kia ora, e kia rauka te kite i te tuatua-mou.” (1 Timoteo 2:4) Eaa ra, te rekareka ra a Iehova me “ariu maira te tangata kino i tona aerenga kia ora”!—Ezekiela 33:11.
2 Te akono atura ainei tatou uaorai i to Iehova manako no te au tangata ra? Mei iaia rai, te manako ra ainei tatou i te aronga tataki tai no te iti tangata katoa e te pa enua kia riro mai ei “mamoe no tana ra koro”? (Salamo 100:3; Angaanga 10:34, 35) Ka akara ana tatou i nga akaraanga e rua te akaari maira i te puapinga no te rauka anga to te Atua ra manako. I nga akaraanga e rua, kua vaitata mai te akapouanga, e kua orongaia ki te au tavini o Iehova te akamatakiteanga no teia tika. E puapinga maata tikai teia nga akaraanga ia tatou e tapapa ra i te ra maata o Iehova.
Rauka ia Aberahama to Iehova Manako
3. Eaa ra to Iehova manako no te au tangata o Sodoma e Gomora ra?
3 Te akaraanga mua ko te pateriareka tiratiratu ko Aberahama e nga oire kino ko Sodoma raua ko Gomora. I te akarongo anga a Iehova i te ‘aue maata o Sodoma, e to Gomora,’ kare aia i akapou viviki ana i nga oire e tona au tangata katoatoa e noo ra i reira. Kua rave aia i te akarakaraanga na mua. (Genese 18:20, 21) Kua tonokia atu e rua angera ki Sodoma, kua noo raua ki roto i te are o te tangata tuatua tika ra ko Lota. Te po i tae mai ei nga angera, “kua katoatoa maira te tangata, te tangata o taua oire ra . . . ko tei ou, e tei ruaine, kua akapini maira i taua are ra,” i te anoano anga kia rave i te ainga pirianga tane e te tane ki nga angera ra. Te taka meitaki ra e, ko te turanga viivii tikai o te au tangata i roto i te oire te akapapu maira e e mea tau kia akapouia atu. Inara, kua akakite atura nga angera kia Lota e: “Koai ma ua ake i toou ra i ko nei? Ko taau ra au unonga, e taau ra au tamariki tamaroa, e taau ra au tamaine, ko taau katoa rai i te oire nei, e rave, e arataki ki vao i taua ngai nei.” Kua akatuera mai a Iehova i te mataara kia akaoraia etai au tangata te noo ra i taua oire, inara i te openga, ko Lota anake ua e tana nga tamaine tokorua tei ora atu i te akapouanga.—Genese 19:4, 5, 12, 16, 23-26.
4, 5. Eaa ra a Aberahama i pati akatenga ai no te au tangata o Sodoma, e te rotai ra ainei tona manako no te au tangata ma to Iehova ra?
4 E teianei, ka oki akaou ana tatou ki te tuatau i te akaari mai anga a Iehova i tona akakoroanga i te akarakara anga i nga oire ia Sodoma raua ko Gomora. I pati akatenga atu ei i reira a Aberahama e: “Peneiake e rima ngauru ua tangata tuatuatika tei taua oire ra; e akapou rai koe, kare koe e akakore i te ara a to taua ngai ra, i taua au tangata tuatua-tika e rima ngauru i roto ra? Auraka roa oki koe e akapera, e ta katoaia te tangata tuatua-tika e te akono kore i te Atua; e kia okotai katoa arite i te tangata tuatua-tika e te akono kore i te Atua, auraka rava ïa. Kare ainei e mea tika ta te Akava i to te ao katoa nei e rave?” Kua tuatua a Aberahama i te tuatua “auraka” e rua taime. Mei tana rai i kite, kua kite a Aberahama e kare a Iehova e akapou atu i te aronga tuatua tika ma te aronga kino ra. Te karanga anga a Iehova e kare aia e akapou i to Sodoma me te vai ua ra e ‘rima ngauru tangata tuatua-tika e kitea i roto i taua oire ra,’ kua akameangiti marie mai a Aberahama i te numero e tae ua atu te reira ki te okotai ngauru.—Genese 18:22-33.
5 Ka akarongo atu ainei a Iehova ki te au patianga a Aberahama me kare ratou e rotai ana ki tona uaorai manako? Kare roa. Ei “oa no Iehova,” i te akaraanga kua kite e kua akono atu a Aberahama i Tona manako. (Iakobo 2:23, NW) Te ariu atu anga a Iehova i tona manako kia Sodoma raua ko Gomora, kua inangaro aia i te akamanako i te au patianga a Aberahama. No teaa ra? No te mea “kare [to tatou Metua i te rangi] e anoano kia akapouia tetai mari ra te anoano ra aia kia rauka te tataraara i te katoatoa.”
To Iona Manako no te Au Tangata—E Tuke Tikai
6. Akapeea te au tangata o Nineve i te ariu anga atu ki ta Iona akakitekiteanga?
6 I teianei e akamanako ana i te rua o te akaraanga—to Iona. Ko Nineve te oire i teia taime tei ikiia e kia akapouia. Kua akakiteia te peroveta ko Iona kia akakitekite i te kino tikai o taua oire e kua ‘tae rava atu ki mua i te aroaro o Iehova.’ (Iona 1:2) Kapitiia atu ki tona au taoni, e oire maata a Nineve, e “po toru te aerenga e pini ei.” I te openga ra to Iona akarongo anga ra e kua tomo atu ki Nineve, kua akakite aere aia: “E rua takau rā toe e uritumuiaʼi Nineve.” No te reira, “kua akatika atura te au tangata o Nineve i ta te Atua; e kua tutu atura i te akakore anga i te kai, kua kakau atura i te kakau paoa.” Kua tataraara katoa te ariki o Nineve.—Iona 3:1-6.
7. Akapeea a Iehova i te manako atu anga i te tu tataraara o te au tangata o Nineve ra?
7 E tuke tikai te reira ki te ariu anga i Sodoma! Akapeea to Iehova manako no te au tangata tataraara o Nineve ra? Kua karanga maira Iona 3:10 e: “Kua tataraara iora te Atua i te kino tana i karanga ra e tuku mai ki runga ia ratou, e kare akera aia i tuku mai.” Kua “tataraara” a Iehova i roto i te manako e kua akatuke aia i tana au ravenga ma te au tangata o Nineve no te mea kua taui ratou i to ratou au tu. Kare te au turanga tu-Atua i taui, inara kua taui a Iehova i tana ikianga i te kiteanga e kua tataraara mai te au tangata o Nineve ra.—Malaki 3:6.
8. Eaa ra a Iona i maromaroa ai?
8 I to Iona kite anga e kare to Nineve e akapouia, kua akara ainei aia i te au mea mei to Iehova ra manako anga? Kare, no te mea kua akakiteia mai kia tatou e: “Kinokino roa akerā Iona, e maata atura tona riri.” Eaa ua atu ta Iona i rave? Kua akakite mai te papaanga e: “Kua pure atura aia kia Iehova, na ko atura, E tenana, e Iehova, kare ainei teia taku i karanga ra, iaku i noo ki toku uaorai enua? i oro ei oki au ki Taresisa i muatangana ra; kua kite ana oki au e, e Atua aroa ua koe e te tangi, e te akakoromaki, e te takinga-meitaki maata, e e tataraara koe i te kino.” (Iona 4:1, 2) Kua kite ke ana a Iona i to Iehova au tu. Inara, i taua taime ra, kua maromaroa te peroveta e kare i akono ana i to te Atua ra manako no te au tangata tataraara o Nineve.
9, 10. (a) Eaa te apiianga ta Iehova i oronga kia Iona? (e) Eaa ra tatou ka manako ei e kua ariki atura a Iona i to Iehova manako no te au tangata o Nineve ra?
9 Kua aere atu a Iona ki vao ake ia Nineve, e kua akatu iora i tetai are piritanga, e kua noo iora ki roto i tona marumaru “kia kite aia e ka akapeeaia taua oire ra.” Kua akatupu iora a Iehova i tetai kikiona kia rauka oki i te oronga mai i te marumaru kia Iona. Inara, i tera mai ra, kua maemae atura te tumu rakau. Te ririanga a Iona no runga i te reira, kua tuatua atura a Iehova: “Kua tangi koe i te kikiona . . . E auraka ainei au nei e tangi ia Nineve, i tera ra oire maata, e ono takau tausani anga i te tangata kare i kite i to ratou rima katau e to ratou rima kaui, e te au puaka katoa oki e manganui?” (Iona 4:5-11) Mei teaa ra te apiianga na Iona no runga i to Iehova manako anga i te au tangata ra!
10 Kare i tataia mai ta Iona ariu anga ki te tuatua a te Atua no te tangi anga i te au tangata o Nineve. Inara, te taka meitaki ra e kua akatikatika te peroveta i tona manako no te au tangata tataraara o Nineve ra. Ka rauka ia tatou i taua manako anga mei te tika anga e kua taangaanga a Iehova iaia kia tata i teia papaanga akauruia.
Ko Teea Toou Tu?
11. Penei e akapeea a Aberahama i te manako anga i te au tangata te ora ra i teia tuatau?
11 I teia tuatau, te aro atu nei tatou i tetai ua atu akapouanga—o teia akatereanga o te au mea kino i te tuatau o te ra maata o Iehova. (Luka 17:26-30; Galatia 1:4; 2 Petero 3:10) Akapeea a Aberahama i te manako anga i te au tangata te ora nei i roto i teia ao kare e roa atu ana ka akapouia? Penei ka manako aia i te aronga kare i akarongo ake i te “evangelia o te basileia nei.” (Mataio 24:14) Kua pati akatenga putuputu atu a Aberahama ki te Atua no runga i te aronga tuatua tika i roto ia Sodoma. Te manako tikai ra ainei tatou i te au tangata tei kopae ke i te au tu o teianei ao i raro ake i te akatere anga a Satani me orongaia atu te tuatau kia tataraara e kia tavini atu i te Atua?—1 Ioane 5:19; Apokalupo 18:2-4.
12. Eaa ra ei mea ngoie i te akatupu i tetai tu mei to Iona rai ki te au tangata ta tatou ka aravei atu i roto i ta tatou angaanga orometua, e eaa te ka rauka ia tatou i te rave no runga i teia?
12 E mea tau te inangaro anga i te openga o te ravenga kino. (Habakuka 1:2, 3) Inara, e mea ngoie ua i te akatupu i tetai tu mei to Iona rai, te manako kore anga i te turanga o te au tangata penei ka tataraara mai. E tika tikai teia me ka aravei ua rai tatou i te au tangata tataki tai tei manako inangaro kore mai, e tu patoi pakari, me kare te aronga marokiakia me aere atu tatou ki to ratou au kainga ma te karere o te Patireia. Penei kare tatou e akarongo atu ki te aronga kare a Iehova i akaputu mai ake mei roto mai i teia akatereanga o te au mea kino ra. (Roma 2:4) Me te akaari maira te akara anga matatio kia tatou uaorai e tei ia tatou tetai manga tu mua o Iona ki te au tangata o Nineve ra, ka rauka ia tatou i te pure atu no te tauturu kia akatano atu i to tatou manako anga ki to Iehova ra.
13. Eaa ra ka rauka ai ia tatou i te karanga e te manako maira a Iehova i te au tangata i teia tuatau?
13 Te manako maira a Iehova i te aronga kare ake i tavini iaia, e te akarongo ra aia ki te au patianga a tona au tangata akatapuia. (Mataio 10:11) Ei akatauanga, ka “akatika mai aia ia ratou” i te akarongo anga ki ta ratou au pure. (Luka 18:7, 8) Pera katoa, ka akatupu a Iehova i tana au taputou e te au akakoroanga katoatoa i tona uaorai tuatau. (Habakuka 2:3) Te kapiti maira teia i te takore pouroa anga atu i te kino i runga nei i te enua, i tona akapouanga rai ia Nineve i te oki akaou anga atu tona au tangata ra ki roto i te ravenga kino.—Nahuma 3:5-7.
14. Eaa ta tatou ka tau i te rave ia tatou e tapapa ra i te ra maata o Iehova?
14 E takore uaia atu ei teia akatereanga o te au mea kino o teia tuatau i te ra maata o Iehova, ka tapapa akakoromaki ua ainei tatou, i te rave putuputu anga i tona ra anoano? Kare tatou i kite i te au mea no runga i te akamaata anga o te angaanga tutu anga kare i akatupuia ake i mua ake ka tae mai ei te ra o Iehova, inara kua kite ra tatou e ka tutu aereia te tuatua meitaki o te Patireia e kako rava ake te enua ki to te Atua merengoanga i mua ake ka tae mai ei te openga. E tika rai ka tau kia manako atu tatou i “tei inangaroia” kare i apainaia mai ake ki roto ra ia Iehova e akaki ua atu ei i tona are ma te kaka ra.—Hagai 2:7.
To Tatou Manako Akakiteia Mai e ta Tatou Au Angaanga
15. Eaa te ka akamaata i ta tatou arikianga no te angaanga tutu anga?
15 Penei te noo ra tatou i roto i tetai tapere e kare te angaanga tutu anga i ariki meitakiia mai e kare e rauka ia tatou i te neke atu ki tetai ngai te anoano maataia ra te aronga akakitekite Patireia. Peneiake e okotai ngauru te ka kiteaia mai i roto i to tatou ngai i mua ake ka tae mai ei te openga. Te manako ra ainei tatou e e mea puapinga kia kimiia atu taua aronga okotai ngauru ra? Kua “aroa atura” a Iesu i te urupu tangata “no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Na te apii anga i te Pipiria e te tatau meitaki anga i te au atikara i roto i Te Punanga Tiaki e te Awake!, ka rauka ia tatou i te kite maata atu i te manamanata o teianei ao. No te reira, ka akamaata teia i ta tatou arikianga no te anoano kia tutu aereia te tuatua meitaki. Pera katoa, te taangaanga arikianga i te apinga akatumuia ki runga i te Pipiria tei orongaia mai na roto i “te tavini akono meitaki e te pakari” ra ka kapitiia atu ki to tatou tu akakeuanga i roto i te ngai angaanga putuputuia ra.—Mataio 24:45-47; 2 Timoteo 3:14-17.
16. Akapeea ra tatou e akamaata atu ei i te tu meitaki o ta tatou angaanga orometua?
16 To tatou manako anga no te aronga kare i ariu mai ake ki te karere oronga mai i te ora o te Pipiria e akakeu ia tatou kia manako i te au tuatau e te au tu tukeke i te aravei atu i te au tangata kainga i roto i ta tatou angaanga orometua. Kua kite ainei tatou e kare i te kainga te manganui me atoro atu tatou? Me koia ia, penei ka rauka ia tatou i te akamaata i te tu akatauanga no ta tatou angaanga orometua na te tauiui anga i te au taime e te au ngai no ta tatou angaanga akakitekite anga. Ka aere te au ravakai i te tautai me ka rauka ia ratou i te opu mai i te ika. Ka rauka ainei ia tatou i te rave i tetai apinga mei te reira rai i roto i ta tatou angaanga tautai i te pae vaerua ra? (Mareko 1:16-18) Eaa ka kore ei e rave i te angaanga akakitekite anga i te aiai e te angaanga na roto i te terepaoni, i te ngai te akatikaia ra te reira? Kua kite etai e i te ngai pakaanga i te motoka, te au ngai tapu anga toroka, te au ngai tito penitini, e te au are toa e ngai uua angaia no te ‘tautai anga.’ Ka kitea katoa ia to tatou tu mei to Aberahama rai ki te au tangata me opu mai tatou i te au tuatau kia akakitekite tapapa kore ua.
17. Na roto i teea au mataara e rauka ai ia tatou i te akamaroiroi i te au mitinari e tetai ua atu te tavini ra i roto i te au enua ke?
17 E mirioni ua atu kare i rongo ake i te karere o te Patireia. Kapitiia atu ki ta tatou tutu anga, ka rauka ainei ia tatou i te akaari i te manako anga no taua au tangata ra ma te kore e akaruke i te enua anauia ra? I na, kua kite ainei tatou i te au mitinari me kore te au orometua tamou te tavini ra i tetai enua ke? Me koia ia, penei e meitaki i te tata atu i tetai reta kia ratou te akaari anga i to tatou tu arikianga no ta ratou angaanga. Akapeea e rauka ai i te reira i te akaari i te manako anga no te au tangata noa nei? Ka akaketaketa ta tatou au reta akamaroiroianga e te akameitakianga i te au mitinari kia noo ua atu i roto i ta ratou tukuanga angaanga, no reira i te tauturu anga i te au tangata e manganui kia aere mai kia kite i te tuatua mou ra. (Akava 11:40) Ka rauka katoa ia tatou i te pure no au mitinari e no te aronga tei inangaro ra i te tuatua mou i tetai atu au enua ke. (Ephesia 6:18-20) Ko tetai atu mataara kia akaari i te manako anga na te oronga anga i te au moni tauturu ki te angaanga i te ao katoa a te Au Kite o Iehova.—2 Korinetia 8:13, 14; 9:6, 7.
Ka Rauka Ainei ia Koe i te Neke Atu?
18. Eaa ta tetai au Kerititiano i rave i te akakite anga i te au manako Patireia i roto i te enua te noo ra ratou?
18 Te aronga tei neke atu ki tetai au ngai ke te anoano maataia ra te aronga akakitekite Patireia kua akameitakiia no ta ratou au tauta anga akaatinga ia ratou uaorai. Inara, ko tei noo mai ki to ratou uaorai enua anauia, kua apii tetai Au Kite na Iehova i tetai reo ke kia rauka i te tauturu i te aronga no tetai enua ke i te pae vaerua. Kua paunaia tikai taua au tauta anga. Ei akatauanga, kua turou mai e itu Au Kite te tauturu ra i te au tangata Tinito i roto i tetai oire i Texas, U.S.A., e 114 aronga tataki tai ki te akamaara anga i te Kaikai Anga Aiai a te Atu i te 2001. Ko te aronga tei tauturu i taua pupu kua kite e kua papa ta ratou ngai koro no te kokoti anga.—Mataio 9:37, 38.
19. Eaa te mea tau i te rave me te tamanako ra koe kia neke atu ki tetai enua ke i te akatotoa atu i te angaanga tutu anga Patireia ki reira ra?
19 Penei te manako ra koe e toou ngutuare e ka rauka ia kotou i te neke atu ki tetai ngai te anoano maataia ra te aronga tutu anga Patireia. E tikai, te mea mua, e mea pakari kia “noo ki raro, ka tatau ei i te apinga.” (Luka 14:28) E tika mou tikai teia me tamanako ana tetai tangata i te neke atu ki tetai enua ke. Ko tetai ua atu te manako ra i taua manako penei e meitaki i te ui kiaia uaorai i te au uianga mei teia rai: ‘Ka rauka ainei iaku i te turu i toku ngutuare? Ka rauka ainei iaku tetai visa tau? Kua kite takere ainei au i te tuatua i te reo o taua enua, me kare te inangaro ra ainei au i te apii i te reira? Kua manako ana ainei au i te reva e te peu? Ka rauka tikai ainei iaku kia riro ei “akapumaana” e kare e akateimaa atu i te au taeake irinaki ra i roto i taua enua ra?’ (Kolosa 4:10, 11) Kia kite e mei teaa ra te maata o te anoano anga i roto i te reira enua taau e manako ra i te neke atu, e mea tau kia tata atu ki te opati manga o te Au Kite o Iehova te akono ra i te angaanga tutu anga i roto i taua ngai ra.a
20. Akapeea tetai mapu Kerititiano i te oronga anga iaia uaorai ei puapinga anga no te au taeake irinaki ra e no tetai atu i roto i tetai enua ke?
20 Ko tetai Kerititiano tei piri atu ki roto i te angaanga patuanga i te au Are Uipaanga Patireia i Tiapani kua kite e te anoanoia ra te aronga angaanga karape kia patu i tetai ngai akamori anga i roto ia Parakuai. Ei tangata takaua e ma te maroiroi ei mapu, kua neke atu aia ki taua enua ra e kua angaanga e varu marama ei tangata angaanga tamou koia anake ua i runga i te angaanga ra. Iaia e noo ra i reira, kua apii aia i te reo Paniora e kua rave i te au apii Pipiria i te kainga. Kua kite aia i te anoano no te aronga akakitekite Patireia i te enua. Noatu e kua oki atu aia ki Tiapani, kare i roa ana kua oki atu aia ki Parakuai e kua tauturu i te akaputuputu mai i te au tangata ki roto i taua Are Uipaanga Patireia ra.
21. Eaa ra to tatou manako puapinga maata e te manako ra ia tatou e tapapa ra i te ra maata o Iehova?
21 Ka akono te Atua e kia raveia te angaanga tutu anga, te rotai ra ki tona ra anoano. I teia tuatau, te taviviki nei aia i te kokoti anga openga i te pae vaerua. (Isaia 60:22) No reira, ia tatou e tapapa ra i te ra o Iehova, kia piri maroiroi atu tatou ki roto i te angaanga kokoti anga e te manako anga i te au tangata mei to tatou Atua aroa ra i te manako anga ia ratou.
[Tataanga Rikiriki i Raro]
a Kare i te mea meitaki i te neke atu ki tetai enua ko koe ua ki te ngai te araiia ra me kare kua kotingaia te angaanga tutu anga. Me ka raveia te reira penei ka akakinoia te au papuritia Patireia te angaanga matakite ra i raro ake i taua au turanga ra.
Maara Ainei ia Koe?
• Ia tatou e tapapa ra i te ra o Iehova, akapeea tatou i te manako anga i te au tangata ra?
• Eaa ra to Aberahama manako no te aronga tuatua tika tei noo ana i roto ia Sodoma?
• Akapeea a Iona i te manako anga i te au tangata tataraara o Nineve?
• Akapeea e rauka ai ia tatou i te akaari e te akono atura tatou i to Iehova manako anga i te au tangata kare i rongo ake i te tuatua meitaki ra?
[Tutu i te kapi 16]
Te manako ra a Aberahama i te au tangata mei ia Iehova rai
[Tutu i te kapi 17]
Kua rauka mai ia Iona to Iehova manako no te au tangata tataraara o Nineve ra
[Au Tutu i te kapi 18]
Te manako anga i te au tangata te akakeu ra ia tatou kia akamanako atu i te au tuatau e te au mataara tukeke i te tutu anga i te tuatua meitaki