E Puapinga Tikai te Irinaki Anga no Tetai Oraanga Mataora

E MEA reka kore tikai te manga i poitiniia. Ko tetai tangata te putuputu ra i te kite i te reira te anoanoia ra kia matakite i tana au peu no te kaikaianga. Inara kia akaruke takiri i te manga e kopae ke atu ei i te tumatetenga no te manga i poitiniia ra kare i te iki anga tau. I te rave anga i te reira ka akatupu maata mai i te au manamanata i te ka rauka i te akatikatikaia ra. Me kare e manga kare tetai e ora ua atu.

I roto i taua tu rai, me pikikaaia to tetai irinaki anga e mamae tikai ia. Penei ka akariro te pikikaa anga putuputu o te irinaki anga kia manako matakite tikai tatou no runga i ta tatou iki anga no te au taokotaianga. Inara, kia atea takiri mai mei te au tangata ra kia kopae ke atu ei i te tumatetenga no te pikikaa anga ra kare ko te pauanga ia. No teaa ra? No te mea te irinaki kore anga i tetai ra te keia ra mei ia tatou i to tatou uaorai mataora. Kia arataki i tetai oraanga merengo anga, te inangaro nei tatou i te au pirianga tei akatumuia ki runga i te irinaki tau.

“Kua riro te irinaki anga e ko tetai o te au tumuanga no te akonoanga i te raveanga ngata kore i te au ra ravarai ma tetai ke,” i akakite mai ei te puka Jugend 2002. “Te inangaro ra te katoatoa i te irinaki anga,” i ripoti mai ei te nuti pepa Neue Zürcher Zeitung. “Te akamako ra te irinaki anga i te tu o te oraanga” ki te maata anga “e mea puapinga tikai [te reira] no te ora.” E tikai, kua akakite mai te nuti pepa e, me kare e irinaki anga, “kare e rauka i tetai tangata i te autu i te oraanga.”

Mei te mea e e umuumu anga tumuanga to tatou kia tuku i to tatou irinaki anga ki roto i tetai tangata, koai ma ta tatou ka irinaki atu ma te kore e tuku tumatetenga e kia pikikaaia mai?

E Irinaki kia Iehova ma to Ngakau Katoa Ra

“E irinaki kia Iehova ma to ngakau katoa ra,” ta te Pipiria ia i akakite mai kia tatou. (Maseli 3:5) E tikai, te akamaroiroi putuputu maira te Tuatua a te Atua ia tatou kia irinaki i Tei Anga ia tatou, i te Atua ko Iehova.

Eaa ka rauka ai ia tatou i te tuku i to tatou irinaki anga ki roto i te Atua? Te mea mua, no te mea e tapu te Atua ko Iehova. Kua tata te peroveta ko Isaia e: “E tapu, e tapu, e tapu, to Iehova Sabaota.” (Isaia 6:3) Te manako anga no te tu tapu ra kua poka ainei i te akareka mai ia koe? Ko te tika, ka tau te reira kia akareka ia koe no te mea te aiteanga no te tu tapu o Iehova ra koia oki e ma aia, tei akaateaia mai mei te au ravenga tarevake katoatoa, e te irinaki anga tikai ra. Kare rava e riro iaia te kino me kare te akakino anga, e kare roa e rauka iaia i te aati i to tatou irinaki anga.

Pera katoa, ka rauka ia tatou i te tuku i to tatou irinaki ki roto i te Atua no te mea no tona tu e te anoano kia turu i te aronga tei tavini ra iaia. Ko tona mana teitei roa atu, ei akaraanga, te akariro ra iaia kia rave angaanga. Te arataki ra tona tuatua tau e tona pakari i tana au tu akono anga. E tona aroa akaaite koreia te akakeu ra iaia kia rave angaanga. “Ko te Atua oki te aroa,” ta te apotetoro ko Ioane i tata. (1 Ioane 4:8) Te akakeu ra to te Atua ra aroa i te au mea katoatoa tana i rave. Te akariro ra to Iehova tu tapu e tetai ua atu o tona au tu meitaki iaia ko tetai Metua tau, ko tetai peretana te ka rauka ia tatou i te tuku atu i te irinaki anga tikai. Kare e rauka i tetai apinga e tetai ua atu kia tau te irinaki anga maata ia Iehova ra.

E Irinaki kia Iehova e Kia Mataora

Ko tetai atu tumu anga tau no te irinaki anga ia Iehova koia oki kua kite meitaki aia ia tatou i tetai ua atu. Kua kite aia e e anoano anga tumuanga to te tangata taki tai no tetai pirianga tinamou, ope kore, e te irinaki anga i Tei Anga ra. Ko te aronga tei rauka taua pirianga ra te manako tinamou maata ra. “E ao to te tangata tei akariro ia Iehova ei irinaki anga nona,” ta te Ariki ko Davida i taopenga mai. (Salamo 40:4) E mirioni ua atu i teia tuatau te tuatua akaou ra i te au manako o Davida.

E akamanako ana i etai au akaraanga. E noo ana a Doris i Tominika Repapuriki, Tiamani, Ereni, e i Marike. Kua tuatua aia e: “Mataora tikai au i te tuku i toku irinaki anga kia Iehova. Kua kite aia e akapeea i te akono anga iaku i te pae kopapa, pae vaerua, e te pae manako. E oa meitaki tikai aia te ka rauka i tetai ua atu tangata.” Ko Wolfgang, ko tetai tangata akakitekite i te ture, kua akataka mai e: “E mea meitaki kia rauka i te irinaki atu ki runga i tetai tangata tei manako maira i toou meitaki, ko tetai tangata ka rauka​—e te ka rauka tikai​—i te rave i te meitaki noou ra!” Ko Ham, tei anauia i Asia inara te noo ra i teianei i Europa, kua tuatua e: “Te papu nei iaku e tei roto i te rima o Iehova te au tumu katoatoa, e kare aia e rave ana i te au tarevake, no reira te mataora nei au i te irinaki ki runga iaia.”

E tikai, ko tatou taki tai te anoano ra kia irinaki kare anake ua i Tei Anga ia tatou mari katoa ra i roto i te au tangata. No reira, ko Iehova, ei oa pakari e te kite, te oronga maira kia tatou i te akakite anga i te tu o te au tangata tataki tai ka tau ia tatou i te irinaki atu. Na te tatau meitaki anga i te Pipiria, ka rauka ia tatou i te akara meitaki i tana ako anga no runga i teia tumu nei.

Te Au Tangata ka Rauka ia Tatou i te Irinaki

“Auraka e irinaki ki te ui ariki, i te tamaiti a te tangata nei, kare oki ona ora,” i tata mai ei te tata taramo. (Salamo 146:3) Te tauturu ra teia tuatua akauruia ia tatou kia akakite e e manganui te au tangata kare e tau to tatou irinaki anga. Noatu te aronga tei akangateiteiia ei “ui ariki” i teianei ao, mei te aronga kikite i roto i te au ngai karape o te kite me kare i te angaanga, kare e tau i to tatou irinaki anga. Te akavare putuputu ra ta ratou aratakianga, e te irinaki tei tukunaia ki roto i taua “ui ariki” ra ka viviki ua i te taui ki roto i te mareka kore.

E tikai, kare e tau kia akariro teia kia irinaki kore atu tatou i te katoatoa. Inara, te anoano meitakiia ra tatou kia iki meitaki i te iki anga i te aronga te tuku ra tatou i to tatou irinaki anga. Eaa te turanga ka tau kia taangaanga tatou? Penei ka tauturuia tatou e tetai akaraanga no ko mai i te iti tangata Iseraela taito ra. Te riro mai anga ei mea meitaki kia iki i te aronga tataki tai kia apai i te au apainga teiaa i Iseraela, kua akakiteia kia Mose kia ‘kimi i te au tangata maroiroi i roto i te au tangata katoa nei, i tei mataku i te Atua ra, ei tangata [“irinakiia,” NW], e te rikarika ki te morimori apinga.’ (Exodo 18:21) Eaa ta tatou ka kite mei teia?

Ko teia au tangata nei e au tangata tei akaari i tetai au tu akono i te Atua i mua ake ka ikiia ai ki te au ngai no te irinaki anga. Kua oronga takere ana ratou i te akapapu anga e te mataku ra ratou i te Atua; e turanga ngateitei oraora to ratou no Tei Anga ra e te mataku ra i te akamareka kore iaia. Te papu ra ki te katoatoa e ko teia au tangata nei te rave ra ratou i te tika anga meitaki kia mou i te au turanga a te Atua. Te rikarika ra ratou i te morimori apinga, te akaari maira i te maroiroi akono tau te ka arai ia ratou mei te akaviivii angaia e te mana ra. Kare ratou e akakino i te irinaki anga kia akamaata atu i to ratou uaorai au anoano me kare i to te kopu tangata ra me kore te au oa.

Kare ainei i te mea pakari no tatou kia taangaanga i taua turanga i teia tuatau i te ikianga i te aronga tei tuku ana tatou i to tatou irinaki anga? Kua kite ainei tatou i te aronga tataki tai te akaari maira ratou e te mataku ra ratou i te Atua? Te manako papu ra ainei ratou kia mou i tona au turanga no te akono tau? E tiratiratu ainei to ratou kia kore e rave i te au mea kare e tika ana? E tu tau ainei to ratou e auraka e akavare atu i tetai turanga ki to ratou uaorai meitaki me kare kia rauka ta ratou uaorai e inangaro ra? E tika tikai e ko te au tane e te au vaine tei akakite i taua au tu ka tau kia irinaki tatou.

Auraka e Tuku Atu no te Mareka Kore i Tetai Atianga

I te iki anga e koai ta tatou ka irinaki, ka tau kia akakoromaki tatou, mei te mea e ka rauka te irinaki anga e tere atu i tetai tuatau roa. Ko te mataara pakari ra koia oki kia akatotoa marie i to tatou irinaki anga ki tetai tangata, mei tetai takainga ki tetai takainga. Akapeea ra? I na, penei ka akara tatou i te tu o tetai tangata e tere atu i tetai tuatau roa, i te akara anga e akapeea aia i te rave angaanga anga i roto i tetai au turanga. Ka tau ainei kia irinakiia te tangata i roto i te au mea meangiti ra? Ei akatauanga, kua akaoki mai ainei aia i te au apinga tei patiia mai tei taputouia e te akono tau tikai ra ainei aia i te au tuatau i akonoia? Me koia ia, penei te manako ra i reira tatou e ka rauka ia tatou i te akatotoa meitaki atu i to tatou irinaki anga kiaia ra i roto i te au tumu maata. Te tika ra teia ki te kaveinga e: “Ko te akono meitaki i te mea ngiti ra, kua akono meitaki katoa i te mea maata.” (Luka 16:10) Na te iki meitaki anga e te akakoromaki anga penei ka tauturu ia tatou kia kopae ke i te au mareka anga maata.

Eaa ra, i reira, me ka pikikaa mai tetai ia tatou? Ko te aronga apii i te Pipiria ka akamaara e i te po ka tapekaia ai aia, kua pikikaa maataia a Iesu Karaiti e tana au apotetoro. Kua pikikaa a Iuda Kariota iaia, e kua oro ke atu tetai no te mataku. Kua pikikaa katoa a Petero ia Iesu e toru taime. Inara kua kite a Iesu e ko Iuda anake ua tei rave akakoro i te angaanga kino. I te pikikaaia anga i taua tuatau maata ra kare i arai ana ia Iesu i te akapapu anga i tona irinaki anga ki roto i te toenga o te 11 apotetoro i te au epetoma i muri ua mai. (Mataio 26:45-47, 56, 69-75; 28:16-20) Ma te aiteite, me te manako ra tatou e kua pikikaaia mai e tetai tangata tei irinakiia e tatou, e mea meitaki kia akamanako tatou e me kua kiteaia te pikikaa anga ei akapapu anga mai i tetai vaerua irinaki kore me kare te akaparuparu anga poto ua no te kopapa.

Ka Tau Ainei kia Irinakiia Au?

Ko tetai tangata tei iki meitaki no runga i tana tangata ka irinaki atu ka tau kia ui kiaia uaorai e: ‘Ka tau ainei au kia irinakiia? Eaa te au turanga tau no te tu irinaki anga ka tau au kia tapapa atu noku uaorai e no tetai atu?’

E tika tikai ko tetai tangata tei irinaki putuputuia te tuatua ra i te tuatua mou. (Ephesia 4:25) Kare aia e akatika i tana au tuatua kia tau ua ki te aronga e akarongo maira iaia e rauka ai te meitaki nona uaorai. E me ka rave aia i tetai taputou, ka rave te tangata tei irinaki tau ra ma tona mana ririnui katoatoa ra kia mou i tana tuatua. (Mataio 5:37) Me ka tuatua tetai tangata kiaia, ka mou te tangata tei irinaki tau ra i te irinaki anga papu e kia kore e urutoe atu. Te tangata irinakiia ra te tiratiratu ra ki tona tokorua akaipoipo. Kare aia e akara i te ravenga ainga viivii, kare aia e manakonako i te au mea tau kore, e kare aia e akameamea atu. (Mataio 5:27, 28) Ko tetai tangata tei tau ra i to tatou irinaki anga te angaanga pakari ra kia rauka mai te moni nana uaorai e tona ngutuare e kare e kimi kia rauka ngoie ua mai te moni na te takinga kino anga i te meitaki o tetai au tangata ra. (1 Timoteo 5:8) Na te akamanako anga e ko taua au turanga tau e te Tuatua Tapu e tauturu mai ia tatou kia kite i te au tangata ka rauka ia tatou i te irinaki atu. Pera katoa, i te aru anga i taua au tu no te turanga e tauturu ia tatou tataki tai kia tau e kia irinakiia mai e tetai ke.

Ka riro ei mea rekareka kia noo i roto i tetai ao te vaira te au tangata katoatoa te irinaki tau ra e kare te au mareka kore no te aati anga i te irinaki anga e ei au mea taito ra! E moemoea ua ainei teia? Kare no te au tangata tei ariki pakari tikai i te au taputou a te Pipiria, no te mea te akakite maira te Tuatua a te Atua i te aereanga mai o tetai “enua ou” manea tei matara mai mei te akavare anga katoatoa, te au pikikaa, e te akakinoanga e tei akarangatiraia mai mei te mii, te maki, e pera katoa te mate! (2 Petero 3:13; Salamo 37:11, 29; Apokalupo 21:3-5) Kare ainei ei mea tau kia kimi maata ua atu no runga i teia manakonako anga? Te mataora nei te Au Kite o Iehova i te oronga atu kia koe i te akakiteanga maata no runga i teia e tetai atu au tumu manako puapinga maata ra.

[Tutu i te kapi 4]

Te irinaki kore anga te keia ra i te mataora mei ia tatou

[Tutu i te kapi 5]

Ko Iehova ra ka tau kia irinaki maataia e tatou

[Au Tutu i te kapi 7]

Ko tatou katoatoa te anoano ra i te au pirianga tei akatumuia ki runga i te irinaki anga tau