Kia Maroiroi Mei ia Ieremia Rai

Tiaki ia Iehova: e akamaroiroi; e nana e akamaroiroi mai i to ngakau ra: e tenana e tiaki rai koe ia Iehova.”​—SALAMO 27:14.

1. Eaa te akameitaki anga maata ta te Au Kite o Iehova e rekareka ra?

TE NOO nei te Au Kite o Iehova i roto i tetai parataito pae vaerua. (Isaia 11:6-9) I rotopu tikai i teia ao manamanata, te rekareka ra ratou ma te au taeake Kerititiano i tetai ngai pae vaerua umereia, e te au ra ratou ma te Atua ko Iehova e ki tetai e tetai. (Salamo 29:11; Isaia 54:13) E te tupu ua atura to ratou parataito pae vaerua. Te o atura te katoatoa tei ‘akono i to te Atua ra inangaro ma te tae o te ngakau’ ki te akatotoa anga i te reira. (Ephesia 6:6) Akapeea ra? Na te akono anga tau i te au kaveinga Pipiria e na te apii anga i tetai ke kia rave katoa i te reira, i te pati anga atu ia ratou i reira kia o mai ki roto i te au akameitaki anga maata no taua parataito ra.​—Mataio 28:19, 20; Ioane 15:8.

2, 3. Eaa ta te au Kerititiano mou ka akakoromaki atu?

² Inara, to tatou noo anga i roto i tetai parataito pae vaerua kare te aite anga e kare tatou e akakoromaki i te au timataanga. Te vai apa ua nei e te mamae nei rai tatou no te au tupu anga o te maki, te ruaine, e i te openga iora te mate. Tei runga ravao, te kite nei tatou i te tupuanga o te au taputou no runga i “te au ra openga ra.” (2 Timoteo 3:1, NW) Te takino nei te au tamaki, te rave anga kino, te maki, te onge, e tetai ua atu au turanga ngata i te tangata ravarai, e kare te Au Kite o Iehova i akaatea keia mai.​—Mareko 13:3-10; Luka 21:10, 11.

³ I te pae i taua au mea, kua kite meitaki tatou e i vao ake i te ngai maana o to tatou parataito pae vaerua, te angiangi ua maira te au matangi anu o te patoianga. Kua akamatakite a Iesu i tana au pipi e: “No te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou. Ka akamanako i taku i karanga atu kia kotou na, Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou.” (Ioane 15:18-21) Kare te au mea i tuke i teia tuatau. Kare ake rai te maata anga o te au tangata i marama ana me kare i ariki ana i to tatou tu no te akamori anga. Te akaapa ra, e te taitoito ra etai, me kare​—mei ta Iesu i akamatakite mai ana​—te riri maira ia tatou. (Mataio 10:22) Tei putuputu, kua riro tatou ei takete no te tuatua pikikaa e te au tauta anga akaariuke na roto i te akakitekite nuti. (Salamo 109:1-3) Ae, te aro ra tatou katoatoa i te au turanga akaaoanga, e ko etai ia tatou penei kua akamata i te maromaroa. Akapeea e rauka ai ia tatou i te akakoromaki?

4. Ka akara tatou kiea no te tauturu kia akakoromaki?

⁴ Na Iehova e tauturu mai ia tatou. I raro ake i te akauruanga, kua tata te tata taramo: “Manganui to te tangata tuatua-tika ra mate; e akaoraia ra aia e Iehova i taua au mea katoa ra.” (Salamo 34:19; 1 Korinetia 10:13) E manganui ia tatou ka rauka i te akakite e me tuku tatou i te irinaki pu ki roto ia Iehova, ka oronga mai aia kia tatou i te maroiroi kia akakoromaki i tetai ua atu turanga ngata. No to tatou aroa iaia e te rekareka tei akanooia i mua ia tatou ka rauka i te tauturu ia tatou kia tamaki atu i te akamaroiroi kore anga e te mataku. (Ebera 12:2) No reira, noatu te aro atura i te au tu ngata, ka tu ngaueue kore ua atu rai tatou.

Na te Tuatua a te Atua i Akamaroiroi ia Ieremia

5, 6. (a) Eaa te au akaraanga tei ia tatou no te aronga akamori mou tei rauka i te akakoromaki ra? (e) Akapeea a Ieremia i te ariu atu anga te kapikiia mai anga kia riro mai ei peroveta ra?

⁵ I roto i te tuatua enua, kua kite te au tavini tiratiratu o Iehova i te rekareka noatu te au turanga ngata. Kua ora etai i roto i te au tuatau no te akavaanga i to Iehova tuku mai anga i tona riri ki runga i te aronga tiratiratu kore. I rotopu i taua aronga akamori tiratiratu ra ko Ieremia e tona au oa tokoiti ua i te reira tuatau, pera katoa te au Kerititiano o te anere mataiti mua. Kua tataia taua au akaraanga tuatua enua i roto i te Pipiria ei akamaroiroi anga no tatou, e ka maata atu ta tatou ka kite mei te apii anga i te reira. (Roma 15:4) Ei akaraanga, e akamanako ana ia Ieremia.

⁶ I te ou anga mataiti, kua kapikiia a Ieremia kia tavini ei peroveta i roto ia Iuda. Kare teia i te tukuanga angaanga ngoie ua. E manganui te akamori ra i te au atua pikikaa. Noatu e tiratiratu a Iosia, koia oki te ariki te akamata anga a Ieremia i tana angaanga orometua, ko te au ariki katoatoa tei aru mai i muri maira e tiratiratu kore, e ko te maata anga tei ia ratou te apainga kia apii i te tangata​—ko te au peroveta e te kau taunga​—kare ratou i te tua o te tuatua mou. (Ieremia 1:1, 2; 6:13; 23:11) Eaa, i reira, to Ieremia manako ngakau i te kapiki mai anga a Iehova iaia kia riro mai ei peroveta ra? Kua mataku aia! (Ieremia 1:8, 17) Kua maara akaou ia Ieremia tona ariu mua mai anga: “Kua karanga atura au, Aue! e taku Atu e Iehova e! i na, kare au i kite i te tuatua: e tamaiti ua oki au nei.”​—Ieremia 1:6.

7. Eaa te manako ta Ieremia i aravei atu i tana ngai angaanga, e akapeea aia i te ariu atu anga?

⁷ Ta Ieremia ngai angaanga anga kare te maata anga e akarongo mai ana, e kua aravei putuputu atu aia i te patoianga pakari. I tetai atianga ko Pasahura, ko tetai taunga, kua ta atura iaia e kua tuku atura iaia ki roto i te patiti. Kua akakite mai a Ieremia eaa tona manako i taua taime ra: “Karanga iora ra au e, kare au e akaiki iaia [Iehova], e kare au e tuatua akaou i tona ra ingoa.” Penei ake i manako ana koe mei taua tu rai​—i te inangaro anga i te akamutu. E akara e eaa tei tauturu ia Ieremia kia akakoromaki. Kua karanga aia e: “Riro atura [ta te Atua tuatua, me kore te karere] ra mei te ai ka i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga, e kare atura e tika kia akatupua ua.” (Ieremia 20:9) Te akakeu ra ainei ta te Atua au tuatua ia koe?

To Ieremia Au Oa

8, 9. (a) Eaa te tu paruparu ta te peroveta ko Uriia i akaari mai, e eaa tei tupu? (e) Eaa ra a Baruka i akamaroiroi kore ei, e akapeea aia i te tauturuia anga?

⁸ Kare e ko Ieremia ua i roto i tana angaanga totou. E au oa tona, e papu e kua akamaroiroiia aia. I tetai taime ra, kare tona au oa i rave ana i te tu pakari. Ei akaraanga, te angaanga maata ra tetai taeake peroveta ko Uriia te ingoa i te oronga anga i te au akamatakite anga no runga ia Ierusalema raua ko Iuda “mei te au tuatua katoa a Ieremia ra.” Inara, te akaue anga te Ariki ko Iehoiakima e kia tamateia a Uriia, kua oro atu te peroveta ma te mataku ki Aiphiti. Kare te reira i akaora mai ana iaia. Kua arumaki atu te au tangata o te ariki iaia, e kua opu atura iaia, e kua apai akaou mai iaia ki Ierusalema, i te ngai i taiaia ai aia. Mei teaa ra te poitirere i te reira kia Ieremia!​—Ieremia 26:20-23.

⁹ Ko tetai oa ake o Ieremia ko tona tekeretere, ko Baruka. E tangata tauturu meitaki a Baruka no Ieremia, inara i tetai atianga kua ngere katoa iaia te manako pae vaerua. Kua akamata aia i te koumuumu, i te karanga anga e: “E ae oki au nei e! kua kapiti katoa mai a Iehova i te mii ki toku mamae nei; kua roiroi au i toku ngengeti ua anga, e kare oku e akaeaanga i kitea.” Ma te akamaroiroi kore, kua akamata a Baruka te ngere i te arikianga i te au mea pae vaerua. Noatu rai, kua oronga takinga meitaki mai a Iehova i te ako anga pakari kia Baruka, e kua akatikatikaia aia. Kua akapapuia mai kiaia i reira e ka ora mai aia i to Ierusalema akapouia anga. (Ieremia 45:1-5) Mei teaa to Ieremia akamaroiroiia anga te rauka akaou mai anga ia Baruka tona tu tau i te pae vaerua!

Kua Turu a Iehova i Tana Peroveta

10. Eaa te au taputou no te turu anga ta Iehova i maani kia Ieremia?

¹⁰ Tei puapinga maata roa atu, kare a Iehova i akaruke ana ia Ieremia. Kua kite aia e eaa te manako o tana peroveta e kua oronga atu kiaia i te maroiroi e te turuanga tana e umuumu ra. Ei akaraanga, i te akamata anga o ta Ieremia angaanga orometua i te akakite ekoko mai anga aia no runga i tona au tu tau, kua akakite atura a Iehova kiaia e: “Auraka e mataku i to ratou mata: ei vaitata katoao au ia koe ei akaora; ia koe, te tuatua mairā Iehova.” I reira, i muri ake i te oronga anga i te akakiteanga ki tana peroveta no runga i tana tukuanga angaanga, kua karanga atura a Iehova e: “E tamaki mai oki ratou ia koe, e kare ra koe e rauka ia ratou; tei ia koe oki au, ei akaora ia koe, te tuatua mairā Iehova.” (Ieremia 1:8, 19) Mei teaa te akapumaana anga! E kua rave mou a Iehova i tana tuatua.

11. Akapeea tatou i kite ei e kua akatupu a Iehova i tana taputou kia turu ia Ieremia?

¹¹ No reira, i muri ake i te tapekaia anga i roto i te patiti e te vai ua anga ei avirianga i te ngai tangata, kua tuatua maira a Ieremia ma te irinaki e: “Tei iaku rā Iehova, ei toa rikarikaia ïa; e riro ei te aronga takinga-kino iaku ra i te turori, kare oki ratou e autu: kua akama roa ratou.” (Ieremia 20:11) I te au mataiti i muri mai te raveia anga te au tauta anga kia tamateia a Ieremia, tei iaia ra a Iehova, e mei ia Baruka rai, kua ora atu a Ieremia i te akapouia anga a Ierusalema ei tangata rangatiraia, kareka ra te aronga tei takinga kino mai iaia e te aronga tei kopae ke i tana au akamatakite anga kua mate atu me kore kua apainaia atu ki Babulonia.

12. Noatu te au tumu manako no te akamaroiroi kore anga, eaa ta tatou ka akamanako?

¹² Mei ia Ieremia rai, i teia tuatau e manganui te Au Kite o Iehova te akakoromaki ra i te au akakino anga. Mei tei taikuia i mua akenei, ko etai o teia au mea nei na to tatou uaorai au apa i akatupu, ko tetai no te turanga oripu i roto i teianei ao, e ko tetai ua atu na te aronga tei patoi mai i ta tatou angaanga. Ka riro taua au akakino anga ra ei akamaroiroi anga kore. Mei ia Ieremia, penei ka akamata tatou i te manako e me ka rauka ia tatou kia tamou ua atu. E tika, ka rauka ia tatou i te tapapa atu kia akamaroiroi koreia mai mei tetai taime ki tetai taime. Te timata ra te akamaroiroi kore anga i te oonu o to tatou aroa no Iehova. No reira kia manako papu tatou e auraka e tuku i te akamaroiroi anga kore kia akaatea mai ia tatou mei ta Iehova angaanga mei ia Uriia rai. Mari ra, kia aru tatou ia Ieremia e kia irinaki i ta Iehova turu anga.

Akapeea te Tamaki Atu i te Akamaroiroi Kore Anga

13. Akapeea e rauka ai ia tatou i te aru i te au akaraanga o Ieremia raua ko Davida?

¹³ I rave putuputu ana a Ieremia i te komunikeiti ki te Atua ko Iehova, i te akakite anga kiaia i tona au manako ngakau oonu e te pati akatenga anga no te maroiroi. E akaraanga meitaki te reira kia aruia. Ko Davida i te tuatau taito, tei akara ki taua Tumu ra no te maroiroi, kua tata e: “E akarongo mai, e Iehova, i taku tuatua, e akono mai i toku nei ngunguru anga: E akarongo mai i toku kapiki anga, e taku ariki, e taku Atua; te pure atu nei oki au ia koe.” (Salamo 5:1, 2) Te akaari maira te papaanga akauruia o to Davida oraanga e kua akarongo putuputu mai a Iehova ki ta Davida au pure no te tauturu. (Salamo 18:1, 2; 21:1-5) I roto i te tu aiteite, me e pakari te au taomianga me kare e akaraanga maata to tatou au manamanata, e pumaana tikai kia anga atu kia Iehova na roto i te pure e te akatuera i to tatou au ngakau kiaia. (Philipi 4:6, 7; 1 Tesalonia 5:16-18) Kare a Iehova i tapupu mai ana i te akarongo mai kia tatou. Kareka ra, te akapapu maira aia kia tatou e ‘koia te tiaki mai ia tatou.’ (1 Petero 5:6, 7) Inara, kare i te mea tau kia pure kia Iehova e oti akera kare e akarongo atu ki tana e tuatua maira, ka tau ainei?

14. Eaa te tupu anga ta te au tuatua a Iehova i rave ki runga ia Ieremia?

¹⁴ Akapeea a Iehova i te tuatua mai anga kia tatou? E akamanako akaou ana ia Ieremia. I te mea e e peroveta a Ieremia, kua komunikeiti tika atu a Iehova kiaia. Te akataka maira a Ieremia i te tupu anga o ta te Atua au tuatua ki runga i tona ngakau: “Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Ieremia 15:16) Ae, kua rekareka a Ieremia i roto i te tika e kua tapaia to te Atua ingoa ki runga iaia, e e okomaata Tana au tuatua ki te peroveta. No reira, mei te apotetoro ko Paulo ra, kua inangaro a Ieremia i te akakite aere i te karere tei orongaia mai kiaia.​—Roma 1:15, 16.

15. Akapeea e rauka ai ia tatou i te tuku i te au tuatua a Iehova ki roto i to tatou ngakau, e eaa te au akamanakoanga ka rave pakari tatou kia kore e vai muteki ua?

¹⁵ Kare a Iehova e komunikeiti tika mai ki tetai ua atu tangata i teia tuatau. Inara, tei ia tatou ta te Atua au tuatua i roto i te au kapi o te Pipiria. No reira, me te manako pakari ra tatou i ta tatou apii no te Pipiria e te manako oonu anga no runga i ta tatou e kite ra, ka riro mai ta te Atua au tuatua ei “rekareka anga, e te pereperekavana anga” no to tatou ngakau katoa. E ka rekareka tatou e te apai ra tatou i te ingoa o Iehova me aere atu tatou i te oronga atu i taua au tuatua ki tetai ke. Auraka rava e ngaropoina ia tatou i te tika e kare tetai ua atu tangata i roto i te ao nei e akakite aere ra i te ingoa o Iehova. Ko tana Au Kite anake ua te akakitekite aere ra i te au tuatua meitaki no te Patireia akatumuia o te Atua e te apii anga i te aronga akaaka kia riro mai ei au pipi na Iesu Karaiti. (Mataio 28:19, 20) Mei teaa ra to tatou akameitakiia anga! I te akamanako anga i ta Iehova i oronga aroa mai kia tatou nei, eaa ra tatou ka vai muteki ua ai?

Kia Matakite Tatou i ta Tatou Au Kapitianga

16, 17. Eaa to Ieremia manako no te au kapitianga, e ka akapeea tatou i te aru anga iaia?

¹⁶ Kua ripoti mai a Ieremia i tetai apinga ke tei tauturu iaia kia akamaroiroi. Kua tuatua aia e: “Kare au i noo i te uipa anga o te aronga akavaavaa, kare oki au i rekareka; no toou rima i noo ua ana ko au anake ua: kua akaki mairai koe iaku nei ki te makitakita maata.” (Ieremia 15:17) Kua inangaro a Ieremia i te noo koia anake ua kare e akaoripuia e te au oa kino. Ko tatou i teia tuatau te manako ra mei taua tu rai. E kore rava e ngaropoina ia tatou ta te apotetoro ko Paulo akamatakite anga e “e kino te tuatua meitaki i te kapiti anga kikino ra,” pera te au peu meitaki i rauka ia tatou i te au mataiti e manganui.​—1 Korinetia 15:33.

¹⁷ Ka tuku te au kapitianga kino i te vaerua o teianei ao kia taviivii i to tatou manako. (1 Korinetia 2:12; Ephesia 2:2; Iakobo 4:4) E tereni, i reira, tatou i to tatou au kite ngakau kia akataka i te au kapitianga kino e kia kopae ke takiri atu ia ratou. (Ebera 5:14) Naringa e te ora ra a Paulo i runga i te enua i teia tuatau, eaa toou manako tana ka tuatua ki tetai Kerititiano te akarakara ra i te au teata tau kore me kare te ta ua me kore te au tarekarekaanga kino? Akapeea aia i te ako anga i tetai taeake te aruaru ra i te au pirianga oa ma te aronga ke i runga i te Internet? Eaa ra tona manako no tetai Kerititiano tei akapou i te ora e manganui i te kanga anga i te au vitio kangakanga me kare i te akarakara anga i te tivi inara kare e rave ana i te au tu apii meitaki nana uaorai?​—2 Korinetia 6:14e; Ephesia 5:3-5, 15, 16.

Kia Vai ua i Roto i te Parataito Pae Vaerua

18. Eaa te ka tauturu ia tatou kia vai maroiroi i te pae vaerua?

¹⁸ Te akaperepere ra tatou i to tatou parataito pae vaerua. Kare rava e apinga e aite atu ki te reira i roto i te ao i teia tuatau. Kua tuatua katoa mai te aronga irinaki kore no runga i te aroa, te akamanakoanga, e te takinga meitaki to te au Kerititiano no tetai e tetai. (Ephesia 4:31, 32) Noatu rai, e maata atu i teianei i to mua ana, te umuumuia ra tatou kia tamaki atu i te akamaroiroi kore anga. Ka rauka te kapitianga meitaki, te pure, e te au tu apii meitaki i te tauturu ia tatou kia vai maroiroi i te pae vaerua. Ka akamaroiroi te reira ia tatou kia aro atu i tetai ua atu timata anga ma te irinaki pu tikai anga ki roto ia Iehova.​—2 Korinetia 4:7, 8.

19, 20. (a) Eaa te ka tauturu ia tatou kia akakoromaki? (e) Kiaai ma i akonoia ai te atikara te ka aru mai, e koai ma katoa te manakoia ra no te reira?

¹⁹ Auraka rava tatou e akatika i te aronga tei riri mai i ta tatou karere o te Pipiria ra kia tamataku mai ia tatou e te akariro anga kia akaoko tatou i to tatou akarongo. Mei te au enemi tei takinga kino ia Ieremia, ko te aronga tei tamaki mai ia tatou te tamaki ra i te Atua. Kare ratou e autu. Ko Iehova, tei ririnui roa atu i to tatou au enemi, te akakite maira kia tatou e e: “Tiaki ia Iehova: e akamaroiroi; e nana e akamaroiroi mai i to ngakau ra: e tenana e tiaki rai koe ia Iehova.” (Salamo 27:14) Kua akatumu oonuia te manakonakoanga i roto ia Iehova ki roto i to tatou ngakau, kia akatika tatou e auraka e roiroi i te rave i te takinga meitaki. Kia irinaki tatou e, mei ia Ieremia raua ko Baruka, ka kokoti ra tatou me kare oki tatou e akaparuparu.​—Galatia 6:9.

²⁰ Te tamaki anga atu i te akamaroiroi kore anga e putoto anga putuputuia no te au Kerititiano e manganui. Inara, ko te aronga mapu, te aro atura i te au akaaoanga takake. Inara ka rauka katoa ia ratou te au tuatau meitaki roa atu. Te akono tikaia maira te atikara te aru maira ki te au mapu i rotopu ia tatou. Ka riro te reira ei manako anga ki te au metua e ki te aronga mamaata katoatoa tei akatapuia i roto i te putuputuanga tei na roto i te tuatua, na te akaraanga, e na te turu anga tika tei roto i te turanga kia tauturu atu i te aronga mapu i roto i te putuputuanga.

Akapeea Koe me Pau?

• Eaa ra tatou ka tapapa atu ei i te au turanga akamaroiroi kore anga, e koai ta tatou ka akara atu no te tauturu?

• Akapeea a Ieremia i te autu anga i te akamaroiroi kore anga noatu e e tukuanga angaanga ngata tetai?

• Eaa te ka akariro i to tatou au ngakau kia ‘rekareka e te pereperekavana’ noatu e tei rotopu i te au tu ngata?

[Tutu i te kapi 9]

Kua manako a Ieremia e e tamaiti ua aia e kare e karape roa ana kia riro mai ei peroveta

[Tutu i te kapi 10]

Noatu e te takinga kinoia ra, kua kite a Ieremia e tei iaia a Iehova “ei toa rikarikaia ïa”