E Akaaiteite Ana Ainei Koe ia Koe Uaorai ki Tetai Ke?

KOAI ma ia tatou tei kare i aravei ana i tetai tangata e manea atu ia tatou, i te akaraanga te mareka maataia ra, viviki atu i te marama, me kore e meitaki ake tana au maka i te apii? Penei e meitaki atu te oraanga kopapa o tetai me kore te mareka ra te angaanga, te puapinga ra, me kore i te akaraanga e maata ake to ratou au taeake. Penei e maata ake ta ratou au apinga, maata atu te moni, e motoka ou mai, me kore te akaraanga mataora ua akera ratou. I te taikuanga i taua au apinga ra, e akaaiteite ana ainei tatou ia tatou uaorai ki tetai ke? Ka rauka ainei te au akaaiteiteanga i te kopaeia? No teaa ra e te inangaro ra ainei tetai Kerititiano i te kopae i te reira? E akapeea tatou i te mareka anga ma te kore e akaaiteiteanga ia tatou uaorai ma tetai ua atu tangata ke?

No Teaa ra e Penei Aea Tatou e Akaaite Atu Ei

Tetai manako e no teaa ra te au tangata e akaaite ana ia ratou uaorai ki tetai ke koia oki e penei te akono ra te reira i te tamou marie me kore i te akamaata atu i to ratou manako akangateitei i roto ia ratou uaorai. E putuputu ana te tangata i te merengo i te kite anga e e puapinga katoa rai ratou mei to ratou au taeake. Tetai manako akaou mai koia oki e ko te au akaaiteiteanga e au tautaanga ia kia akameangiti mai i te tu papu kore no runga ia tatou uaorai, i te marama anga e eaa te maata te ka rauka ia tatou i te rave e eaa to tatou au kotinga anga. E akarakara ana tatou eaa ta tetai ke i akatupu. Me aiteite rai ratou mei ia tatou rai i roto i te au tu e manganui e kua tae ana i tetai au akakoroanga tikai, penei ka manako mai tatou e ka rauka rai ia tatou i te itae katoa i taua au akakoroanga ra.

Te au akaaiteiteanga e maani putuputuia ana i rotopu i te au tangata tei aiteite mei tetai ki tetai​—e tane e tane e vaine e vaine, aiteite te mataiti, e aiteite katoa te turanga no te oraanga tangata e kua kite tetai i tetai. Kare roa tatou e akaaite ana ia tatou uaorai ki tetai tangata ke me te kiteaia ra e e aka tuke rai tetai. I tetai atu tua, kare roa tetai tamaine mapu ua nei e akaaite ana iaia uaorai ma tetai tamaine akaariari kakau rongonui e ki tona au taeake apii, e kare rai te tamaine akaariari kakau rongonui e akaaite ana iaia uaorai ki taua tamaine mapu ra.

I roto i teea au ngai e raveia ana te au akaaiteiteanga? Tetai ua atu apinga me kore e tu te manako puapingaia ra i roto i tetai oire tangata​—me ko te kite, te purotu, te puapinga i te pae apinga, te au kakau​—​penei te tumuanga ia no te akaaiteiteanga. Inara, e matau ana tatou i te akono i te au akaaiteiteanga no runga i te au apinga e inangaroia ana e tatou. Penei ake kare tatou e vareae atu i te maata o te akaputuanga stamp a tetai o to tatou au taeake, ei akaraanga, naringa ra me e inangaro tikai to tatou i te koi anga i te au stamp.

Te akakeu ra te au akaaiteiteanga i tetai au putunga tu e manganui no te ariuanga, akamata mai mei te tu mareka ua ki te taitaia, mei te akapaapaanga e te inangaro kia aru katoa ki te tu mareka kore me kore te akonoanga patoitoi. Tetai papaki o teia au manako ngakau ra e kino ia, e kare te reira e tau ana ki te au tu Kerititiano.

Au Akaaiteiteanga Taemoemo

Te manganui te tauta ra kia riro mai ei “aronga tei re” i roto i te akaaiteiteanga te akaari ra i te tu taemoemo. E inangaro ana ratou kia meitaki atu i tetai ke, e kare ratou e mareka ana kia kite tikai roa ratou e e meitaki ake rai ratou. Kare e mataora ana i te piri atu ki taua au aronga ra. E ngata ana te au akataeakeanga kia ratou, e e kinokino te pirianga. Kare e te ngere ra taua tutu tangata ra i te tu akaaka ua mari ra e matau ana ratou i te akono kore i te akoanga Pipiria no runga i te aroa anga i to ratou tangata tupu, mei te mea e ka ngoie ua to ratou tu i te akakeu i roto i tetai ke i te au manako e e meangiti ua ratou e te tu taakama.​—Mataio 18:1-5; Ioane 13:34, 35.

I tetai tua te maanianga i te au tangata i te manako e e “aronga ruti” ua ratou te tamamae ra ia ratou. Tei tau ki tetai tangata tata, “e kino rava atu to tatou au tu paruparu me i te akaraanga e te au tangata tei aiteite katoa to ratou turanga mei to tatou rai kua rauka ia ratou te au apinga ta tatou e inangaro ana.” Te akakeu ra te vaerua taemoemo i te vareae, te akamoupuku, e te mareka kore ki tetai tangata ke no te mea no tana au apinga, tu puapinga, te turanga, tona tu, te au akameitakianga, e te vai atura. Ka taki atu teia ki te taemoemo akaou atu​—e aerenga kino tikai. Te akaapa ra te Pipiria i te “emoemo anga tetai e tetai.”​—Galatia 5:26, NW.

Na te taakaaka anga i te au akatupuanga o te au tangata taemoemo ke maira, te tauta ra te aronga vareae i te akaora i to ratou uaorai manako akangateitei takinoia i roto ia ratou uaorai. Penei taua tutu ariuanga ka akaraanga e e apinga meangiti ua, inara me kare te reira e kite meitakiia e kare e tapuia, ka taki atu te reira ki tetai ravenga tarevake akakino tikai. Akamanako ana e rua nga tataanga Pipiria e e vareae te tumuanga maata.

I tona nooanga i rotopu i te au Philiseti, kua akameitakiia a Isaaka ma te ‘anana mamoe oki, e te anana puaka-toro, e manganui oki te tavini: e kua vareae iora te Philiseti iaia ra.’ Kua ariu atu ratou na te akaki anga i te au ruavai ki te one tei ko ia e te metua tane o Isaaka, ko Aberahama, e kua pati atu to ratou ariki ia Isaaka kia akaruke i te enua. (Genese 26:1-3, 12-16) E ekai tikai to ratou vareae e te kino tikai. Kare i rauka akaou ana ia ratou i te akakoromaki i to Isaaka tu rekareka no te pae puapinga i rotopu ia ratou.

I te au anere mataiti i muri mai, kua akatakake a Davida iaia uaorai i runga i te ngai tamakianga. Kua akamaaraia tana au angaanga e te au vaine o Iseraela, tei imene e: “Kua mate ta Saula e kua tausani, kua ngauru ra te tausani i ta Davida.” Noatu e kua rauka iaia tetai tuanga no te akapaapaaanga, kua akamanako a Saula i taua akaaiteiteanga e mea taakama, e kua tupu te vareae i roto i tona ngakau. Mei reira mai, kua akatupu aia i te akamou riri kia Davida. Kare i roa ana kua rave aia i te mea mua o te au tautaanga e manganui i te tamate ia Davida. Mei teaa tikai te aka kino te ka tupu mai mei te vareae!​—1 Samuela 18:6-11.

No reira me te akakeu ra te akaaiteiteanga ia tatou uaorai mei tetai ke atu​—ta ratou au angaanga me kore au akameitakianga​—i te au manako ngakau aiteite atura ki te vareae me kore te taemoemoanga, e matakite! E au manako ngakau kino teia, kare e tau ana ki to te Atua manako anga. Inara i mua ake ra ka akara matatio ei e akapeea e rauka ai taua au tu ra i te kopaeia, e akamanako ana tatou i tetai apinga ke akaou mai te akatupu ra i te au akaaiteiteanga.

Akarakaraanga ia koe Uaorai e te Tu Mareka Ua

‘E tangata kite ainei au, e manea, e mako tikai, e meitaki i te tu kopapa ra, e akangateiteiia ana, e te aroa? E mei teaa te maata?’ E taime ua ake e tu ana tatou i mua i te io i te uianga i te au apinga mei teia rai. I na, tei tau ki tetai tangata tata, “papu roa, e putuputu ana taua au uianga i te tomo mai anga ki roto i to tatou manako e te akatupu ra i te au pauanga te akataka ngaro maira i te rekareka.” Ko tetai tangata e kare e papu ana eaa tana ka rauka i te rave penei ka akamanako no runga i teia au apinga ma te kore i tetai ua atu akakeu anga taemoemo me kore tetai manako e te manga vareae rai. Te akarakara ua ra aia iaia uaorai. Kare aina e e apinga tarevake te reira. Inara, te mataara tau i te raveanga i teia, koia oki kare i te akaaiteiteanga ia tatou uaorai ma tetai ke atu.

Tei runga ua i te au tumu anga e tuketuke, e tukeke to tatou au tu kite. Ka vai ua rai te au tangata e te akaraanga e e meitaki atu ratou ia tatou. No reira, e kia akara vareae atu ia ratou, ka tau tatou kia akaaite i to tatou tu raveanga kia tau ki to te Atua au turanga tuatua tika, te oronga maira i tetai aratakianga papu e eaa te mea tika e te meitaki. E inangaro to Iehova i te kite meitaki tikai ia tatou tataki tai. Kare aia e akaaite ana ia tatou ki tetai ua atu tangata. Te ako maira te apotetoro ko Paulo ia tatou: “Kia akapapu ra te tangata ravarai i tana uaorai angaanga, e i reira e rauka ai iaia te tumu no te rekareka nona anake rai, e kare no te akaaite anga ki te tangata ke.”​—Galatia 6:4, NW.

Tamaki Anga i te Vareae

No te mea kua apa pouroa te au tangata ravarai, penei ka umuumuia te au tautaanga ririnui e roa te tuatau i te tamaki anga i te vareae. E apinga ke rai i te kiteanga e te karanga ra te Tuatua Tapu kia tatou: “E arataki i te akangateitei anga tetai e tetai,” inara e apinga ke ra i te raveanga i te reira. Kua kite mai a Paulo i tona uaorai anoano ki te ara. Kia tamaki i te reira, kua umuumuia aia kia ‘moto i [tona] kopapa kia vi.’ (Roma 12:10; NW, 1 Korinetia 9:27) Ia tatou, penei te aiteanga o te reira e kia kopae te au manako taemoemo, monoanga i te reira ma te au apinga te ka akamaroiroi. Ka inangaroia tatou kia pure, pati anga ia Iehova kia tauturu ia tatou “eiaa e maata te manako ia [tatou] uaorai, i tei tau iaia kia manako ra.”​—Roma 12:3.

Ka tauturu katoa te apii Pipiria e te akamanako oonuanga. Ei akatauanga, e akamanako ana, i te Parataito taputouia e te Atua no te tuatau ki mua. Ka rauka i reira te katoatoa i te au, te oraanga meitaki i te pae kopapa, te maata i te kai, te au kainga tau meitaki, e te angaanga mareka tikai. (Salamo 46:8, 9; 72:7, 8, 16; Isaia 65:21-23) Ka akakeuia ainei tetai kia taemoemo atu? Kare roa. Kare e tumu no te raveanga i te reira. E tika, kare a Iehova i oronga mai ana i te au akatakaanga pouroa e eaa te tu o te oraanga i taua taime ra, inara ka rauka ia tatou i te akamanako tau ua e ka aruaru te katoatoa i te au inangaro e te au tu karape ta ratou e reka ana. Penei ka apii tetai i te akarakara etu, e tetai mai ka maani i te au kakau manea tikai. Eaa oki tetai ka vareae atu ei i tetai atu? Ka riro te au angaanga a to tatou au taeake ei akamaroiroianga, kare e tumu anga no te akamoupuku. Ka riro taua au manako ngakau ra e au apinga ia no te tuatau i topa.

Me ko te reira te tu oraanga ta tatou e inangaro ra, kare ainei e ka aruaru tatou i teianei i te tatanu i taua tu rai? Te rekareka ra tatou i tetai parataito pae vaerua, akamataraia mai mei te au manamanata e manganui o te ao nei takapini ia tatou. Mei te mea oki e kare te tu taemoemo e kiteaia i roto i to te Atua ao ou, e tumu tikai tetai kia kopae i te reira i teia taime nei.

E mea tarevake ainei, i reira, i te akaaiteiteanga ia tatou uaorai ma tetai ke? Me kore e tuatau ainei tetai e penei ka tau ua te reira?

Au Akaaiteiteanga Tau Ua

E manganui te au akaaiteiteanga tei taki atu ki te au ariuanga rikarika e te taitaia, inara kare te reira e umuumu ua ia ana. I roto i teia tu, e akara ana i te ako a te apotetoro ko Paulo: “Kia riro mai ei aronga aru i te aronga tei akarongo e te tapapa marie kua rauka ia ratou te au taputou.” (Ebera 6:12, NW) Te aruaru anga i te tatanu i te au tu mei taua aronga o to Iehova au tavini tiratiratu no te tuatau taito ra ka riro ia ei mea puapinga. E tika, penei ka kapiti mai te reira i etai au akaaiteiteanga. Ina, ka rauka te reira i te tauturu ia tatou i te akara i te au akaraanga ka rauka ia tatou i te aru e te au ngai ka inangaroia tatou kia akameitaki atu.

Akamanako ana ia Ionatana. I tetai tua, e tumu tetai e kia vareae aia. E ko te tama mua a te Ariki o Iseraela ko Saula, penei kua manako akera a Ionatana e kia riro mai ei ariki, inara kua iki a Iehova i tetai tangata mei etai 30 mataiti mapu ake iaia, ko te mapu ko Davida. E kare oki i akamoupuku ana i te riri, kua akatuke a Ionatana iaia uaorai na roto i te akataeake anga karapii kore e te turuturuanga ia Davida ei ariki akataoongaia o Iehova. E tangata pae vaerua tikai a Ionatana. (1 Samuela 19:1-4) Kare mei tona metua tane rai, tei akara ia Davida ei enemi ra, kua kite a Ionatana i to Iehova rima i roto i te au mea e kua kauraro atu ki Tona anoano; kare oki aia i akaaiteite atu ana iaia uaorai kia Davida, i te ui anga, “Eaa oki e ko Davida e kare ko au?”

I rotopu i te au taeake Kerititiano, auraka rava tatou e manako tamatakuia, mei te mea e te tauta ra tetai papaki kia meitaki atu ia tatou me kore kia pau i to tatou ngai. Kare e tau ana te tu tarere. Te akatakaia ra te au Kerititiano pakari e te kapipitianga, te taokotaianga, e te aroa, kare te taemoemo. “E enemi maata te aroa no te vareae,” i karanga ai te tangata apii no runga i te tu o te tangata ko Francesco Alberoni. “Me aroa tatou i tetai tangata, te inangaro ra tatou i te mea meitaki nona, e e mataora ana tatou me puapinga mai aia e te mataora.” No reira me kua ikiia tetai tangata ke i roto i te putuputuanga Kerititiano no tetai apainga tikai, te apinga aroa kia rave koia oki kia mareka ua i te reira. Ko te tu ia te reira o Ionatana. Mei iaia rai, ka akameitakiia tatou me turuturu tatou i te aronga te tavini tiratiratu ra i roto i te au taoonga tau i roto i ta Iehova akaaerenga.

Ka rauka te akaraanga meitaki tikai tei akanooia e te au taeake Kerititiano kia mareka tau ia. Ka rauka te au akaaiteiteanga tau ua kia ratou i te akakeu ua atu ia tatou ki tetai aruanga meitaki o to ratou akarongo. (Ebera 13:7) Inara me kare tatou e matakite meitaki, ka taui te aruanga ki te taemoemoanga. Me te kite maira tatou e kua meitaki atu tetai ta tatou e akara mareka ra e kua tauta tatou i te taakaaka me kore aviri atu iaia, kua taekeia te aruanga ki te vareae.

Kare roa tetai tangata apa ua nei e oronga mai ana i te akaraanga tau tikai. No reira, te karanga ra te Tuatua Tapu e: “Ei aru kotou i te Atua, mei te tamariki akaperepere ra.” Pera katoa, “I mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (Ephesia 5:1, 2; 1 Petero 2:21) Te au tu o Iehova raua ko Iesu​—to raua aroa, pumaana, tu tangi, e te tu akaaka​—te apinga ia ka tau tatou kia tauta i te aru. Ka tau tatou kia tuku taime i te akaaiteite ia tatou uaorai ki to raua au tu, au akakoroanga, e te au ravenga i te raveanga i te au apinga. Taua tutu akaaiteiteanga ka akapuapinga i to tatou oraanga, te oronga mai anga i te aratakianga papu, te tu ngaueue kore, e te tinamou, e ka rauka i te tauturu ia tatou kia taeria ki te turanga o te au tane e te au vaine Kerititiano pakari. (Ephesia 4:13) Me akamanako tatou i te raveanga i tei meitaki ia tatou i te aruanga i to raua akaraanga apakore, papu e kare roa tatou e akakeuia i te akaaiteite ia tatou uaorai ma te au taeake tangata.

[Tutu i te kapi 28, 29]

Kua tupu mai te vareae ki te Ariki ko Saula no Davida

[Tutu i te kapi 31]

Kare roa a Ionatana i akara atu ana i te mapu ko Davida ei enemi