Te Au Metua, Paruru i Ta Kotou Tuanga Akaperepere Maataia

“E akapuanga oki tei te pakari . . . na [te reira] oki e oronga mai i te ora i te aronga pu ra.”​—KOHELETA 7:12.

1. Eaa te au metua ka manako ei i ta ratou tamariki ei apinga aroa?

ANAU mai nga metua ki te ao nei i tetai tangata ora tei aiteite tona au tu pae kopapa e te au tu tangata ki to raua uaorai. Kua karanga te Pipiria i taua au tamariki ra e “e tuanga ïa no ko ia Iehova ra.” (Salamo 127:3) I te mea e koia te Oronga-Ora mou tikai, kua irinaki tikai a Iehova i te oronga ki te au metua i tetai apinga tei taopenga mai e nana rai. (Salamo 36:9) E te au metua, eaa ra to kotou manako no runga i te rauka anga mai taua apinga aroa puapinga maata ra mei ko mai i te Atua?

2. Eaa ra te pauanga a Manoa i te kite anga e ka riro mai aia ei metua tane?

² Kare e ekoko e ka arikiia taua apinga aroa ra ma te akaaka e te akameitakianga. Tere atu i te 3,000 mataiti i topa, kua pau iora te tangata ngati Iseraela ko Manoa na roto i teia mataara i te akakite anga tetai angera ki tana vaine e ka anau mai aia i tetai tama. I te rongo anga i te nuti meitaki, kua pure iora Manoa: “E [“Iehova,” NW] e, e tuku akaou mai koe kia maua nei i taua tangata no te Atua taau i tono maira, e akakite mai kia maua i ta maua e rave i taua tamaiti te ka anau ra.” (Te Au Akava 13:8) E te au metua, eaa ta kotou ka kite mai mei te akaraanga a Manoa?

Eaa i Anoanoia ai te Tauturu Tu-Atua i Teianei

3. Eaa i anoanoia ai ta te Atua tauturu i te ngaki anga i te tamariki i teia tuatau tikai?

³ I teianei tei maata roa atu i to mua ana, ka anoano te au metua i ta Iehova tauturu i te ngaki anga i ta ratou tamariki. Te tumu? Kua uriia mai a Satani te Tiaporo e tana au angera mei te rangi mai ki raro nei i te enua. “E mate ra oki to te enua,” e akamatakite maira te Pipiria, “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” (Apokalupo 12:7-9, 12) Te akamarama maira te Pipiria e “mei te liona ngunguru ra,” a Satani, “i te kimi anga i te tangata e pou iaia.” (1 Petero 5:8) E mea matau na te au riona i te takete i tei apikepike roa atu, te maata anga i te taime ko te punua. No reira, kia pakari, te au metua Kerititiano i te akara kia Iehova no te aratakianga i te paruru anga i ta ratou tamariki. Eaa te maata o taau tautaanga e rave ra?

4. (a) Te kite anga e te ori aere ra tetai riona i te oire eaa te ka akamaitu i te au metua kia rave? (e) Eaa ta te tamariki ka anoano no te paruruanga?

⁴ Me kua kite koe e te ori aere ua ra tetai riona i roto i te oire, kare e ekoko e ko te paruru anga i taau tamariki te mea puapinga maata roa atu. Te tapapa ua maira a Satani. Te umuumu ra aia i te takino i te iti tangata o te Atua, i te maani anga kia kore ratou e marekaia mai e te Atua. (Iobu 2:1-7; 1 Ioane 5:19) Ko te tamariki tetai takete mama roa atu. Kia ora mai mei te au puereere a te Tiaporo, ka anoanoia te tamariki kia kite e kia akarongo ia Iehova. E mea puapinga tikai te kite Pipiria. “Teia oki te ora mutu kore,” i tuatua ai a Iesu, “kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Pera katoa, ka anoano te tamariki i te pakari​—te tu kite i te marama e i te taangaanga i ta ratou e apii ra. I te mea e “na taua pakari oki e oronga mai i te ora i te aronga pu ra,” ka anoanoia kotou e te au metua kia tuku i te tuatua mou ki roto i te au ngakau o ta kotou tamariki. (Koheleta 7:12) Akapeea ra koe me rave i teia?

5. (a) Akapeea te apii anga i te pakari? (e) Akapeea te Maseli i te akataka anga mai i te puapinga o te pakari?

⁵ Ka rauka ia koe​—e e mea tau—​kia tatau koe ki taau tamariki mei roto i te Tuatua a te Atua. Inara e maata atu te umuumuia ra i te tauturu anga ia ratou kia inangaro e kia akarongo ia Iehova​—te umuumuia ra kia rauka ia ratou te marama. Ei akatutu: Penei ka akakiteia ki te tamaiti auraka e tikoti i te mataara i mua ake ka akara ai ki nga tua roa ai. Inara, kare tetai au tamariki e akarongo ana. No teea ra? Penei kare e akamarama putuputuia ana te au kino o te u anga i te motoka me kore kare e raveia ana na roto i te tu te akaketaketa ra i te kino ka tupu ki runga i te tamaiti, kia autu i reira ki rungao i te tu “neneva” te ka taopenga mai ki tetai u anga. I te apiianga i te pakari ka anoanoia tetai taime, e pera katoa te akakoromaki maata. Inara e mea puapinga tikai te pakari! “Tona au arataa, e arataa mataora ïa,” e karanga ra te Pipiria, “e e au tei tona ra au aerenga katoa. Ko te rakau ora aia i te aronga e opu iaia: e ko tei tāpu iaia, e ao tona.”​—Maseli 3:13-18; 22:15.

Apiianga te Oronga Maira i te Pakari

6. (a) Eaa ra te tamariki i te maata anga o te taime e rave ei te tu pakari kore? (e) Eaa te tamakianga e tupu nei?

⁶ Maata te taime e rave ana te tamariki i te mea tau kore, kare no te mea e kare ratou i apiiia ana i te mea tika, mari ra no te mea kare te apiianga i tae ki roto i to ratou ngakau​—ki roto roa ia ratou uaorai. Te akatupu nei te Tiaporo i tetai tamakianga kia peke te ngakau o te tamariki. Te kimi ravenga nei aia kia akaari pu ua ia ratou ki te au akakeuanga akono kore i te atua o tona ao. Te tauta katoa ra aia i te akanauru i to ratou manako ngakau ara i anauia mai ei kia rave i te au mea kino. (Genese 8:21; Salamo 51:5) Ka anoanoia te au metua kia kite e e tamakianga tika tikai te akatupuia nei kia peke te ngakau o ta ratou tamariki.

7. Eaa ra e kare e rava ana i te akakite ua ki tetai tamaiti i te mea tika me kore i te mea tarevake ra?

⁷ E akakite ua ana te au metua ki te tamaiti i te mea tika me kore te mea tarevake, i te irinaki anga e kua apii ratou iaia ki tetai kaveinga no te tu akono tau. Penei ka karanga ratou ki te tamaiti e e tarevake kia pikikaa, kia keia, me kore kia rave i te pirianga ainga ki tetai ua atu kare tetai i akaipoipo. Inara, ka anoano te tamaiti i tetai akakeuanga pakari atu no te akarongo anga kare ua ra no te mea e kua akakite mai tona nga metua. Na Iehova teia au ture. Ka anoanoia te tamaiti kia kite e ko te akarongo i te au akauenga a te Atua te arataa o te pakari.​—Maseli 6:16-19; Ebera 13:4.

8. Eaa te tu apiianga te ka tauturu i te tamariki kia akono ma te pakari?

⁸ Te tu ngata o te ao katoa e pini ua ake, te tu tuketuke o te au apinga ora, te tauianga o te au tuatau​—ka tauturu pouroa taua au apinga ra i tetai tamaiti ou kia ariki i te vaianga o Tei Anga mai koia oki tei ki i te pakari. (Roma 1:20; Ebera 3:4) Pera katoa, e mea tau kia apiiia te tamaiti e te aroa maira te Atua iaia e kua akanoonoo na roto i te atinga a Tana Tamaiti kia oronga mai i te oraanga e tuatau ua atu nona e ka rauka iaia i te akarekareka i te Atua na te akarongo anga i Tana tuatua. Ka inangaro atu i reira te tamaiti i te tavini ia Iehova, noatu te au timataanga a te Tiaporo i te tapu iaia.​—Maseli 22:6; 27:11; Ioane 3:16.

9. (a) Eaa te umuumuia maira no te apiianga akaora? (e) Eaa te ikuikuia maira te au metua tane kia rave, e eaa ta teia e kapiti maira?

⁹ Ka anoanoia tetai taime, te akamanakoanga, e te paranianga i te tu apiianga te ka paruru i tetai tamaiti e te ka akakeu iaia kia rave i te mea tika. Te umuumuia maira te au metua kia ariki i te aratakianga mei ko mai i te Atua. Te akakite maira te Pipiria: ‘Ko kotou, e te au metua tane, . . . e rave atu i te utuutu mai [i ta kotou tamariki] i te ako anga e te akatikatikaanga manako a Iehova ra.” (Ephesia 6:4, NW) Eaa te aiteanga i tera? Te “akatikatikaanga manako,” i roto i te reo Ereni tumu, te oronga ra i te manako o te “tukuanga i te manako ki roto.” No reira te raurauia maira te au metua tane, tikai, kia tuku i te manako o Iehova ki roto i ta ratou tamariki. Ka riro tikai tera ei paruruanga maata no te tamariki! Me kua rauka i te tamariki to te Atua au manako, tona aerenga manako, i te tukuia ki roto i to ratou manako, ka paruruia ratou mei te angaanga tarevake.

Anoano Tei Akakeuia e te Aroa

10. Kia ikuiku meitaki tikai i taau tamaiti, eaa ra te mea puapinga tikai kia kite koe?

¹⁰ Inara, kia rauka ia koe i te akatupu i toou anoano kia utuutu meitaki i taau tamariki, ka anoanoia e na te aroa e akakeu i taau au tautaanga. Tetai tumu puapinga koia oki ko te komunikeitianga meitaki. E kimi e eaa te tupu ra i roto i te oraanga o taau tamaiti e eaa tona au manako. I roto i tetai turanga mareka ua, e akamaroiroi marie atu i taau tamaiti. Tetai au taime, penei ka poitirere koe i tana ka tuatua mai. Kia matakite tikai e auraka e riri vave ua. Mari ra, e akarongo ma te manako takinga meitaki.

11. Akapeea te metua i te tuku anga i te manako o te Atua ki roto i te tamaiti?

¹¹ Tika, penei kua tatau ana koe ki taau tamaiti mei roto i te Pipiria no runga i te au ture a te Atua e arai ra i te tu ainga tau kore, noatu kua tatau ana me eia taime. (1 Korinetia 6:18; Ephesia 5:5) Penei kua akaketaketa teia ki rungao i taau tamariki i te mea mareka e te mea mareka kore kia Iehova. Inara, e maata atu te ka umuumuia no te tuku anga i tona manako ki roto i tetai tamaiti. Ka anoanoia i te tauturu i te tamariki kia uriuri no runga i te puapinga o ta Iehova au ture. Ka anoanoia ratou kia irinaki e e mea tika e te meitaki tana au ture e ko te apinga tau e te aroa i te rave koia oki ko te akarongo i te reira. Na te uriuri anga ua koe kia ratou mei te au Tuatua Tapu kia ariki ratou i te manako o te Atua e tau ei kia karangaia e kua tuku koe i tona manako ki roto ia ratou.

12. Akapeea te metua i te tauturu anga i tana tamaiti kia rauka te manako tau tikai no runga i te au pirianga ainga?

¹² Me tuatua no runga i te ainga, penei e ui koe, “Toou manako ka riro te akarongo anga ki te au ture a Iehova auraka e rave i te pirianga ainga i mua ake i te akaipoipo anga i te akangere i tetai tangata i te mataora?” Akamaroiroi i taau tamaiti kia akamarama mai i tana pauanga. Muri ake i te akara akaou anga i te akanoonooanga manea a Iehova no te anauanga i tetai tamaiti, penei e ui koe: “Toou manako ka maani to tatou Atua aroa i te au ture te ka akangere ia tatou i te rekareka o te oraanga? Me kore ra i toou manako e i tukuia mai tana au ture kia mataora tatou e kia paruru ia tatou?” (Salamo 119:1, 2; Isaia 48:17) Kimi kia kite koe eaa te manako o taau tamaiti no runga i teia mea. I reira ka oronga ai koe i tetai au akaraanga e akapeea te ainga tau kore i te taki anga atu ki te mamae ngakau e te pekapeka. (2 Samuela 13:1-33) Na te uriuri anga ki taau tamaiti kia marama e kia ariki aia i te manako o te Atua, e maata tikai taau i rauka i te tuku anga i te manako o te Atua ki roto iaia. Inara, te vai nei tetai apinga ke atu ka rave koe.

13. Na te marama anga no runga i teaa e akakeu tikai i te tamaiti kia akarongo ia Iehova?

¹³ Ma te pakari, kare anake ua koe e apii i taau tamaiti i te au openga kino o te akarongo kore ia Iehova mari ra ka akamarama katoa koe e akapeea a Iehova uaorai i te takino angaia e te mataara e noo nei tatou. Akaari ki taau tamaiti mei roto i te Pipiria e ka akaongoongo tatou ia Iehova me kore tatou e rave i tona anoano. (Salamo 78:41) Penei e ui koe, “Eaa koe kare ei e inangaro i te akamamae ia Iehova?” e te akamarama e: “Te karanga ra a Satani te enemi o te Atua e te tavini ua nei tatou ia Iehova no te au tumu noinoi e kare no to tatou aroa iaia.” E oti i reira e akataka e na te vai tiratiratu anga, kua akarekareka a Iobu i te ngakau o te Atua, te oronga anga i reira i tetai pauanga ki te akaapaanga pikikaa a Satani. (Iobu 1:9-11; 27:5) Ka anoanoia taau tamaiti kia marama e tei runga ua i tona au tu, ka rauka iaia kia akataitaia me kore kia akamataora ia Iehova. (Maseli 27:11) Ka rauka ua teia e te au apiianga puapinga ke atu e manganui kia apiiia ki te tamariki na te taangaanga anga i te puka Learn From the Great Teacher.a

Au Tupuanga Mareka Tikai

14, 15. (a) Ko teea au apiianga i roto i te puka Teacher tei akakeu i te tamariki? (e) Eaa te au tupuanga meitaki taau i kite mai mei te taangaanga anga i te puka? (Akara katoa i te pia i te kapi 18-19.)

¹⁴ Kua tata tetai papa ruau i Koroatia e tatau ana i te puka Teacher ma tana mokopuna e itu mataiti e kua akakite te tamaiti kiaia i teia: “Kua akakite mai a Mama e rave i tetai angaanga, inara kare au i inangaro i te rave i te reira. E oti i reira kua maara mai iaku te pene ‘Obedience Protects You,’ no reira kua oki au e kua akakite kiaia e ka akarongo au iaia.” No runga i te pene “Why We Should Not Lie,” kua akakite tetai nga tokorua i Florida, U.S.A., e: “Te oronga maira te reira i te au uianga e pati ra i te tamariki kia akakite mai eaa to roto i to ratou ngakau e kia akakite mai i te au tarevake te kare tikai ratou e inangaro ana i te akakite mai.”

¹⁵ Kua tere atu i te 230 tutu i roto i te puka Teacher, e ka kitea tetai tataanga akamarama, me kore akatakaanga, no te tutu tataki tai me kore no te au pupu tutu. “Maata te taime e tamou ana taku tamaiti i tona mata ki runga i tetai tutu e kare e inangaro kia uriia te kapi,” i akakite ei tetai metua vaine rekareka. “Kare anake ua te au tutu e manea ana mari ra te apii maira ratou uaorai i tetai au apiianga, me kore te akakeu ra i te tamariki kia ui mai i tetai au uianga. No runga i tetai tutu te akara tivi ra tetai tamaiti i roto i tetai pia poiri, kua ui mai taku tamaiti, ‘Mami, eaa ta tera tamaiti e rave ra?’ na roto ra i te tangianga reo e akakite maira e kua kite aia e e apinga tarevake tetai.” Te tatau ra te tataanga akamarama i te tutu: “Who can see everything we do?”

Apiianga Puapinga no Teia Tuatau

16. Eaa ra te mea puapinga kia apiiia ki te tamariki i teia tuatau, e no teaa ra?

¹⁶ Ka anoanoia te tamariki kia kite i te tu tau e te tau kore o te taangaanga anga i te au mero muna o to ratou kopapa. Tera ra, kare te tuatua anga no runga i teia i te mea ngoie ua. Kua akakite tetai tangata tata nuti pepa e i tupu mai aia i roto i tetai tuatau tei manakoia e e mea tau kore kia tuatua no runga i te au mero no te ainga. No runga i te apiianga i tana tamariki, kua tata aia: “Ka inangaroia au kia autu ki rungao i toku tu akama.” Tika roa, e me kopae te au metua i te tumu manako o te ainga no te akama ua nei, kare te reira e paruru i ta ratou tamariki. Te taangaanga nei te aronga rave tau kore i te tu kite kore o te tamariki. Te tirotiro atu nei te puka Learn From the Great Teacher i te tumu manako na roto i tetai tu tau tikai, e te ngateitei. Kare te akamarama anga ki te tamariki no runga i te ainga e apai ke i to ratou tu apa kore, na te kore anga ra e akamarama kia ratou e arataki atu ki te akangere anga ia ratou i to ratou tu apa kore.

17. Akapeea te puka Teacher i te tauturu anga i te au metua kia apii i ta ratou tamariki no runga i te ainga?

¹⁷ I roto i te pene 10, me uriuri no runga i te au angera kino tei aere mai ki te enua nei e tei uanga mai i te tamariki, kua uiia ki te tamaiti, “What do you know about sex relations?” Te oronga maira te puka i tetai pauanga mama ua, e te ngateitei. Muri mai, te akamarama maira te pene 32 e akapeea te paruru anga i te tamariki mei te aronga rave tau kore i te ainga. Manganui te au reta tei ripoti mai e e mea puapinga tikai taua apiianga ra. Kua akakite tetai: “Te epetoma i topa i te aere anga taku tamaiti a Javan ki ko i te taote o te tamariki, kua ui mai aia e me kua uriuri rai maua kiaia no runga i te tu tau o te taangaanga anga i te au tuanga o te kopapa. Kua rekareka tikai aia e kua rave maua i teia na te taangaanga anga i ta tatou puka ou.”

18. Akapeea te puka Teacher i te uriuri anga no runga i te akangateiteianga i te au apinga akatutu anga pa enua?

¹⁸ Te tuatua ra tetai pene ke mai no runga i te tuatua Pipiria o te toko toru mapu Epera ko Sadaraka, Meseka, e Abedenego, tei patoi i te tipapa ki raro i tetai tiki tei akatutu i te Au-Enua o Babulonia. (Daniela 3:1-30) Penei kare tetai aronga e akaaite i te akangateiteianga i tetai tiki ki te taki anga i te rima ki te reva, mei ta te puka Teacher e akakite maira. Inara, akara eaa ta te tangata tata puka ko Edward Gaffney e karanga ra i roto i tetai uiuianga tuatua na te U.S. Catholic. Kua taiku mai aia e i te akakite anga atu tana tamaine kiaia i muri ake i tona ra mua ki te apii papuriki e kua kite aia i tetai “pure ou i te apii,” kua pati aia kiaia kia ripiti mai i te reira kiaia. “Kua tuku aia i tona rima ki runga i tona pukuatu,” i tuatua ai a Gaffney, “e kua akamata ma te ngakau parau, ‘Te koreromotu nei au i te kauraro ki te reva . . . ’” Kua tuatua ua atu aia: “E mea viviki roa, toku marama anga. Te tika ua ra te Au Kite o Iehova. E tuanga pae vaerua tetai no te akamorianga i te enua e akatupuia ra i roto i ta tatou au apii i te akamataanga roa mai​—koia oki ko tetai tu tiratiratu ekoko kore te kare roa e rauka kia akaaiteia.”

Puapingaia te Tautaanga

19. Eaa te au tutakianga e vai maira no te apii anga i te tamariki?

¹⁹ Tika rava, e ka puapingaia taau tautaanga i te apii anga i taau tamariki. Kua aue takiri tetai metua vaine i Kansas, U.S.A., i te tae mai anga tetai reta mei ko i tana tamaiti. Kua tata aia: “Toku manako kua manuia tikai au e kua rauka tetai utuutuanga tei tauturu iaku kia rauka te tu manako ngakau ngaueue kore e te tau tikai. Kua tau rai kia akapaapaaia korua ko Tati.” (Maseli 31:28) E maata atu te au metua ka rauka i te puka Learn From the Great Teacher i te tauturu kia apii i te tamariki kia rauka i te paruru atu i teia tuanga akaperepere maataia.

20. Eaa te ka tau i te au metua kia akamaara ua rai, e eaa te akakeuanga ta te reira ka akatupu kia ratou?

²⁰ Ka tau ta tatou tamariki kia orongaia te taime, te akamanakoanga, e te tautaanga pouroa ka rauka ia tatou i te oake. E poto ua rai to ratou tuatau mapuanga. Taangaanga meitaki i te au tuatau ravarai kia piri kia ratou e kia tauturu ia ratou. Kare rava koe e taitaia i te reira. Ka taopenga mai ratou i te inangaro ia koe. E akamaara ua rai, e e apinga aroa ta kotou tamariki na te Atua kia kotou. E tuanga akaperepere maataia tikai ratou! (Salamo 127:3-5) No reira akono rai ia ratou mei te reira, mei te mea ra e apainga taau ki te Atua no te mataara e ngaki ra koe ia ratou no te mea ko te tika, naau tera apainga.

[Tataanga Rikiriki i Raro]

Akapeea Koe me Pau?

• Eaa ka anoanoia ai te au metua i teianei tikai kia paruru i ta ratou tamariki?

• Eaa te tu apiianga te ka oronga mai i te pakari?

• Eaa te au itiu puapinga no te uriuri ma taau tamariki i teia tuatau?

• Akapeea te puka Teacher i te tauturu anga i te au metua i te apii i ta ratou tamariki?

[Pia/Au Tutu i te kapi 18, 19]

Tetai Puka no te Katoatoa

Kua akapapaia te Learn From the Great Teacher kia tauturu i te au metua me kore i tetai atu aronga mamaata i te tatau e te uriuri i te au apiianga no Iesu Karaiti ki te tamariki. Inara, ko te aronga mamaata tei tatau uaorai ana i te puka kua akakite mai i te arikianga ngakau tae no ta ratou i kite mai.

Tetai tangata i Texas, U.S.A., kua karanga e ko te: “Learn From the Great Teacher e kite karape tikai i to te reira tu ngoie ua, i te akakeu anga ia tatou i tetai ua atu mataiti​—noatu e 76, mei iaku rai. Meitaki maata tikai, mei tetai tei tavini ana ia Iehova mei te mapu anga.”

Kua ripoti mai tetai tangata tatau no London, Engarani e: “Papu e ka mou mai te au akatutuanga manea tikai i te au ngakau o te au metua e te tamariki katoa. Te au uianga e te akapapaanga e umere tikai ia, e mei teaa tikai te meitaki i te kiteanga i te au itiu ngata i te akonoia anga, mei tera rai i te pene 32, ‘How Jesus Was Protected.’” Kua taopenga aia: “Kare e ekokoanga e noatu rai e kua akapapaia tikai teia puka ma te manakoanga ki te au tamariki a te Au Kite o Iehova, e i toku manako ka mataora tikai te au puapii e tetai atu aronga ke kia tu katoa i tetai kopi. Te akara nei au ki mua i te taangaanga anga i te reira i te au marama e te au mataiti ka aereia.”

Tetai vaine no Massachusetts mai, U.S.A., kua tuatua no runga i te “au tutu tei manako meitakiia” e manganui. Kua tata aia: “Kua kite mai au e noatu e kua akapapaia teia puka na te tamariki, ka rauka katoa te au tumu tuatua uriuriia i te tauturu ia tatou aronga mamaata i te akamanako i to tatou uaorai pirianga kia Iehova.”

“Aue taue! E puka umere tikai!” i karanga ai tetai vaine no Maine mai, i U.S.A. “Kare te reira e na te tamariki anake ua mari ra na tatou katoatoa ei tamariki na te Atua. Kua itae te reira i roto i te au ngai kare roa au i kite ana e te vai ra e kua akakeu i te au manako ngakau e oti kua tamaru i te reira, e kua tupu maira te au. Kua akavaitata tikai au kia Iehova ei Metua noku. Kua apai ke pouroa aia i te mamae tei tupu ana i te au mataiti i aereia mai ana e kua akaari taka meitaki mai i tona akakoroanga.” Kua taopenga aia: “Te akakite nei au ki te katoatoa, ‘E tatau i te reira ine.’”

Kua ripoti mai tetai vaine no Kyoto, Tiapani, e iaia e tatau ra ki tana ai utaro, kua ui mai ratou i te au uianga mei te: “‘Eaa ta tera tamaiti e rave ra? Eaa oki teia tamaine meangiti i karo ia ai? Akapeea teia mama? Akapeea teia riona?’ Te apii ra te reira i te au apinga ta tatou e inangaro ra i te kite, e no reira e maata atu toku inangaro i te reira e i tetai ua atu puka ka kite mai au i roto i tetai ngai vairanga anga puka.”

Kua karanga mai tetai metua tane i Calgary, Kanata e, i te taime tikai i rauka mai ei iaia te puka, kua akamata aia i te tatau i te reira ki tana tamaine e ono mataiti i te pakari e ki tana tamaiti e iva mataiti i te pakari. “Taua taime rai e mea umere tikai te ariuanga,” i ripoti ei aia. “Te aru ua ra taku nga tamariki e te paupau ra i te au uianga mei to raua ngakau. Kua manako mai raua e e tuanga raua no te apii, e kua oronga te reira i tetai atianga i te akakite ua i to raua manako. Kua oraora mai raua, e kua akakite mai taku tamaine e te inangaro ra aia i te apii no roto mai i te puka ou i te au po ravarai.”

I muri ake e tai apiianga, kua tuatua mai te metua tane: “Kua roa maua ko taku tamaiti i te pukapukaanga no runga ia Iehova e tana au akakoroanga. E maata tikai tana au uianga tei akatumuia ki runga i te puka. Kua aere mai te au roimata ki toku nga mata i tona karanga mai anga e kia moe meitaki au e kua ui mai: ‘Ka rauka akaou ainei ia taua i te rave i teia, e Papa? E maata taku au uianga, e ka inangaro au i te kite pouroa i te au apinga no runga ia Iehova.’”

[Tutu i te kapi 15]

E te au metua, eaa ta kotou ka kite mai mei te akaraanga a Manoa?

[Tutu i te kapi 16]

Te tamariki, eaa ta kotou ka kite mai mei te akaraanga o te au tangata Epera toko toru?

[Au Tutu i te kapi 17]

Te au tutu e te au tataanga akamarama i roto i te puka “Teacher” e au apinga angaanga ririnui no te apii

Eaa te pikikaa ta Anania e akakite ra kia Petero?

Koai te kite maira i te au apinga ravarai e rave ra tatou?