Ripoti a te Aronga Tutu Patireia
Te Apai Maira Tetai Au Tangata Tiratiratu i te Akapaapaa kia Iehova
I ROTO i te enua katoa, kua kiteaia te Au Kite o Iehova—te aronga ou e te ruaine—no to ratou tu tiratiratu. E akamanako ana i te au akaraanga no ko mai e toru tuanga o te enua.
Ko Olusola 17 mataiti ra, tei noo ra i Naiteria, te oki atura ki te kainga mei te apii mai i tetai ra i tona kite anga atu i tetai pute moni i runga i te one. Kua apai atu aia i te reira ki te puapii maata, tei tare i te moni, kua tae te reira ki te ₦6,200 (mei te $45, U.S.). Kua akaoki atu te puapii maata i te pute moni ki te puapii nana te reira i ngaro ra. Ei akameitakianga, kua oake te puapii kia Olusola e ₦1,000 (mei te $7, U.S.) e kua akakite atura kiaia e kia tutaki i tana au moni tutaki no te apii ki te reira. Te rongo anga tetai au tamariki apii eaa tei tupu, kua kata aviri ratou ia Olusola. I etai au epetoma i muri mai, kua ripoti atu tetai tamaiti apii e kua keiaia tana moni, kua patiia te au puapii kia kimikimi katoatoa aereia te au tamariki apii. “E tu koe i konei,” i akakite atu ei te puapii kia Olusola. “Kua kite au e ko tetai Au Kite o Iehova, kare koe e keia ana.” Kua kiteaia mai te moni no ko mai i nga tamariki tamaroa tei aviri ana ia Olusola, e kua akautunga pakariia raua. Kua tata a Olusola e: “Mataora tikai au e kua kiteaia mai au e ko tetai o te Au Kite o Iehova, kare roa e keia ana, no reira te orongaia nei te kaka kia Iehova.”
I te akaruke anga i te kainga i tetai ra, kua kiteaia mai e Marcelo, e tangata tumu no Atenetina, tetai kiri apai aere i runga i te one e mita ua ake i muri i tona ngutupa. Kua apai atu i te kiri apai aere ki roto i te are, kua eeu marie raua ko tana vaine i te reira. Ma te poitirere maata kia raua, kua kiteaia mai e raua tetai aka moni, te au kati kaiou, e tetai au tieki tei tainaia, ko tetai mai e mirioni peso. I roto i te kiri apai aere, kua kiteaia mai e raua tetai numero terepaoni. Kua ringi atu raua i te ona e kua akapapa i te akaoki atu i te kiri apai aere ma to te reira apinga i roto ra ki ko i te ngai e angaanga ra a Marcelo. Te tae mai anga te ona, i te akara anga te manamanata ra aia. Kua akakite atu te pu angaanga kiaia e kia noo marie ua, no te mea ko tetai o te Au Kite o Iehova a Marcelo. Ei tutaki anga no te kiteaia mai anga te kiri apai aere, kua oake atu te ona kia Marcelo e 20 ua peso (mei te $6, U.S.). Kua riri te pu angaanga i teia no te mea kua umere tikai aia i to Marcelo tu tiratiratu. Te oronga ra teia i te tuatau kia Marcelo kia akamarama atu e ko tetai o te Au Kite o Iehova ra, te inangaro ra aia kia vai tiratiratu i te au taime ravarai.
Kua tae mai te tupu anga te aru mai nei no Koketitani mai. Kua kiteaia mai e Rinat, e tamaiti e ono mataiti, tetai pute moni na tetai vaine e noo ra i te pae mai. E 1,100 som i roto i te pute moni (mei te $25, U.S.). Te akaoki mai anga a Rinat i te pute moni tei ngaro ana ra ki te vaine ra, kua tare aia i te moni e oti kua akakite atu ki te metua vaine o Rinat e e 200 som tei ngaro. Kua akakite atu a Rinat e kare aia i rave ana i te moni. Ei reira kua aere atu te katoatoa i te kimi i te moni tei ngaro e kua kitenaia mai te reira vaitata atu i te ngai i kitenaia mai te pute moni. Kua poitirere te vaine. Kua akakite aia i tana akameitaki anga kia Rinat e tona metua vaine, te mea mua no te akaoki mai anga i te moni i ngaro e te rua, no tona utuutuia anga ei Kerititiano.