Ka Rauka ia Tatou i te Akakoromaki i Tetai ua Atu Timataanga!
TE ARO atura ainei koe i teia taime nei i tetai timataanga i roto i toou oraanga? Te taitaia ra ainei koe, kare e rauka i te akakoromaki atu i te reira? E mataku ana ainei koe i tetai au taime e e takake roa toou manamanata e kare roa e pauanga ki te reira? Me koia ia, kia akamaroiroi! Noatu eaa te au timataanga ta tatou ka aro atu, te akapapu maira te Pipiria ia tatou e ka rauka i te Atua i te akakeu ia tatou i te akono i te reira.
Te ariki ra te Pipiria e ka ‘aravei [te au tavini o te Atua] i te au timata anga tukeke.’ (Iakobo 1:2, NW) E akara ana i te tuatua “tukeke” (te Ereni e poi·kiʹlos). Kia tau ki te taangaanga anga taito ra, te aiteanga o te tuatua mua e “tumatatini” me kore “te au kara e manganui” e te akakite maira i te “turanga tukeke o te au timataanga.” Ko te tika, me tuatua uaia, ko te aiteanga tikai o te reira koia oki e “maata te au kara.” No reira, ko “te au timataanga tukeke” e au timataanga te aere maira na roto i te au tu kara e manganui, i na te reira tuatua ai. Noatu rai, te turuturu ra a Iehova ia tatou kia rauka ia tatou i te akakoromaki tataki tai i te reira. Eaa i papu ei ia tatou i te reira?
“Te Aroa ua Tumatatini a te Atua Ra”
Te akakite ra te apotetoro ko Petero e ka ‘taitaia [te au Kerititiano] i teianei i te au timataanga tu ke ke ra.” (1 Petero 1:6) I muri akera i roto i tana reta akauruia, kua karanga aia e ko ‘te aroa ua o te Atua’ e ‘tumatatini’ oki.’ (1 Petero 4:10) Te takiota tuatua “tumatatini” te vai ra tetai tu no taua tuatua Ereni mua rai. I te tuatuaanga no runga i teia, te karanga ra tetai tangata apiipii: “E aka manako umere tikai teia. . . . Kia tuatua no runga i te takinga meitaki [me kore, te aroa ua] o te Atua ra e ko poikilos ko te aiteanga koia oki kare e kara i roto i te turanga o te tangata nei e kare e rauka i to te Atua takinga meitaki kia autu.” Kua karanga katoa aia: “Kare roa e okotai putunga turanga, kare roa e tumatetenga, e manamanata tapapa koreia me kore maroanga e kare e rauka ana i te takinga meitaki o te Atua i te kite i tetai ravenga, e ka kore e rauka i te takinga meitaki o te Atua i te akono autu atu e i te akakore atu. Kare roa e apinga i roto i te oraanga e kare e rauka i to te Atua takinga meitaki i te akakoromaki atu. Te taki tika atura teia tuatua akataka ko poikilos i to tatou au manako ki to te Atua au tu kara takinga meitaki e manganui te ka rava ua no te au apinga katoatoa.”
Au Timataanga Pauia ki te Meitaki
Kia tau ki ta Petero, ko tetai mataara e akaariia ra to te Atua takinga meitaki koia oki na roto i aronga tukeke i roto i te putuputuanga Kerititiano. (1 Petero 4:11) E apinga aroa me kore e au kite pae vaerua, to te tavini tataki o te Atua, e penei ka tau ei tumuanga no te akamaroiroi ki te aronga e aro atura i te au timataanga. (Roma 12:6-8) Ei akatauanga, e meitaki tikai tetai au mema o te putuputuanga ei au puapii apii Pipiria. Te akauru ra e te akakeu ra ta ratou au tuatua pakari i tetai atu kia akakoromaki. (Nehemia 8:1-4, 8, 12) Ko etai atu ra te akono putuputu ra i te au atoroanga a te tiaki i te au kainga o te aronga e inangaro ra i te tauturu. Taua au atoroanga e au atianga ia no te akamaroiroianga, ei ‘pumaana no te au ngakau.’ (Kolosa 2:2) Me akono ana te au akaaere i taua au atoroanga akamaroiroi i te akarongo, te oronga ra ratou i tetai apinga aroa pae vaerua. (Ioane 21:16) Noatu rai, etai atu i roto i te putuputuanga kua kiteaia no te pumaana, te tangi aroa, e te tu maru i te akono anga i te au taeake irinaki tei akataitaiaia e te au timataanga. (Angaanga 4:36; Roma 12:10; Kolosa 3:10) Te tu tangi aroa e te tauturu maroiroi tei akaariia e taua au taeake e te au tuaine aroa ra e akakiteanga maata tikai te reira, me kore e “kara,” o to te Atua ra aroa ua.—Maseli 12:25; 17:17.
“Ko te Atua Nona Anake te Pumaana”
Tei runga ravao, te oronga maira Iehova i te pumaana. Koia “te Atua nona anake te pumaana; Ko tei akapumaana mai ia matou i to matou au mate katoa nei.” (2 Korinetia 1:3, 4) Te pakari tei kiteaia i roto i ta te Atua Tuatua akauruia e te maroiroi orongaia mai e tona vaerua tapu e au mataara maata tikai te reira e pau mai ana a Iehova i ta tatou au pure no te tauturu. (Isaia 30:18, 21; Luka 11:13; Ioane 14:16) Ka rauka i to tatou ngakau i te akakeuia e te taputou akauruia tei tuatuaia e te apotetoro ko Paulo. Kua karanga aia: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”—1 Korinetia 10:13.
Ae, noatu eaa te “kara,” me kore te tu, o to tatou timataanga, te vai ua ra tetai “kara,” me kore akakiteanga, o to te Atua ra aroa ua te ka pau atu i te reira. (Iakobo 1:17) Ta Iehova turuturuanga tau meitaki e te tau ua tei orongaia no tona au tavini ra—noatu eaa te tuke i to ratou au timataanga me kore au akaaoanga—ko tetai akapapuanga ia o “te pakari tumatatini o te Atua.” (Ephesia 3:10) Kare ainei koe e akatika?
[Au Tutu i te kapi 31]
Te tauturu ra a Iehova ia tatou i te akakoromaki i to tatou au timataanga