Au Uianga a te Aronga Tatau

Mei te mea e kua tiratiratu kore mai te Ariki ko Solomona o Iseraela taito ra i tona pakari anga ki te Atua, ka rauka ainei ia tatou i te taopenga e kare aia e akatu akaouia mai?​—1 Ariki 11:3-9.

Mei te mea e kua papa te Pipiria i te ingoa o tetai au tangata e te au vaine akarongo e kare e ekokoanga ka akatuakaouia, kare te reira e tuatua tikai maira no runga i te au manakonakoanga o te au tangata tataki tai ta te reira e tapa maira. (Ebera 11:1-40) Inara, i te tua o Solomona, ka rauka ia tatou tetai manakoanga o ta te Atua akavaanga na te akaaite anga eaa tei tupu kiaia i te mate anga ki tei tupu ra ki tetai aronga tiratiratu tikai i to ratou mate anga.

E rua ua rai akapapuanga ta te au Tuatua Tapu e tuatua ra no te mate​—te tu tuatau poto ua no te vai kore ua anga e te tu no te mate mutu kore. Te aronga tei akavaia e kare e tau ana no te tuakaouanga kua peiia ki roto ia “Keena,” me kore “te roto ai.” (Mataio 5:22, NW; Mareko 9:47, 48; Apokalupo 20:14) I roto i teia aronga ra ko te nga tangata mua, ko Adamu raua ko Eva, ko Iuda Ikariota pikikaa ra, e tetai au tangata tikai tei mate i to te Atua tuku anga i te akautunga ki runga ia ratou, mei taua aronga ra i to Noa tuatau e te aronga tikai o Sodoma e Gomora.a I te mate anga, te aronga te ka akameitakiia ma tetai tuakaouanga ka aere roa ki te vaarua tanumanga o te tangata​—ko Teoro, me kore ko Ate. I te tuatua anga no runga i to ratou manakonakoanga, te karanga ra te Pipiria e: “E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra: e akavaia iora ratou ravarai i ta ratou au angaanga.”​—Apokalupo 20:13.

I reira, te aronga tiratiratu tei taikuia ra i roto ia Ebera pene 11, tei roto ia Teoro, me kore ia Ate, te tiaki ua ra i te tuakaouanga. I roto i te reira ko te au tavini tiratiratu o te Atua ko Aberahama, Mose, e Davida. I teianei e akamanako ana e akapeea te Pipiria i te tuatuaanga ia ratou no runga i to ratou mate anga. “Ka tae ra koe,” i karanga ai a Iehova kia Aberahama, “ki o toou ai metua ra ma te au; kia ruaine roa koe ka tanumiaʼi.” (Genese 15:15) Kua na ko atu a Iehova kia Mose: “I na, ka moe koe ma to ai metua katoa.” (Deuteronomi 31:16) No runga i te metua tane o Solomona, ko Davida, te karanga ra te Pipiria e: “Moe aturā Davida e tona ai metua katoa, e tanumia iora ki roto i te oire o Davida.” (1 Ariki 2:10) No reira, te tuatuaanga ‘moe anga ki tetai ra ai metua’ ra ko tetai mataara ke ia i te tuatua anga e kua aere te tangata ki Teoro.

Eaa tei tupu kia Solomona i tona mate anga? Te pau maira te Pipiria: “E to Solomona tuatau i te ariki anga i Ierusalema ki runga ia Iseraela katoa e a ïa ngauru i te mataiti. Kua moe iorā Solomona ki o tona ra ai metua, e tanumia iora aia i roto i te oire o tona metua ra o Davida.” (1 Ariki 11:42, 43) No reira, i te akaraanga e mea tau i te taopenga e tei roto a Solomona ia Teoro, me kore ia Ate, mei reira aia e akatuakaouia mai ei.

Te akakite maira teia taopenga anga e te akatueraia ra ki tetai ke ra i te akapapuanga e ka akatuakaouia mai i ta te au Tuatua Tapu e akataka tikai maira e, ‘kua moe ratou ma to ratou ai metua.’ Ko te tika, te manganui o te au ariki tei mono mai ia Solomona, noatu e kua tiratiratu kore, te tuatuaia ra na roto i teia tu. Kare teia e aka angaanga ana i te irinaki, mei te mea “e e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) E tika, i muri ua ake i te “aronga katoa i roto i te au menema akamaara anga” e akatuakaouia mai ei ka kite papu mai tatou i reira e koai tei akameitakiia ma te tuakaouanga. (Ioane 5:28, 29, NW) E kia oronga i tetai pauanga papu tikai no runga i te tuakaouanga o tetai ua atu tangata tikai i taito ra, kia tiaki tatou, irinaki anga i roto i ta Iehova tukuanga tika apa kore.

[Tataanga Rikiriki i Raro]