Ka Aaere Tatou i te Ingoa o Iehova o to Tatou Atua
“Ka aaere ra tatou i te ingoa o Iehova, o to tatou Atua, e tuatatau ua atu.”—MIKA 4:5.
1. No runga i te tu akono tau, eaa te turanga i to Noa tuatau, e akapeea a Noa i tuke ei?
KO ENOKA te tangata mua tei taikuia mai i roto i te Pipiria tei aaere ma te Atua. Ko Noa te rua. Te akakite maira te papaanga kia tatou e: “E tangata tuatua-tika a Noa, e te apa kore i tona uki; e kua aaere a Noa raua ko te Atua.” (Genese 6:9) Te tae anga ki to Noa tuatau, kua aere ke atu te maata anga o te au tangata mei te akamorianga ma. Kua akakino maataia te turanga kino e te au angera akarongo kore tei akatupu i te au pirianga tau kore ma te au vaine e kua anau mai i te uanga tei tapaia ko te Nepirimi, “te aronga toa,” me kore “e aronga rongonui ïa i taito ra,” o taua tuatau. No reira rai te enua i ki ei i te kino! (Genese 6:2, 4, 11) Noatu rai, kua akapapu mai a Noa iaia uaorai ei tangata apa kore e “e tangata i ako i te tuatua-tika ra.” (2 Petero 2:5) Te akaue anga te Atua iaia kia patu i tetai araka no te akaoraanga i te oraanga, kua akarongo a Noa “i te au mea katoa ta te Atua i akaue mai iaia ra, ko tana ïa i rave marie.” (Genese 6:22) Tika roa, kua aaere a Noa ma te Atua.
2, 3. Eaa te akaraanga memeitaki ta Noa i oronga mai no tatou i teia tuatau?
2 Kua kapiti mai a Paulo ia Noa i roto i tana akapapa anga no te au kite akarongo mou te tataanga aia e: “No te akarongo oki to Noa, ka akakiteia mai ei aia e te Atua i te au mea kare rai i kitea maira, e rokoia iora e te mataku, i tarai ei i te pai, kia ora tona ngutuare; akaapa iora i to te ao, e riro atura oki aia ei atu i te tuatua-tika e rauka i te akarongo ra.” (Ebera 11:7) E akaraanga meitaki tikai! Kua papu e ka tupu tikai te au tuatua a Iehova, kua oronga a Noa i te taime, te maroiroi, e te au apinga kia akatupu i te au akauenga a te Atua. Na roto i taua tu, e manganui i teia tuatau tei kopae i te au tuatau noa i roto i teianei ao e kua oronga atu i to ratou taime, te maroiroi, e te au apinga i te akono anga i te au akauenga a Iehova. E mea meitaki to ratou akarongo e ka akatupu mai i to ratou uaorai ora e pera katoa o tetai ke.—Luka 16:9; 1 Timoteo 4:16.
3 Penei e ngata tikai no Noa e tona ngutuare tangata i te akono anga i te akarongo mei ia Enoka rai, to Noa tupuna tane, tei uriuriia ana i roto i te atikara i mua akenei. I to Noa tuatau e to Enoka ra, e tokoiti ua te aronga akamori mou—toko varu ua tangata tei akarongo mou e tei ora mai i te Vaipuke. Kua tutu aere a Noa i te tuatua tika i roto i tetai ao kino e te tau kore. Tei runga ravao, te patu ra aia e tona ngutuare tangata i tetai araka maatamaata rakau i te akapapa anga no tetai vaipuke i te ao katoa, noatu e kare tetai i kite ana i taua vaipuke i mua ana. Penei paa e akara anga tuke tikai te reira ki te aronga te akarakara maira ia ratou.
4. Eaa te au tarevake ta Iesu i akakite mai no runga i to Noa uki?
4 Ma te tau, te taiku anga a Iesu ki to Noa tuatau, kare aia i tuatua ana no te kino, te akonoanga pikikaa, me kore te tu akono tau kore—noatu e kino te reira. Ko te tarevake ta Iesu i akakite mai koia oki te patoi anga te au tangata i te akarongo ki te akamatakiteanga tei orongaia. Kua karanga aia e “te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te araka.” Te kaikai anga, te inu anga, te akaipoipo anga, te orongaia anga kia akaipoipo—eaa te tarevake o te reira? Te akono ua ra ratou i te au oraanga “noa ua”! Inara te tupu maira tetai vaipuke, e te tutu aere ra a Noa i te tuatua tika. E mea tau e kua riro mai tana au tuatua e tona tu ei akamatakiteanga kia ratou. Noatu rai, “kare rava [ratou] i kite, e rokoia iora ratou e te diluvi, e ope takiri akera ratou i te mate.”—Mataio 24:38, 39.
5. Eaa te au tu ta Noa e tona ngutuare tangata e anoano ra?
5 Te akara anga ki taua tuatau, te kite ra tatou i te pakari o to Noa tu oraanga. Inara, i te au ra i mua ake te Vaipuke, kua umuumuia te mataku kore kia tuke ake mei tetai ke mai. Kua umuumuia te irinakianga pakari kia tarai a Noa e tona ngutuare tangata i te araka maatamaata e kia akaki i te reira ki te au animara tukeke. Kua inangaro ainei etai o taua aronga akarongo mou i tetai taime e kia kore ratou e kiteaia mai e te akono ua ra i te oraanga “noa ua”? Noatu e me kua tupu mai taua au manako kia ratou, kare ratou i akaparuparu ana i to ratou tu tau. I muri ake i te au mataiti e manganui—e roa atu i tetai ua atu ia tatou kia akakoromaki i roto i teia akatereanga o te au mea nei—kua taki atu te akarongo o Noa ki tona akaoraia anga mai na roto i te Vaipuke. Inara, kua tuku mai a Iehova i te utunga ki runga i te aronga katoatoa tei akono ra i te oraanga “noa ua” e kare i kite mai ana i te aiteanga o te tuatau e noo ra ratou.
Kua Akakino Akaouia te Au Tangata e te Kino
6. I muri ake i te Vaipuke, eaa te turanga te vai nei rai?
6 I muri ake te maro anga te au vai o te Vaipuke, e akamata anga ou to te au tangata. Inara, te vai apa ua nei rai te au tangata, e e “kino uaorai te manako o te ngakau tangata” tei riro mai “mei tona tamariki mea riki anga mai.” (Genese 8:21) Tera te tu, noatu e kare te au temoni e aere akaou mai i roto i te au kopapa tangata, te maroiroi nei rai ratou. Te akaari viviki mai nei te ao o te au tangata akono kore i te Atua e te “vai ua nei rai to te ao ravarai i raro ake i taua vaerua kino ra,” e mei teia tuatau rai, te tamaki atu nei te aronga akamori mou i “te ravenga pakari a te diabolo ra.”—1 Ioane 5:19; Ephesia 6:11, 12.
7. Akapeea te kino i tupu maata ai i te ao i muri ake i te Vaipuke?
7 Mei te tuatau o Nimeroda, kua ki akaou mai te enua i muri ake i te Vaipuke ma te ravenga kino a te tangata. Tei tupu mai no te rai oki o te tangata e te tere anga ki mua te apinga tekinoroti, i tupu maata ai te kino e tere atu te tuatau. I te au mataiti i mua atu, kua vai ana te koke, te korare, te ana e te kakao, e te kariota. I teia tuatau te vai nei te pupui paura e te pupui mamaata, e oti akera ko te pupui e te au apinga tamaki tei maani karapeia i te akamata anga o te 20 anere mataiti. Kua oronga mai te Tamaki I o te Ao i te au apinga tamaki kino roa atu, mei te pairere, te tangika, te pai ruku vai, e te au kati poitini. I roto i taua tamaki ra, kua tamate teia au apinga tamaki nei e mirioni ua atu ora anga. Kua tapapa koreia ainei te reira? Kare.
8. Akapeea a Apokalupo 6:1-4 i te akatupu angaia?
8 I te mataiti 1914, kua akataoongaia a Iesu ei Ariki no te Patireia o te Atua i te rangi, e i akamataia ai “te rā o te Atu ra.” (Apokalupo 1:10) I roto i tetai orama tei tataia i roto i te puka o Apokalupo, kua kiteaia a Iesu ei Ariki te akaoro upokotu ra i runga i tetai oroenua teatea. Kua aru mai tetai au tangata i runga i te oroenua iaia, te akatutu tataki tai maira i tetai mate tukeke ki runga i te tangata. Ko tetai ia ratou te akaoro ra i tetai oroenua kutekute, e kua orongaia kiaia “kia apai ke i te au i te ao nei, e kia ta te tangata ia ratou uaorai: e e koke maata tei orongaia mai nana.” (Apokalupo 6:1-4) Te akatutu maira teia oroenua e tona tangata akaoro ra i te tamaki, e te akatutu maira te koke maata i te akapouanga maata tikai no te tamaki o teia tuatau ma tana au apinga tamaki ririnui. Te kapiti maira taua au apinga tamaki i teia tuatau i te au apinga nukiria, ka rauka tataki tai i te reira i te takore atu e ngauru tauatini ua atu tangata; ka rauka i te au roketi i te tuku mai i taua au apinga ra ki te au takete e tauatini ua atu maire te mamao; pera katoa te au apinga tamaki kemikara e te au mea ora no te akapouanga maata.
Te Kite ra Tatou i ta Iehova Au Akamatakiteanga
9. Akapeea me akaaiteia te ao o teia tuatau ki te tuatau tei vai ana i mua ake i te Vaipuke ra?
9 I to Noa tuatau, kua akakore a Iehova i te tangata no te kino pakari a te au tangata kino na te Nepirimi i tauturu mai. Akapeea i teia tuatau? E meangiti ake ainei te kino i te enua nei i to mua ana? Kare roa! Tei runga ravao, mei to Noa tuatau, te rave ra te au tangata i teia tuatau i ta ratou au angaanga i te au ra katoa, i te tauta anga i te akono i tetai oraanga “noa ua,” te patoi anga i te akarongo atu ki te au akamatakiteanga tei akakiteia mai. (Luka 17:26, 27) E tumu anga ke atu ainei tetai, i reira, kia ekoko e ka akakore akaou a Iehova i te au tangata ravarai? Kare.
10. (a) Eaa te akamatakiteanga tei oronga putuputuia mai i roto i te totou Pipiria? (e) Eaa te ravenga pakari anake ra i teia tuatau?
10 E au anere mataiti ua atu i mua ake i te Vaipuke, kua totou ana a Enoka i te akapouanga te ka tupu mai i to tatou tuatau. (Iuda 14, 15) Kua tuatua katoa a Iesu no te “mate maata” te aere mai nei. (Mataio 24:21) Kua akamatakite mai tetai au peroveta no taua tuatau. (Ezekiela 38:18-23; Daniela 12:1; Ioela 2:31, 32) E i roto i te puka o Apokalupo, ka tatau tatou i tetai akatakaanga taka meitaki no taua akapouanga openga. (Apokalupo 19:11-21) Ei aronga tataki tai, e aru tatou ia Noa e kia maroiroi ei aronga tutu aere i te tuatua tika. Ka akarongo tatou i te au akamatakiteanga a Iehova e te tauturu aroa anga i to tatou au tangata tupu kia rave i te reira. No reira, mei ia Noa ra, e aaere tatou ma te Atua. E tikai, e mea puapinga no tetai ua atu tei inangaro i te ora kia aaere ua atu ma te Atua. Akapeea tatou i te rave anga i te reira i te akamanako anga i te au taomi anga ta tatou ka aro atu i te au ra tataki tai? Te umuumuia ra tatou kia tatanu i te akarongo pakari i te akatupu anga i ta te Atua akakoroanga.—Ebera 11:6.
E Aaere ua Atu ma te Atua i Roto i te Au Tuatau Kikino
11. Na roto i teea tu e aru ra tatou i te au Kerititiano o te anere mataiti mua?
11 I te anere mataiti mua, i tuatuaia ana te au Kerititiano akatainuia e te piri ra ki “Te Mataara.” (Angaanga 9:2, NW) Kua akanooia to ratou oraanga katoa ki runga i te akarongo i roto ia Iehova e e Iesu Karaiti. Kua aaere ratou i te arataa ta to ratou Pu i aaere. I teia tuatau, te akapera katoa ra rai te au Kerititiano akarongo mou.
12. Eaa tei tupu i muri ake te angai temeio anga a Iesu i tetai urupu tangata?
12 Kua akakiteia mai te puapinga o te akarongo i roto i tetai tupuanga tei tupu ana i te tuatau o ta Iesu angaanga orometua. I tetai atianga, kua angai a Iesu i tetai urupu tangata mei te 5,000 tane. Kua umere e kua rekareka te au tangata. Inara, e akara ana, e eaa tei tupu mai i muri mai. E tatau tatou: “E kite akera taua au tangata ra i te akairo ta Iesu i rave ra, kua na ko akera, Ko taua peroveta mou rai teia, ko te ka aere mai ki te ao nei. Te kite rā Iesu i to ratou manako, ka tiki mai iaia e kave e akaariki, oki akaou atura aia ki runga i te maunga, koia anake ra.” (Ioane 6:10-15) I taua po kua aere atu aia ki tetai ngai ke. Penei kua kononinoni pu te manganui no to Iesu patoi anga i te ariki atu i te taoonga ariki. No te mea, kua akaari mai aia e e maata atu tona pakari kia riro mai ei ariki e tei iaia te mana kia akamerengo i te au anoano o te tangata i te pae kopapa. Inara, kare i tae mai ake to Iehova tuatau kia tutara aia ei Ariki. Tera te tu, tei te rangi to Iesu Patireia, kare i te enua nei.
13, 14. Eaa te tumu manako ta te manganui i akaari mai, e akapeea to ratou akarongo i te timata angaia?
13 Noatu rai, kua aru papu tikai te urupu tangata ia Iesu e kua kiteaia mai aia, mei ta Ioane e karanga ra e, “i tetai pae roto ra.” Eaa ra ratou i aru ei iaia i muri ake i tona kopae anga i ta ratou au tauta anga kia akariro iaia ei ariki? E manganui tei akaari mai i tetai tumu manako kopapa, te tuatua tikai anga no te au kai ta Iehova i oronga mai i roto i te metepara i to Mose tuatau. Te aiteanga oki e kia oronga ua atu a Iesu i te kai na ratou. Ko Iesu ra, tei kite i to ratou au akakoroanga tarevake, kua akamata i te apii atu kia ratou i te au tuatua mou pae vaerua te ka tauturu i te akatikatika i to ratou manako. (Ioane 6:17, 24, 25, 30, 31, 35-40) I te pau anga atu, kua koumuumu etai iaia, i tona tuatua anga tikai i teia akatutuanga: “Tika, tika tikai taku e karanga atu kia kotou, Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou. Ko te kai i toku kopapa, e te inu i toku nei toto, e ora mutu kore tona; e naku aia e akatu akaou kia tae ki te rā openga ra.”—Ioane 6:53, 54.
14 Kua akakeu putuputu ta Iesu au akatutuanga i te au tangata kia akaari e me te inangaro tikai ratou i te aaere ma te Atua. Kare e tuke anga teia akatutuanga. Kua akatupu mai te reira i te au manako pakari. E tatau tatou: “E manganui tana aronga pipi i akarongo i taua tuatua nei, i na ko e, E tuatua rikarika teia, ka kitea ra iaai?” Kua akamarama atu a Iesu e kia akara ratou i te aite anga i te pae vaerua no tana au tuatua. Kua karanga aia e: “No te vaerua te ora, kare o te kopapa e puapinga: te tuatua taku e karanga atu kia kotou, e vaerua ïa, e e ora tei te reira.” Noatu rai, e manganui kare i akarongo mai ana, e kua ripoti mai te papaanga e: “Akaruke maira tetai papaki pipi ana i reira ra e manganui, kare [“e aaere,” NW] akaou iaia ra.”—Ioane 6:60, 63, 66.
15. Eaa te tumu manako tika tei tupu ki etai o ta Iesu au pipi?
15 Noatu rai, kare te katoa anga o ta Iesu au pipi i akapera ana. E tikai, kare te au pipi tiratiratu i marama pu tikai ana e eaa ta Iesu i tuatua ana. Noatu rai, te vai ngaueue kore tikai ra to ratou irinaki i roto iaia. Ko Petero, ko tetai o taua au pipi tiratiratu, tei akakite mai i te au manako ngakau no te katoatoa tei toe mai te karanga anga aia e: “E te Atu, ka aere tika matou kiaai ra? tei ia koe te tuatua o te ora mutu kore ra.” (Ioane 6:68) E tu manea tikai, e e akaraanga memeitaki!
16. Akapeea tatou i te timata angaia, e eaa te tumu manako tau ta tatou ka tatanu?
16 Ko tatou i teia tuatau nei penei ka timataia mei te au pipi mua rai. I to tatou turanga, penei ka mataora kore tatou e kare ake ta Iehova au taputou i akatupu vivikiia ake mei ta tatou uaorai e inangaro ra. Penei te manako ra tatou e ko te au akatakaanga no te au Tuatua Tapu i roto i ta tatou au puka tei akatumuia i runga i te Pipiria e mea ngata i te maramaia. Penei kare tatou e mareka atu i te tu o tetai taeake Kerititiano. E tika ainei e kia akamutu ua tatou i te aaere ma te Atua no teia me kore taua au tumu ra? Kare rava! Kua akaari mai te au pipi tei akaruke ia Iesu i tetai tu manako kopapa. E kopae tatou i te rave atu i te reira.
“Kare ra Tatou i to te Aronga i Unui ki Muri”
17. Akapeea tatou e tauturuia ai kia aaere ua atu ma te Atua?
17 Kua tata te apotetoro ko Paulo e: “Te au tuatua tapu katoa i tataia ra, e mea akauruia mai e te Atua.” (2 Timoteo 3:16) Na roto i te au kapi o te Pipiria, kua akakite taka meitaki mai a Iehova kia tatou e: “Teia te ara, e na reira te aere.” (Isaia 30:21) Na te akono anga i te Tuatua a te Atua e tauturu mai ei ia tatou kia ‘matakite i to tatou aerenga.’ (Ephesia 5:15) Te apii anga i te Pipiria e te manako oonu anga i ta tatou e apii ra te tauturu maira ia tatou kia “akono i te tuatua-mou.” (3 Ioane 3) Tika roa, mei ta Iesu e karanga ra, “no te vaerua te ora, kare o te kopapa e puapinga.” Te aratakianga tau ua kia arataki i to tatou au takainga ra koia oki te aratakianga i te pae vaerua, te aere maira na roto mai i te Tuatua a Iehova, i tona vaerua, e tana akaaerenga.
18. (a) Eaa ta etai i rave pakari kore ana? (e) Eaa te tu akarongo ta tatou ka tatanu?
18 I teia tuatau, te aronga te kopekope ra penei no te manako pae kopapa ra me kore no te au tatarianga kare i tupu ake te anga putuputu ke atura i te taangaanga ki katoa anga i ta teianei ao ka oronga mai. Te ngere anga to ratou tu rapurapu anga, kare ratou i kite i te anoano “kia matakite oki,” e kua iki ratou i te aruaru i te au akakoroanga noinoi kare ra i tuku ana i te au inangaro o te Patireia na mua ake. (Mataio 24:42) E pakari kore katoa oki te aaere anga i roto i taua tu. E akamanako ana i te au tuatua a te apotetoro ko Paulo: “Kare ra tatou i to te aronga i unui ki muri e mate atu; no te aronga ra i rauka te akarongo e ora atu ei te vaerua.” (Ebera 10:39) Mei ia Enoka raua ko Noa, te noo nei tatou i te au tuatau kikino, inara mei ia raua rai, tei ia tatou te akameitakianga no te aaere anga ma te Atua. Na te rave anga i te reira, tei ia tatou te akapapu anga no te au mea tatariia e ka kite tatou i te akatupuia anga ta Iehova au taputou, te takoreia anga te kino, e te akanooia anga tetai ao ou tuatua tika ra. E manakonako anga umere!
19. Akapeea a Mika i te akataka anga i te aerenga o te aronga akamori mou?
19 Kua karanga te peroveta akauruia ko Mika no te au pa enua o teianei ao e ko ratou ra ka “aaere ua te tangata ravarai i te ingoa o tona uaorai atua.” E oti kua tuatua aia nona uaorai e no tetai aronga akamori akarongo mou e te karanga anga e: “Ka aaere ra tatou i te ingoa o Iehova, o to tatou Atua, e tuatatau ua atu.” (Mika 4:5) Me kua aite taau tautaanga ki ta Mika, e noo vaitata kia Iehova noatu e eaa te kikino ka tupu mai i te au tuatau. (Iakobo 4:8) Kia riro te reira ei inangaro ngakau tae no tatou tataki tai nei kia aaere ma to tatou Atua ko Iehova i teianei e tuatatau ua atu!
Akapeea Koe me Pau?
• Eaa te au tu aiteite te vai ra i rotopu i to Noa tuatau e i teia tuatau?
• Eaa te aerenga ta Noa e tona ngutuare tangata i aru, e akapeea e rauka ai ia tatou i te aru i to ratou akarongo?
• Eaa te tumu manako tarevake ta etai o ta Iesu au pipi i akaari mai?
• Eaa ta te au Kerititiano mou e tauta ra i te rave?
[Au Tutu i te kapi 20]
Mei to Noa tuatau rai, te akapou taime nei te au tangata i roto i ta ratou au angaanga i te au ra katoa
[Tutu i te kapi 21]
Ei aronga tutu aere i te Patireia, “kare ra tatou i to te aronga i unui ki muri”