Turanga Puapinga mou i Roto i to te Atua Ao Ou

KUA neke atu a David,a e tane e te metua tane Kerititiano, ki Marike, ma te papu tikai e te rave ra aia i te mea tau. Noatu kare aia i inangaro ana i te akaruke ao i tana vaine e te tamariki, kua papu ra iaia e ka rauka iaia i te akatupu i tetai oraanga meitaki atu no ratou katoatoa naringa ua ake e maata tana moni. I reira kua ariki aia i tetai patianga mei te kopu tangata i New York e kare i roa ana kua kitea mai te ngai angaanga i reira.

Inara, i te au marama i aereia, kua akamata to David manako papu i te akangaro. E meangiti ua rai te taime e akapouia ra ki roto i te au angaanga pae vaerua. Tae ki tetai taime, kua vaitata rai i te ngaro tona akarongo i te Atua. Na te topa roa anga aia ki roto i tetai timataanga o te tu akono i kite ei aia i te tikaanga tikai o tona turanga. Kua riro te akamou anga i tona manako ki runga i te turanga puapinga i te pae materia i te arataki marie ke ua iaia mei te au apinga puapinga roa atu kiaia. Ka anoanoia tetai tauianga.

Mei ia David, e manganui te aere ana mei te au enua anau i te au mataiti, i te manako anga e kia akameitaki atu i to ratou turanga i te pae moni. Inara, putuputu te taime e tutaki kino ua rai ta ratou e rauka mai ana i te pae vaerua. E umere ana tetai aronga e, ‘Ka rauka ainei i tetai Kerititiano kia aruaru i te au apinga maata i te pae materia e kia apinga maata katoaia i te Atua?’ Te karanga ra te aronga tata e te aronga tutu rongonui e ka rauka ua teia. Inara mei ta David e etai ke atu i kite, e mea ngata tikai te rauka anga mai tetai ma te kore e ngaro atu tetai.​—Luka 18:24.

Kare te Moni e Kino Ana

E tika e, na te tangata i maani mai, i te moni. Mei te au apinga ke atu rai i maaniia, kare te reira uaorai i te kino me kore i te tarevake. Te tikaanga tikai, e ravenga ua te reira no te oko mai e kare atu ei. No reira, me taangaangaia ma te tau, e mea meitaki ta te reira ka akatupu. Ei akatauanga, te ariki ra te Pipiria e e “akapuanga tei te moni,” no te au manamanata tikai tei piri atu ki te ngere. (Koheleta 7:12) No tetai papaki, i te akaraanga, “ko te moni te pauanga no te au apinga ravarai.”​—Koheleta 10:19, New International Version.

Te akaapa ra te au Tuatua Tapu i te tu kope e te akamaroiroi maira i te angaanga pakari. Kia akono tatou i to tatou uaorai pamiri tikai, e me e manga iti akaou atu ta tatou ra, kia rauka ia tatou “kia oronga atu na te tangata i ngere.” (Ephesia 4:28; 1 Timoteo 5:8) Pera katoa, kare e akamaroiroi maira i te tu akangere iaia uaorai, te akamaroiroi maira ra te Pipiria ia tatou kia rekareka i ta tatou au apinga. Te akakiteia maira kia tatou kia ‘rave tatou i ta tatou tuanga’ e kia rekareka i te au ua o ta tatou au angaanga. (Koheleta 5:18-20) E tika e, te vaira, te au akaraanga i roto i te Pipiria o te au tane e te au vaine akarongo mou tei tu i te apinga nui.

Nga Tangata Akarongo Mou Tei Tu i te Apinga Nui

Ko Aberahama, e tavini akarongo mou no te Atua, e maata tikai tana mamoe e te puakatoro, e maata tikai te ario e te auro, e te ngutuare tavini maata tei taeria te au anere ua atu. (Genese 12:5; 13:2, 6, 7) E maata katoa te apinga nui a te tangata tuatua tika ko Iobu​—te manu, te au tavini, te auro, e te ario. (Iobu 1:3; 42:11, 12) E nga tangata apinga nui maata teia me akaaiteia atu ki te au turanga o teia tuatau, inara e apinga maata katoa ta raua i te Atua.

Kua kapiki te apotetoro ko Paulo ia Aberahama “ei metua no te aronga ravarai tei akarongo ra.” Kare a Aberahama i te karapii e kare katoa e rima pupuru ana i tana i rauka. (Roma 4:11, NW; Genese 13:9; 18:1-8) Mei te reira katoa, te Atua uaorai i te akataka anga ia Iobu ei “apa kore e te tiratiratu.” (Iobu 1:8) E papa ua ana rai aia i te tauturu i te putaua e tei rokoia e te kino. (Iobu 29:12-16) Kua irinaki tikai a Aberahama raua ko Iobu ki roto i te Atua kare ra ki roto i ta raua apinga maata.​—Genese 14:22-24; Iobu 1:21, 22; Roma 4:9-12.

Ko te Ariki ko Solomona tetai akaraanga ke mai. Ei komono ki te terono o te Atua i Ierusalema, kua akameitakiia a Solomona kare anake ua ki te pakari tu-Atua mari katoa ra ki te au apinga maata roa e te kaka. (1 Ariki 3:4-14) No te maataanga i tona oraanga, kua vai akarongo mou tikai aia. Inara, i tona au mataiti i muri mai, ‘kare akenei to Solomona ngakau i tau ki tona Atua kia Iehova.’ (1 Ariki 11:1-8) Te tikaanga tikai, te akatutu maira tei tupu kiaia i etai o te au puereere o te turanga puapinga i te pae materia. Ka akamanako ana i etai.

Au Puereere o te Turanga Puapinga

Ko te kino maata roa atu koia oki ko te akainangaro anga i te moni e ta te reira ka rauka mai. Ka akatupu te apinga nui ki roto i tetai aronga i te kaki te kare roa e rauka kia akamerengoia. I muao ana, kua kite a Solomona i teia tu paruparu i roto i etai ke. Kua tata aia: “Ko tei inangaro i te ario ra, kare ïa e mareka i te ario; e tei inangaro i te apinga nui ra, kare ia e mareka i te apinga e kia maata ra. E mea puapinga kore katoa te reira ra.” (Koheleta 5:10) Kua akamatakite a Iesu raua ko Paulo i te au Kerititiano i muri mai no runga i teia tu inangaro akavare.​—Mareko 4:18, 19; 2 Timoteo 3:2.

Me riro te moni ei tumu no to tatou anoano e kare ei ravenga no te rave i tetai au mea, ka akatueraia tatou ki te au tu timataanga anake o te tu akono, tei kapiti mai i te pikikaa, te keia, e te akavare. Ko Iuda Ikariota, tetai o te au apotetoro a Karaiti, kua pikikaa aia i tona pu no e 30 moni ario ua nei. (Mareko 14:11; Ioane 12:6) Tei kino maata roa atu, kua mono tetai aronga i te Atua ki te moni ei tumu puapinga roa atu no ta ratou akamorianga. (1 Timoteo 6:10) No reira e mea tau i te au Kerititiano kia tauta ua rai i te akakite i te tika no runga i to ratou akakoroanga tikai i kimi maata ai i te moni.​—Ebera 13:5.

Te akatu katoa maira te aruaruanga o te apinga nui i te au kino kare e kite meitakiia atu ana. Te mea mua, ka riro te maata roa o te apinga maata i te akatupu i te irinakianga kia koe uaorai. Kua kapiti mai a Iesu i teia i tona taiku anga i “te pikikaa o te apinga.” (Mataio 13:22) Kua akamatakite katoa mai te tangata tata Pipiria ko Iakobo i te au Kerititiano auraka kia akangaropoina i te Atua i roto katoa i te maani anga i te au parani pitiniti. (Iakobo 4:13-16) No te mea i te akara anga te oronga maira te moni i tetai turanga takake no tatou, no te aronga tei rauka te reira, te vai ra i reira te kino o te irinaki anga ki roto i ta ratou moni kare ki roto i te Atua.​—Maseli 30:7-9; Angaanga 8:18-24.

Te rua, mei ta David, tei taikuia i mua ake, i kite mai, ko te aruaruanga o te apinga nui e putuputu ana i te akapou maata i te taime e te maroiroi o tetai tangata e ka akaariu ke marie ua iaia mei te au aruaruanga pae vaerua. (Luka 12:13-21) No te aronga apinga nui, te vai katoa ra te timataanga tuku kore kia taangaanga i ta ratou i rauka no te au angaanga tikai e navenave ei me kore no te au aruaruanga nona uaorai.

Ka rauka ainei kia karangaia to Solomona inga i te pae vaerua e i tupu te reira no te mea kua akatika aia i te oraanga puapinga nui kia akapoiri i tona ngakau? (Luka 21:34) Kua kite aia i ta te Atua araianga tika ua no runga i te au pirianga ki te au pa enua ke. Inara, i te openga kua akaputuputu maira aia i tetai pupu vaine okotai tauatini. (Deuteronomi 7:3) No te anoano kia akarekareka i tana au vaine ke ra, kua titau aia i te akanoo i tetai tu akarongo iroia no ratou. Mei tei kiteaia i mua akenei, kua ariu ke marie ua atura to Solomona ngakau mei ia Iehova.

Taka meitaki ua, e te akaari mai nei teia au akaraanga i te tika tikai o ta Iesu akoanga: “Kare e tika kia akono atu i te Atua e te Mamona.” (Mataio 6:24) Akapeea, i reira, e puapingaia ai tetai Kerititiano i te akono mari anga atu i te au akaaoanga pae moni e aro atu nei te maataanga i teianei? Puapinga maata roa atu, eaa ra te manakonakoanga e vai nei no tetai oraanga meitaki atu ki mua?

Turanga Puapinga Mou ki Mua

Kare i aite ki nga pateriareka ko Aberahama raua ko Iobu e te iti tangata o Iseraela, e angaanga ta te au pipi a Iesu kia “akariro i to te pa enua katoa ei pipi.” (Mataio 28:19, 20) No te akatupu anga i taua angaanga ra ka anoanoia te taime e te tautaanga penei te ka taangaangaia tikai ki roto i te au aruaruanga noa ua nei. No reira, ko te taviri e puapingaia ai, tei roto i te rave anga i ta Iesu i akakite mai kia rave tatou: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.”​—Mataio 6:33.

Muri ake i te vaitata anga i te ngere i tona pamiri e tona turanga pae vaerua, i te openga kua rauka ia David i te akamako akaou i tona oraanga. Mei ta Iesu i taputou, i te akamata akaou anga a David i te tuku i te apii Pipiria, te pure, e te angaanga orometua ei mea mua i roto i tona oraanga, kua akamata mai i reira te au apinga ravarai i te meitaki. Kua meitaki marie akaou mai tona pirianga ki tana vaine e te tamariki. Kua oki akaou mai tona mataora e te marekaanga. Te angaanga pakari nei rai aia. Kare tona i te oraanga mei te putaua mai ki te apinga nui. Inara, kua rauka iaia tetai au apiianga puapinga tikai, mei te tupuanga mamae tana i kite.

Kua oki a David kua akamanako akaou no runga i te tu pakari o tona neke anga ki Marike, e kua akakoro tikai aia e auraka rava e tuku akaou i te moni kia tutara ki rungao i tana au ikianga. Kua kite aia i teianei e ko te au apinga puapinga roa atu i roto i te oraanga​—te pamiri aroa, te au taeake meitaki, e tetai pirianga ma te Atua​—kare e rauka mai i te moni. (Maseli 17:17; 24:27; Isaia 55:1, 2) Tika rava e, e puapinga maata roa atu te tu akono apa kore i te apinga maata i te pae materia. (Maseli 19:1; 22:1) Kapiti atu ki tona pamiri, kua akakoro tikai a David kia tuku i te au apinga puapinga maata atu na mua.​—Philipi 1:10.

Putuputu ua ana i te poka te au tautaanga a te tangata kia akatupu i tetai taiate puapinga mou ma te tu akono. Inara, kua taputou mai te Atua e ka oronga mai tona Patireia i te maata ua atu o te au apinga pae materia e te pae vaerua ta tatou ka anoano kia noo mataora ua. (Salamo 72:16; Isaia 65:21-23) Kua apii mai a Iesu e ko te turanga puapinga mou ka akamata mai ki te turanga pae vaerua. (Mataio 5:3) No reira noatu e apinga maata me kore e putaua tatou i te pae materia, ko te oronga anga i te ngai mua no te au apinga pae vaerua i teianei te mataara meitaki roa atu ka rauka i tetai ua atu ia tatou kia akapapa no to te Atua ao ou i mua ua nei. (1 Timoteo 6:17-19) Ka riro tikai taua ao ra ei taiate puapinga mou tikai i te pae materia e te pae vaerua.

[Tataanga Rikiriki i Raro]

[Au Tutu i te kapi 5]

Kua irinaki a Iobu ki roto i te Atua, kare ki roto i tona au apinga maata

[Au Tutu i te kapi 7]

Kare te au apinga puapinga roa atu i roto i te oraanga e rauka mai i te moni