E Aru i To Iehova Akakoromaki Anga

‘Kare ua a Iehova i akaroaroa i tana i tuatua maira, e akakoromaki maata ra tona.’​—2 PETERO 3:9, akaaite ia NW.

1. Eaa te apinga aroa akaaite koreia ta Iehova i oronga mai ki te au tangata?

KUA oronga mai a Iehova kia tatou i tetai apinga kare e rauka i tetai ua atu tangata i te oronga mai. E apinga manea e te akaperepere maataia, inara kare te reira e rauka i te okoia e kare katoa e rauka ua mai. Tana e oronga maira koia oki te apinga aroa no te ora mutu kore​—ko te maata anga ia tatou, e oraanga ope kore i runga i tetai enua parataito. (Ioane 3:16) E mea mataora tikai te reira! Ka ope te au mea te akatupu maata ra i te mii​—te pekapeka, te ta anga, te putaua, te kino, te maki, e pera katoa te mate. Ka noo ponuiaau apa kore ua ma te taokotai te au tangata i raro ake i te tutara anga aroa o te Patireia a te Atua. Mei teaa ra to tatou inangaro anga i taua Parataito!​—Isaia 9:5, 6; Apokalupo 21:4, 5.

2. Eaa ra a Iehova kare i akaatea ake i ta Satani akatereanga o te au mea kino ra?

² Te tapapa katoa nei a Iehova i te tuatau e akanoo ei aia i te Parataito i runga i te enua nei. No te mea, no tona inangaro i te tuatua tika e te tuatua tau. (Salamo 33:5) Kare aia e reka ana i te akara atu i tetai ao manako kore me kare te riri ra i tana au kaveinga tuatua tika, e ao te kopae aviri ra i tona mana taoonga e te akakino ra i tona au tangata. Inara, e au tumu meitaki tetai kare aia i rave ake i te akaatea atu i ta Satani akatereanga o te au mea kino ra. Te o maira ki taua au tumu anga te au maroanga tau te piri atura ki te tu ngateitei. Te akanoo anga i teia au maroanga, te akaari maira a Iehova i tetai tu manea tikai, e tu te ngere ra i te manganui i teia tuatau​—te akakoromaki anga.

3. (a) Eaa te aite anga o te au tuatua Ereni e te Epera tei uriia e “akakoromaki” i roto i te Pipiria? (e) Eaa te au uianga ta tatou ka akamanako i teianei?

³ E tuatua Ereni tetai i roto i te New World Translation e toru taime te taikuia anga e e “akakoromaki.” Te aite anga tikai “roa anga no te vaerua” e no reira te taiku putuputuia ra e e “akakoromakianga roa” e e okotai taime ra e “akonoanga akakoromaki maata.” Kua uriia i roto i nga tuatua roa ai o te Ereni e te Epera te “akakoromaki” koia oki te manako no te akakoromaki akono tau e te kore e riri vave. Akapeea ra to Iehova akakoromaki anga e akapuapingaia ai ia tatou? Eaa te au apiianga ka apiiia mai mei te akakoromaki anga e te tamou marie anga o Iehova e o tona au tavini akarongo mou? Akapeea tatou i kite ei e kare i kotingaia to Iehova akakoromaki? E akara tatou.

E Akamanako Ana i to Iehova Akakoromaki

4. No runga i to Iehova akakoromaki, eaa ta te apotetoro ko Petero i tata mai?

⁴ No runga i to Iehova akakoromaki anga, kua tata te apotetoro ko Petero e: “Auraka na ra e ngaro ia kotou i teianei potonga tuatua, e aku au akaperepere, okotai rai tu [ia Iehova] te rā tai e te mataiti okotai tausani; e te mataiti okotai tausani ra, okotai rai tu e te rā okotai nei. Kare ua [a Iehova] i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.” (2 Petero 3:8, 9, akaaite ia NW.) E akara ana ine i nga tumu anga e rua tei akakiteia mai i konei te ka tauturu ia tatou kia marama i to Iehova akakoromaki.

5. Akapeea a Iehova i te manako anga i te tuatau te akakeu anga i tana e rave ra?

⁵ Te tumu mua koia oki kare a Iehova e akara ana i te tuatau mei ia tatou rai. Ki Tei ora ana e mutu kore ua atu, te tauatini mataiti ra e okotai ua ia ra. Kare aia i kotingaia me kore i taomiia e te tuatau, inara kare aia i akaroaroa i te angaanga anga. Te rauka anga te pakari kotinga koreia, kua kite a Iehova i te tuatau tano meitaki tikai i te rave anga i tetai apinga ei puapinga anga ki te katoatoa te manako maira, e te tiaki akakoromaki ua ra aia e tae ua mai taua tuatau. Inara, auraka tatou e manako e kare a Iehova e manako mai ana i tetai ua atu mamae te kite ra tona au tavini i teia tuatau. E Atua aia no te “ngakau aroa,” ko te tu tikai o te aroa. (Luka 1:78; 1 Ioane 4:8) Ka rauka iaia i te taui tamou tikai i tetai ua atu kino ta teia akatika anga poto ua no te mamae ra e akatupu maira.​—Salamo 37:10.

6. Eaa ra ta tatou kare e manako taopenga atu no runga i te Atua, e no teaa ra?

⁶ E tikai, kare i te mea ngoie i te tiaki ua atu i tetai apinga ta tetai e inangaro ra. (Maseli 13:12) No reira, me kare te au tangata e akatupu viviki i ta ratou au taputou, penei ka manako tetai pae e kare ratou i inangaro ana i te rave i te reira. E kino tikai i te manako atu e te akapera ra rai te Atua! Me te manako tarevake ra tatou i to te Atua akakoromaki anga ra e e taroaroa anga, ka akatupu ngoie ua te tuatau i topa akenei i te manako ekoko e te mareka kore kia tatou, e te tuku anga ia tatou kia varea moe ua i te pae vaerua. Tei kino roa atu, penei ka akavareia tatou e te aronga ta Petero i akamatakite mai ana i mua atu ana​—te aronga taitoito, te aronga kare o ratou akarongo. Te karanga aviri ra taua aronga ra e: “Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.”​—2 Petero 3:4.

7. Akapeea i kapitiia atu ei to Iehova akakoromaki anga ki tona anoano kia tataraara te au tangata?

⁷ Te rua o te tumu ta tatou ka rave mai mei te au tuatua a Petero koia oki te akakoromaki ua ra Iehova no te mea te anoano ra aia kia tataraara te katoatoa. Te aronga tei patoi marokiakia i te ariu mai mei ta ratou au aerenga kino ka tamateia e Iehova. Inara, kare te Atua e mareka ana i te mate o te tangata kino ra. Kareka ra, te rekareka ra aia i te kite atu anga i te au tangata tataraara, te ariu mai anga mei to ratou au aerenga kino, e kia ora mai. (Ezekiela 33:11) No reira rai, te akono ra aia i te akakoromaki e te akakiteaia nei te tuatua meitaki i te enua katoa penei kia rauka mai i te au tangata ra te au atianga ravarai kia ora mai.

8. Eaa ta tatou i kite mai no to te Atua ra akakoromaki na te akamanako anga i tana au angaanga ma te iti tangata o Iseraela?

⁸ Kua kitea katoaia to te Atua akakoromaki i roto i tana au angaanga ma te iti tangata taito o Iseraela. No te au anere mataiti, kua akakoromaki ua aia no to ratou akarongo kore. Na roto i tana au peroveta, kua raurau putuputu atura aia ia ratou e: “E ariu mai kotou i to kotou au aerenga kino, e akono i taku ra au akauenga, e taku ra au akonoanga, tei tau ki te ture katoa taku i akaue atu ki to kotou ai metua, e taku i akau atu kia kotou i te rima o taku au tavini te au peroveta ra.” Eaa tei tupu mai? Ma te mii, ‘kare rai te au tangata i akarongo mai.’​—2 Ariki 17:13, 14.

9. Akapeea to Iesu akakoromaki anga te akaata mai anga i tona Metua?

⁹ I te openga ra, kua tono mai a Iehova i tana Tamaiti, tei pati atu ma te roiroi kore ki te ngati Iuda kia akaongi akaou i te Atua. Kua akaata apa kore mai to Iesu akakoromaki i tona Metua. Te kite meitaki tikai anga e ka tamateia aia, kua aue a Iesu: “E ae oki koe, e Ierusalema e, e Ierusalema e, tei ta i te au peroveta, e tei peî oki ki te toka te aronga i tonokia atu ia koe na, manganui toku inangaro anga i te akaputuputu i to tamariki, mei te moa e akakoukou i tana anaunga i raro ake i tona peau, kare ra i tika ia kotou!” (Mataio 23:37) Kare teia au tuatua akakeu anga no ko mai i tetai akava aroa kore te inangaro ra i te akautunga i tetai tangata inara no ko mai taua au tuatua ra i tetai oa aroa te akakoromaki ua ra i te au tangata. Te inangaro ra a Iesu, mei tona Metua rai i te rangi ra, i te au tangata kia tataraara e kia ora mai mei te akautunga anga kino. Kua ariu mareka mai etai ki te au akamatakite anga a Iesu e kua ora mai mei te akautunga anga kino tei tukunaia mai ki runga ia Ierusalema i te 70 T.N.​—Luka 21:20-22.

10. Na roto i teea mataara e puapingaia ai tatou e to te Atua akakoromaki?

¹⁰ Kare ainei ei mea umere to te Atua ra akakoromaki? Noatu e maata to te tangata akarongo kore, kua akatika mai a Iehova kia tatou tataki tai nei, pera katoa tetai au tangata e mirioni ua atu, i te tuatau kia kite iaia e kia ariki i te manakonakoanga no te ora. “E [“tamanako ana,” NW] i te akakoromaki maata o to tatou Atu ra, ko te ora ïa,” ta Petero ia i tata ki te au taeake Kerititiano. (2 Petero 3:15) Kare ainei tatou e reka ana e kua akatuera mai to Iehova akakoromaki anga ra i te mataara ora no tatou? Kare ainei tatou i pure ana e kia akakoromaki ua rai a Iehova ia tatou ia tatou e tavini ra iaia mei tera ra ki tera ra?​—Mataio 6:12.

11. Te marama anga i to Iehova akakoromaki anga te akakeu ra ia tatou kia rave i teaa?

¹¹ Me marama ra tatou e eaa ra a Iehova i akakoromaki ei, ka tauturuia tatou kia tiaki akakoromaki ua i te akaora anga tana ka apai mai, kare rava e manako atu e te taroaroa ra aia i te akatupu anga i tana au taputou. (Te Aue o Ieremia 3:26) Ia tatou e pure ua ra kia tae mai te Patireia o te Atua, ka irinaki tatou e kua kite te Atua i te tuatau meitaki no te pau mai i taua pure. Pera katoa, te akakeuia nei tatou kia aru ia Iehova na te akaari anga i te akakoromaki anga mei iaia rai i roto i ta tatou au angaanga ma to tatou au taeake e ki te aronga ta tatou e tutu aere atura. Kare katoa tatou e inangaro i tetai ua atu kia takoreia inara te inangaro ra kia tataraara ratou e kia o mai ki roto i to tatou manakonakoanga no te ora mutu kore.​—1 Timoteo 2:3, 4.

Akamanako Ana i te Akakoromaki Anga o te Au Peroveta

12, 13. E tau ei ki ta Iakobo 5:10 (NW), akapeea te peroveta ko Isaia te akono autu anga i te akakoromaki anga?

¹² Na te akamanako anga i te akakoromaki anga o Iehova, te tauturuia nei tatou kia ariki rekareka e kia tatanu rai i taua tu. Kare i te mea ngoie no te au tangata apa i te tatanu i te akakoromaki, inara ka rauka te reira. Te apiiia nei tatou e te au tavini taito a te Atua. Kua tata te pipi ko Iakobo e: “E te au taeake, e akamanako i te akaraanga o te au peroveta no te mamaeanga i te kino e te akonoanga i te akakoromaki, ko tei tuatua mai ma te ingoa o Iehova ra.” (Iakobo 5:10, NW) E pumaana e e akamaroiroi anga te reira i te kite anga e kua autu tetai pae i te au manamanata tei aiteite i ta tatou e aro atu nei.

¹³ Ei akaraanga, te anoano tikai ra te peroveta ko Isaia i te akakoromaki anga i roto i tana tukuanga angaanga. Kua akakite mai a Iehova i te reira na te akakite anga kiaia e: “Kua tuatua maira aia, Ka aere, ka karanga atu ki teianei aronga: E akarongo rai kotou, kare ra e kite; e akara rai oki kotou, kare ra e utoa. E akamatorutoru i te ngakau o teianei aronga; e akateimaa i o ratou taringa, e e topiri i o ratou mata; ko te akara aea o ratou mata, e ko te rongo aea o ratou taringa, ko te kite aea o ratou ngakau, e ko te akaariuia mai, e ko te akaoraia aea oki ratou.” (Isaia 6:9, 10) Noatu e kare te au tangata i ariu mai ana, e 46 ua mataiti te akakite ua anga a Isaia ma te akakoromaki anga i te au karere akamatakite anga a Iehova! Pera katoa rai, ka tauturu te akakoromaki anga ia tatou kia tamou marie i roto i ta tatou angaanga no te tutu aere anga i te tuatua meitaki, noatu e e manganui kare i ariu mai ana.

14, 15. Eaa tei tauturu ia Ieremia kia akakoromaki i te au kino e te mareka kore?

¹⁴ E tikai, te rave anga te au peroveta i ta ratou angaanga orometua, kare e kua akakoromaki ua ratou i te ariu kore anga; kua takinokinoia rai ratou. Kua tukunaia a Ieremia ki roto i te patiti, tapekaia i roto i te “are tapeka anga,” e kua peiia ki roto i te vaarua. (Ieremia 20:2; 37:15; 38:6) Kua takinokino tikaiia aia i roto i nga rima tikai o te au tangata tana i inangaro ana i te tauturu atu. Inara, kare a Ieremia i riri ana, kare katoa aia i akakino atu. Kua tamou marie aia ma te akakoromaki anga e ngauru atu mataiti.

¹⁵ Kare te takinokino anga e te taitoito anga i akamuteki ana ia Ieremia, e kare katoa te reira e akamuteki ia tatou i teia tuatau. E tikai, penei te manako mareka kore ra tatou i tetai au taime. Kua manako mareka kore ana rai a Ieremia. “Kua akariroia oki te tuatua a Iehova ei akakino anga iaku, e ei akavaavaa anga i te au rā katoa,” i tata ei aia. “Karanga iora ra au e, kare au e akaiki iaia, e kare au e tuatua akaou i tona ra ingoa.” No reira eaa ra tei tupu mai? Kua akamutu ainei a Ieremia i te tutu aere anga? Kua tuatua mai aia e: “Riro atura ra mei te ai ka [te tuatua a te Atua] i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga, e kare atura e tika kia akatupua ua.” (Ieremia 20:8, 9) E akara na e me ka akamanako atu aia i te taitoito anga a te au tangata ra, kua ngaro iaia tona rekareka. Me tuku mai ra aia i tona manako ki te manea e te puapinga o te karere ra, kua rauka akaou mai tona rekareka. Tei runga ravao, tei ia Ieremia a Iehova “ei toa rikarika ïa,” i te akaketaketa anga iaia kia akakitekite aere i te tuatua a te Atua ma te maroiroi e te mataku kore.​—Ieremia 20:11.

16. Akapeea tatou i te akono tamou anga i te rekareka i roto i ta tatou angaanga no te tutu aere anga i te tuatua meitaki?

¹⁶ Kua kiteaia mai ainei e te peroveta ra ko Ieremia te rekareka i roto i tana angaanga? Papu tikai! Kua karanga aia kia Iehova e: “Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Ieremia 15:16) Kua rekareka a Ieremia i roto i tana akangateitei anga no te komono anga i te Atua mou e te tutu aere anga i tana tuatua. Ka rekareka katoa tatou. Kapiti atu, ka rekareka tatou, mei te au angera ra i te rangi ra, e e manganui i te ao katoa nei tei ariki mai i te karere o te Patireia, e kua tataraara, e kua aere mai ki runga i te mataara ki te ora mutu kore.​—Luka 15:10.

“Tamou Marie Anga o Iobu”

17, 18. Na roto i teea mataara i tamou marie ei a Iobu, e eaa ra tei tupu mai?

¹⁷ I muri ake i te tuatua anga no runga i te au peroveta o muatangana, kua tata te pipi ko Iakobo e: “Kua akarongo oki kotou i te tamou marie anga o Iobu e kua kite i te tupu anga ta Iehova i oronga atura, e ki oki a Iehova i te aroa e te takinga meitaki.” (Iakobo 5:11, NW) Te tuatua Ereni tei uriia i konei ra te “tamou marie anga” aiteite ua te aite anga ki te tuatua ta Iakobo i taangaanga ana i roto i te irava i mua akenei no te “akakoromaki.” Te tou mai anga i te tuke i rotopu i nga tuatua e rua, kua tata tetai tangata apiipii e: “Te tuatua mua koia oki te akakoromaki anga me akakinoia mai tatou e tetai au tangata ra, e te rua o te tuatua koia oki te tamou marie anga ma te mataku kore i raro ake i te au mea te ka akataitaia ia tatou.”

¹⁸ Kua kite a Iobu i te taitaia maata. Kua kite aia i te kino i te pae moni, te mate anga tana tamariki, e tetai maki mamae tikai. Kua putoto katoa aia i te au akaapa anga pikikaa e te akautunga anga maira a Iehova iaia. Kare a Iobu i mamae muteki ua; kua aue aia no tona turanga e kua tuatua katoa e e maata atu tona tuatua tika i to te Atua. (Iobu 35:2) Inara, kare rava i ngaro ana iaia te akarongo, kare katoa aia i aati ana i tona tiratiratu. Kare aia i akakino ana i te Atua mei ta Satani i tuatua ana e ka rave aia. (Iobu 1:11, 21) Tei tupu mai? “Akameitaki roa akerā Iehova i to Iobu openga i to tona muatangana.” (Iobu 42:12) Kua akaouia akaou e Iehova to Iobu oraanga kopapa, kua akamaata atu i tana apinganui, e kua akameitaki atura iaia ma tetai oraanga puapinga e te mataora ma tona aronga akaperepere. Kua tauturu katoa to Iobu tamou marie anga ma te akarongo mou ra iaia kia marama pu tikai i to Iehova tu.

19. Eaa ta tatou i kite mai mei te akakoromaki anga tamou marie o Iobu?

¹⁹ Eaa ta tatou i kite mai mei to Iobu akakoromaki tamou marie anga? Mei ia Iobu rai, penei ka rokoia tatou e te maki me kore tetai au turanga ngata. Penei kare tatou e marama tikai ana e eaa ra a Iehova i akatika ua ai ia tatou kia rokoia mai e tetai timata anga. Inara, kua papu ia tatou i teia mea nei: Me vai akarongo mou tatou, ka akameitakiia tatou. Ka tutaki mai a Iehova i te aronga tei kimi tikai ra iaia. (Ebera 11:6) Kua tuatua a Iesu e: “Ko te tāpu marie ra e kia tae ki te openga, koia te ka ora.”​—Mataio 10:22; 24:13.

‘E Tae Maira te Rā o Iehova’

20. Eaa ra i papu ei ia tatou e ka tae mai to Iehova ra ra?

²⁰ Noatu e te akakoromaki ra a Iehova, e tuatua tika katoa aia e kare e akakoromaki ua atu i te au ravenga kino. E au kotinga anga tona akakoromaki. Kua tata a Petero e: “E kare [te Atua] i akaperepere i to te ao taito ra.” I te mea e kua akaoraia mai a Noa ma tona ngutuare tangata, kua ninaia e te vai taua ao akono kore ra i te Atua. Kua tuku katoa mai a Iehova i te utunga anga ki runga ia Sodoma e Gomora, na te akariro anga i te reira ei reu ai. Kua akanoo teia au utunga anga “ei akaraanga na te aronga e tāpu i te akono kore i te Atua a muri ake.” No teia nei, kua papu tikai ia tatou e: ‘E tae maira te rā o Iehova.’​—2 Petero 2:5, 6; 3:10.

21. Ka akapeea tatou i te akaari anga i to tatou akakoromaki anga e te tamou marie, e eaa te tumu manako ta tatou ka akamanako i roto i te atikara e aru mai nei?

²¹ E aru, i reira tatou, i to Iehova akakoromaki anga na te tauturu anga i tetai ke kia tataraara e penei ake ka akaoraia mai ratou. E aru katoa tatou i te au peroveta na te akakite akakoromaki anga i te tuatua meitaki noatu e kare te aronga ta tatou e tutu aere atura e ariu mai ana. Pera katoa, papu ia tatou e ka akameitaki maata mai a Iehova ia tatou, e mei ia Iobu rai ra, te akono tamou ra tatou i te au timata anga e te tiratiratu. Te vai nei te au tumu ravarai kia rekareka i roto i ta tatou angaanga orometua i to tatou kite anga e mei teaa atura te maata ta Iehova akameitakianga no runga i te au tauta anga a tona au tangata i te tutu aere anga i te tuatua meitaki takapini i te ao katoa. Ka kite tatou i teia i roto i te atikara e aru mai nei.

Maara Ainei ia Koe?

• Eaa ra a Iehova i akaari mai ei i te akakoromaki anga?

• Eaa ta tatou i kite mai no te akakoromaki anga o te au peroveta?

• Akapeea a Iobu i te akaari anga i te tamou marie anga, e eaa tei tupu mai?

• Akapeea ra tatou i kite ei e kare e kotinga anga to Iehova akakoromaki anga?

[Tutu i te kapi 18]

Aiteite ua to Iesu akakoromaki anga apa kore ki tona Metua ra

[Au Tutu i te kapi 20]

Akapeea a Iehova i te tutaki anga i to Ieremia akakoromaki anga?

[Au Tutu i te kapi 21]

Akapeea a Iehova i te tutaki anga i to Iobu tamou marie anga?