Auraka e Mataku​—Tei o Kotou na a Iehova!

TERE atu i te 50 mataiti i topa, i muri poto ua ake i te aruru anga te au pomu nukiria mua, kua akakite te tangata kite taineti tei re i te Nobel Prize ko Harold C. Urey no runga i te tuatau ki mua: “Ka kai tatou i te mataku, ka moe tatou i te mataku, e ka noo tatou i te mataku e ka mate tatou i te mataku.” I teia tuatau, e tika rava, e kua ki ua, to tatou ao i te mataku, e no reira e mama ua i te marama atu! I te au ra ravarai, ka akakite mai te au nuti pepa i te au tuatua no runga i te angaanga tamataku, te au angaanga kino, e te au maki tuke ake rai.

Ei au Kerititiano, kua kite ua tatou eaa te aiteanga i taua au tu ra. Te akaari maira te reira e te noo nei tatou i roto i “taua tuatau openga ra” o teia akatereanga o te au mea nei, ta te Pipiria i totou mai e ka akairoia e te “kino maata.” (2 Timoteo 3:1) Te akaketaketaia nei i reira to tatou irinakianga e kare e roa atu ka apai mai te Atua ko Iehova i tetai ao ou i te vai tika anga o te tuatua tika. (2 Petero 3:13) Inara, i teia taime, te kite katoa ra ainei tatou i te mataku?

Te Mataku e to te Atua Au Tavini

Ko Iakoba, Davida, e Elia tetai i rotopu i te au tavini o Iehova tei kite ana i te mataku i te aro anga atu i te kino. (Genese 32:6, 7; 1 Samuela 21:11, 12; 1 Ariki 19:2, 3) Kare teia au tangata nei i ngere i te akarongo. Ei tukeanga ra, kua akaari tikai ratou i te irinakianga ngaueue kore ki runga ia Iehova. Noatu rai, e tangata ua nei oki a Iakoba, a Davida, e Elia; no reira, kua rokoia rai ratou e te mataku. “E tangata oki a Elia mei ia tatou katoa te tu,” i tata ai te pipi ko Iakobo.​—Iakobo 5:17.

Penei ka matakutaku katoa rai tatou me akamanako ua tatou i tetai manamanata e aro atura tatou i teianei me kore penei i tetai ta tatou ka kite i te tuatau ki mua. Te marama uaia ra taua tu mataku ra. No te mea, te karanga ra te Pipiria e kua akakoro rai a Satani te Tiaporo i te “tamaki atu” ki te aronga “ko tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:17) Noatu e no te au Kerititiano akatainuia tikai taua au tuatua ra, kua tata a Paulo e: “Te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12) Noatu rai, auraka roa te mataku kia akaparuparu ia tatou me aro atu tatou i te au manamanata. No teaa ra?

“E Atua no te Au Angaanga Akaora”

Kua tata te tata taramo ko Davida: “To matou Atua mou, e Atua no te au angaanga akaora.” (Salamo 68:20, NW) Kua akatutu putuputu ana a Iehova i tona tu kite i te akaora i tona iti tangata, na te akaora anga mai ia ratou mei te au turanga kino me kore na te oronga anga i te maroiroi kia rauka ia ratou i te akakoromaki. (Salamo 34:17; Daniela 6:22; 1 Korinetia 10:13) Mei taau apiianga o te Pipiria, e ia o taua “au angaanga akaora” ra taau e maara ra?

Na te taangaanga anga i te Watch Tower Publications Index,a kore ei e rave i tetai kimikimianga no runga i taua au tupuanga oraanga tika tikai mei te Tiruvi i te ao i to Noa tuatau, te akaoraangaia a Lota e tana nga tamaine mei Sodoma e Gomora, te Aerenga mai o Iseraela mei Aiphiti e te aere anga na roto i te Tai Muramura, me kore arai angaia te parani a Hamana kia takore i te ngati Iuda? Ka riro te tatau anga e te manakonako anga no runga i teia au papaanga rekareka ei akaketaketa i toou akarongo e e Atua rave angaanga akaora a Iehova. Na teia, i reira, e tauturu ia koe i te aro atu i te au timataanga o toou akarongo ma te mataku kore.

Au Akaraanga i Teia Tuatau

Ka rauka ainei ia koe te akamanako i tetai au akaraanga no te akakoromaki i roto i toou uaorai ngai i teia tuatau nei? Penei ko tetai tangata tei akamouauriia ana no tona aerenga akarongo mou. Penei kua kite koe i tetai Kerititiano pakarikari e tavini nei ia Iehova noatu te kopapa paruparu. Me kore e akamaara i te au mapu e akatakake maira mei teia ao noatu te aka taomianga mei to ratou au oa i te apii. E oti tera te au metua takaua, e kare e tokorua te ngaki ra i te tamariki, me kore te au tangata kare i akaipoipo te tavini ra ia Iehova noatu te au manako ngakau maromaroa. Eaa taau i mou mai mei taua aronga ra? Ka riro te akamanako anga i to ratou aerenga akarongo mou ei tauturu ia koe kia akakoromaki e kia vai mataku kore ua noatu te au timataanga ka aro atu koe.

Ka anoanoia te tu mataku kore kare anake ua me aro atu tatou i te patoianga e te takinokino mari katoa ra me akamata tatou i te ekoko i to Iehova aroa no tatou. Ka anoanoia kia tatanu tatou i te irinakianga e te tau ra to Karaiti oko no tatou ei aronga tataki tai. (Galatia 2:20) Ka rauka i reira kia akavaitata atu tatou kia Iehova ma te kore e tau kia mataku me kore e emiemi. Me te manako ra tatou e kare tatou i tau i to Iehova aroa, kia akamanako tatou no runga i ta Iesu au tuatua ki tana au pipi: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.”​—Mataio 10:29-31.

E nenei putuputu ana nga makatini Te Punanga Tiaki e te Awake! i te au tupuanga o te Au Kite o Iehova i teia tuatau tei aro ana i te au akaaoanga ma te mataku kore tikai. Kare ra te aiteanga e kare ratou i rokoia ana e te manako manamanata no runga i to ratou turanga. Inara kare ratou i tuku ua i taua au manako ngakau ra kia tapu ia ratou mei te tavini anga ia Iehova. Ka tauturu ta ratou au papaanga i neneiia ia koe kia akakoromaki ma te mataku kore. Akamanako ana e rua nga akaraanga.

Kua Taui Roa te Kino o te U Anga i Tona Oraanga

Tei roto i te itiu o te Awake! o Aperira 22, 2003, te atikara “Peea te Kino o te U Anga i te Taui Anga i Toku Oraanga.” I roto i reira, kua akakite mai a Stanley Ombeva, tetai o te Au Kite o Iehova i Kenia, i te au akaaoanga tana i aro atu i te akau angaia aia e tetai apinga akaoro vivikiia. I te kino roa atu anga tona oraanga kopapa, kua ngere aia i tana ngai angaanga e te au moni tauturu katoatoa. “I te marama anga au i te tikaanga tikai o toku turanga,” kua akakite te Taeake Ombeva i roto i tana papaanga, “kua taitaia tikai au, kua manako ua iaku uaorai, e te riririri. Maata te taime, e riri ana au e te mareka kore.” Noatu tona timataanga, kua vai mataku kore rai teia tangata Kerititiano. Kare aia i tuku ua atu i te tu mareka kore kia autu ki rungao iaia e kia akakeu iaia kia tuku takiri i te au. Mari ra, kua irinaki tikai aia kia Iehova. “E turuturu ua mai ana aia iaku i roto i te au mea katoatoa tei tupu kiaku​—e maata tikai te tauturu, e akama ana au iaku uaorai i tetai taime,” i karanga ai te Taeake Ombeva. “Kua tuku au i tetai ikianga papu kia tatau e kia manakonako no runga i te au irava kua kite au e ka akapumaana mai i toku turanga.”

E manganui tei tauturuia e te au tuatua tika ua a te Taeake Ombeva kia akakoromaki i te au timataanga ma te mataku kore. “Kua aue tikai au i te tatau anga au i teia atikara,” i tata ai tetai tuaine Kerititiano. “Kua manako tikai au e te akaari maira a Iehova na roto i teia atikara i tana akaperepereanga pumaana e te aroa e te oronga maira i te akapumaana noku.” Kua tata tetai Kite ke mai e: “Te oronga maira te au atikara mei teia rai i te akamaroiroianga kia tatou te aronga e kite ra i te au turanga mei te reira e tei mamae muteki ua.”

Autu Anga i te Taitaia Manako Ngakau

Tetai tupuanga tangi ke mai koia oki no Herbert Jennings, tei akakiteia i roto i te atikara “Kotou oki ko Tei Kore i Kite i te ka Tupu Apopo.”b Kua autu te Taeake Jennings i te maki manako bipolar. I te akamanako anga no runga i te au ra mua o tona maki, kua karanga aia: “E putoto anga tikai i te aere atu ki te au uipaanga Kerititiano. Noatu rai, kua irinaki pu tikai au i te puapinga o te taokotai anga i te pae vaerua. Kia autu atu, e tomo ana au ki roto i te Are Uipaanga Patireia i muri ake ka noonoo ei te katoatoa e ka akaruke i muri ua ake i te akamutu anga te porokarama openga.”

E ngata katoa te tutu aere anga. “I etai taime, noatu kua tae ki tetai are, kare e rauka iaku i te akatangi i te ove,” i akakite ei te Taeake Jennings. “Inara, kare au e tuku i te au, no te mea te kite ra au e e ora te aiteanga o ta matou angaanga orometua kia matou e ki tetai tei ariki mareka ua mai. (1 Timoteo 4:16) I muri maira, kua rauka iaku i te akaaere i toku manako ngakau, ka aere ki tetai ngutupa, e ka akamata akaou. Na te piri tamou ua atu ki roto i te angaanga orometua, kua akono au i te oraanga pae vaerua ma te tau, e kua akamaata te reira i toku turanga kia autu atu.”

E manganui te aronga tatau tei tauturuia e te papaanga tika ua a te Taeake Jennings kia aro atu i to ratou au tu taitaia ma te tu mataku kore mei teia rai. Ei akaraanga, kua tata tetai tuaine Kerititiano e: “I te 28 mataiti i tatau ana au i te makatini te Punanga Tiaki e te Awake!, kare roa au i akakeu oonuia ana mei teia i toku tatau anga i teia atikara. Kua akamutu au i taku angaanga orometua tamou ma te akava ngakau tikai, te manako anga e naringa i maata toku akarongo, kua angaanga atu rai au. Te tatau anga e kua anoanoia te Taeake Jennings kia akaruke i tana tukuanga angaanga kia rauka i te akono i tona maki kua riro ei tauturu iaku kia akara i toku turanga na roto i te mataara tau. Ko te pauanga tikai teia ki taku au pure!”

Pera katoa rai, kua tata tetai taeake Kerititiano e: “I muri ake i te tavini anga ei tangata pakari i roto i te putuputuanga no te okotai ngauru mataiti, kua akamutu au i taku angaanga puapinga ei tangata pakari no te maki manako. Kino tikai toku manako ngakau no tei poka ua e maata te taime e taitaia ana au i te tatau i te au atikara no runga i te tua oraanga, te tuatua putuputu anga no runga i te au angaanga meitaki a to Iehova iti tangata. Inara kua riro te akakoromaki o te Taeake Jennings ei akamaroiroianga kiaku. E maata tikai te au taime i tatau ei au i te atikara.”

Tere Anga ki Mua ma te Irinakianga Papu

Mei nga taeake ko Ombeva raua ko Jennings, e manganui te Au Kite o Iehova e akamori mataku kore ua atura i te Atua ko Iehova noatu te au araianga ngata. Me ko koe tetai i rotopu ia ratou, kia akameitakiia koe. Kia papu tikai e: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.”​—Ebera 6:10.

Mei ia Iehova i tauturu i tona iti tangata akarongo mou i te au tuatau taito ra kia akavi i to ratou au enemi, ka tauturu katoa aia ia koe kia upokotu i rungao i tetai ua atu araianga taau ka aro atu. No reira, e akamanako meitaki i te au tuatua ta Iehova i tuatua na roto i te peroveta ko Isaia: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.”​—Isaia 41:10.

[Au Tataanga Rikiriki i Raro]

[Au Tutu i te kapi 16]

Mei ia Stanley Ombeva (i runga) raua ko Herbert Jennings (katau), e manganui te tavini ra ia Iehova ma te mataku kore

[Akameitakianga no te Tutu i te kapi 14]

USAF photo