Akonoanga Eaa Tona Puapinga?

“KA MEITAKI ua au noatu kare e akonoanga!” E manako matau uaia tera. Manganui te aronga tuatua tika, takinga meitaki, e te irinakiia ra kare e inangaro ana i te akonoanga. Ei akaraanga, e iti ua rai te tangata i Europa Opunga e aere ana ki te pure, noatu e maata te karanga ra e te irinaki ra ratou i te Atua.a Pera katoa i Marike Ratino, e 15 ki te 20 patene ua rai au Katorika e aere putuputu ana ki te pure.

Mei te manganui rai, penei te manako ra koe e kare e anoanoia te akonoanga kia akameitaki atu te oraanga. Inara, penei, kua kite katoa koe e i te au rau ngauru mataiti akenei, i te tuatau o toou au tupuna, e maata atu te tangata e aere pure ana i to teia tuatau nei. I akapeea ra te akonoanga i ngaro ei tona mekameka maata? Ka meitaki ua ainei tetai tangata noatu kare e akonoanga? E akonoanga ainei tetai te ka puapingaia koe?

Eaa te Manganui i Kopae ei i te Akonoanga

No te au anere ua atu mataiti, kua irinaki te maataanga o te tangata i roto ia Kerititome e te umuumu maira te Atua i te akarongo. E aere ana ratou ki te pure kia rauka te akaperepereanga a te Atua, na roto i te au peu ta te orometua ka rave me kore, na roto i te aratakianga a te tangata e ako maira. E tika, e manganui tei kite ua i te pikikaa o te akonoanga. Kua kite pu uaia ta te akonoanga tuanga i roto i te tamaki, pera katoa te tu viivii o tetai au orometua. Inara e manganui tei manako e te meitaki ua ra te akonoanga. Tetai aronga, inangaro ratou i te au mea muna o te akonoanga, te au peu akamori, e te tangi imene; ki tetai pae e mea puapinga te mataku i te utunga i roto i te ai vera o era, e apiianga kare e kiteaia i roto i te au Tuatua Tapu. I na i muri mai, kua riro tetai au tupuanga i te taui takiri i te aerenga manako o te tangata e manganui no runga i te au akonoanga.

Kua rongonui takiri te apiianga o te mea tupu ua mai. Kua irinaki tikai tetai papaki e e mea tupu ua mai te oraanga​—kare i te mea angaia mai e te Atua. Kare i rauka i te maataanga o te au akonoanga i te oronga i tetai au akapapuanga tau e ko te Atua te Tumu o te ora. (Salamo 36:9) Tetai, no te kite tekinoroti e maata atura, kua riro te au puapinga maata e rauka maira i te pae vairakau, pae apinga akaoro, pae komunikeitianga, i te akakeu i te tangata kia manako e ka rauka i te taineti i te rapakau i tetai ua atu manamanata. Pera katoa, kua manakoia e e meitaki atu te aratakianga a te au taineti no te tu tangata e te au taote no te manako i ta te au akonoanga. Kareka te au akonoanga uaorai, kare i rauka ia ratou i te akataka meitaki mai e ko te akono i te ture a te Atua te arataa meitaki roa atu no te oraanga.​—Iakobo 1:25.

I te pau anga mai, kua taui te manganui o te au akonoanga i ta ratou karere. Kua akamutu te au orometua e te aronga ako i te apii e te umuumu maira te Atua i te akarongo. Inara, kua apii te manganui e na te tangata tataki tai uaorai e iki eaa te tika e eaa te tarevake. I te tauta anga kia arikiia mai, kua karanga tetai au arataki akonoanga e ka ariki ua mai te Atua ia koe noatu eaa te tu o toou oraanga. Te akamaara maira taua tu apiianga ra i ta te Pipiria i totou mai: “Te vai atura oki te tuatau e kore ei ratou e āriki i te tuatua-mou; no te navenave o to ratou taringa e akaputu ei ratou i te orometua e tau i to ratou uaorai inangaro.”​—2 Timoteo 4:3.

Kare taua apiianga ra i akavarenga mai i te tangata, kua akaariu ke atu ra ia ratou. Kua umere ua ra oki ratou e: ‘Me te ekoko ra te au akonoanga i to te Atua mana i te anga mai e to te Atua pakari i te atu i te au ture, eaa i reira te puapinga kia aere au ki te pure? Eaa ra au ka kaimoumou ei i te taime i te apii i taku tamariki no runga i te akonoanga?’ Kua akamata i reira te aronga e tauta ra i te noo i tetai oraanga tau i te akamanako e kare e puapinga o te akonoanga. Kua akaruke ratou i te akonoanga, e kare atura te akonoanga i riro ei mea puapinga akaou kia ratou. Eaa ra tei tupu, i riro ei tetai apinga puapinga ei mea puapinga kore ua? Te oronga maira te Pipiria i tetai akamaramaanga tau tikai.

Akariroia te Akonoanga no te Au Akakoroanga Kino

Kua akamatakite te apotetoro ko Paulo i te au Kerititiano e ka akariro tetai aronga i te akonoanga Kerititiano no te au akakoroanga kino. Kua akakite aia: “Ka o mai ei te luko taae ki roto ia kotou na, kare e akaperepere i te anana. E ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.” (Angaanga 20:29, 30) Tetai tei tuatua mai i te “tuatua mingi” koia oki ko te tangata apii akonoanga o te Katorika Roma ko Augustine. Kua apii a Iesu i tana au pipi kia akapapu atu ki etai ke, na te uriuri anga mei te au Tuatua Tapu. Inara, kua taviriviri a Augustine i te aiteanga o ta Iesu au tuatua i rekotiia i roto ia Luka 14:23, kia “Unuunumou tika atu ei ki te tangata kia aere mai,” e ko te aiteanga koia oki ka meitaki ua kia maro i te tangata kia ariu mai. (Mataio 28:19, 20; Angaanga 28:23, 24) Kua akariro a Augustine i te akonoanga ei akaaere i te tangata.

Ko Satani, te angera meameaau, tei muri i te pikikaa e te angaanga viivii a te akonoanga. Kua akanauru aia i te au tangata akonoanga i te anere mataiti mua i te titau anga kia taviivii i te au putuputuanga Kerititiano. Te karanga ra te Pipiria i taua aronga tangata ra e: “E aposetolo pikikaa oki te reira, e rave angaanga pikikaa ïa, i te akatutu aposetolo anga na te Mesia ia ratou uaorai. Kare oki e vavaria; ko Satani oki tei akatutu angela katoa iaia uaorai no te mārama. Kare oki te mea va maata, kia akatutu tavini tona au tavini no te tuatua-tika.”​—2 Korinetia 11:13-15.

Te taangaanga nei rai a Satani i te akonoanga e akatutu ra ia ratou ei Kerititiano, ei akono tau, e te marama, kia aru te tangata i tona au turanga auraka to te Atua. (Luka 4:5-7) Penei kua kite ua koe e manganui te au orometua i teia tuatau e akariro nei i te akonoanga ei akateitei ia ratou ki te au taoonga ngateitei e kia rauka mai te moni mei ta ratou au anana. Te akariro katoa ra te kavamani i te akonoanga ei akakeu i te tangata kia akaatinga ia ratou uaorai i roto i te tamaki.

E maata roa atu ta te Tiaporo taangaanga anga i te akonoanga, i ta te maataanga o te tangata e manako ra. Penei te manako ra koe e e nga mea aronga maro ua i ta ratou akonoanga ta Satani e taangaanga ra. Inara kia tau ki ta te Pipiria, ko “tei karangaia i te diabolo ra, e ko Satani oki . . . tei pikikaa i to te ao katoatoa nei.” Te karanga katoa ra te Pipiria e: “Te vai ua nei rai to te ao ravarai i raro ake i taua vaerua kino ra.” (Apokalupo 12:9; 1 Ioane 5:19) Eaa ra to te Atua manako no runga i te akonoanga e taangaangaia nei e te au arataki tei inangaro e ko ratou ua ta te tangata e aru?

‘Eaa te Puapinga Kiaku?’

Me te vinivini ra koe i te tu o tetai au akonoanga o Kerititome, kia kite meitaki e e aka mareka kore maata tikai to te Atua Mana Katoatoa ia ratou. Kua karanga a Kerititome e e koreromotu tana i papau ei ki te Atua; kua pera katoa rai a Iseraela i taito. Kua akarongo kore ra nga mea e rua. No reira te akaari maira ta Iehova akautungaanga ia Iseraela e ka akautunga pakari katoa rai aia ia Kerititome i teia tuatau. Kua akakite a Iehova: “Kare oki ratou i akarongo mai i taku tuatua, e taku nei ture, kua akaruke ra i te reira. Eaa te puapinga o te rakau kakara i riro mai kiaku nei mei Seba mai, . . . e kare ua au e rekareka i ta kotou au atinga.” (Ieremia 6:19, 20) Kare te Atua i ariki ana i te akamorianga a te aronga pikikaa. Kare aia i inangaro ana i ta ratou au peu e te au pure. Kua akakite aia kia Iseraela: “Ta kotou au oroa akatakaia ra, kua riri roa taku vaerua i te reira; e apainga teiaa ïa naku; kua roiroi au i te apai anga. Kia oora mai oki i to kotou rima, e puroku au i oku mata ia kotou; e kia akamaata kotou i te au pure, kare au e akarongo atu.”​—Isaia 1:14, 15.

Te inangaro maira ainei a Iehova i te au oroa ta te au akonoanga e oronga ra ei mea Kerititiano inara kua orongaia ana ei akangateitei i te au atua pikikaa? Te akarongo maira ainei aia ki te au pure a te au orometua e taviivii ra i te au apiianga a Karaiti? Te ariki maira ainei te Atua i tetai akonoanga e kopae ra i tana ture? Kia papu tikai ia koe e te riri maira aia i te au peu akonoanga i teia tuatau mei tana rai i riri ana i te au atinga a Iseraela i taito, tana i tuatua e: ‘Eaa ua te puapinga kiaku?’

Noatu ra, te manako oonu maira a Iehova no runga i te akamorianga a te aronga ngakau tae e oronga ra. Te rekareka maira te Atua i te aronga e akaari i te ariki rekareka no te au mea ravarai e rauka maira ia ratou mei ko mai iaia. (Malaki 3:16, 17) No reira ka meitaki ua ainei koe noatu kare e akamori i te Atua? E tau ainei tetai tangata kare e akono ana i tona nga metua kia karanga iaia uaorai e e meitaki? E tau ainei kia karangaia tetai tangata kare e akono ana i te Atua e e meitaki? E mea tau tikai, e kia tuku i to tatou irinakianga ki roto i te Atua mou, te tumuanga uaorai o te ora. I roto i te atikara ka aru mai, ka kite tatou e akapeea te akamorianga mou i te akangateitei anga i te Atua e te akapuapinga katoa anga ia tatou.

[Tataanga Rikiriki i Raro]

[Tutu i te kapi 4]

Kua akakite ainei te au akonoanga i te akapapuanga e na te Atua i anga mai i te au mea ravarai?

[Tutu i te kapi 4, 5]

Ka tau ainei to te Atua komono i roto i teia turanga?

[Tutu i te kapi 5]

Eaa ra to te Atua manako no runga i teia tu oroa?

[Akameitakianga]

AP Photo/Georgy Abdaladze