Maara Ainei ia Koe?

I reka ana koe i te tatau anga i te au itiu ou o Te Punanga Tiaki? Akara ana ra, me ka rauka ia koe i te pau i te au uianga ka aru mai:

• Eaa te ka tauturu i tetai Kerititiano mou me akaruke tetai tei akaperepereia ia Iehova?

E patu ia koe uaorai e etai au mema ke atu o te pamiri. Kia piri ua rai ki roto i te au angaanga pae vaerua. Kia va ua i te tauturu i etai ke. Auraka e tuku i te au e penei ka oki mai tei akaperepereia. Auraka e akaapa ia koe uaorai. Akangateitei i te au akanoonooanga a te Atua no te ako, e tuatua ki te au taeake no runga i te au mea taau e manako ra.​—9/1, kapi 18-21.

• Eaa e rua mataara e tauturu maira te au Tuatua Tapu i te akataka i “te au ra openga”?

Te akakite maira te Pipiria i te au tupuanga ka tupu mai i “te openga o teianei ao.” (Mataio 24:3, 7, 8; Luka 21:11) Te tuatua katoa ra te reira i te au tauianga i roto i te tu e te au angaanga a te tangata e noo ra i te “tuatau openga.” (2 Timoteo 3:1-5) Tei puapinga maata roa atu, ka tutu aereia te tuatua meitaki o te Patireia i teia tuatau.​—9/15, kapi 4-6.

• Eaa te apainga a te putuputuanga me u tetai tangata Kerititiano e akaoro ra i tetai apinga akaoro e kua tupu te mate ki etai ke?

Penei ka kite te aronga pakari e kimikimi ra i taua mea ra e kare e akamaringianga toto i raveia no te mea kare tei te tangata akaoro te akaaere i te au turanga tei akatupu i te mate. Inara mei te mea e kua apa i te akamaringi toto e kua tataraara te tangata i apa, ka akoia aia mei roto i te au Tuatua Tapu e ka araiia mei te au angaanga i roto i te putuputuanga.​—9/15, kapi 30.

• No teaa kare ei e tau kia irinakiia te rauka anga mai o te ora mutu kore ki runga i te au kite taineti?

E maata te au tautaanga a te taineti kia akaroa atu i te oraanga, na te tauta anga kia akaroa roa atu i te au taime e akaora akaou ana te au teera ia ratou uaorai me kore na roto i te therapeutic cloning kia oronga mai i tetai au mero ou, tei au ki te tangata maki. Inara te akaari maira te Pipiria e ko te ravenga ua rai e rauka ai te ora mutu kore i te tangata koia oki ko te oko a Iesu.​—10/1, kapi 3-5.

• E momua ainei te peu pai a te ngati Iuda no te papetitoanga Kerititiano?

Kare. E rave ana te ngati Iuda i te peu tama ki runga ia ratou uaorai, tei kore i anoanoia i roto i ta Ioane papetitoanga. Ko te tamaanga tei umuumuia e te Ture a Mose ka ripiti uaia rai te reira, kareka te papetitoanga Kerititiano, e tai rai rave anga i te reira.​—10/15, kapi 12-13.

• Eaa ra te Apii Terenianga Orometua?

E varu epetoma teia apiianga na te aronga pakari o te putuputuanga e te au tavini orometua tauturu kare i akaipoipo e ko tei tau tona turanga kia tukuia atu aia ki te ngai tei anoano maataia. Penei ka tukuia ratou ki te putuputuanga no reira mai ratou, me kore ki tetai ngai ke i taua enua ra, me kore ki tetai enua ke atu.​—11/15, kapi 10-11.

• Eaa, me kore koai te akakore karaiti tei taikuia mai i roto ia 1 Ioane 2:18; 4:3?

Me akamanako mamaoia atu tona aiteanga, te tou ra te tuatua “akakore karaiti” ki te aronga katoatoa tei patoi e tei akapikikaa e ko ratou a Karaiti me kore tona au komono. Te akaari maira te tuatua a Iesu raua ko Ioane e e pupu katoa te akakore karaiti tei akapupuia ki te au akakore karaiti tataki tai e manganui tei akatotoa aere i ta ratou akavareanga na roto i te akonoanga e te patoi i te Patireia o te Atua.​—12/1, kapi 4-6.