Tauturu i Tetai Ke Kia Akono i ta te Pipiria e Apii Maira

“Kareka to te ngai one meitaki, koia te aronga e akarongo i te tuatua, tāpu piri tikai ki roto i te ngakau pikikaa kore e te tau, e e tika i te uua anga i te ua.”​—LUKA 8:15.

1, 2. (a) Eaa te akakoroanga i tataia ai teia puka Eaa Tikai ta te Pipiria e Apii Maira? (e) I te au mataiti i topa ua akenei, akapeea a Iehova i te akameitakianga i te au tautaanga a tona iti tangata kia akariro i te au tangata ei pipi?

“E PUKA meitaki tikai teia. E rekareka tikai ana taku aronga apiipii i te reira. E rekareka tikai ana au i te reira. Kua tauturu teia puka i te akamata i te au apii Pipiria ma te au tangata i to ratou ngutupa tikai.” I karanga ei tetai orometua painia tamou no te Au Kite o Iehova no runga i te puka Eaa Tikai ta te Pipiria e Apii Maira? a I te taikuanga ki taua puka ra, kua karanga tetai tangata tutu pakarikari no te Patireia e: “Kua rauka iaku te tikaanga i te tauturu atu i te au tangata e manganui kia kite ia Iehova i roto i te 50 mataiti i toku angaanga maroiroi anga i roto i te angaanga orometua. Inara te inangaro nei au i te akakite e, e puka apii umere tikai teia. E manea tikai te au tutu e te au akatutuanga te akakeu ra i te manako.” Ko toou manako ainei te reira no runga i te puka ta te Pipiria e Apii Maira? Kua tataia teia puka apii Pipiria kia tauturu ia koe i te akatupu i ta Iesu akauenga: “Ka aere kotou, e akariro i to te pa enua katoa ei pipi, . . . Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

² Kare ekokoanga, e rekareka ana to Iehova ngakau iaia e kite maira mei tetai 6.6 mirioni o tona Au Kite te aru puareinga ua ra i ta Iesu aratakianga kia akariro i te au tangata ei pipi. (Maseli 27:11) Papu e te akameitaki ra a Iehova i ta ratou au tautaanga. I te 2005, ei akaraanga, kua tutu aereia te tuatua meitaki i roto i te au enua e 235, ei avereti, kua tere atu i te 6,061,500 apii Pipiria tei akonoia. Ei tupuanga, e manganui te au tangata tei akarongo e tei ‘āriki i te tuatua a te Atua, kare ei tuatua na te tangata, ei tuatua ra na te Atua, e koia tika rai oki.’ (1 Tesalonia 2:13) I roto i nga mea mataiti e rua i topa ua akenei, kua tere atu e apa mirioni au pipi ou tei taui i to ratou au oraanga ki ta Iehova au turanga e kua akatapu ia ratou uaorai ki te Atua.

3. Eaa te au uianga no runga i te taangaanga anga i te puka ta te Pipiria e Apii Maira te ka uriuriia i roto i teia atikara?

³ Kua kite mai ana ainei koe i te rekareka i te akonoanga i tetai apii Pipiria ki tetai tangata? Takapini i te ao katoa, te vai ra rai te au tangata ma “te ngakau pikikaa kore e te tau” e i to ratou akarongo anga i te tuatua a te Atua ka “tika i te uua anga i te ua.” (Luka 8:11-15) E akamanako ana tatou e akapeea koe i te taangaanga anga i te puka ta te Pipiria e Apii Maira i roto i te angaanga i te akariroanga i te au tangata ei pipi. Ka akara matatio ta tatou au uriurianga e toru uianga: (1) Akapeea koe i te akamataanga i tetai apii Pipiria? (2) Eaa te au ravenga puapinga rava atu no te apiianga? (3) Akapeea koe i te tauturuanga i tetai tangata kia riro mai ei tangata apiipii e pera katoa ei puapii no te Tuatua tataia a te Atua, te Pipiria?

Akapeea Koe me Akamata i Tetai Apii Pipiria

4. Eaa tetai aronga ka emiemi ei i te apii i te Pipiria, e akapeea koe i te tauturuanga ia ratou kia autu i to ratou tu ekoko?

⁴ Me patiia koe kia rere ki tetai tua o tetai kauvai atea, penei ka patoi koe i te reira patianga. Inara me ka tukutuku ia te au toka takainga e tae ua atu ki tetai tua mai, penei ka inangaro paa koe i te tikoti atu i reira. Mei te reira katoa, penei ka emiemi tetai tangata e maata tana angaanga, i te apii i te Pipiria. Penei ka manako mai te tangata ngutuare e e maata roa te taime e te tautaanga te umuumuia ra kia apii i te reira. Akapeea koe i te tauturuanga iaia kia autu i tona tu ekoko? Na te akonoanga i te au uriurianga poto ua e te maramarama ua, ka rauka ia koe i te taangaanga i te puka ta te Pipiria e Apii Maira kia arataki i te tangata kia apii putuputu i te Tuatua a te Atua. Me akateateamamao meitaki koe, ka riro te atoroanga tataki tai ki tera tangata mei tetai toka takainga rai ki tona akapiri atu anga kia Iehova.

5. Eaa koe ka anoanoia ai kia tatau i te puka ta te Pipiria e Apii Maira?

⁵ Inara, i mua ake ka rauka ai ia koe i te tauturu i tetai tangata ke kia puapinga mei te puka ta te Pipiria e Apii Maira, ka inangaroia koe kia matau meitaki i te reira. Kua tatau ainei koe i te puka mei te akamataanga ki te openga? Kua apai tetai tokorua i te puka ia raua e orote ra e kua akamata i te tatau i te reira ia raua e akangaroi ra i te pae taatai. E te aere maira tetai vaine no reira e okooko apinga ra ki te au turoto, kua kite atu aia i te tumu tuatua Eaa Tikai ta te Pipiria e Apii Maira? Kua akakite aia ki te tokorua e i nga mea ora ua i mua atu, kua pure aia no runga i te reira uianga tikai, i te patianga ki te Atua no tetai pauanga. Kua mataora te tokorua i te oronga atu ki te vaine i tetai kopi o te puka. Kua “taporoporo marie [ainei koe] i te tuatau” kia tatau i teia puka, penei e rua taime, ia koe e tiaki ra no tetai araveianga me kore i toou ora kaikai i te angaanga me kore i te apii? (Ephesia 5:15, 16) Me rave koe i te reira, ka matau mai koe i teia tauturu no te apii Pipiria e penei ka akatupu katoa i te au atianga kia tuatua atu ki tetai ke no runga i te au manako i roto i te reira.

6, 7. Akapeea koe i te taangaanga anga i te puka ta te Pipiria e Apii Maira kia akamata i te au apii Pipiria?

⁶ Me te oronga ra i te puka i roto i te angaanga orometua, e taangaanga meitaki i te au akatutuanga, au irava, e te au uianga i te kapi 4, 5, e te 6. Ei akaraanga, penei ka akamata koe i tetai pukapukaanga na te uianga, “I te au manamanata katoatoa e kite nei te au tangata ravarai i teia tuatau, eaa i toou manako te tumu irinaki roa ia atu no te aratakianga?” I muri ake i te akarongo meitaki anga ki te pauanga a te tangata, e tatau ia 2 Timoteo 3:16, 17, e e akamarama atu kiaia e te oronga maira te Pipiria i tetai pauanga tikai ki te au manamanata o te au tangata ravarai. E oti, e arataki i te manako o te tangata ngutuare ki te kapi 4 e te 5, e e ui atu: “I te au turanga tei akatutuia i runga nei i teia nga kapi, eaa te mea taitaia roa atu kia koe?” Me tou atu te tangata ngutuare ki tetai tutu, e oake koe e nana e mou i te puka ia koe e tatau maira i te irava turu mei taau Pipiria. E oti, e tatau i te kapi 6, e e ui atu i te tangata ngutuare, “I teia au uianga e ono tei taikuia i raro i teia kapi, ko teea uianga taau ka inangaro kia pauia?” Me tou atu te tangata ki tetai uianga, e akaari koe kiaia i te pene te pau ra i te reira uianga, e akaruke koe i te puka kiaia, e e akapapu koe i tetai akanoonooanga kia oki akaou i te uriuri i te reira uianga.

⁷ Ka oti mai teia akatutuanga tei akataka uaia akenei i roto i te rima miniti. Inara, i roto i te reira nga mea miniti ua, kua kite mai koe i te au manako o te tangata ngutuare, kua tatau e kua akono koe e rua nga irava, e kua akanoo koe i te tumuanga no tetai atoro akaouanga. Penei ka riro taau pukapukaanga poto ua ki te tangata ngutuare e ko te tupuanga maroiroi rava atu e te pumaana rava atu tana i kite mai no tetai tuatau roa. Ei tupuanga, ka inangaro katoa rai tetai tangata e maata tana angaanga, i te noonoo mai kia koe no nga mea miniti akaou ia koe e tauturu ra iaia i te akono i tona takainga ka aru mai kia aere mai ki runga i te ‘ara, te taki atura ki te ora.’ (Mataio 7:14) Aere rai, e te tupu ra te inangaro o te tangata ngutuare, ka tau kia akaroaia te tuatau o te apii. Ka rauka teia i te raveia na te pati atu anga kia noo ki raro e kia apii no tetai tuatau roa atu.

Au Ravenga Puapinga Rava Atu no te Apiianga

8, 9. (a) Akapeea koe i te akateateamamaoanga i taau tangata apiipii Pipiria kia autu i te au arairaianga e te au timataanga tana paa ka taii atu? (e) Ka kitea ainei te materia paruru ai no te patuanga o te akarongo mou kiea?

⁸ Me akamata ana tetai tangata i te aru i ta te Pipiria e apii maira, penei ka aro atu aia i te au arairaianga te ka tapupu i tona tereanga ki mua. Kua karanga te apotetoro ko Paulo: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” (2 Timoteo 3:12) Kua akaaite a Paulo i teia au timataanga ki tetai ai te ka takore i te au materia puapinga kore no te patu are inara kare i takore i te au materia mei te auro, ario, e te toka memeitaki ra. (1 Korinetia 3:10-13; 1 Petero 1:6, 7) Kia tauturu i taau tangata apiipii Pipiria kia akatupu i te reira au tu tei umuumuia kia autu i te au timataanga tana paa ka taii atu, ka inangaroia koe i te tauturu iaia na te patu anga ma te au materia paruru ai.

⁹ Kua akaaite te tangata tata taramo i “te tuatua a Iehova” ki te “ario i tamāia i roto i te āriki one ra, i tataki ituia te tamā anga.” (Salamo 12:6) E tika, te vai ra te au materia memeitaki ra i roto i te Pipiria te ka rauka i te taangaangaia i te patu i te akarongo ketaketa. (Salamo 19:7-11; Maseli 2:1-6) E te akaari maira te puka ta te Pipiria e Apii Maira e akapeea koe e puapinga ai i te taangaanga anga i te au Tuatua Tapu.

10. Akapeea koe i te akamouanga i te manako o te tangata apiipii ki runga i te Pipiria?

¹⁰ I te tuatau o te apii, e akamou i te manako o te tangata apiipii ki runga i te au irava tei orongaia mai i roto i te pene tataki tai te uriuriia ra. E taangaanga i te au uianga kia tauturu i te tangata apiipii kia marama i te au tumu irava Pipiria e kia taangaanga i te reira kiaia uaorai. Kia matakite koe e auraka e akakite kiaia e eaa tana ka rave. Mari ra, e aru i te akaraanga o Iesu. I te uiui atu anga tetai tangata kite i roto i te Ture iaia, kua pau atu a Iesu: “Eaa tei tataia ki roto i te ture ra? te peea ra koe i te tatau anga?” Kua pau atu te tangata mei te au Tuatua Tapu, e kua tauturu a Iesu iaia kia kite mai i te akono i te reira kaveinga kiaia uaorai. Na te orongaanga i tetai akatutuanga, kua tauturu katoa a Iesu i te reira tangata kia kite mai e akapeea te apiianga i te akakeuanga iaia. (Luka 10:25-37) E maata te au akatutuanga mama ua i roto i te puka ta te Pipiria e Apii Maira ka rauka ia koe i te taangaanga i te tauturu i tetai tangata apiipii kia akono i te au kaveinga Tuatua Tapu kiaia uaorai.

11. Eaa te maata taau ka uriuri i roto i te atianga apii tataki tai?

¹¹ Te taangaanga ra te puka ta te Pipiria e Apii Maira i te tuatua mama ua, e te tika ua i te akamarama i te Tuatua a te Atua, mei ia Iesu rai e akakitekite ra i te au manako ngata i roto i te au tuatua mama ua. (Mataio 7:28, 29) E aru i tona akaraanga. E akakite i te akakitekiteanga ma te mama ua, te marama ua, e te tika tikai. Auraka e rapurapu i te apii. Mari ra, e tuku i te au turanga e te kite o tetai tangata apiipii i te akataka mai eia aau parakarapa ka uriuri i te atianga apii tataki tai. Kua kite a Iesu i te au kotinga o tana au pipi e kare aia i inangaro ana i te akateiaa maata roa ia ratou ma te akakitekiteanga i te reira taime.​—Ioane 16:12.

12. Akapeea te taangaanga anga i te apenetiki?

¹² E apenetiki tetai i roto i te puka ta te Pipiria e Apii Maira e e 14 au tumu tuatua. Akatumuia ki runga i te au inangaro o te tangata apiipii, ka rauka ia koe ei puapii nona i te akataka e akapeea i te taangaanga meitaki i teia tuanga. Ei akaraanga, me kite mai ana tetai tangata apiipii i tetai tumu tuatua e e pakari i te marama me kore e au uianga tana no runga i tetai au manako tikai no tona au irinakianga mua, penei ka rava ua i te arataki i tona manako ki te tuanga tau o te apenetiki e tuku e kia uriuri aia uaorai i te reira tumu tuatua. I tetai tua ra, penei te akakite maira te au inangaro o te tangata apiipii e ka inangaroia koe kia uriuri kapiti atu i te reira apii kiaia. Te vai ra te au tumu manako Tuatua Tapu i roto i te apenetiki, mei “Te ‘Meta’ e te ‘Vaerua’​—Eaa Tikai te Aiteanga o Teia Nga Tuatua?” e “Akataka Anga ia ‘Babulonia Maata.’” Penei ka inangaro koe i te uriuri atu i teia au tumu manako ki taau tangata apiipii. I te mea e kare i orongaia mai te au uianga no te au tumu tuatua te uriuriia ra i roto i te apenetiki, kia matau meitaki koe i te akakitekiteanga kia rauka ia koe i te ui i te au uianga puapinga tikai.

13. Eaa ta te pure angaanga i te akaketaketaanga i te akarongo?

¹³ “Kia kore a Iehova e patu i te are ra, e angaanga puapinga kore ta te aronga i patu ra,” te karanga ra a Salamo 127:1. No reira, ia koe e akateateamamao ra i te akono i tetai apii Pipiria, e pure i ta Iehova tauturu. E tuku i taau au pure ka tuatua i te akamataanga e te openga o te apii tataki tai i te akaata mai i toou pirianga maanaana kia Iehova. E akamaroiroi i te tangata apiipii kia pure kia Iehova no te kite kia marama i Tana Tuatua e te maroiroi kia akono i ta te reira akoanga. (Iakobo 1:5) Me rave aia i te reira, ka akamaroiroiia te tangata apiipii i te autu i te au timataanga e ka ketaketa roa atu i roto i te akarongo.

Tauturu i te Aronga Apiipii Pipiria kia Riro ei Au Puapii

14. Eaa te tereanga ta te au tangata apiipii Pipiria e anoanoia ra kia akono?

¹⁴ Me ka aru ta tatou aronga apiipii Pipiria i te “au mea ravarai” ta Iesu i akaue i tana au pipi, ka inangaroia ratou kia tere ki mua mei te riro mai anga ei aronga apiipii no te Tuatua a te Atua ki te riro mai anga ei au puapii no te reira. (Mataio 28:19, 20; Angaanga 1:6-8) Eaa taau ka rave kia tauturu i tetai tangata apiipii kia akono i te reira tu tereanga i te pae vaerua?

15. Eaa koe ka akamaroiroi ei i taau tangata apiipii Pipiria kia aere mai ki te au uipaanga Kerititiano?

¹⁵ Mei te apiianga mua rai, e pati i te tangata apiipii kia aru mai ia koe ki te au uipaanga putuputuanga. E akamarama atu kiaia e ko te au uipaanga te ngai e rauka ana taau terenianga ei puapii no te Tuatua a te Atua. I roto i te au epetoma, e akapae i nga mea miniti ua i te openga o te apii Pipiria tataki tai i te akamarama atu i te porokaramu no te ikuikuanga pae vaerua taau e rauka ana i te au uipaanga e te au akaputuputuanga tukeke. E tuatua maoraora atu koe no runga i te au puapinga taau i rauka mai i roto i teia au atianga. (Ebera 10:24, 25) Me akamata roa ana te tangata apiipii i te aere putuputu mai ki te au uipaanga, i te akaraanga ka riro mai aia ei puapii no te Tuatua a te Atua.

16, 17. Eaa tetai au akakoroanga ta tetai tangata apiipii Pipiria ka akanoo e ka itae atu?

¹⁶ E tauturu i te tangata apiipii Pipiria kia akanoo i te au akakoroanga ka rauka iaia i te itae. Ei akaraanga, e akamaroiroi iaia i te akakite atu i tana e kite maira ki tetai taeake me kore ki tetai kopu tangata. Pera katoa, e akakite atu koe kiaia kia akanoo i tetai akakoroanga kia tatau i te katoaanga o te Pipiria. Me tauturu koe iaia i te akanoo e kia akono tamou i tetai akonoanga matauia kia tatau putuputu i te Pipiria, ka puapinga teia peu iaia i muri roa mai i tona papetitoanga. Kapiti katoa atu, kore koe e akakite atu ki te tangata apiipii kia akono aia i tetai akakoroanga kia akamaara e tai ua irava Pipiria te pau ra i tetai uianga puapinga mei te pene tataki tai o te puka ta te Pipiria e Apii Maira? Na te raveanga i te reira, ka riro mai aia “e tangata rave angaanga me te kore e akama, i te akono meitaki anga i te tuatua mou ra.”​—2 Timoteo 2:15, NW.

¹⁷ E kia apii ua i tetai tangata apiipii kia ripiti i te au irava me kore kia oronga mai i tetai manako poto ua o te reira, e akamaroiroi koe iaia kia akamarama mai i te au irava Pipiria tau, iaia e oronga ra i tetai pauanga ki te aronga e inangaro ra iaia kia akakite atu i te tumu o tona akarongo. Penei ka tauturu te au atianga no te akamatauanga, ia koe e maani ra e e kopu tangata koe me kore e oa angaanga koe te ui ra kiaia kia akamarama mai aia i tona au irinakianga. I te tangata apiipii e pau maira, e akaari kiaia e akapeea i te pau atu ma “te maru e te kauraro marie.”​—1 Petero 3:15.

18. Me riro mai tetai tangata apiipii Pipiria ei papuritia kare i papetitoia, eaa atu tetai tauturu ka tau koe kia oronga kiaia?

¹⁸ Aere rai, penei ka tau te tangata apiipii i te piri atu ki roto i te angaanga orometua. E akakite atu kiaia e e tikaanga tikai teia kia akatikaia kia piri atu ki roto i teia angaanga. (2 Korinetia 4:1, 7) Me kite mai ana te aronga pakari e kua tau te tangata apiipii ei papuritia kare i papetitoia, e tauturu iaia kia akapapa i tetai akatutuanga mama ua e e aru atu koe iaia i roto i te angaanga tutu anga. E angaanga putuputu ua atu rai koe kiaia i roto i te au tuanga tukeke o te angaanga orometua, e e apii iaia e akapeea i te akapapa e te akono meitaki i te au atoro akaouanga. Ka riro toou uaorai akaraanga meitaki ei akakeuanga meitaki.​—Luka 6:40.

“E Oraʼi Koe, e te Aronga Katoa e Akarongo Mai ia Koe”

19, 20. Eaa ta tatou au akakoroanga, e no teaa ra?

¹⁹ Kare ekokoanga, e angaanga maata tikai i te tauturu i tetai tangata kia “rauka te kite i te tuatua-mou.” (1 Timoteo 2:4) Inara, e iti ua te au rekarekaanga i roto i te oraanga, i te akaaiteia ki te mataora no te tauturuanga i tetai tangata kia aru i ta te Pipiria e apii maira. (1 Tesalonia 2:19, 20) E tikai, tei ia tatou te tikaanga kia riro mai ei ‘oa rave angaanga oki no te Atua’ i roto i teia angaanga apiianga i te ao katoa!​—1 Korinetia 3:9.

²⁰ Na roto ia Iesu Karaiti e tana au angera ririnui, ka akava a Iehova i te “aronga kare i kite i te Atua, e tei kore i akarongo i te evangelia o to tatou Atu o Iesu Mesia.” (2 Tesalonia 1:6-8) E turanga kino tikai to te au oraanga. Ka rauka ainei ia koe i te akariro ei akakoroanga naau kia akono i tetai apii Pipiria i te kainga i roto i te puka Eaa Tikai ta te Pipiria e Apii Maira? Ia koe e piri atura ki roto i teia angaanga, tei ia koe te atianga “e oraʼi koe, e te aronga katoa e akarongo mai ia koe ra.” (1 Timoteo 4:16) I teianei tikai, e mea rapurapu kia tauturu tatou i te aronga kia aru i ta te Pipiria e apii maira.

[Tataanga Rikiriki i Raro]

Eaa Taau i Kite?

• Eaa te akakoroanga i tataia ai te puka ta te Pipiria e Apii Maira?

• Akapeea koe i te akamataanga i te au apii Pipiria na te taangaanga anga i te puka ta te Pipiria e Apii Maira?

• Eaa te au ravenga meitaki rava atu no te apii?

• Akapeea koe i te tauturuanga i tetai tangata apiipii kia riro mai ei puapii no te Tuatua a te Atua?

[Tutu i te kapi 26]

Te taangaanga meitaki ra ainei koe i teia puka?

[Tutu i te kapi 27]

Na tetai uriurianga poto ua e akakeu i te inangaro o tetai tangata no te kite Pipiria

[Tutu i te kapi 29]

Akapeea koe i te aratakianga i te manako o te tangata apiipii ki te Pipiria?

[Tutu i te kapi 30]

Tauturu i te tangata apiipii Pipiria kia tere ki mua