Ka Noo Ainei Koe no Teia Ra Ua?

“KARE rava au e manako atu ana i te tuatau ki mua. Kare te reira e roaia ka tae mai.” Taua au tuatua taiku putuputuia ra na te tangata taineti rongonui na Albert Einstein. E maata rai te tangata e tuatua ana i te au manako mei te reira. Penei ka karanga ratou e, “Eaa ka manata atu ei ia apopo?” Me kore penei kua rongo ana koe i te tangata i te tuatua i te au apinga mei tera e: “E rave ua koe i taau e rave ra.” “E noo ua no teia ra.” “Akangaropoinaia atu apopo.”

E tika e kare taua tu manako matauia ra i te mea ou. “Ka kai, ka inu, tamataoraia koe. Kare e puapinga i te toenga.” Teia oki te aerenga manako o te au tangata Epikuro i taito. Mei te reira rai te manako o tetai au taeake o te apotetoro ko Paulo. To ratou manako “e kai tatou, e e inu oki; apopo oki tatou e mate ei.” (1 Korinetia 15:32) Kua irinaki ratou e ko teia oraanga poto ua rai te ka rauka ia tatou, no reira kua turuturu ratou i te aerenga manako e e ngari ake tatou i te taangaanga meitaki i taua oraanga ra.

No te mirioni ua atu au tangata i te enua nei, kare te aiteanga o te taangaanga meitaki anga i teia oraanga e ko te aruaru ua anga i te au mea e navenave ei. Te au turanga taitaia ngata e kite nei te manganui ia ratou uaorai i roto, te riro nei ei putakaitianga maata kare e openga anga. Eaa ra ratou i reira ka akamanako atu ei i te tuatau ki mua, i tetai “apopo” kare takiri e rauka i te akakoromaki me akaraia atu te tu taitaia e te kore e manakonakoanga?

Ka Parani Ainei no Apopo?

Te au tangata katoa kare e ngata roa ana to ratou au turanga kare ratou e kite ana i te puapinga o te maani parani no apopo. Penei ka ui ratou e, “Eaa i reira ka manata atu ei?” Penei ka karanga tetai aronga e ko te aronga tei maani i tetai au parani i te openga kua rokoia e te tumatetenga e te taitaia maata. Kua kite katoa ana te pateriareka a Iobu i te au tuatau taito i te tu taitaia i te “motu ke,” ua anga tana au parani e takino atura i reira i te mea tikai te ka apai mai i te oraanga mataora i te tuatau ki mua nona e tona pamiri.​—Iobu 17:11; Koheleta 9:11.

Kua akaaite te tangata tata pee i Tekotia ko Robert Burns i te turanga taitaia o tetai kiore toka ngangaere tei takore manako kore uaia e Burns tona koanga ki te koi o tana arote. Kua oro te kiore toka i te kimi ora i te takino takiriia anga te tu o tona oraanga. ‘Ae,’ i manako ei te tangata tata pee e, ‘e ia ra taime e kite ana tatou uaorai i te tu puapinga kore ua me aro atu i te au turanga kare takiri e rauka ia tatou i te akaaere e te au parani katoa tei akakoro meitakiia, e maata ua atu te taime e puapinga kore ana.’

No reira e puapinga kore ainei te parani no te tuatau ki mua? Me tupu te au uriia me kore te au tumatetenga natura, e tika rava e ka tupu te au openga kino me kare e parani meitakiia. I te akaraanga, kare rai e rauka i tetai tangata i te tapu i te Uriia Katrina. Inara naringa i kite mamaoia atu e i parani meitakiia, kare ainei te reira e akaiti maata roa mai i te kino tei tupu ki runga i te oire e tona au tangata?

Eaa ra toou manako? E tau ainei kia noo no teia ra ua e kia akangaropoina atu i apopo? Ka akamanako ana ra e eaa ta te atikara ka aru mai e tuatua ra no runga i teia tumu manako.

[Au Tutu i te kapi 3]

“Ka kai, ka inu, tamataoraia koe. Kare e puapinga i te toenga”

[Tutu i te kapi 4]

Naringa i kite mamaoia atu e i parani meitakiia ka akaitiia mai ainei te au kino ta te Uriia Katrina i akatupu?

[Akameitakianga]

U.S. Coast Guard Digital