‘Aere mai ka Aru mai Iaku’

‘Kia inangaro tetai tangata i te aru mai iaku, e kopae aia iaia uaorai ka mou ei i tana rakau tamamae mei tera ra ki tera ra e ka aru ua mai ei iaku.’​—LUKA 9:23, NW.

1, 2. (a) Eaa te patianga takinga meitaki ta Iesu i oronga atu? (e) I akapeea ra koe i te ariu atu anga ki te patianga a Iesu?

VAITATA atu ki te openga o tana angaanga orometua, te akakitekite aere ra a Iesu i Perea, e ngai i tetai tua mai i Ioridana, i te tua tokerau itinga o Iudea. Kua aravei mai tetai mapu tane iaia e kua ui maira e eaa ra te ka anoanoia kia rave aia e rauka ai te ora mutu kore. I te kite anga a Iesu i muri mai e, te akono tiratiratu ua ra taua mapu tane ra i te Ture a Mose, kua oronga atura aia i tetai patianga umere tikai. Kua tuatua atura aia e: ‘Ka aere, ka oko i taau apinga, ka apai atu ei na te putaua, e apinga taau i te rangi i reira: e aere mai oki, ka aru mai ei iaku.’ (Mare. 10:21) E akamanako ua ana ra​—e patianga teia kia aru ia Iesu, te Tamaiti anau tai a te Atua Teitei Rava!

² Kua iki taua mapu tane ra eiaa e ariki i te patianga, inara kua ariki tetai aronga. I muao ana, kua karanga atu a Iesu kia Philipa e: “Ka aru mai iaku.” (Ioa. 1:43) Kua ariki a Philipa e kua riro maira ei apotetoro i muri mai. Kua tuatua akaou atu a Iesu i taua patianga ra kia Mataio, e kua ariki katoa mai aia i te reira. (Mata. 9:9; 10:2-4) Kare roa e ekoko, e kua oronga a Iesu i taua patianga rai ki te aronga ravarai tei inangaro i te tuatua tika i tona tuatua anga e: ‘Kia inangaro tetai tangata i te aru mai iaku, e kopae aia iaia uaorai ka mou ei i tana rakau tamamae mei tera ra ki tera ra e ka aru ua mai ei iaku.’ (Luka 9:23, NW) No reira, ka rauka i tetai ua atu tangata kia aru ia Iesu me e inangaro tikai tona. Ko toou anoano ainei rai tera? Te maataanga ia tatou kua ariki ke ana i ta Iesu patianga takinga meitaki, e i roto i te angaanga orometua, kia oronga katoa atu tatou i taua patianga ra ki etai ke.

3. Ka akapeea ra tatou i te paruru anga ia tatou kia kore e topa mari ua atu mei te aru anga ia Iesu?

³ Te mea mii ra, tetai aronga tei akaari mai ana i te inangaro i roto i te tuatua mou o te Pipiria, kare e apii akaou ana. Mari ra, kua akaparuparu ratou e i te openga, kua “topa” ke mari ua atura mei te aru anga ia Iesu. (Ebe. 2:1) Ka akapeea ra tatou i te paruru anga ia tatou kia kore e topa ki roto i taua ereere ra? Ka tauturu maata roaia me ui tatou kia tatou uaorai e: ‘Eaa ra au i iki ei kia aru ia Iesu? Eaa ra te aiteanga e, kia aru iaia?’ Na te akamaara anga i te pauanga ki taua nga uianga ra e tauturu i te akaketaketa i ta tatou ikianga kia noo mou rai ki runga i te arataa o te ora ta tatou i iki. Ka tauturu katoa te reira ia tatou kia akamaroiroi atu i etai ke kia aru ia Iesu.

Eaa te Tumu ka Aru ei ia Iesu?

4, 5. Eaa ra a Iesu i tau ei kia arataki?

⁴ Kua akakite te peroveta ko Ieremia e: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” (Iere. 10:23) Te akapapu ua maira te tuatua enua i te tika o ta Ieremia tuatua. E maata te akapapuanga e kitea maira e kare e rauka ana i te tangata i te akaaere meitaki ua ia ratou uaorai. Kua ariki tatou i te patianga kia aru ia Iesu no te mea kua kite tatou e kua tau tikai aia kia riro ei Arataki na roto i te tu kare rava e rauka i tetai ua atu tangata. Ka akamanako ana i tetai au tu i tau ei a Iesu ei Arataki.

⁵ Te mea mua, na Iehova uaorai i iki ia Iesu kia riro e ko te Mesia te Arataki. Koai ia tei kite roa atu i Tei Anga mai ia tatou e koai te ka tau kia akataoongaia ei Arataki no tatou? Te rua, tei ia Iesu te au tu anake ka rauka ia tatou kia akangateitei e kia aru. (E tatau ia Isaia 11:2, 3.) Koia tikai te akaraanga apa kore no tatou. (1 Pete. 2:21) Te toru, te manako aroa ua maira a Iesu i te aronga e aru ra iaia, e kua akaari mai aia i te reira i tona mate anga no ratou. (E tatau ia Ioane 10:14, 15.) E te akaari katoa maira aia e e tiaki aroa ua aia i te arataki anga ia tatou ki te oraanga te ka apai mai i te tu mataora i teianei, e te ka taki atu ia tatou ki tetai oraanga kaka no te tuatau ki mua. (Ioa. 10:10, 11; Apo. 7:16, 17) No teia e no tetai au tumu ke mai, e ikianga tau tikai ta tatou i rave i to tatou iki anga kia aru iaia. Eaa ra i reira te o maira ki roto i te ikianga kia aru ia Iesu?

6. Eaa ra te o maira ki te aru anga ia Iesu?

⁶ E maata atu te o maira ki te riro anga ei au pipi na Karaiti, i to te karanga ua anga ia tatou e e au Kerititiano. Mei tetai rua pirioni tangata i teia tuatau e karanga ra e e Kerititiano ratou, kareka ta ratou au angaanga e rave ra te akaari maira e e “aronga rave tuatua kino” ratou. (E tatau ia Mataio 7:21-23.) Me akaari mai te tangata i te inangaro i roto i te patianga kia aru ia Iesu, ka akamarama atu tatou kia ratou e, e akarotai ana te au Kerititiano mou i to ratou oraanga katoa kia tau ki tana au apiianga e tana akaraanga​—e e rave ana ratou i te reira i te au ra ravarai o to ratou oraanga. Ei akatutu atu i te aiteanga o teia, ka akamanako ana i tetai au mea ta tatou i kite no runga ia Iesu.

Aru i to Iesu Akaraanga no te Tu Pakari

7, 8. (a) Eaa ra te tu pakari, e no teaa ra i maata ai te pakari tei rauka ia Iesu? (e) I akapeea a Iesu i te akaari anga i te tu pakari, e ka akapeea e rauka ai ia tatou te aru iaia?

⁷ Kua akaari mai a Iesu i te au tu takake rava e manganui, inara ka tamou ua tatou ki runga i e a: tona tu pakari, tona tu akaaka, tona tu toto mapu, e tona tu aroa. Te mea mua, ka akamanako ana i tona tu pakari​—tona tu karape i te taangaanga i te kite e te marama na roto i te tu e ka puapingaia. Kua tata te apotetoro ko Paulo e: “Tei vaoo katoatoaia te apinga ra o te pakari e te kite i roto [ia Iesu].” (Kolo. 2:3) Noea mai to Iesu pakari? Kua akakite mai aia uaorai e: “Ko ta taku Metua ra i apii mai iaku ra, ko taku ïa e tuatua nei.” (Ioa. 8:28) Na Iehova i oronga mai i tona tu pakari, no reira kare tatou e poitirere ana i te tu ngaueue kore o ta Iesu au tukuanga tika.

⁸ Ei akaraanga, e tukuanga tika meitaki tikai ta Iesu i rave ei i te iki anga i te arataa no tona oraanga katoa. Kua iki aia kia akangoie ua i tona oraanga, i te tamou ua anga ki runga i te mea okotai ua: te rave anga i to te Atua anoano. Kua akapou aia i tona taime e tona maroiroi i te kimi anga i te Patireia na mua. Ka aru tatou i to Iesu akaraanga na te aruaru anga kia ‘ngoie ua te mata’ kia kore tatou e akateiaaia e te au mea puapinga kore ua te ka akapou i to tatou maroiroi e to tatou manako. (Mata. 6:22, NW) Manganui te au Kerititiano tei apai i te au takainga kia akangoie ua i to ratou oraanga kia maata atu to ratou taime ka pou no te angaanga orometua. Kua rauka i tetai papaki i te piri atu ki roto i te angaanga painia. Me ko koe tetai o ratou, kia akameitaki maataia koe. Na te ‘kimi anga na mua i te basileia o te Atua’ e apai mai i te mataora e te mareka maata.​—Mata. 6:33.

Kia Akaaka Mei ia Iesu Rai

9, 10. I akapeea a Iesu i te akaari anga i tona tu akaaka?

⁹ Te tuanga rua o to Iesu tu ta tatou ka akamanako koia oki ko tona tu akaaka. Me orongaia te taoonga ki te tangata apa ua, te maataanga i te taime ka akatupu ratou i te manako akateitei ia ratou uaorai. E tuke tikai mei ia Iesu! Noatu tona taoonga puapinga tikai i roto i te akatupu anga i to Iehova akakoroanga, kare rava a Iesu e akaari ana i te tu nengonengo. E te akamaroiroiia nei tatou kia aru i tona tu akaaka. Kua tata te apotetoro ko Paulo e: “Kia okotai rai o kotou tu ngakau e to te Mesia ra to Iesu: Ko te tu ïa aia no te Atua, e kare aia i manako e, e apinga āru kia aite katoa aia i te Atua ra: Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu.” (Phili. 2:5-7) Eaa te o maira ki te reira?

¹⁰ Kua mareka tikai a Iesu i te akameitakianga kaka o te noo anga ki mua i te aroaro o tona Metua i te rangi, inara kua “tuku ke atura ra aia i tona uaorai tu” ma te puareinga ua. Kua tukuia mai tona oraanga ki roto i te vairanga tamariki o tetai paretenia ngati Iuda, kia tupu no te iva marama e tae ua atu ki tona anau mai anga ei pepe varevare kare ona kapenga i roto i te ngutuare o tetai tangata kamuta akaaka ua. I roto i te ngutuare o Iosepha, kua tupu marie ua mai a Iesu ei pepe koi akamata ua akera i te aere, ei manga tamaiti ua, e oti i reira ei mapu ou. Kare rava ana ara. E oti akera, i roto i tona oraanga mapu katoa kua kauraro ua rai aia ki tona nga metua ara ua. (Luka 2:51, 52) E tu akaaka umeremere tikai!

11. Na roto i teea au mataara e rauka ai ia tatou i te aru i to Iesu tu akaaka?

¹¹ Te aru ra tatou i to Iesu tu akaaka me ariki puareinga ua tatou i te au tukuanga angaanga tei akara anga akaaka ua. Ei akaraanga, ka akamanako ana i te tukuanga angaanga kia tutu aere i te tuatua meitaki. Penei e akara anga akaaka ua taua tu angaanga ra, me ariu mai tikai te tangata ma te reka kore, ma te taitoito, me kore ma te makitakita. Inara, na te tamou marie ua atu anga i roto i te angaanga tutu aere, te tauturu ra tatou i etai ke kia ariu mai ki ta Iesu patianga kia aru iaia. Te tauturu ra tatou i reira i te akaora mai i te tangata. (E tatau ia 2 Timoteo 4:1-5.) Tetai akaraanga ke mai koia oki te akonokono anga i to tatou Are Uipaanga Patireia. Te kapiti maira te reira i te tari i te tita i roto i te au vairanga, te uki i te taua, e te tama i te au pia orei rima​—e au angaanga akaaka pouroa! Noatu rai, kua kite tatou e ko te akono anga i to tatou Are Uipaanga Patireia​—te ngai no te akamorianga mou i to tatou ngai e noo ra—​e tuanga te reira no ta tatou angaanga tapu. Na te akaoti puareinga ua anga i te au angaanga tei akara anga akaaka ua, te akaari ra tatou i te tu akaaka e te aru ra tatou i reira i te rua tapuae o Karaiti.

Mei ia Iesu, kia Toto Mapu

12, 13. (a) Akapeea a Iesu i te akaari mai anga i te tu toto mapu, e eaa tei akakeu iaia? (e) Eaa te ka akakeu ia tatou kia akaari i te tu toto mapu i roto i te angaanga orometua?

¹² Ka akamanako ana i to Iesu tu toto mapu i roto i te angaanga orometua. E maata ua atu ta Iesu au mea i rave iaia i runga nei i te enua. I te tuatau e mapu ra aia, kare e kore e e angaanga kapiti ana aia e tona metua angai ko Iosepha, ei kamuta. I te tuatau o tana angaanga orometua, kua rave ana a Iesu i te au temeio, tei kapiti mai i te akaora anga i te maki e te akatu akaou mai anga i tei mate. Inara, ko tana angaanga maata tikai koia oki ko te tutu aere anga i te tuatua meitaki e te apii anga i te aronga e inangaro ra i te akarongo mai. (Mata. 4:23) Ei au pipi nana, aiteite rai ta tatou angaanga. Akapeea tatou i te aru anga i tana akaraanga? Ka rave tatou i teia angaanga no te au tumu rai i rave ei a Iesu i te reira.

¹³ Ei runga ravao, na te aroa no te Atua i akakeu ia Iesu kia tutu aere e kia apii atu. Inara kua inangaro katoa rai a Iesu i te au tuatua mou tana i apii atu. Kiaia, ko taua au tuatua mou ra, e au apinga puapinga maata akaperepereia tikai te reira, e kua inangaro maata tikai aia i te akakite atu i te reira ki etai ke. Ei au puapii, mei te reira katoa rai to tatou manako. E akamanako ua ana i tetai au tuatua mou akaperepere ta tatou i apii mei roto mai i te Tuatua a te Atua! Kua kite tatou i te maroanga no runga i te tutaraanga ngateitei a te Atua i te ao e pini ua ake e ka akapeea i te akatika anga i te reira. Kua marama meitaki tatou e eaa ta te au Tuatua Tapu e apii maira no runga i te turanga o tei mate e te au akameitakianga ka rauka i roto i to te Atua ao ou. Noatu koi apii ua akenei tatou i taua au tuatua mou ra me kore kua roa akenei te tuatau, kare rava e ngaro to te reira puapinga. Noatu me e mea taito e me e mea ou, e mea papu rava e, e au apinga puapinga maata akaperepereia tikai taua au tuatua mou ra. (E tatau ia Mataio 13:52.) Na te tutu aere anga ma te ngakau katoa, te akakite atura tatou ki etai ke i to tatou inangaro no ta Iehova i apii mai kia tatou.

14. Ka akapeea tatou i te aru anga i te tu e apii ana a Iesu?

¹⁴ E akara katoa ana e, i akapeea a Iesu i te apii anga. Kua arataki ua rai aia i te aronga e akarongo maira iaia ki roto i te au Tuatua Tapu. E akakite ua ana rai aia i tetai manako puapinga na te karanga anga e: “Kua tataia.” (Mata. 4:4; 21:13) I roto i tana au tuatua i rekotiia, kua taiku tika mai aia me kore kua tou ua mai aia ki te maataanga o te au puka Tuatua Tapu Epera. Mei ia Iesu rai, e taangaanga ua ana tatou i te Pipiria i roto i ta tatou angaanga orometua e e tauta ana tatou i te akaari i te au Tuatua Tapu. Na roto i taua tu ra te tauturu ra tatou i te aronga ngakau tika kia kite no ratou uaorai e te apii ra tatou i to te Atua au manako, eiaa to tatou uaorai. E rekareka maata ana tatou me inangaro tetai tangata i te tatau i te Pipiria e te uriuri i te puapinga o te Tuatua a te Atua e to te reira aiteanga! E me ariki mai taua aronga ra i te patianga kia aru ia Iesu, kare e openga anga o to tatou rekareka.

Aru ia Iesu, te Aiteanga e Aroa atu i Etai Ke

15. Eaa ra tetai tu takake rava o Iesu, e ka akapeea te akamanako anga no runga i te reira i te akakeu anga ia tatou?

¹⁵ Te tuanga openga o to Iesu tu ta tatou ka uriuri e mea pumaana tikai​—tona aroa no te tangata. Kua tata te apotetoro ko Paulo e: “Na te aroa o te Karaiti i akakeu ia tatou.” (2 Kori. 5:14, NW) Me akamanako tatou no runga i to Iesu aroa no te tangata nei e no tatou tataki tai, e pumaana ana to tatou ngakau e e akakeuia ana tatou kia aru i tana akaraanga.

16, 17. Na roto i teea au mataara i akaari ei a Iesu i tona aroa no etai ke?

¹⁶ I akapeea a Iesu i te akaari anga i te aroa no etai ke? Ko tona tu inangaro puareinga ua i te oronga i tona uaorai ora no te tangata nei, te akakiteanga maata rava atu o tona aroa. (Ioa. 15:13) Inara, i te tuatau o tana angaanga orometua, kua akaari katoa a Iesu i te aroa na roto i te au mataara ke atu. Ei akatauanga, e tupu ua ana tona manako aroa no te aronga e taitaia ra. I tona kite anga ia Maria e te aronga i vaitatao iaia e aue ra no tei mate a Lazaro, kua tukia roaia tona ngakau i to ratou mamae. Noatu e ka akatu akaou mai aia ia Lazaro, kua taitaia tikai a Iesu e kua “aue iorā.”​—Ioa. 11:32-35.

¹⁷ I roto i ta Iesu angaanga orometua i muao ana, kua aravei maira tetai tangata repera ia Iesu e kua tuatua maira e: “Kia tika ia koe, e mā au ia koe.” I akapeea ra a Iesu i te ariu atu anga? Te karanga ra te rekoti e: “Aroa akerā Iesu iaia.” I reira kua rave aia i tetai mea umeremere tikai. “Akatika atura i te rima, e akatukia atura iaia, na ko atura, Kua tika ïa iaku; kia mā koe. E tei te pera anga atu aia ra, peke atura te lepera nona i reira ra, mā atura aia.” I raro i te Ture a Mose, kua viivii te aronga repera, e ka rauka ua ia Iesu kia akaora i taua tangata ra ma te kore e amiri atu iaia. Inara, ia Iesu e akaora ra i taua tangata repera ra, kua akatika aia iaia kia kite e mei teaa te tu kia amiriia e tetai tangata, penei e no te taime mua i roto i te au mataiti i aereia mai ana. E tu ngakau aroa tikai!​—Mare. 1:40-42.

18. Ka akapeea tatou i te “aroa katoa anga” atu i etai ke?

¹⁸ Ei au pipi na Karaiti, te akaueia maira tatou kia akaari i to tatou aroa na te “aroa katoa anga” atu i etai ke. (1 Pete. 3:8) Penei e kare e ngoie ua kia marama atu e mei teaa tikai te manako ngakau o tetai taeake irinaki tei rokoia e tetai maki ngata i te rapakau, me kore i te maki manako taitaia​—me kare tikai tatou uaorai i na roto ana i taua turanga ra. Tera ra, kua marama meitaki ua a Iesu i te tu o te maki noatu e kare rava aia uaorai e maki ana. Ka akapeea ra e rauka ai ia tatou i te akatupu i taua tu ra? Na te akarongo mari anga atu me akakite mai te aronga i roto i taua au turanga ra i to ratou manako kia tatou. Kia ui katoa tatou kia tatou uaorai e, ‘Naringa ko au tera, ka akapeea ra au?’ Me marama tikai tatou i te manako ngakau o etai ke, ka rauka i reira ia tatou i te “akapumaana atu i te ngakau taitaia.” (1 Tesa. 5:14) Te aru ra i reira tatou ia Iesu.

19. Na roto i teea au mataara e puapingaia ai tatou e te akaraanga o Iesu?

¹⁹ E apiianga rekareka tikai ta tatou i kite i roto i te au tuatua e te au angaanga a Iesu Karaiti! Te maata atu i ta tatou ka kite no runga iaia, ko te maata atu ia i to tatou inangaro kia aite kiaia​—e ko te maata atu ia i to tatou inangaro kia tauturu atu i etai ke kia akapera. No reira, kia mareka tatou i te aru anga i te Ariki ko te Mesia​—i teianei e mutu kore ua atu!

Ka Rauka Ainei ia Koe i te Akataka?

• Ka akapeea tatou i te akaari anga i te tu pakari mei ta Iesu rai i rave?

• Na roto i teea au mataara e rauka ai ia tatou i te akaari i te tu akaaka?

• Akapeea e rauka ai ia tatou i te akatupu i te tu toto mapu no te angaanga orometua?

• Na roto i teea au mataara e rauka ai ia tatou i te aru ia Iesu i te akaari anga i te aroa no etai ke?

[Pia/​Tutu i te kapi 5]

E PUKA EI TAUTURU IA TATOU KIA ARU IA KARAITI

I te tuatau o te uruoaanga tapere i te mataiti 2007, kua tukuia mai tetai puka ou i roto i te reo Papaa, e 192 kapi, te ingoa o te puka “Come Be My Follower.” Kua akakoroia teia puka ei tauturu i te au Kerititiano kia akamanako tamou no runga ia Iesu, e no runga tikai i tona au tu e tana au angaanga. Muri ake i nga pene akamataanga, te oronga maira te tuanga mua i tetai uriurianga poto no runga i to Iesu au tu umere tikai​—tona tu akaaka, tona tu ngakau toa, tona tu pakari, tona tu kauraro, e tona tu akakoromaki.

Aru mai i teia, ko te au tuanga no runga i ta Iesu au angaanga ei puapii e ei tangata tutu aere i te tuatua meitaki, e no runga i tetai au mataara i akaariia mai ei tona aroa maata. I roto i te puka, kua orongaia mai te au akakiteanga ei tauturu i te Kerititiano kia aru ia Iesu.

Irinaki tikai matou e ka riro teia puka ei akakeu ia tatou katoatoa kia makitoro marie ia tatou uaorai e kia ui e: ‘Te aru tikai ra ainei au ia Iesu? Ka akapeea ra e rauka ai iaku kia aru piri vaitata iaia?’ Ka tauturu katoa te reira i “te aronga i akonoia no te ora mutu kore” kia riro mai ei au pipi na Karaiti.​—Anga. 13:48.

[Tutu i te kapi 4]

Kua ariki a Iesu e kia aere mai aia ki te enua nei e kia anauia mai ei pepe i roto i te kopapa. Eaa ra te tu tei anoanoia no te reira?

[Tutu i te kapi 6]

Eaa te ka akakeu ia tatou kia akaari i te tu toto mapu i roto i te angaanga orometua?