E Akavaitata Atu ki te Atua

“Kua Kimi Aia i Tona Atua ia Iehova”

“MANAKO tikai au e kare oku puapinga,” i karanga ai tetai tangata tei akamutu i te aru i te au turanga a te Atua i utuutuia mai ei aia. I tona akamata anga i te taui i tona oraanga, mataku aia e kare rava te Atua e akakore i tana ara. Inara kua rauka i teia tangata tei tataraara, te manakonakoanga mei te tuatua o Manase i roto i te Pipiria, tei rekotiia i roto ia 2 Paraleipomeno 33:1-17. Me i manako ana koe e kare oou puapinga no taau au ara i te tuatau i topa, penei ka rauka katoa ia koe te pumaana mei te akaraanga o Manase.

I utuutuia a Manase i roto i tetai ngutuare akono Atua. Ko Hezekia tona metua tane, tetai o te au ariki meitaki tikai o Iuda. Kua anauia a Manase mei te toru mataiti i muri ake i te akaroa temeio anga te Atua i te oraanga o tona metua tane. (2 Ariki 20:1-11) Kare e ekoko e kua manako a Hezekia i teia tamaiti e e apinga aroa no te tu aroa o te Atua e kua tauta i te apii pakari iaia kia akaperepere i te akamori ma. Tera ra kare te tamariki a te au metua akono i te Atua e aru ua ana i te akaraanga a to ratou au metua. Te reira tikai te turanga o Manase.

E 12 rai o Manase mataiti i mate ei tona metua tane. Mea taitaia, “kua rave ra [a Manase] i te kino i mua i te aroaro o Iehova.” (Irava 1, 2) Kua aru ainei teia ariki tamariki ua i te akakeuanga a te aronga ako, kare e akangateitei no te akamori mou? Kare te Pipiria i akakite mai. Kua akakite mai ra te reira kia tatou e kua rave a Manase i te akamori itoro viivii e te kino. Kua akatu aia i te au atarau no te au atua pikikaa, oronga i tana uaorai tamariki ei atinga, rave i te angaanga purepure, e te tuku i te au itoro akatikitikiia ki roto i te iero o Iehova i Ierusalema. Kua patoi a Manase marokiakia i te au akamatakiteanga putuputu a Iehova, te Atua tei akatupu i tona anau anga temeio.​—Irava 3-10.

Te openga, kua tapekaia a Manase i te tuku anga a Iehova kia apaiia aia ki Babulonia. Iaia e noo tuitarere ra i reira, kua rauka ia Manase te atianga i te akamanako i tona arataa. Kua kite ainei aia i teianei e kare e rauka i tona au itoro kare e mana e te puapinga kore ua i te paruru iaia? Kua akamanako ainei aia i te au apinga ta tona metua tane akono Atua i apii kiaia i tona tamariki anga? Noatu e eaa te tu, kua taui te ngakau o Manase. Kua karanga te rekoti e: “Kua kimi aia i tona Atua ia Iehova ra, e kua taakaaka rava iaia uaorai . . . e kua pure oki aia iaia.”a (Irava 12, 13) Inara ka rauka ainei i tetai tangata tei rave i taua au ara kino ra kia akakore tikaiia mai e te Atua?

Kua mareka a Iehova i te tu tataraara ngakau tae o Manase. Kua akarongo te Atua i tana pati akatenga kia akaaroa mai “e kua akaoki mai aia iaia ki Ierusalema ki tona uaorai basileia.” (Irava 13) Ei akapapu i tona tu tataraara, kua rave a Manase i tei rauka iaia i te akatikatika i tona au tarevake, te akaatea i te au itoro mei tona patireia e te raurau i tona iti tangata kia ‘akamori ia Iehova.’—Irava 15-17.

Me manako koe e kare koe e tau kia akakore mai te Atua i taau ara i topa ki muri, akamanako oonu i te akaraanga o Manase. E tuanga teia tataanga no te Tuatua akauruia a te Atua. (Roma 15:4) Taka ua e, ka inangaro a Iehova ia tatou kia kite e ka “tika [iaia] i te akakore mai i te ara.” (Salamo 86:5) Kare e ko te ara mari ra ko te turanga o te ngakau o te tangata ara te mea puapinga kiaia. Ko te tangata ara e pure ra ma te ngakau tataraara, tei akaruke i tona arataa tarevake, e te tauta pakari ra i te rave i te mea tika ‘kia kimi aia i tona Atua ia Iehova,’ mei ta Manase rai i rave.—Isaia 1:18; 55:6, 7.

[Tataanga i Raro Ake]