Akakite Anga i te Tuanga Reo Papaa Mama Ua
TE REKAREKA nei matou i te akakite e no tetai mataiti okotai, ka nenei kapiti matou i te tuanga reo Papaa mama ua i te au marama tataki tai, akamata ki teia itiu o te tuanga apii o Te Punanga Tiaki. Tei roto i reira te au atikara apii, e me ka va tetai ngai, ka ikiia tetai au atikara ke mai. Irinaki nei matou e ka akatupu teia i te anoano pae vaerua o te manganui o te Au Kite o Iehova. Eaa te tumu?
Ko te reo Papaa te reo matauia i te tuatua e to tatou au taeake i te au enua mei ia Kana, Kenia, Naiteria, Papua Nu Kini, Riperia, Toromona Airani, e Viti. Noatu e tuatua ana to tatou au taeake i teia au enua nei i tetai atu reo ke, e taangaanga ana ratou i te reo Papaa i te au ra ravarai me komunikeiti i ko i te au uipaanga putuputuanga e i roto i te angaanga orometua. Inara, e mama ake ta ratou reo Papaa e taangaanga ana i ta tatou e taangaanga ana i roto i ta tatou au puka. Pera katoa, kua neke tetai au iti tangata o Iehova ki te au enua ka anoanoia ratou kia taangaanga i te reo Papaa me komunikeiti, noatu kua kotingaia to ratou kite i te reo Papaa. Pera katoa, kare ratou e rauka i te aere ki te au uipaanga putuputuanga e raveia ra i roto i to ratou uaorai reo metua.
Te au atikara ta tatou e apii ana i te au epetoma i ko i te Apii Punanga Tiaki, ko te ravenga maata ia i te oronga maata mai kia tatou i te kai pae vaerua i te tuatau tau. No reira, ei tauturu i te katoatoa tei tae mai kia puapinga maataia mei teia apii, kare te au tuatua i roto i te reo papaa mama ua e pakari ana, e e mama ua te karama e te aerenga tuatua. Tuke rai te kapi mua o teia tuanga ou. Aiteite ua te au parakarapa, au uianga, au tutu, e te au uianga akamanako akaou i roto i te nga makatini. E ka rauka i te katoatoa i te iki e ko teea makatini tana ka apii e ka taangaanga no te Apii Punanga Tiaki. Ei akaari i te tuke o te tuatua i roto i nga makatini, akara i te akaraanga i raro mai i te parakarapa 2 o te atikara apii mua i roto i teia itiu.
Te irinaki nei matou e ka riro teia makatini ou ei pau i te au pure a te manganui tei akakite kia Iehova e: “E apii mai koe iaku kia kite au i taau ra au akauenga.” (Sala. 119:73) Papu ia matou e ko te aronga kare e marama roa ana i te reo Papaa, e tetai au tamariki mapu e tuatua ana i te reo Papaa, ka rauka i te akapapa meitaki no te Apii Punanga Tiaki i te au epetoma tataki tai. Te akameitaki nei matou ia Iehova, no tona ‘aroa i te au taeake,’ te taangaanga nei aia i te “tavini akono meitaki e te pakari” kia oronga maata mai i te kai pae vaerua.—1 Pete. 2:17; Mata. 24:45.
Pupu Akaaere o te Au Kite o Iehova