Me Ekoko Taau Tamaiti i Toou Irinakianga

IRINAKI papu tikai koe e te apii ra taau akonoanga i te tika no runga i te Atua. Te irinaki ra koe e te akamaroiroi maira te Pipiria i te mataara meitaki roa atu o te oraanga. No reira, e mea natura ua noou kia apii pakari i taau au kaveinga ki taau tamaiti. (Deuteronomi 6:6, 7) Akapeea ra me pakari mai aia, e kare taau tamaiti e inangaro i te au mea pae vaerua? Akapeea me akamata aia i te ekoko i te irinakianga tana i ariki ana i tona meangiti anga?​—Galatia 5:7.

Me te tupu ra te reira, auraka e karanga e kua puapinga kore koe ei metua Kerititiano. Penei te o maira tetai au tumu ke mei ta tatou ka kite mai. Inara, kia kite e: Ko te mataara ka akono koe i te au uianga a taau tamaiti, na te reira e akataka mai e me ka akavaitata atu aia ki toou irinakianga, e me ka akamamao ke roa atu iaia mei te reira. Me ka maro ua atu koe i taau tamaiti no runga i teia manako, ka ngata roa atu te manamanata​—e kare koe e puapingaia.​—Kolosa 3:21.

E meitaki atu i te aru i te akoanga a te apotetoro ko Paulo. Kua tata aia e: “Kare oki te tavini o te Atu nei e tika kia māro; kia maru ra aia i te tangata katoa nei, e te tau oki kia apii ia etai ke, e te akakoromaki marie.” (2 Timoteo 2:24) Akapeea koe me akaari e ‘te tau ra koe kia apii ia etai ke’ me ekoko taau tamaiti i toou irinakianga?

Kia Rauka i te Kite

Mea mua, tauta kia kite e eaa te au tumu i manako akapera ei taau tamaiti. Ei akaraanga:

• Maromaroa ainei aia e kare ona oa i roto i te putuputuanga Kerititiano? “No toku inangaro oa, kua piri atu au ki tetai au oa apii, e kua arai te reira i toku turanga pae vaerua no tetai au mataiti. No toku kapitianga kino, kua kore toku inangaro i te au mea pae vaerua, e teianei tataraapa tikai au.”​—Lenore, 19.

• Te ekoko ra ainei aia e penei no reira i ngata ei iaia i te tuatua no runga i tona irinakianga? “Iaku i te apii, emiemi au i te akakite i toku irinakianga ki toku au oa apii. Kua mataku au e ka karanga ratou e e tuke ua ake rai au, me kore ‘e orometua.’ Te au tamariki tuke akerai e kopaeia ana, e kare au e inangaro ana kia akaperaia mai au.”​—Ramón, 23.

• Te apiapi ra ainei aia e e maata roa te apainga no te turanga Kerititiano? “Mei te mea rai kiaku e tei runga roa te taputou o te Pipiria no te oraanga mutu kore i tetai ara kakenga, e kare au i akamata ake; tei te mamao ke rai au. Pakari tikai toku mataku i te kake na runga i te ara kakenga, inangaro au i te akakore i toku irinakianga.”​—Renee, 16.

Tuatua Kia Ratou

Eaa tikai te manamanata maata e aro atura taau tamaiti? Te mataara meitaki kia kite, e ui kiaia! Matakite ra, eiaa ta korua pukapuka anga kia riro ei taumaro anga. Mari ra, aru i te akoanga a Iakobo 1:19 e: ‘Kia rapurapu i te akarongo, kia tavarevare i te tuatua, kia tavarevare oki i te riri.’ Kia rauka te akakoromaki iaia. Taangaanga i te “akakoromaki maata e te apii marie anga atu,” mei taau e akapera ana ki tetai ke kare i te pamiri noou.​—2 Timoteo 4:2.

Ei akaraanga, me kare taau tamaiti e inangaro ana i te aere ki te au uipaanga Kerititiano, tamata i te kimi e me e apinga ke atu tetai e manamanata ra aia. Inara e rave ma te akakoromaki. Kua puapinga kore te metua i roto i te turanga e aru maira.

Tamaiti: Kare au e reka ana i te aere akaou ki te au uipaanga.

Metua Tane: [tu riri] Te akapeea mai nei koe, e kare koe e inangaro i te aere?

Tamaiti: E maromaroa oki, tira rai!

Metua Tane: Ko toou manako tena i te Atua? Maromaroa koe iaia? Ae, mei tera ua ra! I, noatu kare koe e inangaro, ka aru mai rai koe!

Umuumu maira te Atua i te au metua kia apii i ta ratou tamariki no runga iaia e kia akarongo te tamariki ki to ratou au metua. (Ephesia 6:1) Inara, ka inangaro koe i taau tamaiti kia inangaro tikai i te aru i taau akamorianga e kia kore e emiemi i te aru ia koe ki te au uipaanga Kerititiano. Me ka rauka, ka inangaro koe kia tae tikai tona ngakau i te aru ia koe.

Ka rauka te reira me kite koe e eaa tikai tona au manamanata maata i manako akapera ei aia. I te akamanako anga i te reira, akara e penei e mataara meitaki atu tetai i te rave anga i te uriuri anga tei raveia i runga akenei.

Tamaiti: Kare au e reka ana i te aere akaou ki te au uipaanga.

Metua Tane: [tu maru] Eaa koe i manako akapera ei?

Tamaiti: E maromaroa oki, tira rai!

Metua Tane: Ka maromaroa rai me noo koe e tai me kore e rua ora. Eaa te akaaoanga maata taau e kite ra no runga i te reira?

Tamaiti: Kare au i kite. Tera ua, inangaro au te aere i tetai ngai ke.

Metua Tane: Ko tena ainei te manako o toou au oa?

Tamaiti: Ae ko teia ua toku manamanata! Kare oku au oa akaou. Te aere anga toku oa piri tikai, kare aku tangata ei tuatua atu! Te mataora ua nei te katoatoa. Ko au ra, kare au e mataora ana!

Na te toto mai anga i te manako o te tamaiti, kua rauka i te metua tane i te kite e eaa tikai te manamanata​—i roto i teia turanga, e maromaroa​—e te akatupu katoa i te irinaki, e te oronga anga i tetai tuatau kia pukapuka akaou raua.​—Tatau i te pia i raro mai “Kia Akakoromaki!”

Te taime tei aereia, maata te au mapu i kite mai e me autu ratou i te au manamanata e arai ra i to ratou tupu anga pae vaerua, ka mataora roa atu ratou ia ratou uaorai e to ratou akarongo. Akamanako ana i te mapu ko Ramón tei taikuia i mua ake, kua emiemi aia i te akakite i te apii e e Kerititiano aia. I te openga, kua kite mai a Ramón e kare e kino ana i te tuatua no runga i tona akarongo mei tana i manako​—noatu ka aviriia mai aia. Kua akakite mai aia e:

“Tetai atianga kua aviri mai tetai tamaiti iaku i te apii no taku akonoanga. Kua ru tikai au te manako anga e te akarongo maira te pupu katoa kia maua. No reira kua taui au i te pukapuka anga e kua ui atu kiaia no runga i tona irinakianga. Poitirere tikai au e, e ru atu aia iaku! I reira, kite mai au e, e irinakianga akonoanga to te maataanga ia ratou, kare ra ratou e marama ana i te reira. Ko au ra ka rauka iaku i te akamarama atu i toku irinakianga. Tikaanga tikai, ko toku pupu apii te ka akama, kare ko au!”

Tu “Kite i te Akamanako” o Taau Tamaiti

Kua kite te au metua e te aronga kite karape e e tuke maata te manako o te tamariki rikiriki ki te manako o te tamariki mapu. (1 Korinetia 13:11) Ka akakite tika ua mai te tamariki rikiriki i to ratou manako, te tamariki mapu ra, ka inangaro roa ratou kia kite e eaa te tumu no tetai au mea. Ei akaraanga, ka rauka i te apii atu i te tamaiti meangiti e na te Atua i anga i te au mea pouroa. (Genese 1:1) Inara, ka kimi manako roa te mapu no runga i te au uianga mei te: ‘Akapeea au e kite ei e Atua tetai? Eaa ra tetai Atua aroa ka akatika ua ai i te kino? Eaa toou kite e, mei tupua roa mai te Atua?’​—Salamo 90:2.

Penei ka manako koe e te riro ra teia au uianga ei akaparuparu akaou i te akarongo o taau tamaiti. Te tikaanga ra, penei e te tupu ra tona turanga. No te mea, e tuanga puapinga te ui uianga no te tupuanga pae vaerua o tetai Kerititiano.​—Angaanga 17:2, 3.

Pera katoa, te apii ra taau tamaiti kia “kite i te akamanako.” (Roma 12:1, 2, NW) Te ka tupu mai, ka marama aia i “te tipoto, e te tiroa, e te oonu, e te teitei” o te akarongo Kerititiano, na roto i te tu e kare i rauka iaia i tona tamarikianga. (Ephesia 3:18) E tei maata atu, ko teia te tuatau i te tauturu i taau tamaiti kia marama i tona irinakianga, kia ngaueue kore tona akarongo.​—Maseli 14:15; Angaanga 17:11.

“Akakeuia Kia Irinaki”

Te tuatua ra te Pipiria no runga i te tamaiti mapu ko Timoteo tei kite i te au tataanga tapu ‘mei tona tamariki anga mai.’ Inara, kua akamaroiroi te apotetoro ko Paulo ia Timoteo e: “E tamou ua i te au mea taau i apii e tei akakeuia kia irinaki.” (2 Timoteo 3:14, 15) Mei ia Timoteo rai, penei kua apiiia ana taau tamaiti i te au turanga Pipiria mei tona anau mai anga. Inara, i teianei, ka umuumuia koe kia akakeu iaia kia akatupu i tona uaorai irinakianga.

Te akakite maira te puka Questions Young People Ask—Answers That Work, Volume 1 e: “Me te noo ra taau tamaiti i toou kainga, e tikaanga toou kia tapapa atu iaia kia aru i te akanoonooanga no te akamorianga ngutuare. Inara ko toou akakoroanga, kia akatupu i te aroa no te Atua ki roto i tona ngakau​—kare kia aru patete ua mai aia.” Na te akamanakoanga i taua akakoroanga ra, ka rauka ia koe i te tauturu i taau tamaiti kia kore tona ‘akarongo e turori,’ kia riro ra ei arataa nona uaorai kia aru i te oraanga—​kare noou ua.b​—1 Petero 5:9.