Au Tumatetenga Natura​—E Akapapuanga Ainei te Reira e e Kino te Atua?

TAAU KA RONGO: “Ko te Atua te tutara o teianei ao, no reira nana rai e akatupu nei i te au tumatetenga natura e e kino rai aia.”

TA TE PIPIRIA E AKAKITE RA: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Koai ra taua “vaerua kino ra”? Te akakite maira te Pipiria e ko Satani. (Mataio 13:19; Mareko 4:15) E tika ainei tera? E akamanako ana ra i teia: Me e mana to Satani i rungao i teianei ao, nana i reira e akakeu nei i te tangata kia aite mei iaia rai i te kore e kea atu i etai ke, te noinoi, e te kamakura. Kare ainei tera e tauturu ra i te akamarama mai i te tumu i kore ei i rauka i te tangata i te akaaere i to ratou uaorai oraanga i te enua nei? Maata te aronga kite tei akamatakite mai e te riro nei te akatereanga kino a te tangata i te enua, ei akatupu i te au tumatetenga natura, me kore i te takino roa atu i te reira e i te akaareare pu ua i te taiate tangata ki te reira.

Eaa ra i reira te Atua i akatika ai kia maata atu to Satani mana? Ka kite tatou i te pauanga me oki tatou ki te kapuaanga mai o te tangata, i te patoi anga to tatou nga metua mua i te Atua ei tutara no raua. Mei tera taime mai, te aru nei rai te maataanga i taua arataa ra. Taua ikianga ra​—te patoi anga i te tutara a te Atua—​na tera i tuku i te tangata o teia ao ki roto i te rima o te enemi o te Atua, ko Satani. No reira a Iesu i kapiki ei ia Satani e ko “te ariki o teianei ao.” (Ioane 14:30) Ka tutara ua atu ainei a Satani e mutu kore ua atu? Kare!

Te kea maira a Iehovaa i te turanga taitaia ta Satani i akatupu. Ko te tika, te tumatetenga maira aia i te turanga taitaia o te tangata. Ei akaraanga, no runga i te au tuatau ngata tei na roto mai te iti tangata o Iseraela, te akakite ra te Pipiria no runga i te Atua e: “Kua akono maira aia i to ratou tumatetenga, kia kite aia i to [ta] ratou kapiki.” (Salamo 106:44) No tona tangi, kua akapapu te Atua e kare e roa atu ka takore takiri aia i ta Satani tutaraanga! Kua akamana aia i tana Tamaiti, ia Iesu Karaiti, kia riro ei Ariki meitaki e te tuatua tika e tuatau ua atu.

PEEA KOE TE O ATU ANGA: Noatu kua puapinga kore ta Satani tutaraanga i te paruru i te tangata mei te au tumatetenga natura, ka autu ra ta Iesu tutaraanga. Kua rauka ia Iesu i te paruru i tana au pipi i roto i tetai uriia. Karanga te Pipiria e: “Kauvae atura [aia] i te matangi, e na ko atura ki te kare, Kua oti ana, kia aki. Torue atura te matangi, marino rava atura.” E kua na ko akera te au pipi e: “Eaa ua te tu o teianei tangata, i akarongo ei te matangi e te kare iaia!” (Mareko 4:37-41) Rauka to tatou irinakianga e ka paruru rai a Iesu i te au tangata akarongo pouroa i te tuatau o tana tutaraanga ei Ariki.​—Daniela 7:13, 14.