TUMU MANAKO I TE KAPI MUA | KIA MATAORA I TE ANGAANGA PAKARI
Te Angaanga Pakari—E Puapinga Ainei?
Kua pupui a Alex i tona aʼo iaia e tuku ra i tetai pia ki roto i te toroka o tana ngai angaanga. ‘Eaa ra au i piritia ai ki teia angaanga puapinga kore?’ i ui ei aia kiaia uaorai. ‘Aea e rauka ai tetai angaanga meitaki naku? Naringa kare au e anoanoia kia angaanga, ka meitaki roa atu toku oraanga!’
Mei ia Alex rai i roto i teia akatutuanga, manganui te tangata kare e reka ana i te angaanga pakari. “Maata te tangata e manako ra e kare ratou e anoanoia kia angaanga,” i karanga ai tetai tangata maani motoka ko Aaron. “Te akaari nei ratou i teia tu: ‘Ka rave ua au i teia kia tae roa mai tetai atianga meitaki atu noku.’”
No teaa ra te manganui o te tangata i kore ei i inangaro i te angaanga pakari? Penei kua akakeuia ratou e te au teata e te nuti tei akatutu mai i te oraanga “meitaki” ei mea apinganui e te māmā ua. “Manako te tangata e me angaanga pakari koe i te akono ia koe uaorai, kare koe e puapingaia ana,” i karanga ai a Matthew, tetai tangata ripea are. Kua kite katoa tetai tangata tāmā are ko Shane i taua tu ra. Karanga aia e: “Kare tetai aronga e inangaro akaou ana kia angaanga pakari no ta ratou tutaki.”
Inara i tetai tua, e maata te aronga apinganui tei reka i te angaanga pakari. “I toku manako, e tutaki meitaki te ka rauka no te angaanga pakari, e me rauka tikai iaku i te itae i te au akakoroanga tau meitaki,” i karanga ai tetai tangata patu are ko Daniel, e 25 ona mataiti. Ko Andre, e 23 ona mataiti, kua āriki katoa aia i te reira. Karanga aia e: “Irinaki au e te kapitiia ra te tu mataora e te merengo ki te angaanga. Me iti te angaanga, ka akatupu i te tu kōpē!”
Akapeea te aronga mei ia Daniel raua ko Andre i rauka ai i te akatupu i te manako papu no runga i te angaanga pakari? Te pauanga, kua aru ratou i te au kaveinga Pipiria. Kare te Pipiria e akakore ana i te angaanga pakari, inara te akamaroiroi maira kia rave maroiroi i te angaanga e kia akakoromaki i te reira. Te akakite maira te Pipiria kia tatou kia maroiroi i te angaanga. Pera katoa, tei puapinga maata atu, te akaari maira te reira e akapeea tatou e mataora ai i te angaanga.
Ko teaa te au kaveinga Pipiria te ka tauturu ia koe kia mataora i taau angaanga? Te pati nei matou ia koe kia akara i te pauanga i roto i te atikara ka aru mai.