PAUIA TE AU UIANGA PIPIRIA
Ka rauka ainei tetai kavamani i te tutara ki rungao i teianei ao?
Akapeea tetai kavamani o teianei ao i te taokotai anga i te iti tangata pouroa o te pa enua ravarai? Isaia 32:1, 17; 54:13
Akamanako ana i tetai kavamani no teianei ao te ka akameitaki i te turanga o te tangata. I teia tuatau, te mamae nei te tangata no te turanga putaua e e apinganui tetai pae. Tera ra, ka rauka i tetai kavamani meitaki i te oronga i te au mea ravarai te ka anoanoia e te tangata pouroa. Toou manako, ka rauka ainei te tangata i te akanoo i tetai kavamani mei teia te tu?—E tatau ia Ieremia 10:23.
I roto i te tuatua enua, kare roa i rauka ana i te au kavamani i te akono i to ratou iti tangata, te aronga putaua tikai. E kino pakari tikai tetai au kavamani. (Koheleta 4:1; 8:9) Inara te taputou maira te Atua Mana Katoatoa e ka akanoo aia i tetai kavamani te ka komono i te au kavamani pouroa. Ka akono meitaki tikai te Tutara o teia kavamani i te tangata.—E tatau ia Isaia 11:4; Daniela 2:44.
Eaa ta te Patireia o te Atua ka akatupu?
Kua iki te Atua ko Iehova i te Tutara tau meitaki no teianei ao—ko tana Tamaiti, ko Iesu. (Luka 1:31-33) Iaia i runga nei i te enua, kua inangaro tikai a Iesu i te tauturu i te tangata. Ei Ariki, ka taokotai aia i te au tangata o te pa enua ravarai e ka akakore i to ratou tumatetenga.—E tatau ia Salamo 72:8, 12-14.
Ka āriki ainei te katoatoa ia Iesu ei Tutara? Kare. Inara e tu akakoromaki to Iehova. (2 Petero 3:9) Te oronga nei aia i tetai tuatau no te tangata kia āriki ia Iesu ei Tutara. Kare e roa atu, ka takore a Iesu i te au tangata kino pouroa i te enua nei, e ka akatupu i te au e te tinamou no te ao katoa.—E tatau ia Mika 4:3, 4.