PAUIA TE AU UIANGA PIPIRIA

Eaa te Rā Akavaanga?

I te tuatau Pipiria, kua akaora te Atua i tona iti tangata mei te au turanga tika kore na roto i te au akava. (Te au Akava 2:18) Te akataka maira te Pipiria i te Rā Akavaanga e tu mai nei ei tuatau mataora me akaora mai a Iehova, te Akava Nui o te enua katoa, i te tangata mei te turanga tika kore.​—E tatau ia Salamo 96:12, 13; Isaia 26:9.

Kua iki te Atua ia Iesu kia akava i te aronga e ora nei e tei mate. (Angaanga 10:42; 17:31) E manganui te tangata tei mate kare i kite i te Atua. I te tuatau o te Rā Akavaanga, ka akatu akaou mai a Iesu i teia aronga kia rauka ia ratou i te kite e te inangaro i te Atua mou.​—E tatau ia Angaanga 24:15.

Eaa ra te Rā Akavaanga ka pou ei e tauatini mataiti?

Ka akatuia mai te aronga mate i te tuatau o te tauatini mataiti. (Apokalupo 20:4, 12) Ka anoanoia tetai tuatau no ratou kia apii i to te Atua au aerenga e te akarongo kiaia. Te akaari maira te Pipiria e ka akavaia te tangata kia tau ki ta ratou i rave i muri ake i to ratou tuakaouanga, kare i mua ake mei ta te maataanga i manako.​—E tatau ia Roma 6:7.

Kua akataka katoa mai te Pipiria i tetai rā akavaanga te ka tupu poitirere ua i mua ake ka akamata ai te tauatini mataiti. Kua kapikiia taua rā ra e ko te openga, mei tei uriuriia i roto i te au atikara mua o teia makatini. I taua rā ra, ka takore te Atua i te aronga kino pouroa e tei akono kore i te Atua. (2 Petero 3:7) No reira, kia matakite tatou i te akapapu i to tatou inangaro i te Atua.​—E tatau ia 2 Petero 3:9, 13