PAUIA TE AU UIANGA PIPIRIA

No teaa ra i tataia ai te au totou i roto i te Pipiria?

E manganui te au totou taka meitaki i roto i te Pipiria. Kare e rauka i tetai tangata i te totou mai i te tuatau ki mua ma te taka meitaki. No reira, te oronga maira te akatupu anga o te au totou Pipiria i te tumu anga papu e e Tuatua na te Atua te Pipiria.​—E tatau ia Iosua 23:14; 2 Petero 1:20, 21.

Te riro ra te au totou Pipiria tei akatupuia ei akapapu i to tatou akarongo ki roto i te Atua. (Ebera 11:1) Te akapapu katoa maira e ka riro te au taputou a te Atua no te tuatau ki mua ei mea tika. No reira, te riro ra te totou Pipiria ei manakonakoanga papu no tatou.​—E tatau ia Salamo 37:29; Roma 15:4.

Akapeea te au totou Pipiria i te tauturu anga ia tatou?

Te akamatakite maira tetai au totou i te au tavini o te Atua kia matakite. Ei akaraanga, te kite anga te au Kerititiano o te anere mataiti mua i tetai au totou i te akatupu angaia, kua akaruke ratou ia Ierusalema. I muri mai, te takore angaia taua oire ra no tei kopae te maata anga o te tangata ia Iesu, kua mamao ke ana te au Kerititiano i te ngai paruruia.​—E tatau ia Luka 21:20-22.

I teia tuatau, te akaari maira te au totou akatupuia e kare e roa atu ana ka takore te Patireia o te Atua i te au patireia e te au kavamani tangata. (Daniela 2:44; Luka 21:31) No reira e mea rapurapu kia matakite te tangata tataki tai i teianei kia rauka te mareka anga a te Ariki, ko Iesu Karaiti, tei akataoongaia e te Atua.​—E tatau ia Luka 21:34-36.