Te Akaaite Anga Puapinga Rava Atu Taau ka Rave

KO KOE ainei tetai Kerititiano? Me koia ia, ko koe tetai o te rua pirioni tuma tangata i te enua nei—vaitata rai e tai i roto i te toru tangata—tei karanga e e au pipi ratou na Iesu. I teia tuatau, e tauatini ua atu akonoanga tei karanga e e au Kerititiano ratou, inara kua tupu te ke i rotopu ia ratou no te au apiianga e te au manako tukeke. No reira, penei e tuke rai taau irinakianga ki te au irinakianga a te au Kerititiano. E puapinga ainei taau e irinaki ra? Ae,—me inangaro koe i te aru i te akonoanga Kerititiano tei apiiia i roto i te Pipiria.

Kua kapikiia te au pipi mua a Iesu Karaiti e au “Kerisitiano.” (Angaanga 11:26) Kare e anoanoia tetai ingoa ke no te akataka ia ratou, no te mea okotai rai akarongo Kerititiano i akamataia. Kua aru taokotai te au Kerititiano i te au apiianga e te au ikuiku anga a Tei Akamou i te Akonoanga Kerititiano, koia a Iesu Mesia. Akapeea taau akonoanga? Te irinaki ra ainei koe e te apii ra te reira i ta Iesu i apii e tei irinakiia e ta Karaiti au pipi mua? Akapeea koe e papu ei? Okotai rai ravenga—kia taangaanga i te Pipiria ei vaito.

Akamanako ana i teia: Kua akangateitei a Iesu Mesia i te au Tuatua Tapu ei Tuatua na te Atua. Kare aia i āriki ana i te aronga tei akaiti i te puapinga o te au apiianga Pipiria na te akariro anga i te au peu a te tangata ei mea mua. (Mareko 7:9-13) No reira e mea tau kia irinaki e ka akatumu te au pipi mou a Iesu i to ratou irinakianga ki runga i te Pipiria. E mea meitaki kia ui tetai Kerititiano kiaia uaorai: ‘Te tano ra ainei te apiianga a taku akonoanga ki te Pipiria?’ Ei pau i teia uianga, e mea tau kia akaaite i tei apiiia e taau akonoanga ki ta te Pipiria e tuatua tikai ra.

Karanga a Iesu e kia akatumuia ta tatou akamori anga i te Atua ki runga i te tuatua mou—te tuatua mou i roto i te Pipiria. (Ioane 4:24; 17:17) Karanga katoa te apotetoro ko Paulo e ka rauka te ora me “kite i te tuatua-mou.” (1 Timoteo 2:4) No reira e mea puapinga kia akatumuia to tatou au irinakianga ki runga i te tuatua mou o te Pipiria. Ae, ka anoanoia teia e ora ai tatou!

AKAAITE I TOOU IRINAKIANGA KI TE PIPIRIA

Te pati nei matou ia koe kia tatau i te au uianga e ono i raro mai e kia akara i te pauanga a te Pipiria ki teia au uianga. E tatau i te au irava tei taikuia mai, e kia akamanako oonu i te au pauanga. E oti ui kia koe uaorai, ‘Akapeea te au apiianga a taku akonoanga me akaaiteia ki ta te Pipiria e akakite maira?’

Ka riro teia au uianga e te pauanga ei tauturu ia koe kia rave i tetai akaaiteanga puapinga rava atu. Ka puareinga ainei koe i te akaaite i te au apiianga a taau akonoanga ki ta te Pipiria e akakite ra? Ka mataora te Au Kite o Iehova i te tauturu ia koe kia akara oonu atu i te au tuatua mou Pipiria. E pati ki te Au Kite o Iehova no tetai apii Pipiria kare e tutaki. Me kore ra e aere ki runga i ta matou website, jw.org.

1 UIANGA: Koai te Atua?

PAUANGA: Ko Iehova te Metua o Iesu, koia te Atua mutu kore e te mana katoatoa Tei Anga mai i te au mea ravarai.

AKAKITE RA TE PIPIRIA:

“Te akameitaki nei oki matou i te Atua, i te Metua o to tatou Atu ra o Iesu Mesia, e kare e tivata i te pure ia kotou.”—Kolosa 1:3.

“E tau te kakā ia koe, e te Atu, e te akangateitei, e te mana: naau oki i anga i te au mea ravarai nei.”—Apokalupo 4:11.

Akara katoa ia Roma 10:13; 1 Timoteo 1:17.

2 UIANGA: Koai a Iesu Mesia?

PAUANGA: Ko Iesu te Tama mua a te Atua. Kua angaia a Iesu, e no reira e akamata anga tona. Kauraro a Iesu ki te Atua e te akono i Tona anoano.

AKAKITE RA TE PIPIRIA:

“E maata oki toku Metua iaku.”—Ioane 14:28.

“Ko te tu tikai [a Iesu] o te Atua akara koreia, ko te Tama mua aia o te au mea ravarai i angaia ra.”—Kolosa 1:15.

Akara katoa ia Mataio 26:39; 1 Korinetia 15:28.

3 UIANGA: Eaa te vaerua tapu?

PAUANGA: Te vaerua tapu e mana angaanga no te Atua ei akatupu i tona anoano. Kare te reira i te tangata. Ka akakiia te tangata ki te vaerua tapu e ka akamaroiroiia.

AKAKITE RA TE PIPIRIA:

“Tei te akarongo anga atu a Elisabeta i to Maria aroa anga mai, kua rere iora te tamaiti i roto i tona kopu: ki akerā Elisabeta i te Vaerua Tapu.”—Luka 1:41.

“Ka rauka ra to kotou mana i te Vaerua Tapu, kia aere mai aia i rungao ia kotou.”—Angaanga 1:8.

Akara katoa ia Genese 1:2; Angaanga 2:1-4; 10:38.

4 UIANGA: Eaa te Patireia o te Atua?

PAUANGA: Te Patireia o te Atua e kavamani i runga i te rangi. Ko Iesu te Ariki o te Patireia o te Atua. Kare e roa atu ana ka akatupu te Patireia i to te Atua anoano i te enua nei.

AKAKITE RA TE PIPIRIA:

“Kua akatangi maira te tokoitu o te angela; e e au reo mamaata atura tei runga i te rangi, i te na ko anga e, Ko te au basileia o teianei ao, kua riro ïa ei au basileia no to tatou Atu e no tana Mesia; e e vai rai te au iaia e tuatau e tuatau ua atu.”—Apokalupo 11:15.

Akara katoa ia Daniela 2:44; Mataio 6:9, 10.

5 UIANGA: Ka aere ainei te aronga meitaki pouroa ki te rangi?

PAUANGA: Kare. E pupu meangiti ua no te au tangata tiratiratu tei kapikiia e ko te “anana iti,” kua ikiia ratou e te Atua kia aere ki te rangi. Ka tutara kapiti ratou ma Iesu ei ui ariki i rungao i te tangata.

AKAKITE RA TE PIPIRIA:

“Auraka e mataku, e taku anana iti; e mea anoano na to kotou Metua, i te oronga mai i te basileia no kotou.”—Luka 12:32.

“E riro ra ratou ei taunga na te Atua, e na te Mesia, e e au to ratou iaia.”—Apokalupo 20:6.

Akara katoa ia Apokalupo 14:1, 3.

6 UIANGA: Eaa to te Atua akakoroanga no te enua nei e te tangata?

PAUANGA: Raro ake i te Patireia o te Atua, ka riro mai te enua ei parataito e ka rekareka te aronga tiratiratu i te oraanga kopapa apa kore, ka noo tinamou ma te au, e ka ora e tuatau ua atu.

AKAKITE RA TE PIPIRIA:

“Kareka te aronga maru ra, ka noo ïa i te enua, e ka rekareka ratou i te maata o te au.”—Salamo 37:10, 11.

“E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:3, 4.

Akara katoa ia Salamo 37:29; 2 Petero 3:13.