TUMU MANAKO I TE KAPI MUA | AKAPEEA E PUAPINGA AI ME TATAU I TE PIPIRIA

Akapeea me Akareka i te Tatau Pipiria?

E popoa ainei? Me e oraora? Mei teaa te tu o taau tatau anga Pipiria? Tei runga ua i toou tu akapeea te rave i taau tatau. Ka akara ana tatou i taau ka rave kia akamaata atu i toou rekareka e te inangaro.

E iki i tetai urianga irinakiia i te reo o teia rā. Me tatau koe i tetai puka tei ki i te au tuatua ngata e te takere e kare koe i kite i te reira, e mea papu kare e reka ana taau tatau. No reira e kimi i tetai Pipiria tei taangaanga i te reo māmā ua i te mārama kia pakia toou ngakau. I taua taime rai, ka tau te reira kia uri meitakiia ma te tika tikai.a

Taangaanga i te tekinoroti ou. I teia tuatau ka rauka te Pipiria vaîia tei neneiia, pera katoa te puka digital. Ka rauka i te tatau i tetai au Pipiria i runga i te initaneti me kore kia kopi i te reira ei tatau i runga i te komupiuta, te tablet, e te tereponi apaipai. Ka rauka i tetai au urianga te au ravenga ke atu te ka tauturu ia koe kia akara viviki i te au irava Pipiria no runga i tetai tumu manako me kore e akaaite i te au urianga ke ke. Me e reka ana koe i te akarongorongo me kare i te tatau, ka rauka katoa te Pipiria ei rekoti akatangitangi. E reka ana te manganui i te akarongorongo me aere ratou na runga i te au apinga tari tangata, me puʼa kakau, e me rave i tetai ua atu angaanga te ka akatikaia te akarongorongo. Eaa ka kore ei e tamata i tetai ravenga tei tau kia koe?

Taangaanga i te au apinga apii Pipiria. Ka riro te au apinga apii Pipiria ei tauturu ia koe kia puapinga maataia taau tatau. Te vaira te au mapu no te au enua Pipiria, te ka tauturu ia koe kia kimi i te au ngai taau e kite ra i roto i taau tatauanga e kia akamanako i te au tupuanga tikai. Ka riro te au atikara i roto i teia makatini e i runga i te jw.org website ei tauturu ia koe kia kimi i te aiteanga o te au tuanga ravarai o te Pipiria.

Tamata i te au ravenga ke. Me e ākā angaanga i te tatau i te katoa anga o te Pipiria, eaa ka kore ei e akamaata atu i toou inangaro na te akamataanga i tetai ngai tikai taau e reka ra? Me ka inangaro koe i te apii no runga i te au tangata rongonui o te Pipiria, penei ka akamata koe i te tatau no runga i te au tu tangata o te Pipiria. Te kapiti maira tetai ravenga i roto i te pia, “Apii no Runga i te au Tangata o te Pipiria Kia Rauka te Mārama.” Me kore ra penei ka inangaro koe i te tatau i te au tumu manako o te Pipiria me kore ra te aerenga o te au tupuanga. Eaa ka kore ei e tamata i teia?

[Tataanga Rikiriki i Raro]

[Pia i te kapi 5]

APII NO RUNGA I TE AU TANGATA O TE PIPIRIA KIA RAUKA TE MĀRAMA

Te au vaine tiratiratu

Abigaila

1 Samuela pene 25

Esetera

Esetera pene 2-5, 7-9

Hana

1 Samuela pene 1-2

Maria

(Metua vaine o Iesu) Mataio pene 1-2; Luka pene 1-2; akara katoa ia Ioane 2:1-12; Angaanga 1:12-14; 2:1-4

Rahaba

Iosua pene 2, 6; akara katoa ia Ebera 11:30, 31; Iakobo 2:24-26

Rebeka

Genese pene 24-27

Sara

Genese pene 17-18, 20-21, 23; akara katoa ia Ebera 11:11; 1 Petero 3:1-6

Te au tane meitaki

Aberahama

Genese pene 11-24; akara katoa ia 25:1-11

Davida

1 Samuela pene 16-30; 2 Samuela pene 1-24; 1 Ariki pene 1-2

Iesu

Te Evangelia a Mataio, Mareko, Luka, e Ioane

Mose

Exodo pene 2-20, 24, 32-34; Numero pene 11-17, 20, 21, 27, 31; Deuteronomi pene 34

Noa

Genese pene 5-9

Paulo

Angaanga pene 7-9, 13-28

Petero

Mataio pene 4, 10, 14, 16-17, 26; Angaanga pene 1-5, 8-12

[Pia i te kapi 6]

AU APINGA APII PIPIRIA A TE AU KITE O IEHOVA

▸ JW.ORG​—Te akaari ra teia website i te au apinga apii Pipiria, kapiti mai te tuanga “Bible Questions Answered.” Te akaari katoa ra i te au ikuikuanga no te kopi i te JW Library app

▸ “See the Good Land”​—Te akaari ra teia poroutia i te au mapu e te au tutu no te au ngai tei taikuia i roto i te Pipiria

▸ Insight on the Scriptures​—E rua voriumu puka kimikimianga Pipiria tei oronga mai i te au akamārama anga no te au tangata, au ngai, e te au tuatua i roto i te Pipiria

▸ “All Scripture Is Inspired of God and Beneficial”​—Te akamārama ra teia puka kimikimianga inaea, iea, e no teaa ra te au puka tataki tai o te Pipiria i tataia ai e te oronga maira i te akakiteanga poto no runga i te reira

▸ The Bible​—God’s Word or Man’s?​—Te akara matatio ra teia puka iti tei kimikimi meitakiia i te au akapapuanga e ko te Pipiria te Tuatua akauruia a te Atua

▸ The Bible​—What Is Its Message?​—Te akakite ra teia poroutia e 32 kapi i te tumu manako maata o te Pipiria