TUMU MANAKO I TE KAPI MUA | ĀRIKI AINEI KOE TE APINGA AROA MAATA A TE ATUA?

Ta te Atua Apinga Aroa Maata​—No Teaa ra i Akaperepereia Ai?

No teaa ra koe i akaperepere maata ai i tetai apinga aroa? Penei e ā tumu: (1) Naai i oronga i te apinga aroa kia koe, (2) te tumu i orongaia ai, (3) eaa tei akaatingaia kia oronga i te apinga aroa, e te (4) me akono te apinga aroa i tetai anoano. Me akamanako tatou i teia tumu e ā, ka tauturuia tatou kia āriki oonu atu i te atinga oko​—ta te Atua apinga aroa maata.

NAAI I ORONGA?

E mea akaperepere tetai apinga aroa me na tetai tangata taoonga me kore na tetai ta tatou i akangateitei i oronga mai. E tetai atu apinga aroa, noatu e iti ua te moni i te oko i te reira, te akaperepereia ra e tatou no te mea na tetai mema akaperepere o te ngutuare me kore tetai oa irinakiia i oronga mai i te reira. Ko teia te tu o te apinga aroa a Russel kia Jordan, tei taikuia i te atikara i mua ake. Akapeea teia i tau ei ki te apinga aroa o te oko?

Mea mua, karanga te Pipiria e koia “[te Atua] i tono mai i tana Tamaiti anau tai ki te ao nei, kia ora tatou iaia.” (1 Ioane 4:9) Ko te tumu teia i akaperepereia ai teia apinga aroa. Kare atu e tangata mana taoonga teitei atu i te Atua. No runga iaia, karanga te tata salamo Epera e: “Ko Iehova toou ingoa, e ko koe anake Tei Teitei i te enua katoa nei.” (Salamo 83:18) Kare atu e apinga aroa no ko mai i tetai tei teitei.

Te rua, ko te Atua “to matou Metua.” (Isaia 63:16) Akapeea ra? Kua oronga mai aia i te ora. E tetai, te akono ra aia ia tatou mei tetai metua aroa e akono ra i tana tamariki. Te kapikianga i tona iti tangata i taito ko Epheraima, kua ui te Atua “E tamaiti akaperepere ainei a Epheraima naku? e tamaiti inangaroia ainei aia? . . . kua tangi toku ngakau iaia; e aroa atu rai au iaia.” (Ieremia 31:20) Te manako akapera ra te Atua i tona aronga akamori i teia tuatau. Koia Tei Anga mai ia tatou e koia katoa to tatou Metua e te Oa tiratiratu. Kare ainei teia e akariro i tana au apinga aroa ei mea akaperepere maataia?

TE TUMU I ORONGAIA AI?

E mea akaperepere tetai au apinga aroa no te mea kua orongaia te reira ma te aroa ngakau tae, kare no tei umuumuia. Kare te tangata tei oronga ma te noinoi kore e tapapa atu i te tutaki no tona takinga meitaki.

Kua oronga mai te Atua i tana Tamaiti no tona aroa ia tatou. Karanga te Pipiria “kua kitea to te Atua aroa ia tatou nei, koia i tono mai i tana Tamaiti anau tai.” No teaa ra? “Kia ora tatou iaia.” (1 Ioane 4:9) Kua umuumuia ainei te Atua kia pera? Kare takiri! “Te ora e vai i te Mesia ra ia Iesu” na roto i te atinga oko, e akairo no te “aroa ua” o te Atua.​—Roma 3:24.

No teaa ra te apinga aroa o te Atua te mea “aroa ua”? Akamārama te Pipiria: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) Na te aroa noinoi kore i akakeu i te Atua kia tauturu i te tangata apikepike, paruparu, e te ara. Kare tatou e tau kia rauka te reira aroa, e kare e tutaki iaia. Ko teia apinga aroa te akaari anga maata rava atura i te aroa.

EAA TEI AKAATINGAIA?

E mea akaperepere tetai apinga aroa no te mea te akatutu ra i te akaatinga maata a te tangata oronga. Me puareinga ua tetai tangata i te oronga i tetai apinga puapinga kiaia uaorai, ka akaperepere tikai tatou i te reira apinga aroa no te atinga.

Kua oronga mai te Atua “i tana Tamaiti anau tai.” (Ioane 3:16) Kare atu e mea akaperepere maata atu kiaia tana ka oronga. I te tuatau roa i anga ai te Atua i te ao katoa e pini ua ake, kua angaanga kapiti a Iesu kiaia e “te mataora ua ra [aia] i te au rā katoa ra.” (Maseli 8:30) Ko Iesu te “Tamaiti akaperepere” a te Atua e “ko te tu tikai aia o te Atua akara koreia.” (Kolosa 1:13-15) Kare atu e pirianga vaitata tikai mei te reira te tu.

“Ko tei kore oki i akaperepere i tana uaorai Tamaiti.” (Roma 8:32) Kua oronga mai a Iehova i tana mea meitaki rava atu kia tatou. Kare atu e apinga aroa tei riro ei ngere maata kiaia.

ME AKONO I TETAI ANOANO

E mea akaperepere te apinga aroa no te mea te akono ra i te anoano puapinga e te rapurapu. Ei akaraanga, mei teaa atura toou rekareka i tetai tangata tei oronga ua i te moni kia tutaki i tetai rapakauanga maki kare e peke ia koe! E apinga aroa maata tikai teia, me kare ainei?

“Mei te tangata i ope i te mate ia Adamu, e ope katoa i te akaoraia e te Mesia.” (1 Korinetia 15:22) Ei uanga na Adamu, te “mate” nei tatou katoatoa e kare e ora mei te mamae o te maki e te mate, e kare e akaongiia ki te Atua e te apa kore i mua iaia. Ei aronga akaaka ua, kare e rauka i te ‘akaora’ ia tatou uaorai e tetai ke. Te tou maira te Pipiria: “Kare rava e tika i te tangata kia akaora i tona taeake, e kare ana tutaki kia apai ki te Atua e rauka mai ei aia ra . . . e ko te kore rai ïa e tuatau ua atu.” (Salamo 49:7, 8) Ka anoanoia te tauturu no te mea kare e peke ia tatou te tutaki i te oko. Naringa tatou i akarukeia, kare o tatou tauturu.

No tona aroa maata, kua oronga ua mai a Iehova i te tutaki no te “rapakauanga” ta tatou e anoano ra, e no reira “e ope katoa i te akaoraia e te Mesia.” Akapeea te oko i te akatupuanga i teia? “Te mā nei tatou i ta tatou au ara ravarai i te toto o tana Tamaiti o Iesu Mesia.” Ae, no te akarongo i te toto o Iesu tei akamaringiia e akatuera i te ngutupa no te akakore anga ara e te ora mutukore. (1 Ioane 1:7; 5:13) Eaa ta te oko ka rave no to tatou akaperepere tei mate? “Mei te mate oki i rauka i te tangata ra, no te tangata katoa i raukaʼi te tuakaouanga i te aronga i mate.”​—1 Korinetia 15:21.a

Kare atu e apinga aroa no ko mai i tei teitei me kore tei akakeuia e te aroa maata mari ra ko te atinga o Iesu. Kare tetai ua atu e akaatinga mei te Atua rai ko Iehova. E kare atu e apinga aroa te akono ra i te anoano mei te atinga tei akaora ia tatou mei te ara e te mate. Ae, kare tetai ua atu apinga aroa e aite ki te puapinga o te oko.

Kia apii maata atu no runga i te atinga o Iesu e akapeea koe e puapinga ai, akara i te vitio poto Akamaara i te Mate o Iesu i runga i te www.pr2711.com. Akara i raro ake i te AU PUKA > AU VITIO.

[Tataanga Rikiriki i Raro]