Akaperepere a Iehova i Taau “Amene”

AKAPEREPERE a Iehova i ta tatou akamorianga. Te “akarongo mairā” aia i tona au tavini, e kare e akapaapaa anga, noatu te meangiti, e ngaro iaia. (Mala. 3:16) Ei akaraanga, akamanako i tetai tuatua kua matau tatou i te tuatua putuputu. Te tuatua “amene.” Te akaperepere ra ainei a Iehova i teia tuatua māmā ua? Ae! Kia apii akapeea, ka akara matatio tatou i te aiteanga o te reira tuatua e akapeea te reira i te taangaangaia anga i roto i te Pipiria.

“E NA TE TANGATA RAVARAI E TUATUA MAI E, E TIKA ÏA”

Te tuatua Papaa “amene” te aiteanga “e tika ïa,” me kore “e tika tikai.” No roto mai i te tuatua tumu Epera te aiteanga “kia tiratiratu,” e “kia irinaki tikaiia.” Tetai taime e taangaangaia ana i roto i te ture akavaanga. Me tia tetai tangata i tana taputou, ka karanga aia “amene” ei akapapu i tana i tuatua e kua tika e kua āriki i te au tupuanga tei akakiteia. (Nume. 5:22) Me tuatua aia i teia ma te papu, e tumu anga tana kia akono i tana tuatua i tia.—Nehe. 5:13.

Tetai akaraanga tau no te taangaanga i te “amene” kua tataia ia Deuteronomi pene 27. I muri ake i to Iseraela tomo anga ki te Enua Taputouia, kia akaputuputu ratou ki rotopu i te Maunga Ebala e te Maunga Gerizima, no te akarongo ki te Ture e akakiteia maira. Tei reira ratou kare no te akarongo ua, mari ra ka tuatua katoa e kua āriki ratou i te Ture. Kua rave ratou i teia na te pauanga “Amene!” me tatauia mai te au angaanga no te akarongo kore. (Deu. 27:15-26) Akamanako ana i te kapiki a te manganui o te tauatini ua atu tane, te vaine, e te tamariki te pau anga mai ma te kapiki maata! (Iosu. 8:30-35) Papu e kare i ngaropoina ia ratou te au kupu ta ratou i tuatua i te reira rā. Kua akamou to Iseraela i ta ratou tuatua, tei tataia: “Kua akamori Iseraela ia Iehova e ope rava akera to Iosua ra tuatau, e ope rava akera oki te tuatau o te aronga pakari i toe i te ao i muri ake ia Iosua ra, ko tei kite i te au angaanga ravarai ta Iehova i rave ia Iseraela ra.”—Iosu. 24:31.

Kua taangaanga katoa a Iesu i te “amene” ei akapapu i te tika anga tikai o tana i tuatua, inara kua rave aia na roto i tetai tu umere. Kare aia i taangaanga ana i te reira ei pauanga ki tetai akakiteanga, kua taangaanga ra aia i te “amene” (uriia i te reo Papaa “tika tikai”) ei akakite i te au karere tuatua mou. I tetai au taime, ka taokioki akaou aia i te reira, te tuatuaanga “tika, tika tikai.” (Mata. 5:18; Ioa. 1:51) Kua akapapu aia i tona aronga akarongo e e tika tikai tana au tuatua. Ka rauka ia Iesu i te tuatua ma te papu tikai no te mea kua akamanaia aia kia akatupu tika tikai i te au taputou ravarai a te Atua.—2 Kori. 1:20; Apo. 3:14.

“TUATUA MAIRA TE TANGATA KATOATOA, AMENE, E KUA AKAPAAPAA IA IEHOVA”

Kua taangaanga katoa to Iseraela i te “amene” me oronga i te akapaapaa anga e te au pure kia Iehova. (Nehe. 8:6; Sala. 41:13) Na te tuatua anga i te tuatua i muri ake i te pure, te akaari maira te aronga e akarongo maira e kua āriki ratou i te pure e na ratou uaorai. Kua rauka i te katoatoa i te piri atu ki roto, e kua rekareka i teia atianga pae vaerua. Ko te reira tei tupu i te apai anga te Ariki ko Davida i te Aruna o Iehova ki Ierusalema. I te tuatau o te oroa tei aru mai, kua oronga aia i tetai pure ma te ngakau tae na roto i tetai imene tei tataia ia 1 Paraleipomeno 16:8-36. Kua akakeuia te aronga tei tae mai no tana au tuatua e kua “tuatua maira te tangata katoatoa, Amene, e kua akapaapaa ia Iehova.” Ae, kua tuatua taokotai ratou ma te rekareka i tera rā.

Kua taangaanga katoa te au Kerititiano o te anere mataiti mua i te “amene” me akapaapaa ia Iehova. I te maata anga o te taime, kua kapiti mai te aronga tata Pipiria i te reira ki roto i ta ratou au reta. (Roma 1:25; 16:27; 1 Pete. 4:11) Te akaari maira te puka o Apokalupo i te au mea ora vaerua i te rangi e akakakā ra ia Iehova, na te tuatua anga e: “E tika ïa. Aleluia.” (Apo. 19:1, 4) E peu matauia na te au Kerititiano mua i te karanga e “amene” i muri ake i ta ratou uipaanga. (1 Kori. 14:16) Inara, kare te reira i te tuatua e ka taokioki ua.

E PUAPINGA TIKAI TAAU “AMENE”

I muri ake i te kite anga eaa tei tupu, ka kite tatou i te tumu i riro ei te “amene” ei taopenga anga puapinga tikai i roto i tetai pure. Me tuatua tatou i te reira i te openga o ta tatou uaorai pure, kua papu tikai ta tatou i tuatua. E me akakeuia tatou kia tuatua “amene,” i roto i te pure noatu te muteki, e i te ngai tangata, te akaari ra tatou e te turu ra tatou i te au tuatua tei tuatuaia. Akamanako ana i te tumu i puapinga ai ta tatou “amene.”

Akarongo e e akara meitaki i ta tatou akamorianga. Te akamori nei tatou ia Iehova i te tuatau o te pure kare anake i ta tatou ka tuatua mari katoa ra na roto i to tatou tu. Penei na te anoano anga i te oronga i tetai “amene” meitaki e tauturu ia tatou kia akamou i te tu tau tikai e kia akamanako meitaki i te pure.

Taokotaiia tatou ei aronga akamori. Te riro ra te au pure i te ngai tangata ei akamou i to tatou manako ki runga i ta te katoa anga o te putuputuanga e akarongo ra. (Anga. 1:14; 12:5) Me akakeuia tatou kia ariu taokotai ma te au taeake e te au tuaine, ka taokotai maata atu tatou. Me ka tuatua tatou i ta tatou “amene” ma te reo maata me kore i roto i to tatou ngakau, penei ka akakeu te reira ia Iehova kia pau rotai mai i ta tatou patianga taokotai.

Pure tetai tuaine iaia e akarongo ra i te uipaanga i runga i te tereponi — Ka akapaapaa maata atu ta tatou “amene” ia Iehova

Te akapaapaa ra tatou ia Iehova. Te kite ra a Iehova i ta tatou au akamorianga rikiriki. (Luka 21:2, 3) Te kite ra aia i to tatou manako e eaa to roto i to tatou ngakau. Noatu me akarongo tatou i te uipaanga na roto i te tereponi, papu ia tatou e ka kite ua mai a Iehova i ta tatou “amene” ma te tu akaaka. Ka piri atu tatou ki te akapaapaa anga taokotai tei orongaia kiaia.

Penei e apinga meangiti ua ta tatou “amene,” inara e puapinga maata tikai te reira. “Na roto i te taangaanga anga i teia tuatua okotai,” i akakite ei tetai encyclopedia Pipiria, ka rauka i te au tavini o te Atua i te akakite i “te tu papu, te mareka anga papu, e te manakonakoanga akatenga i roto i to ratou ngakau.” Kia riro ua rai ta tatou “amene” ei akamareka anga ia Iehova.—Sala. 19:14.

KIA TUATUA UA AINEI KOE E E “AMENE”?

E tuatua puapinga te tuatua “amene.” Inara, akapeea me oronga tetai tangata i tetai pure kare e tano meitaki ana te manako? Ka tau ainei ia tatou kia tapupu i ta tatou “amene”? Kare. Mei tera te tu, te kite maira a Iehova e e tarevake ana to tatou arero, e te akakore maira aia i te reira. No reira auraka tatou e akaapa ua, me akamou tatou ki runga i te vaerua o te au tuatua, ka kite tatou e ka rauka i te karanga e e “amene.”

I tetai tua, kare tatou e tuatua vaa ua “amene,” e i roto i to tatou ngakau, ki tetai pure tei orongaia e te tangata kare i roto i te akarongo. Akapeea me tei reira koe me orongaia tetai pure mei teia te tu? Ei akaraanga, penei te aere ra tatou ki tetai tarekarekaanga i te ngai angaanga e kua patiia tetai tangata kia oronga i te pure. Me kore, penei tei roto tatou i tetai ngutuare kare e aiteite ana te irinakianga e kua manako te upoko o te ngutuare, kare i roto i te akarongo, kia oronga i te pure no te ngutuare tangata. Eaa ta tatou ka rave?

Me ō tatou ki roto i teia turanga, ka noo muteki ua tatou ma te akangateitei. Kare tatou e piri atu i te karanga anga e “amene”; e kare katoa e mou rima ki tetai ke i te tuatau e pure ra, no te mea ka akaari te reira e te piri atura tatou ki roto i te pure. Penei ka inangaro tatou i te pure i ta tatou uaorai pure muteki, inara kare tatou e tuatua kia rongoia te “amene” kia kore tetai pae e manako e te piri atura tatou ki ta ratou pure. Me tu ra te katoatoa ki runga, tei ia tatou rai te iki me ka tu tatou e me kare. Na te tu anga ki runga me kore te piko anga i to tatou upoko ki raro, kare te reira i te tu akamori. Tei runga rai i te Kerititiano tataki tai i te akamanako e ko teea ara ta ratou ka iki, auraka tetai e akaapa atu i tana iki anga.

Te akataka maira teia au akaraanga e te akaperepere ra a Iehova i ta tatou “amene.”