Te Pipiria​—Te Tumu ïa o te Tuatua Mou

Mei te au mataiti i aereia mai, kua manako te au tangata i te Pipiria ko te tumu ïa o te tuatua mou. I teia tuatau, e mirioni ua atu te aru ra i te apiianga Pipiria. Inara te karanga ra tetai pae, e e mea maani ua te Pipiria e kare i te puka puapinga. Eaa toou manako? Ka kiteaia ainei te tuatua mou i roto i te Pipiria?

TE TUMU KA IRINAKI EI KOE I TE PIPIRIA

Akapeea koe me akapapu e kua tau rai kia irinakiia te Pipiria? Akamanako ana i tetai akatutuanga: Kua akakite mai tetai oa i te tika kia koe no tetai tuatau roa, ka irinaki rai koe iaia. Mei tetai oa irinakiia, kua akakite mai ainei te Pipiria i te tuatua mou? Akamanako ana i teia au akaraanga.

E Tuatua Mou ta te Aronga Tata

Akakite te aronga tata i te tika, to ratou tarevake e te tu paruparu. Ei akaraanga, kua tata te peroveta ko Iona i tona tu akarongo kore. (Iona 1:1-3) Kua taopenga aia i roto i tana puka Pipiria i to te Atua akoanga iaia, inara kare aia i akakite mai ana e kua taui aia i tona tu. (Iona 4:1, 4, 10, 11) Akaari maira te tu tika o te aronga tei tata i te Pipiria i to ratou inangaro i te tuatua mou.

E Tuatua Mou Tau Tikai

E ako meitaki ainei ta te Pipiria no tatou? Ae. Akamanako ana i ta te Pipiria e karanga ra no te au pirianga meitaki ki te tangata: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12) “Ko te tuatua maru ra tei akaanga ke i te riri: kareka te tuatua akakoko ra, ko te riri ïa te tupu.” (Maseli 15:1) Ae, te tau meitaki nei rai te au tuatua mou Pipiria kia tatou mei te taime mai i tataia ai.

E Tuatua Mou te Tuatua Enua

Maata ta te aronga kimikimi i kite mai no te au tangata e te au ngai tukeke e te au tupuanga tika ta te Pipiria e akakite ra. E akamanako ana i teia akapapuanga. Akakite te Pipiria i to Nehemia tuatau, no Turia (e iti tangata Phenia) tei noo ana i Ierusalema “kua apai maira . . . i te ika, e te au apinga ke katoa.”—Nehemia 13:16.

E akapapuanga ainei tetai te turu ra i teia irava Pipiria? Ae. Kua kite mai te aronga kimikimi i te au apinga no Phenia i Iseraela, te akakite maira i te okooko anga i rotopu i teia nga enua taito. Pera katoa, i Ierusalema, kua keriia mai te au iviivi ika o te Tai Mediterranean. Irinaki te aronga kimikimi e kua apainaia mai te ika e te aronga okooko. I muri ake i te akara matatio anga i te au apinga i kiteaia mai, karanga tetai tangata kite e: “Kua tano rai tei akakiteia i roto ia Neh[emia] 13:16 e kua okooko to Turia i te au ika i Ierusalema.”

E Tuatua Mou i te Pae o te Kite Taieni

E puka akonoanga te Pipiria e te akakite i te tuatua enua. No runga ra i te kite taieni, te rotai ra te reira ki te Pipiria. Tetai akaraanga.

E 3,500 mataiti teianei, kua akakite te Pipiria no te enua, kua akautaia “ki runga i te kore.” (Iobu 26:7) Tuke maata teia ki te au tua maani ua e te pānu ra te enua ki runga i te vai me kore tei runga i te mokotua o tetai onu maatamaata. No tetai 1,100 mataiti te otianga te puka o Iobu i te tataia, te irinaki ra rai te tangata e te vaira te enua ki runga i tetai apinga. E toru anere mataiti akenei, i te 1687, kua nenei a Isaac Newton i tana kimikimi anga no runga i te gravity e kua akamārama mai e te vaira te enua ki runga i te kore. Akapapu mai teia kimikimi anga puapinga i ta te Pipiria i akakite takere no tetai 3,000 mataiti i mua atu!