Akono Tika i te Tua i te Tuatua a te Atua
1 I te akakitekite anga ki tetai opita o te ture, “kua tuatua marie atura to Philipa vaa na taua takiato tuatua i tataia ra, e akakite atura i te tuatua no Iesu kiaia.” (Anga. 8:35) Kua akono “tika [a Philipa] i te tua i te tuatua mou ra.” (2 Timo. 2:15) Inara, i teia tuatau, te kite nei te aronga akaaere tutaka e e maata te au papuritia kare e taangaanga putuputu ana i te Pipiria me akakitekite aere. Te taangaanga ainei koe i te Pipiria i roto i taau angaanga orometua?
2 Ko te Tuatua a te Atua te tumu no te au apinga ravarai ta tatou e irinaki e e apii nei. (2 Timo. 3:16, 17) Ko te reira te apai maira i te tangata kia Iehova e te apii ra ia ratou no te oraanga. No reira i puapinga ai kia taangaanga tatou i te Pipiria i roto i ta tatou angaanga orometua i to te tuatua ua no runga i ta tatou i inangaro. (Ebera 4:12) No te mea oki e ko te maata anga o te tangata e iti ua te kite i te Pipiria, ka anoanoia tatou kia tatau atu mei reira i te akaari kia ratou i te aratakianga tau ta te reira e oronga maira e te tuatau ki mua ta te reira e akatoro maira no te tangata nei.
3 E Tatau Tika Mei Roto i te Pipiria: E tamata paa koe i te tutu aere ma te kore e kiri puka no te akakitekiteanga. Penei ka tuku koe i te puka ka akaariia taau i inangaro i te oronga ki roto i tetai kiri paraa meangiti e te Pipiria i roto i to rima me kare i to pute. I reira, me pukapuka koe ki tetai tangata, akapae koe i te Pipiria ki vao ma te kore tera tangata e manako mai e ka rave koe i tetai akoanga kiaia. Akanoo ia koe na tetai tu te ka rauka i tera tangata e akarongo maira i te aru i roto i taau Pipiria. Penei e pati iaia kia tatau pu mai i tetai irava. E oonu atu te manako ka tupu me te kite ra aia e eaa ta te Pipiria e tuatua ra i ta te akarongo ua mai i te reira mei ia koe. Ae, ei tauturu iaia kia marama i te aiteanga o te irava, e akataka i te au tuatua te ka oronga i te manako.
4 Okotai Irava no te Orongaanga: Muri ake i te akaaravei anga ia koe, penei ka karanga koe e: “Te akara nei te tangata ki te au tumu keke no te aratakianga i to ratou oraanga. Eaa i toou manako te tumu meitaki roa atu no te aratakianga tau? [Tiaki no te pauanga.] Eaa toou manako no runga i teia tuatua? [Tatau ia Maseli 2:6, 7, tiaki no te pauanga.] Kua kiteaia te ngere i roto i te pakari tangata, i te arataki anga i te manganui ki te taitaia. Kareka, to te Atua pakari, e tumu tau ua rai ia kia irinakiia e te puapinga.” I reira e akaari i te puka taau e oronga ra, e te akamarama atu mei te reira e tai akaraanga no to te Atua pakari tau.
5 Kua taangaanga a Iesu i te au Tuatua Tapu ei tauturu i te aronga ngakau tika. (Luka 24:32) Kua akapapu a Paulo mei roto i te Tuatua Tapu te au apinga tana i apii. (Anga. 17:2, 3) Ka maata atu to tatou irinakianga e te mataora i roto i te angaanga orometua ia tatou e tupu atura i te karape i roto i te akono tika anga i te tua i te Tuatua a te Atua.