E Akono Meitaki i te Openga e Vaitata Maira
1 Te akataka putuputu ra ta te Atua Tuatua i to Iehova ra e te aere maira “mei te keia”—koia oki, ma te poitirere, te viviki ua, e te marie. (1 Tesa. 5:2; Mata. 24:43; 2 Pe. 3:10; Apo. 3:3; 16:15) “E teianei,” i na Iesu ei, “kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” (Mata. 24:44) Ka akapeea tatou me akono ma te matakite i te pae vaerua i te openga e vaitata maira? Ka kiteaia te puapinga ki roto i te ako akauruia: “E akono meitaki.”—1 Pe. 4:7.
2 Te o maira i te akono meitaki i te akara anga atu i te au mea mei to Iehova turanga. (Ephe. 5:17) Ka tauturu te reira ia tatou kia akara ia tatou uaorai ei “tangata ke, e te tuitarere” i roto i teia akatereanga o te au mea. (1 Pe. 2:11) Ka tauturu mai te reira ia tatou kia kite e eaa tikai te mea puapinga, kia akanoo i te au mea mua, e kia rave i te au ikianga tau.—Philipi 1:10.
3 Akanoo i te Au Akakoroanga Pae Vaerua: Te akanooanga e te tauta anga kia rauka te au akakoroanga pae vaerua te tauturu ra ia tatou kia akono meitaki. E au akakoroanga ainei i te pae vaerua taau e aruaru nei koe i teianei? Te tauta ra ainei koe i te tatau i te Pipiria i te au ra, te aere atu ki te au uipaanga Kerititiano katoatoa, te tatau i te itiu tataki tai o Te Punanga Tiaki e te Awake!, me kare penei i te akamaata i taau tuanga i roto i te angaanga orometua? Me akanoo koe i te au akakoroanga te tau ra noou, e aruaru i te tauta i te reira, e pati ia Iehova kia akameitaki mai i taau au tautaanga, penei ka umere koe i te au mea te ka tupu.
4 Kua ui atu tetai tangata pakari ki tetai nga tokorua no runga i to raua au akakoroanga i te pae vaerua. Kua riro taua uianga i te akaari kia kite raua e me akamama mai raua i to raua oraanga e te akakore i te au kaiou e apainga ngata, ka rauka ia raua i te painia. Kua iki raua i te akono i te reira e ko to raua akakoroanga ia. Kua tutaki raua ma te maroiroi i te kaiou pouroa e kua kitea te au mataara no te akaiti mai i te au angaanga kare tikai i anoanoia e te akapou ra i to raua taime e te maroiroi. Tano tikai i te okotai mataiti i muri mai, kua itaeia e raua i to raua akakoroanga. Eaa tei tupu mai? Te karanga ra te tane: “Ma te kore te au akakoroanga kare maua e o atu ki roto i teia turanga i teianei. Te mataora nei maua. Kua maru e te meitaki ua to maua oraanga. E aiteanga e te akakoroanga tikai to te reira.”
5 Ia tatou e tapapa nei i to Iehova ra, kia akono tatou ma te matakite i te pae vaerua na te noo anga ma te akono meitaki, te akara tamouanga i te raveanga i to te Atua anoano.—Tito 2:11-13.