Pia Uianga

◼ Eaa te au akamatakiteanga ta tatou ka akono me akakitekite ki te aronga mouauri?

Takapini i teia ao te vaira mei te varu mirioni aronga mouauri, tetai papaki o ratou te inangaro ra i te tuatua meitaki. (1 Timo. 2:4) E tae mai ana ki tetai opati manga mei te 1,400 reta i te marama mei ko i te au mouauri e te au mema o to ratou pamiri i te pati puka me kare kia atoroia ratou. Noatu oki e maata te au mouauri tei inangaro tikai, te akaari maira ra tei tupu ana e kare to tetai papaki i te inangaro tikai, e akakoroanga akavare ua i te iti tangata o te Atua. No runga i teia, e akono te katoatoa i te au akamatakiteanga no runga i te akakitekite anga ki te aronga mouauri.

I te maata anga ra o te taime e raveia ana te akakitekite anga ki te au mouauri na roto i te tata anga reta. Te akakite pakariia atu nei e auraka te au tuaine e tata ki te au mouauri tane, noatu e akakoroanga tauturu i te pae vaerua. Ko te reira apainga na te au tungane tau anake ua e rave. Penei ka ikiia te au tuaine tei tau kia tata ki te au mouauri vaine tei inangaro tikai i te tuatua mou o te Pipiria. Te moni me kare te au apinga oronga auraka kia tukuia ki te au mouauri, noatu me ka patiia mai te reira.

Me ka inangaro tetai tangata tapekaia, e oake i tona ingoa e te ngai nooanga ki te putuputuanga i te ngai te reira te are auri. Kua kite ua te au tungane tei tau e ka akapeea i te akono i te au turanga te ka tupu mai. Me kare te putuputuanga i kiteaia, e tuku i te akakiteanga ki te opati manga.

Kare e kino no te au tungane tei ikiia kia rave i te au uipaanga ma te au mouauri kia maata ai te ka rauka i te apii i te taime okotai. Inara, eiaa kia raveia ki roto i te are auri te au akakoroanga takake te ka tikaia te au papuritia kia kapiti ki te au mouauri. Tetai katoa, kare i te mea meitaki no te au papuritia kia atoro puapinga kore ua i te are auri i te akapiri atu ki te au mouauri.

Kia “pakari [tatou] mei te ovi, e te apa kore mei te kukupa” ia tatou e akakite ra i te tuatua meitaki ki te aronga mouauri.—Mata. 10:16.