Apai Mai te Akakitekiteanga Pupu i te Rekareka

¹ I te tono anga i te 70 pipi kia tutu aere, kua apii a Iesu ia ratou eaa te ka tuatua, akataka atura ia ratou tataki rua i te pupu okotai, akakite atura i te ngai ta ratou ka angaanga. Kua oronga teia i te rekareka kia ratou. (Luka 10:​1-17) Mei koia rai i teia tuatau, ka tauturu te akakitekiteanga pupu i te akapapa, te akataka, e te akamaroiroi i te iti tangata o te Atua no te angaanga tutu aere.

² E Arataki te Aronga Pakari: E tuanga puapinga ta te aronga pakari i te tauturu anga i te katoatoa kia piri putuputu atu ki te angaanga tutu aere. E arataki te akaaere tavinianga i te akono anga i te au akanoonooanga no te angaanga o rotopu i te epetoma. Na te akaaere apii puka tataki tai rai e akataka i te angaanga na tona pupu, i te openga epetoma tikai. I te au taime ra ka uipa te katoaanga o te putuputuanga no te tavini anga koro, mei te otianga o te Apii Punanga Tiaki, e mea tau kia akono rai te akaaere apii puka tataki tai i te au anoano o tona uaorai pupu.

³ “Ma te Tika e te Manea”: E mea tau no te tangata tei ikiia ei akaaere i te uipaanga no te tavini anga koro kia akamata vave e kia akaiti mai i te uipaanga ki te10 me kore i te 15 miniti. E meitaki atu kia akanoo aia i te au pupu akakitekite e te tuku i te ngai (tera ua me na te au akaaere rai e akono i teia, mei tei akakite mua ia akenei) i mua ake ka taopenga ai ki te pure. Ka akaiti mai teia i te putuputu aere ua anga te au papuritia i ko i te ngai ka angaanga ai, te ka riro i te apai ke i te tu ngateitei o ta tatou angaanga. Te tau katoa ra te reira ki te ako a Paulo e: “E rave ra te au mea ravarai ma te tika e te manea.” (1 Kori. 14:40) Ka tau pouroa te ka tae ki teia au uipaanga nei kia akatupu i te puapinga o te akanoonooanga na te tae vave anga, te taokotai anga ki te arataki, e te akaruke viviki anga no te ngai ka angaanga ai me oti.

⁴ Pirianga Rotai: Te oronga maira te akakitekiteanga pupu i tetai tuatau manea tikai no tatou kia kite i etai ke atu i roto i te putuputuanga. Noatu kare e akaapaia te akanoo na mua ake kia angaanga ma tetai, e mea mataora katoa ra no tatou kia tae ki te au uipaanga no te tavini anga koro ma te kore e au akanoonooanga i mua ake. Penei ko te tukuia tatou kia angaanga ma tetai kare tatou i matau meitaki, te ka tauturu i reira ia tatou kia “maora katoa” i roto i to tatou aroa.​—2 Kori. 6:​11-13.

⁵ Ka tauturu te akakitekiteanga pupu ia tatou kia akapiri vaitata atu ei “aronga rave angaanga katoa i te tuatua-mou.” (3 Ioane 8) Kia piri atu tatou ma te ki katoa ki roto i te reira!