Tatanu Anga i te Pirianganao kia Iehova
1. Eaa ta tetai tuaine i kite mai no runga i tana akonoanga matauia i te pae vaerua?
1 “I noo ua mai ana au i roto i te tuatua mou mei te 20 mataiti i topa na te aere ua anga ki te au uipaanga e te piri atu ki te angaanga orometua,” i akakite ei tetai tuaine Kerititiano. Inara, i nana atu ei: “Kua kite au i te openga e noatu e puapinga teia au angaanga nei, kare ra e rauka ia ratou anake i te akamaroiroi iaku me akamata te au turanga i te ngata. . . . Kua kite au i teianei e ka anoanoia au kia akatikatika i toku aerenga manako e te akamata i tetai porokaramu apii ma te aiteanga tikai kia rauka iaku i te kite tikai ia Iehova e kia rauka te anoano iaia e te ariki rekareka no ta tana Tamaiti i oronga mai no tatou.”
2. No teaa i puapinga ai kia tatanu i te pirianganao kia Iehova?
2 Ka anoanoia te tautaanga no te patu i tetai pirianga noou uaorai kia Iehova. E maata atu te ka umuumuia i to te aru ua anga i tetai akonoanga matauia no te angaanga Kerititiano. Me kare e rauka ia tatou i te tuatua putuputu kia Iehova, i te openga ka riro mai aia kia tatou mei tetai oa piri vaitata kare tatou e kite akaou ana. (Apo. 2:4) Ka akara tatou e ka akapeea te apiianga uaorai i te Pipiria e te pure i te tauturu anga ia tatou kia tatanu i te pirianganao kia Iehova.—Sa. 25:14.
3. Eaa te mataara no te apiianga uaorai te ka tauturu ia tatou kia akavaitata atu ki te Atua?
3 E Puapinga te Pure e te Manakonakoanga: E maata atu te ka piri mai ki te apiianga uaorai i to te akairaira ua i te au manako maata i roto i te puka apii e te akara i te au irava. Te inangaroia ra tatou kia akamanako no runga i ta te akakiteanga e akaari maira no runga i to Iehova au mataara, au turanga, e te tu. (Exodo 33:13) Ko te marama anga i te au mea i te pae vaerua ka akaori te reira i to tatou manako ngakau e ka akakeu ia tatou kia manako no runga i to tatou uaorai oraanga. (Sa. 119:35, 111) Kia raveia te apiianga uaorai ma te akakoroanga kia akapiri vaitata atu kia Iehova. (Ia. 4:8) Ka anoanoia te taime no te apiianga pakari pera katoa te ngai tau, e te apii putuputu ka anoanoia te tauta pakari. (Dani. 6: 10) Noatu e maata te angaanga i roto i toou oraanga, te akanoo ra ainei koe i te taime i te au ra i te akamanakonako no runga i to Iehova au tu umere?—Sa. 119:147, 148; 143:5.
4. Akapeea te pure tei piri atu ki te apiianga uaorai i te tauturu anga ia tatou kia tatanu i te pirianganao kia Iehova?
4 Te pure ma te ngakau katoa e tuanga puapinga te reira no te apiianga uaorai e aiteanga tikai tetai. No te tuatua mou o te Pipiria kia akaara i to tatou ngakau e te akakeu ia tatou kia “akamori tatou i te Atua ma te kiteia mai, ma te akaaka e te mataku,” ka anoano tatou i te vaerua tapu o te Atua. (Ebera 12:28) No reira, e tau ia tatou kia akatuera i te au tuatau apii na te pati akatenga anga ia Iehova no tona vaerua. (Mata. 5:3) Ia tatou e akamaaraara ra i te au Tuatua Tapu e te taangaanga i te au puka apii tauturu i orongaia mai e to Iehova akaaerenga, te akatuera ra tatou i to tatou ngakau kia Iehova. (Sa. 62:8) Ko te akaaere anga i te apii na teia mataara nei e rave anga akamori ia i te akakite anga i to tatou inangaro maata ia Iehova e te akaketaketa i to tatou pirianga kiaia.—Iuda 20, 21.
5. No teaa i puapinga ai no tatou kia manakonako no runga i ta te Atua Tuatua i te au ra ravarai?
5 Mei te au pirianga pouroa rai, ka anoanoia to tatou pirianga kia Iehova kia utuutu uaia rai no te reira kia mou ua atu te tupu anga i roto i to tatou au oraanga. Ko tatou, i reira, e taporoporo i te tuatau i te au ra i te akavaitata atu ki te Atua, ma te kite e koia, i reira, ka akavaitata mai kia tatou.—Sa. 1:2, 3; Ephe. 5:15, 16.