Kia Matakite no Runga i te Akapouanga i Toou Tuatau
1. Eaa te akaaoanga e kiteaia ra e te tangata i te au ngai ravarai i teia tuatau?
1 I roto i teia tuatau e manganui te au apinga angaanga te akameangiti mai i te taime e te angaanga, e manganui te kite maira e maata atu te au apinga kia raveia e meangiti ua te tuatau i te raveanga i te reira. E ngata ana ia koe kia tamou ua atu i tetai akonoanga matauia e te meitaki i te pae vaerua? E manako ana ainei koe e kia maata atu toou tuatau no te angaanga orometua? Akapeea tatou i te akapou meitaki anga atu i to tatou tuatau?—Sa. 90:12; Phile. 1:9-11.
2, 3. Eaa te akaaoanga ta te au akakiteanga ou e oronga maira, e akapeea tatou tataki tai uaorai i te makitoro marie anga?
2 Akataka i te Au Mea Kaimoumou Taime: Ka tau pouroa tatou kia putuputu i te makitoro marie e i akapeea tatou i te akapou anga i to tatou tuatau. Te raurau maira te Pipiria: “E tenana, kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia.” (Ephe. 5:15, 16) E akamanako ana i te au akaaoanga te orongaia maira e te au tuatua akakite te tere ra ki mua no te au apinga ou. Noatu e puapinga to te komupiuta e te au apinga electronic i te taangaangaia anga, ka riro te reira ei puereere me poka tatou e kia matakite no runga i te akapouanga i to tatou tuatau.—1 Kori. 7:29, 31.
3 Ka tau tatou tataki tai kia ui kiaia uaorai: ‘Te akapou ra ainei au te tuatau i te au ra tataki tai i te tatauanga me kare i te pauanga i te au akakiteanga E-mail e te akaraanga e mea tamanamanata tikai ia? E putuputu ana ainei au i runga i te terepaoni me kare i te tuku atu anga i te au akakiteanga electronic no runga i te au apinga puapinga kore ua? (1 Timo. 5:13) Te kite ra ainei au iaku uaorai i te akarakaraanga i te Internet ma te kore e akakoroanga me kare i te patapata puapinga kore ua anga mei tetai channel ki tetai channel me te akarakara tivi ra? Kua akakino ainei te akapouanga maata i te tuatau ki te au apinga kangakanga electronic i taku apii i te Tuatua a te Atua?’ Ka rauka i teia au aruaruanga i te keia i to tatou au tu puapinga i te pae vaerua.—Maseli 12:11.
4. Eaa te akatanotanoanga ta tetai mapu ou i rave, e no teaa ra?
4 Taangaanga Anga Pakari i te Tuatau: Ka riro te au apinga electronic i te akapou kapiti i to tatou tuatau e to tatou manako. Kua akatika mai tetai mapu ou tei akapou maata te tuatau i roto i te au apinga kangakanga komupiuta e: “I etai taime me kua kangakanga ana au i mua ake i te aere anga ki runga i te angaanga orometua me kare ki tetai uipaanga Kerititiano, kua kite mai au e te ngata ra i te akarongo. Te akamanako ua ra au te maataanga o te taime e akapeea au e meitaki atu ei i te kanga i tetai apinga kangakanga me oki atu au ki te kainga. Kua kinokino taku uaorai apiianga pera te tatau putuputu i te Pipiria. Kua akamata toku mataora i te tavinianga i te Atua i te topa marie mai. I te kiteanga e ka umuumuia aia kia rave i tetai au tauianga, kua kiriti takiri pouroa aia i tana au apinga kangakanga komupiuta. “E ngata tikai te reira,” kua akamaara aia. “E maata atu toku pirianga ki te au apinga kangakanga e i taku i manako ei. Inara kua rauka katoa iaku i tetai manako ngakau maata no te autu anga no te mea kua kite mai au e kua rave au i te reira ei puapinga rai noku.”—Mata. 5:29, 30.
5. Akapeea tatou i te taporoporo marie anga i te tuatau no te au aruaruanga pae vaerua e akapeea tatou e puapingaia ai no te raveanga i te reira?
5 Penei ka inangaroia kia raveia te au ravenga me e ngai tetai te umuumuia ra koe kia akatanotano. Ka rauka ainei ia koe i te taporoporo marie e apa ora i te au ra mei te au angaanga kare e puapinga roa ana? Ko te maataia o te tuatau ia koe e tatau ra i te katoaanga o te Pipiria i roto i te mataiti. Mei teaa tikai te akameitakianga ta teia ka apai mai i te pae vaerua! (Sa. 19:7-11; 119:97-100) E akanoo papu i te tuatau no te tatauanga Pipiria, akateateamamaoanga no te uipaanga, e te angaanga orometua koro. (1 Kori. 15:58) Na te raveanga i teia ka tauturu ia koe i te akatere meitaki i te au apinga kaimoumou taime ra, e ka tauturu ia koe ‘kia kite i to te Atu ra anoano.’—Ephe. 5:17.