“Ko Iehova ta Kotou e Inangaro, e te Aronga Tapu Katoa Nona”

To Iesu Matenga kia Akamaaraia a te ra 4 o Aperira

¹ I te au mataiti i topa, ia Ukarania i raro i te tutaraanga Komuniti, kua akara matatio tikai te aronga mana i te au taeake​—i te vaitata anga mai tikai te ra o te Kaikai anga Aiai a te Atu—no te mea te manako ra ratou kia kiteaia to ratou ngai uipa anga. E riro ua ana rai teia ei manamanata, no te mea kua kite ua te aronga mana i te ra tei tamanakoia no te akamaaraanga. Eaa ra ta te au taeake ka rave? Te kainga o tetai tuaine kua ki te pia i raro roa ake i te vai. I te mea e kare te aronga mana e tapapa i te tangata kia putuputu mai ki reira, kua patu te au taeake i tetai paata ki runga ake i te vai tei taenaia te turi i te oonu. Noatu oki e ka noo ipuku aere ua ratou ki runga i te paata i raro ake i tetai auaro akaaka ua, kare roa e tangata i tamanamanata mai na ia ratou i te putuputuanga e akono ra i te Akamaaraanga ma te rekareka.

² Te manako akakoro papu o to tatou au taeake Ukarania kia akarongo i te akauenga i te akamaara i te matenga o Iesu e akatutuanga umere tikai no to ratou aroa no te Atua. (Luka 22:19; 1 Ioane 5:3) Me e ua ake e aro atu tatou i te au arairaianga i roto i to tatou oraanga, kia rave mai tatou i te akamaroiroianga mei taua au tu akaraanga ra e e akakoro rai kia tae i te akono i te Kaikai anga Aiai a te Atu a te ra 4 o Aperira. Na te pera anga, te akaari ra tatou e te ariki ra tatou i te au manako o te tata taramo ko tei imene e: “Ko Iehova ta kotou e inangaro, e te aronga tapu katoa nona e.”​—Sa. 31:23.

³ E Tauturu i Etai ke kia Tupu i Roto i te Aroa no te Atua: Ka akakeu katoa te aroa no te Atua ia tatou kia pati i etai ke kia akono i te akamaaraanga ma tatou. Te akamaroiroi maira te kapi o roto ake i Ta Tatou Angaanga Patireia o Peperuare ia tatou tataki tai kia maani i tetai papaanga o te aronga e parani ra tatou i te pati ki te Akamaaraanga. Te rave maroiroi ra ainei koe i te oronga atu i tetai patianga ki te au tangata ravarai i roto i taau papaanga? Akataka i tetai taime i te akamarama i te puapinga o te atianga kia ratou. Penei na tetai akamaaraaraanga ma te tu oaoa i te ra e te taime o te Akamaaraanga e, me ka tau, tetai patianga kia aru atu ia ratou e akamaroiroi ia ratou kia tae mai.

⁴ I ko i te ngai no te akonoanga, e rave i tetai tautaanga takake i te turou atu i te aronga tei ariki mai i ta tatou patianga, e te akono atu ia ratou kia noo ma te tau. Akapeea e rauka ai ia koe te tauturu ia ratou kia tupu i roto i to ratou aroa no Iehova? Kia puareinga uaorai koe i te pau atu i ta ratou au uianga. Kia papa ua i te oronga atu i tetai apiianga Pipiria me ka tau. E pati ia ratou kia tae mai ki ta tatou au uipaanga putuputuanga i te au epetoma. Te aronga pakari tikai kia akaari i te manako inangaro ki te au Kerititiano kare e maroiroi ana tei tae mai. Ka rauka ua kia akanoo ratou i te atoro atu i taua aronga ra e te akamaroiroi ia ratou kia akamata akaou i ta ratou angaanga ma te putuputuanga, penei e akamaata atu no runga i te au manako tei orongaia i roto i te akoanga o te Akamaaraanga.​—Roma 5:​6-8.

⁵ Akaoonu Anga i to Tatou Uaorai Aroa no Iehova: Te akamanako anga no runga i te apinga aroa o te oko ka riro ei akaoonu i to tatou aroa no Iehova e tana Tamaiti. (2 Kori. 5:​14, 15) Tetai Kite tei roa te tuatau i te tae ua anga ki te Akamaaraanga kua akakite e: “E tapapa ua ana rai matou i te Akamaaraanga. E riro ua ana rai te reira ei mea takake maata atu i te au mataiti ravarai. Maara iaku te tu ua anga i roto i te kainga tanumanga e 20 mataiti i topa akenei, te akara anga atu i toku papa akaperepereia e te arikianga ngakau tae tikai no te oko. I mua atu i te reira e tumu tuatua ua te reira no te kite manako. Ae, kua kite pouroa au i te au irava e ka akapeea me akamarama i te reira! Inara no toku kite ua anga i te tikaanga tikai o te mate i rere ei toku ngakau i te rekareka no runga i te ka rave akaopeia no tatou na roto i te oko akaperepereia.”​—Ioane 5:​28, 29.

⁶ I te ra o te akonoanga no teia mataiti e vaitata maira, e akataka i te taime i te akapapa i toou ngakau no te atianga. (2 Para. 19:3) E manakonako no runga i te tatauanga Pipiria takake no te Akamaaraanga, tei papaia i roto i te Examining the Scriptures Daily​—2004 e i runga i te 2004 Calendar. E reka ana tetai papaki i te akara akaou i te au pene 112-16 i roto i te puka Te Tangata Maata Rava Atu i te tuatau o ta ratou apii ngutuare. Tetai papaki e rave ana i te kimikimianga ke atu na te taangaanga anga i te au puka tauturu ke atu tei orongaia mai na roto i te pupu tavini akono meitaki e te pakari. (Mata. 24:​45-47) Kia akariro tatou pouroa i te apinga aroa o te oko ei tumu no te pure anga ma te ngakau tae. (Sa. 50:​14, 23) Ae, i teia tuatau o te Akamaaraanga, kia akaata ua atu rai tatou no runga i to Iehova aroa no tatou e te kimi i te au mataara i te akatutu i to tatou aroa nona.​—Mareko 12:30; 1 Ioane 4:10.